Ilembile Mateu
9 Ee-no Yesu atoogwela mwadiya novandelela khombela n’nango, thitho atoodhowa sidadi wakalecha liye. 2 Angali weo atu tatoom’dhelana mutu okwa vyano angagonathidhe vakandalani.* Yesu angaoni iroromelo iwa, atoowandela mutu wokwa vyanuo ira: “Ulimbe rima mwanawe! Vyodawavyaa vitoleveleliwa.” 3 Angairile e-no, Alembi enango tanoonga rimani mwiwa ira: “Mutu wen’na unaam’nyoza Nlungu.” 4 Mbwenye Yesu atoozindiyela vyathuulela aliwa thitho atoafuka ira: “N’nga mwasiwa ngwan’ni munothuulela vyongo vyothakala rimanimwinyu? 5 Mofwanafwani-a, yo-orucha chini, kuonga ira ‘Vyodawavyaa vitoleveleliwa,’ venango onga ira, ‘Venyathi uwende’? 6 Dedi-ani ndiuoni-eni ira Mwana mutu utokaana kopolo vailambo yavathi dholevelela vyodawa . . .” moi e-no liye atoom’mwandela mutu okwa vyanule ira: “Venyathi utukule kandalaa thitho udhowenga waninyu.” 7 Thitho atoovenyathi nodhowanga waniwa. 8 Mwinji waatuo ungaoni vyevyo, watoova thitho watootitimi-a Nlungu avelenle kopolo dhedho waatu.
9 Angakhumile vevo, Yesu atoona mutu mwinango dhinalee Mateu angakaathidhe skritorioni mokhomela misoko, thitho atoom’mwandela ira: “Ukale nama-arelanga.” Hora yeniyene Mateu atoovenyathi nom’arela. 10 Hora inango vyadya aliwa vanyumba inango, watoodha atu anjinji okhomi-a misoko na odawa thitho tatooroma udya vambo-i na Yesu naanamafunjedhee. 11 Mbwenye Afarisi tangaoni vyevyo tatoafuka anamafunjedhee ira: “Mwasiwa ngwan’ni namafunji-inyu unodya naatu okhomi-a misoko vambo-i naatu odawa?” 12 Liye angavwide vyevyo, atoawakhula ira: “Atu apama katinofuneela firimero, mbwenye obulela mbanom’funa. 13 Ee-no mudhowe mumafunjedhe inothapulela madhu oi: ‘Ndinofuna tangaranga, a-kala sembe.’ Namwasa oi miyo kandidhele atu olongomana mbwenye odawa.”
14 Moi e-no anamafunjedha a Juwau tatoodha wa liye nom’fuka ira: “Mwasiwa ngwan’ni i-yo vambo-i na Afarisi ninosala udya mbwenye anamafunjedhinyu katinosala udya?” 15 Yesu atoawakhula ira: “N’nga afwee anamathela tanosukwala akala ira namatheluo uli vambo-i naaliwa? Mbwenye malambo anofiya oi namatheluo, unodha khumi-iwavo vari viwa thitho vahoriyo tanodha sala udya. 16 Kavali mutu unosonela ichapa ya nguwo ipya va nguwo yawale. Namwasa oi ichapiyo inooda kaula nguwiyo thitho kauwawo unooda wenjedheleya maningi. 17 Thitho atu katino-ela vinyu m’pya mabudu a tembe* awale. Tairana vyevyo mabudu atembeao tanotweya thitho vinyu unobomeya moi mabudwao tanonongeya. Mbwenye atu tano-ela vinyu m’pya mabudu a tembe mapya thitho vilivyene vinolokoteya pama.”
18 Vahora yaawandela liye vyevi, namatonga mwinango atoom’kwivela, moi ee-no atoom’kokorela noonga ira: “Va-eni apwase mwananga wa i-yana utokwa namwasa oi ndi-iidhe abulelanga maningi. Mbwenye dhoweni mumam’sameli-e dhandha linyu thitho unokaana ingumi.”
19 Ee-no Yesu atoovenyathi na anamafunjedhee nom’arela. 20 Moi ee-no i-yana mwinango abulela marenda okhumi-a sangiri wa vyawa 12, atoodha no-inda usalu wa khundu mwa nguwee yaundhe, 21 namwasa oi rimanimwee athuulela ira: “Nda-inda nguwee yaundhe baa-i, ndinoila.” 22 Yesu angadhimbinuile atoom’mona i-yanuo noonga ira: “Mwanawe, limba rima! Iroromeloyaa itouili-a.” Khumela vahora yeniyo i-yanuo atooila.
23 Moi e-no angavolowile m’mba mwa namatongule, atoona atu tali-anga vitoliro thitho mwinji waatu ulanga mokhuwa. 24 Yesu atoawandela ira: “Khumanimo muno, namwasa oi sikan’na kakwide, mbwenye unaagona.” Angaongile vyevi, atwao tatooroma m’theya monyoza. 25 Yesu angaakhumi-idhe vandhe atwale, atoovolowa no-inda dhandha la sikanuo, thitho liye atoovenyathi. 26 Mwasa wen’na watoovweya isa yothene yeyo.
27 Yesu akhumelanga weo, alombwana ambili an’na marenda o-oona tatoom’arela takhuwanga ira: “Munivwele tangaranga, nyo Mwana Davide.” 28 Yesu angavolowile m’mba alombwana an’na marenda o-oonale tatoodha wa liye, thitho liye atoafuka ira: “N’nga munororomela ira miyo ndinooda irana vyevi?” Aliwa tatoom’mwakhula ira: “Ee Mbwiyeni.” 29 Moi e-no Yesu atoa-inda muthonimwiwa, noonga ira: “Vinofuna nyoovyo viireye movwelana na iroromelwinyu.” 30 Methwiwa tatoodhuleya thitho Yesu atoawenjeli-a mwakopolo ira: “Muire polepole ira mutu uliwethene a-aviidhiwe vyevi.” 31 Mbwenye aliwa tangakhumile undhe, tanoonga isa yothene vyokhuza liye.
32 Vahora yadhowa alombwana ambilalee, atu tatoom’dhelana mutu o-oonga oi aoni-iwa nyarwa na iwanda. 33 Angakhumi-idhe iwandayo, mutu o-oongule atooroma onga. Moi mwinji waatu watoodabwa thitho watooroma onga ira: “Vyongo vyevi kavinarome ireyavo mu Israeli mwethene.” 34 Mbwenye Afarisi taonga ira: “Mutu wen’na unokhumi-a viwanda na kopolo ya namatonga wa viwanda.”
35 Moi e-no Yesu atooroma ulendo owendela masidadi na mamidhi othene. Liye anoofunji-a masinagoga mwiwa nolaleela milanyu yapama ya Umwene thitho anooili-a marenda a tundu uliwethene abulela atu. 36 Angaoni mwinji waatu, liye atoavwela tangaranga namwasa oi tali onyozeya thitho o-okaana namasogolela ninga mabila o-okaana namakumbiza. 37 Moi e-no atoawandela anamafunjedhee ira: “Ee vatokala vyongo vinjinji vinofuna a-ndiwa, mbwenye anamalaba mboyeva. 38 Ee-no mum’vephe Mwinyaa munda ira arume anamalaba o-anda.”