Loroma Lilembile Juwau

1 Ndinoulembelani vyokhuza wenuo alivo romela vamaromelo, oi unodhi-a madhu ova-a ingumi, wenuo wam’vwide i-yo nom’mona na methwi-u, oi natoom’mwing’anechecha nom’samela na mandhi-u. 2 (I-yo nitoona thitho ninoirela umboni nouwandelani vya ingumi yo-omala yaoni-iwile i-yo khumela wa Baba.) 3 I-yo ninouwandelani vioni i-yo nouvwa, ira nyo thitho mukale ovwelana na i-yo. Thitho i-yo nili ovwelana na Baba na Mwanee Yesu Kristu. 4 Ee-no ninolemba vyevi naifunelo yoi nikale osangalala maningi.

5 Ila ndimilanyu yavwide i-yo khumela wa liye thitho ninoilaleela wa nyo ira: Nlungu ndi njeza thitho wa liye kauli isi navang’onovene. 6 Akala ninoonga ira, “Nili ovwelana na liye,” mbwenye ninodhowanave wenda muisini kuongela ira ninaanama thitho kaninoira vyongo movwelana na imbarimbari. 7 Mbwenye akala ninowenda mu njeza mofwanafwana na muli liye njeza, kuongela ira nili ovwelana thitho sangiri ya Yesu oi ndi Mwanee, inaanicheni-a wu vyodawa vyothene.

8 Naonganga ira, “Kanina vyodawa,” kuongela ira ninaadhinami-a thitho rimani mwi-u kamuli imbarimbari. 9 Nlungu ngororomeleya thitho olongomana, ee-no narumela vyodawa vi-u liye unodha nilevelela nonicheni-a wu mabasa othene othakala. 10 Naonganga ira, “Kanidawile,” vili ninga ninoonga ira Nlungu ngonama, thitho rimani mwi-u kamuli madhwee.