Karta Lilembile Yakobo
1 Miyo Yakobo, dhaari wa Nlungu na wa Mbwiye Yesu, ndinolembela maziza 12 amwadheile matatamo o-iyana-iyana:
Ndinaaumwenyulani!
2 Abalanga, musangalalenga maningi vanogumanana nyo vyowesedha vyo-iyana-iyana, 3 namwasa oi ninga munoidhiwela nyo, iroromelwinyu yakalave yolimba vanowesedhiwa nyo, munofunjedha kala ovilela. 4 Mbwenye murumele ira vilelao umari-e laba basalee, ira mukale okwakwanela na o-okaana yodawa va ikhundu iliyothene, venango ira mukaena makalelo othene apama.
5 Ee-no akala mutu mwinango unorambulela zelu, avephenga wa Nlungu thitho liye unodha m’va-a, namwasa oi liye unovelela modhala mandha waatu othene thitho unovelela mo-oumeleliwa.* 6 Mbwenye tavephenga na iroromelo, katikaikelenga navang’onovene, namwasa oi mutu unokaikela uli ninga mabimbi avabara oi anotukuleya na liphevo nobeluwanga. 7 Mutu oira e-no kadedi-edhele ira unowachela yongo khumela wa Yohova.* 8 Liye ngokaikela thitho vyoira vyee vyothene vinochinjachinja.
9 Bali onyozeya asangalale namwasa oi utolemeziwa na Nlungu, 10 thitho mutu ofuma asangalale namwasa oi utofunjedha kala odhiyevi-a, namwasa oi mutu ofuma unofwanafwana na folori la-angani, moi liye unodha nyala. 11 Dhuwa lakhuma linoka-a maningi nonyali-a vyomela thitho mafolori avyomelavyo anokhodhowa moi baleya wee unomala. Mofwanafwana na vyevi mutu ofumuo unodhakwa angali wari mosakanga kobiri.
12 Osangalala ngu mutu oi unovilela vyowesedha namwasa oi adharumeli-iwa, unodhawachela yotuva ya ingumi yalanyedhile Yohova* waatu othene anodhowanave m’dhiveliwana. 13 Mutu awesedhiwanga kaongenga ira: “Nlungu unaandiwesedha.” Namwasa oi Nlungu kanowesedhiwa na vyongo vyothakala thitho liye kanowesedha mutu na vyongo vyothakala. 14 Mbwenye mutu uliwethene unowesedhiwa nokopeya na naluveluvee nomangeya ninga go-i. 15 Moi e-no naluveluve waulukhula, unobala vyodawa. Thitho yodawa yaireya, inodhi-a wukwa.
16 Abalanga odhiveliwiwa, kamudimeli-iwe. 17 Yotuva iliyothene yapama na yochena inokhumela dhulu. Inothitha khumela wa Baba wa vyomoneela vyadhulu oi kanochinja ninga ruthi oi unosusasusa. 18 Mofuna wee, liye atoonibala varoromele i-yo madhwee oi ndiimbarimbari. Atooirana vyevi ira nikale vyova-a vyoroma va vyopandhuchiwa vyee.
19 Abalanga odhiveliwiwa, mwiidhiwe vi: Mutu uliwethene akalenga okozeya vuruwana, aromenga thuulela a-anaonge thitho kambaranyi-edhenga thakaleliwa, 20 namwasa oi mutu unothakaleliwa kanoira vyongo movwelana na longomano la Nlungu. 21 Ee-no mu-iye kalelo nlilothene lonyakavala thitho mukhumi-e vyothakala vilivyothene vi-alele mwa nyo. Modhiyevi-a murumele ira madhu anaode uvulumuchani adhaliwe mwa nyo.
22 Mbwenye muirengana vinoonga madhu, a-kala ira uvwa baa-i, nodhinami-anga na mathuulelo onama. 23 Namwasa oi akala mutu unaauvwa madhu baa-i mbwenye a-irana, unofwanafwana na mutu unodhiing’anela khovee va supeyoni. 24 Liye unodhiing’ana nokhumavo thitho hora yeniyene unodiwala ira ndi mutu oi a-vi. 25 Mbwenye mutu unoing’anechecha lamulo lolongomana lelo linodhi-a ufulu thitho unodhowanave liing’anechecha, unodhakala osangalala na vinoirana liye namwasa oi kai mutu oi uteuvwa nodiwala, mbwenye unoirana vivwide liyevyo.
26 Akala mutu unothuulela ira unolambela Nlungu, mbwenye a-odanga tonga lumilee, unaadhinami-a thitho lambela wee ko-okaana basa. 27 Lambela ochena thitho o-othakali-iwa wa Nlungu na Babi-u kuwu: Samalela a-ima amakwele na a-iyana amakwele oi anogumanana nyarwa thitho rambela ira ilamboi ya-auiri-eni kaana idoli.