Loroma Lilembile Juwau
4 Abalanga odhiveliwiwa, kamuroromele madhu aliothene ovudheleliwa,* mbwenye musakesake madhu ovudheleliwao* ira muone akala mbokhumeladi wa Nlungu, namwasa oi anamaongela anjinji onama atoroma fwanyeya muilamboi.
2 Ira niidhiwe akala madhu ovudheleliwa mbokhumela wa Nlungu, ninoaidhiwa namwasa wa vi: Madhu aliothene ovudheleliwa anorumela vyoi Yesu Kristu atoodha ninga mutu, mbokhumela wa Nlungu. 3 Mbwenye madhu aliothene ovudheleliwa anoruni-a vyoi Yesu atoodha ninga mutu, madhu enao kai okhumela wa Nlungu. Madhu enao mbovudheleliwa na amwidani a kristu, avwidenyo ira amwidani a kristwao anodha aonga thitho va-eeni anaaongadi muilamboi.
4 A-imanga odhiveliwiwa, nyo muli okhumela wa Nlungu, thitho mutogonji-a anamaongela onamao. Vili ee-no namwasa oi wenuo uli ovwelana nanyo ndi nlukhulu kwaranya wenuo uli ovwelana na ilambo. 5 Anamaongela onamala mbokhumela muilamboi, ngumwasee anoonga vyongo vyovwelana na ilamboi thitho ilambo inoavwela. 6 I-yo nakhumele wa Nlungu. Mutu unom’mwidhiwa Nlungu unonivwela, mbwenye mutu ukhondile a-khumela wa Nlungu kanonivwela. Mwemu ndi munoidhiwela i-yo ira madhu ovudheleliwala mbaimbarimbari venango mbonama.
7 Abali odhiveliwiwa dhoweni nidhowenave dhivelana, namwasa oi udhivela unokhumela wa Nlungu. Mutu uliwethene unodhiveliwana atu enango, ndi mwana Nlungu thitho unom’mwidhiwa Nlungu. 8 Mutu unokonda a-dhiveliwana atu enango kanom’mwidhiwa Nlungu, namwasa oi Nlungu ndi udhivela. 9 Vyongo vyairile Nlungu vonithonyi-edha udhivelee ndi vi: Atoom’ruma Mwanee obaliwa ekhene muilamboi ira nidhakaena ingumi yo-omala dhela mwa liye. 10 Nlungu atoom’ruma Mwanee ninga sembe yokhunela vyodawa vi-u.* Atooirana vyevi namwasa onidhiveliwana, a-kala namwasa oi i-yo ngwam’dhiveliwilena.
11 Abali odhiveliwiwa, akala Nlungu atoonidhiveliwana mwandhila yen’na, kuongela ira na-iyene thitho ninofwanela dhivelana. 12 Kavali aromilevo m’mona Nlungu. Nadhowanave dhivelana, Nlungu unodhowanave kala na i-yo thitho unongonithonyi-edha udhivelee mokwakwanela. 13 Ninoidhiwa ira nili ovwelana na liye thitho liye ngovwelana na i-yo namwasa oi utoniva-a zimwee. 14 Thitho i-yo nitoona moi ninoirela umboni ira Baba atoom’ruma Mwanee ira akale namavulumucha wa ilambo. 15 Mutu uliwethene unorumela ira Yesu Kristu ndi Mwana Nlungu, unokalave ovwelana na Nlungu thitho Nlungu unokala ovwelana na liye. 16 I-yo ninoidhiwa thitho ninororomela ira Nlungu unonidhiveliwana.
Nlungu ndi udhivela, thitho mutu unodhowanave thonyi-edha udhivela, unokalave ovwelana na Nlungu moi Nlungu unokala ovwelana na liye. 17 Ngumwasee i-yo ninothonyi-edha udhivela mokwakwanela ira nidhaode onga mothathuwa vadambo lotongiwa, namwasa oi moda muli Yesu Kristu, ndi mwemo thitho moda uli i-yo muilamboi. 18 Ova unoniiri-a kala omangeya. Mbwenye mutu unodhiveliwana Nlungu kanoova, namwasa oi udhivela okwakwanela unomali-a ova. Mutu unoova, udhivelee kai okwakwanela. 19 I-yo ninothonyi-edha udhivela, namwasa oi Nlungu ngwaromile nidhiveliwana.
20 Akala mutu mwinango unoonga ira, “Ndinodhiveliwana Nlungu,” mbwenye unoidanana balee, kuongela ira mutu wenuo ngonama. Namwasa oi mutu oi kanom’dhiveliwana balee unom’mona liye, kanam’dhiveliwena Nlungu oi kanarome m’monavo. 21 Thitho liye atooniva-a lamulo loi, mutu unom’dhiveliwana Nlungu am’dhiveliwengana thitho balee.