Yesu atoovenyathi-iwa

Yesu angakwide, mutu mwinango wafuma dhinalee Yosefi, atoodhowa wa Pilato mavepha manungo a Yesu ira amaalokote masiyeni. Yosefi atoodholi-a makhura manungo a Yesu nowabilinga na nguo yapama maningi. Ee-no atoom’lokota masiyeni oira sema. Adhamale tatoopingiricha libwe nlukhulu nofungana lango wa masiyao. Andimuwa asembe tatoomwandela Pilato ira: ‘Ninothuulela ira anamafunjedha a Yesu anodhowa maba manungo a Yesu noonganga ira utovenyathi-iwa. Liye atoawandela ira: ‘Dhowani mumafungevo maningi vamasiyenivo thitho mu-iyeo alimbo ing’anela.’

Vangavirile malambo mararu, a-iyana enango tatoobe-a masiyenio mbwenye tafwaidhe ira libwenle litokhumi-iwao. Masiyenimo mwali ngelo thitho liye atoonga ira: ‘Kamuove. Yesu utovenyathi-iwamo. Dhowani mumawandele anamafunjedhee ira tamagumane wu Galileya.’

Mariya Madalena atootamanga dhowa mamwandela Pedru na Juwau ira: ‘Manungo a Yesu atobiwa.’ Tangadhowile masiyenio tafwaidhe ira masiyenimo Kamuli manungo a Yesu thitho tatoowelela mudhi.

Mariya angawelele masiyenio atoona angelo ambili tangali masiyenimo thitho atoafuka ira: ‘N’nga mbwiye mum’dena wani?’ Ee-no angaoni mutu mwinango athuulela ira ngwaing’anela masiyao. Atoom’mwandela ira: ‘Baba akala ngunyo ukumi-idhemo mbwiye, ndiwandeleni unlokotile nyo.’ Mutuo atoom’mwitana ira: “Mariya!” Moi ee-no Mariya atoozindiyela ira ali Yesu. Ee-no atookhuwa ira: “Namafunji-a.” Thitho atoom’inda. Yesu atoom’mwandela ira: ‘Dhowa umawandele abalanga ira utondiona.’ Vahora yeniyo Mariya atoodhowa maawandela anamafunjedhee ira utom’mona Yesu.

Namaulo adambo lelo, anamafunjedhee ambili tawendanga khumela wu Yerusalemu tatoovirana wu Emau. Ee-no mutu mwinango atooroma wenda naaliwa thitho afukanga vyaonga aliwa. Aliwa tatoonga ira: ‘Weyo khuvwide-i? Malambo mararu avirilala, alimbo velela sembe naandimuwa tatoom’pha Yesu. Ee-no a-iyana enango anoonga ira utokaana ingumi. Mutuo atoafuka ira: ‘N’nga nyo kamunororomela vyalembile anamaongela? Vale taongile ira Kristu unodhakwa thitho unodha venyathi-iwa.’ Mutuo atoonga malemba o-iyana-iyana. Angafiile wu Emau, anamafunjedhao tatoom’vepha ira tadhowe vambo-i na liye waniwa. Vahora ya yodya yanamaulo, mutuo atooroma lobela thitho tatoozindiyela ira ali Yesu. Adhamale atoodimela.

Vahora yeniyo anamafunjedha tatoodhowa wu Yerusalemu thitho tatoovolowa m’mba mwemo mwali arumiwi. Weo tatoonga vyongo vyaireile. Tangali m’mbamo Yesu atookhumelela. Voroma arumiwao kataroromela ira ngu Yesu. Mbenye liye atoawandela ira: ‘Khaonani mandhangala ndi-indeni ira musikimizele. Vale malemba tatoongelatu ira Kristu unodha venyathi-iwa.’