Ilembile Mateu
4 Moi e-no zimu watoom’sogolela Yesu dhowa kokolani thitho weo atoowesedhiwa na Namanami-a. 2 Angamadhi malambo 40 thana nama-iyu a-dya,* atokaana ndhala. 3 Moi e-no Namanami-uwo atoodha nom’mwandela ira: “Akala uli mwana Nlungu, usanduche mabwala ira akale mapau.” 4 Mbwenye liye atom’mwakula ira: “Malemba anoonga ira: ‘Mutu kanakaena ingumi namwasa wa yodya baa-i, mbwenye na madhu othene okhumela valomoni va Yohova.’”*
5 Moi e-no Namanami-a atoom’tukula nom’dhowanee mu sidadi lochena, thitho atoom’gweli-a vadhulu va chi-i la panda wa kachisi,* 6 nom’mwandela ira: “Akala uli mwana Nlungu udhiponyedhe vathi, voi malemba anoonga ira: ‘Liye unodha wandela angelwee vyoonga we,’ thitho anoonga ira, ‘tanodha ugeta mandhani mwiwa, ira nyalolaa la-akhome libwe.’” 7 Mbwenye Yesu atoom’mwakhula ira: “Malemba anoonga thitho ira: ‘Yohova* Nlungwinyu kamum’mwesedhe.’”
8 Moi e-no Namanami-a atoom’tukula thitho m’dhowana va mwangoni olapa maningi nom’moni-a maumwene othene availambo yavathi na titimi-o liwa. 9 Na-eno atoom’mwandela ira: “Ndinouva-a vyongo vyothene vyevi wandikokorela fendo imbo-i baa-i nondilambela.” 10 Mbwenye Yesu atoom’mwakhula ira: “Khumavo vano Satana! Namwasa oi malemba anoonga ira: ‘Yohova* Nlungwaa ngunofwanela we m’lambela thitho unofwanela m’labelanga liye baa-i.’” 11 Moi ee-no Namanami-ule atoo-iya thitho watoodha angelo dham’limbi-a.
12 Moi e-no Yesu angavwide ira Juwau utofungeliwa perezo, atookhumao weo nodhowa wu Galileya. 13 Moi ee-no angakhumile wu Nazareti atofiya wu Kafarnau makala chereerani mwa i-nje visa vya Zebuloni na Nafitali, 14 ira madhu aongile Nlungu dhela mwa namaongela Esaya akwakwaneli-edhiwe. Liye aongile ira: 15 “Atu anokala ilambo ya Zebuloni na ilambo ya Nafitali, khundu mwa ndhila yodhowa bara khombela n’nango ya Yordani, wu Galileya wakalecha atu a mitundu inango. 16 Atu takalecha isini tatoona njeza ilukhulu, thitho atu takalecha isa ya ruthi wa wukwa, tatoomoneiwa na njeza.” 17 Romela hora yeniyo, Yesu atooroma laleela ira: “Muchinyuwe, namwasa oi Umwene wadhulu, uli duzi.”
18 Vahora yawenda liye chereerani mwa bara la Galileya, Yesu atoona alombwana ambili muubalini mwiwa taponyedhanga kokota ophana somba barani. Aliwa tali anamameza thitho madhiniwa tali Simoni oitaniwa Pedru na Andreya. 19 Liye atoawandela ira: “Mundi-arele thitho ndinousanduchani kala alimbo meza atu.” 20 Hora yeniyene aliwa tatoo-iya makokotiwa nom’arela. 21 Angakwaranyile vevo, atoona thitho alombwana ambili muubalini mwiwa, Yakobo mwana Zebedeyo na balee Juwau. Aliwa tali mwadiyani vambo-i na babiwa Zebedeyo tasonanga makokotiwa, thitho liye atoaitana. 22 Hora yeniyene tatoo-iyedhela mwadiyule babiwa, nom’arela.
23 Angairile e-no, atoowenda mu Galileya mwethene thitho anoofunji-a masinagoga mwiwa, anoolaleela milanyu yapama ya Umwene noili-a tundu wa marenda othene abulela atu. 24 E-no limbililee latoovweya mu ilambo yothene ya Siriya. Atu tanom’dhelana atu othene abulela marenda o-iyana-iyana thitho avwa upha manungo, aoni-iwa nyarwa na viwanda, ogwa injilenjile naatu okwa vyano mbwenye liye atoaili-a. 25 Ee-no atu anjinji okhumela wu Galileya, wu Dekapoli,* wu Yerusalemu, wu Yudeya thitho kombela n’nango la Yordani, tatoom’arela.