Yakobo na Ezau tatookaathi-a rendele

Yohova atom’lanyedha Yakobo ira unodha m’barela ninga mwemo mwam’barenle liye Abrahamu na Izaki. Yakobo akalecha wu Harana thitho atookaana banja nlukulu na fuma injinji.

Ee-no Yohova atom’mwandela Yakobo ira: ‘Welela waninyu.’ Voi ee-no Yakobo na banjalee tatooroma wenda ulendo olapha owelela waniwa. Angali ndhila atu enango tatoom’mwandela ira: ‘Ezau unaadha vambo-i naatu 400.’ Yakobo athuulela ira baleuo unaadha ira am’phe liye vambo-i na banjalee. Ee-no atoolobela wa Yohova ira: ‘Pepani Yohova ndikami-eni ira balanga a-andiphe.’ Vadambo lo-arela, Yakobo atoom’tumizela Ezau vyotuva vinjinji ninga mabila, mbudi, ng’ombe, ngamila na makavalo.

Ee-no ma-iyu adambo lelo Yakobo angali ekhene, atoona ngelo. Hora yeniyene atooroma limbanana ngeluo thitho kaam’iidhe fiedhela undhe ungaromile ucha. Angalive ira Yakobo atoopheya liye kaa-iidhe ngeluo. Adhamale ngeluo atoonga ira: ‘Ndi-iye ndidhowenga.’ Mbwenye Yakobo atoowakhula ira: ‘Kandinou-iya, u-iyawee undiraeli-e.’

Vasogolovee ngeluo atom’raeli-a Yakobo. Khumela vevo, Yakobo atooidhiwa ira Yohova kanodha rumeli-a ira Ezau am’phe.

Undhe ungachide, Yakobo atoom’mona Ezau angali vandandai adhanga vambo-i naatu 400. Ee-no Yakobo atoosogola dhowa magumanana baleuo, angam’fwaidhe atoom’kokorela fendo 7. Ezau atootamanga nom’kumbarela Yakobo. Ambilene tatooroma ula voi ee-no tatookaathi-a rendele noroma vwela. N’nga unothuulela ira Yohova adhivwide a-vi na vyairile Yakobo vofuna ira avwelane okoka na balee?

Adhamale Ezau atoowelela waniwa mbwenye Yakobo atoodhowanave ulendwee. atookaana a-ima aalombwana 12. Madhina aa-imao ali Rubeni, Simiyoni, Levi, Yuda, Dani, Nafitali, Gadi, Aseri, Isakara, Zebuloni, Yosefi na Benjamini. Yohova atoom’indi-edha basa Yosefi vofuna vulumucha atwee. N’nga utoidhiwa vyaireile? Ninothapanya vyevi mumuru o-arela.