Loroma Lilembile Juwau
3 Muthuulele vyaudhivela ulukhulu wanithonyi-edhe Baba voniromola ira a-imee. Thitho nilidi a-imee. Ngumwasee ilambo* kinoniidhiwa, voi liye thitho kinom’mwidhiwa. 2 Odhiveliwiwa abali, va-eeni nili a-ima a Nlungu, mbwenye ee-ni kavinaidhiweyeve ira ninodha kala oi a-vi. Nitoidhiwa ira adhaoneela, ninodha kala ninga liye namwasa oi ninodham’mona moda uli liye. 3 Thitho mutu uliwethene unodedi-edhela vyongo vyevi khumela wa liye, unodhicheni-a namwasa oi liye thitho ngochena.
4 Mutu uliwethene una ilemeelo yodawa unaaira vyongo vyo-ovwelana na malamulo, namwasa oi dawa ndi a-vwela malamulo. 5 Nyo mutoidhiwa thitho ira liye atoodha ira adhamali-e vyodawa vi-u thitho mwa liye kamuli yodawa. 6 Mutu uliwethene uli ovwelana na Yesu kanokaana ilemeelo yodawa, namwasa oi mutu uliwethene una ilemeelo yodawa kuongela ira kanom’roromela venango m’mwidhiwa. 7 A-imanga odhiveliwiwa, mutu mwinango kaudimeli-eni. Mutu unoirana longomano ngolongomana ninga moda muli Yesu. 8 Mutu una ilemeelo yodawa unosazi-edha Namanami-a, namwasa oi Namanami-a ukanle adawanga romela vamaromelo.* Ngumwasee Mwana Nlungu atooneela ira anonge mabasa a Namanami-a.
9 Mutu uliwethene oi ndi mwana Nlungu kanokaana ilemeelo yodawa, namwasa oi utokaana zimu wa Nlungu. Thitho kanakaena ilemeelo yodawa, namwasa oi ndi mwana Nlungu. 10 A-ima a Nlungu na a-ima a Namanami-a ninooda aidhiwa na likhundo nli: Mutu uliwethene unokonda a-ira vyolongomana kanosazi-edha Nlungu, saasawa thitho na mutu unokonda a-dhiveliwana balee. 11 Namwasa oi milanyu yavwide nyo voroma njoi, nidhivelengana. 12 Kanikale ninga Kaini, oi anoosazi-edha othakaluo thitho atoom’pha balee. N’nga mwasiwa ngwan’ni atoom’pha balee? Namwasa oi vyoiravyee vyali vyothakala, mbwenye vya balee vyali vyolongomana.
13 Abali, kamudabwe ira ilambo inaauidanani. 14 Ninoidhiwa ira nali ninga atu okwa, mbwenye va-eeni nili aingumi namwasa oi ninodhiveliwana abali-u. Mutu unokonda a-dhiveliwana balee kuongela ira ulive okwa. 15 Mutu uliwethene unoidanana balee ngopha mutu, thitho munoidhiwa ira mutu uliwethene opha mutu kanodha kaana ingumi yo-omala. 16 Nitoidhiwa udhivela namwasa oi Yesu Kristu atoovelela ingumiyee namwasa wa i-yo, thitho na-iyene ninofwanela velela vingumi vi-u namwasa waabali-u. 17 Mutu uliwethene una vyongo vyofuneeleya vaingumi amala liye m’mona balee aonanga nyarwa namwasa orambulela vyongovyo, mbwenye liye am’thonyi-edha tangaranga, n’nga mutu wen’na unom’dhiveliwana Nlungu? 18 A-imanga odhiveliwiwa, kanidhivelane na madhu baa-i venango na lomo baa-i, mbwenye nithonyi-edhengana udhivela waimbarimbari khumela muvyoira vi-u.
19 Nairangana vyongo vyevi ninodha thonyi-edha ira nino-arela makhundo aimbarimbari. Thitho ninodha simikizela mirimani mwi-u ira Nlungu kanoniomba landu 20 vayongo iliyothene inaruni-e mirimi-u, namwasa oi Nlungu ndi nlukhulu kwaranya mirimi-u thitho unoidhiwa vyongo vyothene. 21 Abali odhiveliwiwa, akala mirimi-u kinoniruni-a, ninooda onga na Nlungu mothathuwa. 22 Thitho yongo iliyothene inam’vephe i-yo unodha niva-a, namwasa oi ninovwela malamulwee thitho ninoirana vyongo vyom’sangalali-a. 23 Lamulo laniva-idhe liye toi, nikaena iroromelo mudhina la Mwanee Yesu Kristu nodhivelangana, ninga mwanitongile liye. 24 Thitho, mutu unovwela malamulwee unokala ovwelana na liye moi liye thitho unokala ovwelana na mutuo. Thitho namwasa wa zimu waniva-idhe liye, ninoidhiwa ira nili ovwelana na liye.