Laneraru Lilembile Juwau
1 Miyo ninga mutu oulula,* ndinolembela balanga odhiveliwiwa Gayo, oi ndinom’dhiveliwana maningi.
2 Odhiveliwiwa bali, ndinoulobelela ira vyongo vyothene vidhowenave uwendela pama thitho ira ukaena ingumi yapama ninga muli aliwa va-eni. 3 Ndatoosangalala maningi abali tangadhidhe dhandiwandela vyaimbarimbari ili mwa we, vanodhowanave we wenda muimbarimbari. 4 Kavali yongo inondisangalali-a maningi* kwaranya uvwa ira a-imanga anadhowanave wenda muimbarimbari.
5 Odhiveliwiwa bali, unothonyi-edha ira uli ororomeleya vayongo iliyothene inoairela we abali, masiki ale oi kunoaidhiwa navang’onovene. 6 Abalala atowandela pingo vya udhivelaa. Atu ninga enala takhumanga, udhilimbi-edhenga akami-a mundhila iliyothene inosangalalana Nlungu, 7 namwasa oi tatoodhowa malaleela vya dhina la Nlungu, moi katadedi-edhela wachela yongo iliyothene khumela waatu amaziza enango. 8 Ee-no, ndi izo yi-u awachela pama atu enala noawaredhi-a, ira takale anamalaba afwi-u volaleela imbarimbari.
9 Pingwinyu ndatoulembela karta, mbwenye Diotrife oi unodhiveliwana kala oroma vari vinyu, kanolemeza yongo iliyothene iongile i-yo. 10 Ngumwasee ndadhafiya weo, ndinodha onga vakwecha vyongo vinoira liye voonga vyonama vyokhuza i-yo. Thitho namwasa o-okwakwana na vyevi, unokonda wachela abali mwalemezo. Thitho atu anofuna awachela abalao, liye unodhilimbi-edha akondi-a noakhumi-a pingoni.
11 Odhiveliwiwa bali, kusazi-edhenga atu anoirana vyongo vyothakala, malomwee usazi-edhenga atu anoirana vyongo vyapama. Atu anoirana vyongo vyapama anosogoleliwa na mathuulelo a Nlungu. Mbwenye atu anoirana vyongo vyothakala katinom’mwidhiwa Nlungu. 12 Atu othene takanle tam’mwirelanga umboni Demetriyo. Thitho vyoiravyee vyovwelana na imbarimbari vinaam’mwirela umboni. I-yo thitho ninom’mwirela umboni, thitho unoidhiwa ira umboni unovelela i-yo ngwaimbarimbari.
13 Nditokaana vyongo vinjinji vyoi ndiuwandele, mbwenye kandinofuna ira ndidhowenave ulembela vyongo vyevi vakartani. 14 Mbwenye ndinothuulela ira ninoonana chineneeva thitho ninodha tapanya kove nakove.
Rendele ukale nawe.
Abali a wuno anaaumwenyula. We thitho uvelele mwenyula wanga waabali a weo uliwethene vaekhene.