Karta Lilembile Yakobo
2 Abalanga, n’nga munothuulela ira munororomela Mbwii-u Yesu Kristu, oi ngwa titimi-o vanoira nyo vyasakulo? 2 N’nga mutu uwarile pete dha oro na vyowara vyodula afiya va migumanwinyu, amala mutu mwinango thitho osauwa uwarile vyowara vyothakala afiya, 3 munosangalala na mutu uwarile vyowara vyodulule nom’mwandela ira, “Ukaathi va limburo lapamali” mbwenye osawauule nom’mwandela ira, “We uimele e-no,” venango, “Ukaathi vathi duzi na vano-ela miyo manyalwanga”? 4 N’nga mwairangana vyevi, kamunothonyi-edha ira muli atu asakulo vari vinyu? N’nga veva kamunokala ninga muli anamatonga anotonga mothakala?
5 Kavuruwanani abalanga odhiveliwiwa. N’nga Nlungu kasakunle atu oi ilamboi inoaona kala atu osauwa ira takale ofuma muiroromelo thitho ira takale ofwanelela va-iwa Umwene walanyedhile Nlungu waatu anom’dhiveliwana? 6 Mbwenye nyo kamunolemeza atu osauwa. N’nga kai atu ofuma anouoni-echani nyarwa noudhowanani wu mamburo otongela miselu? 7 N’nga kai enao thitho anonyoza dhina lapama maningi lava-iwile nyo? 8 Mbwenye akala muno-arela lamulo la umwene loi, “Um’dhiveliwengana fwaa ninga munodhidhiveliwana we wekhene,” ninga munoongela lemba, munoira pama. 9 Mbwenye mwadhowanave kala asakulo, munaadawa thitho lamulo linooni-elatu ira muli odawa.
10 Mutu uliwethene unovwela Ilamulo adawi-a yongo imbo-i, kuongela ira utodawela ilamulo yothene. 11 Namwasa oi aongile ira, “Kamuraruwe,” aongile thitho ira, “Kamuphe mutu.” Moi akala we kuraruwile mbwenye utopha mutu, kuongela ira utodawela ilamulo. 12 Muongenga noirana vyongo ninga atu oi anodhatongiwa na ilamulo yaatu oi ali vaufulu.* 13 Namwasa oi mutu oi kanothonyi-edha tangaranga unodha tongiwa mo-ovweliwa tangaranga. Tangaranga njiilukhulu kwaranya tongiwa.
14 Abalanga, n’nga vali ganyali oi a-vi akala mutu mwinango unoonga ira utokaana iroromelo mbwenye a-irana mabasee? N’nga iroromelo yeyo inodham’vulumucha? 15 Akala abali venango arongola katina vyowara* venango vyodya vyokwakwanela vadambo lelo, 16 amala mutu mwinango wa nyo awandela ira, “Muwende pama, mufwanye vyowara na vyodya vya dambo nlilothene,” mbwenye liye aam’va-a vinofuneela aliwavyo ira takaena ingumi, n’nga vyevyo vinoakami-a? 17 Ndi saasawa thitho na iroromelo vaokhene, akala kina mabasee, ndi yokwa.
18 Mbwenye mwinango unooda onga ira: “We utokaana iroromelo, mbwenye miyo nditokaana mabasee. Undioni-e iroromelwaa vo-okala mabasee, thitho miyo ndinouoni-a iroromelwanga dhela mu mabasanga.” 19 Unororomela ira uli Nlungu m’mbo-i, kai e-no? Unoira pama. Mbwenye viwanda naaliwene thitho vinororomela nongurumela. 20 We o-oidhiwa ilo, n’nga kunoidhiwa ira iroromelo yo-okaana mabasee cho-okaana basa? 21 N’nga Abrahamu babi-u kaoniwile kala olongomana namwasa wa mabasee, angavelenle mwanee Izaki sembe vaiguwani? 22 Pyooneelatu ira iroromelwee yawendile vambo-i na mabasee, thitho mabaseao atooiri-a ira iororomelweeyo ikale yolongomana. 23 Ee-no lemba latookwakwaneli-edhiwa linoonga ira: “Abrahamu atoororomela vyam’mwandele Yohova* thitho anooniwa ira ngolongomana,” ee-no anooidhiweya ira ndi xamwali wa Yohova.*
24 Mutoonelatu ira mutu unooniwa ira ngolongomana namwasa wa mabasee, a-kala namwasa wa iroromelo baa-i. 25 Mofwanafwana na vyevi n’nga Rahabi putanle, kaaoniwile ira ngolongomana namwasa wa mabasee, angawachele pama atu tazondela ilambwiwa noakami-a ira tatawe dhela ndhila inango? 26 Mwaimbarimbaridi tutu lo-okaana zimu* linokala lokwa, mofwanafwana na vyevi naaliwene iroromelo yo-okaana mabasee ndi yokwa.