Mukalenga okozeya funjedha vyongo vipya

Mwakozeelanga funjedha mudhifukenga ira “N’nga ndinodedi-edhela funjedhan’ni? Masiki muidhiwe vyongo vinofuna nyo funjedha, muthuulelenga ira munooda funjedha vyongo vipya vinaufunji-eni Yohova. N’nga munaire a-vi ira mukale okozeya funjedha vyongo vipya?

Mum’vepenga Yohova dhela mulobelo. Muvepenga Yohova ira aukami-eni vwechecha vyongo vinofuna liye ufunji-ani va-eeni. (Yak. 1:5) Kamukalenga okwakwanana vyongo viidhi nyo baa-i.—San. 3:5, 6.

Muthuulelenga ira Bibilya litokaana kopolo. “Madhu a Nlungu mbaingumi.” (Aeb. 4:12) “Madhu” a Nlungu wa ingumi anooda nikami-a mundhila dho-iyana i-yana vahora iliyothene inoleri i-yo Bibilya. Mbwenye vyevi vinoodeya akala nitokozeela funjedha vyongo vipya va vinoleri i-yovyo.

Musimbenga vyongo vyothene vinoufunji-ani Yohova. Yodya yauzimu ili ninga “pwando ya vyodya vya pama maningi.” (Esa. 25:6) Ee-no murambelenga sala “vyodya” vinoona nyo ira kavinousangalali-ani. Irana vyevi unodha ukami-ani ira mukaena makalelo apama thitho musangalalenga maningi mwafunjedhanga madhu a Nlungu.