N’nga kuto unonifunji-a n’ni?

1. N’nga fwanyeya va mwambo othuulela wukwa wa Kristu yawa iliyothene unonikami-a a-vi?

MUNOODA rumela ira kuto ndi yotuva yapereso yavadhulu maningi. (2 Ak. 9:15) Namwasa oi Yesu atoovelela ingumiyee. Munooda kala vauxamwali wapama na Yohova Nlungu. Munodha kaana thitho idedi-edho yodha kaana ingumi yo-omala. Ninofwanela m’simba Yohova, voniva-a kuto namwasa oi unonidhiveliwana. (Aro. 5:8) Vofuna nikhami-a ira nisimbenga kuto thitho ira na-alionenga movevuwa, Yesu atooromi-a mwambo othuulela wukwawee.—Luk. 22:19, 20.

2. N’nga ninotapanya n’ni muyofunjedha yei?

² Manene, mwambo othuulela wukwa wa Yesu unodha ireya Sabudu va 12 Abril wa 2025. Mo-okaikela, nothene ninoira masaka-edho ira nidhafwanyeyevo. Vahora ya ithuulelwila, ninodha ganyali maningia nathuulela mwemo Yohova na Yesu viniireele aliwa. Muyofunjedha yei ninotapanya vyevyo kuto vinofunji-a aliwa vyokhuza Yohova na Mwanee. Muyofunjedha yo-arela inodha nikhami-a vwechecha mwemo kuto munonikhami-edhela aliwa thitho moda munathonyi-edhele i-yo ira ninosimba.

MWEMO KUTO MUNONIFUNJI-EDHELA ALIWA VYOKHUZA YOHOVA

3. N’nga wukwa wa mutu mbo-i unavulumuche a-vi atu mamiliyau anjinji? (Muone thitho iruthiruthi.)

³ Kuto unonifunji-a ira Yohova ngolongomana. (Dot. 32:4) N’nga linonifunji-a a-vi vyevi? Kathuulelani vi: Namwasa o-ovwela wa Adamu, natukhulele wu vyodawa vinoniiri-a ira nikwenga. (Aro. 5:12) Ira anivulumuche wu vyodawa na wukwa, Yohova atooira masaka-edho oi Yesu avelele kuto. N’nga sembe ya mutu mbo-i olongomana yavulumuche a-vi atu mamiliyau anjinji? Rumiwi Paulo atoonga ira: “Voi a-vwela wa mutu mbo-iuo [Adamu] watooiri-a ira atu anjinji takale odawa, vwela wa mutu mbo-iuo [Yesu] watooiri-a ira atu anjinji takale olongomana.” (Aro. 5:19; 1 Ti. 2:6) Ninooda onga ira a-vwela wa mutu mbo-i oi ali olongomana, watoniiri-a ira nikale adhaari avyodawa na wukwa. Ee-no vanoofuneya mutu mbo-i ovwela na olongomana ira nivulumuchiwe.

4. Mwasiwa ngwan’ni Yohova kaarumeli-idhe a-ima ovwela a Adamu ira takaena ingumi modhowa nodhowa?

⁴ N’nga Yesu anoofuneela wukwa ira anivulumuche? N’nga Yohova kaaode fiyari a-ima ovwela a Adamu ira takaena ingumi yo-omala? I-yo aatu ningathuulele ira yen’na yali ndhila yapama yomari-edhana nyarwila. Mbwenye vyevi kai vyovwelana na longomano la Nlungu. Voi Yohova ngolongomana, kaalevelele a-vwela mwakhomove wa Adamu.

5. Mwasiwa ngwan’ni kaninokaikela ira hora dhothene Yohova unoira vyongo vyofwanelela?

⁵ N’nga chini yafuna ireya aakale ira Yohova kaavelenle kuto, vwalavwali-a longomanolee vorumela ira a-ima a Adamu, takale naingumi modhowa nodhowa? Atu tangakaikele ira Nlungu unodha ira longomano va myasa dhinango. Mofwanafwani-a, atu enango tangadhifukilenga ira, ‘n’nga unodha kwakwaneli-edha vilanyedhile liye?’ Mbwenye kaninofwanela khumbanyedha vyongo vinofuna dhaireya. Vyongo vyam’mwiri-idhe Yohova rumela ira Mwanee odhiveliwiwa aphiwe, vinonisikimizeli-edha ira liye hora dhothene unodha ira vyofwanelela.

6. N’nga kuto unothonyi-edha a-vi ira Yohova unonidhiveliwana? (1 Ju. 4:9, 10)

⁶ Pyaimbarimbari ira kuto unonikami-a vwechecha ira Yohova ngwalongomano, mbwenye linonikami-a thitho idhiwa ira liye unonidhiveliwana maningi. (Ju. 3:16; muleri 1 Juwau 4:9, 10.) Vyongo vinofunjedha i-yo vyokhuza kuto, vinothonyi-edha ira Yohova kanofuna ira nikaena ingumi yo-omala ba-i, mbwenye unofuna thitho ira nikale mu banjanimwee. Kathuulelani vi: Adamu angadawile, Yohova kaarumenle okoka ira akhale banjanimwee. Ee-no nothene ninobaliwa wudhe wa banja la Nlungu. Mbwenye namwasa wa kuto, Yohova unolevelela vyodawa vi-u thitho vahoree unodha weli-edha atu othene anom’roromela nom’vwela mubanjalee. Masiki va-eeni ninooda kala vauxamwali wapama na Yohova thitho na Makristau afwi-u. Onga mwaimbarimbari, Yohova unonidhiveliwana maningi.—Aro. 5:10, 11.

7. N’nga rucheya wa Yesu unonikami-a a-vi vwechecha ira Yohova unonidhiveliwa maningi?

⁷ Ninooda vwechecha pama ira Yohova unonidhiveliwana, nathuulela mwemo mwavwela liye upha ira avelele kuto. Satana unoonga ira kavali rumiwi wa Yohova unakaleve ororomeleya akala utogumanana nyarwa ilukhulu. Vofuna runi-a yonamila, Yohova atoorumela ira Yesu arucheye a-anakwe. (Yob. 2:1-5; 1 Pe. 2:21) Yohova anoona vevo Yesu vyanyoziwa liye naamwidanee, khomiwa naanyakhondo thitho khomeliwa vaimurini. Yohova anoona Mwanee odhiveliula arucheyanga namwasa ovwa upha fiyedha wukwa. (Mat. 27:28-31, 39) Yohova atookaana kopolo dhokhondi-a vyothene vyevi ira vya-aireye. Mofwanafwani-a, vevo atu oruni-a vyaonga aliwa ira: “Nlunguwo am’vulumuche akala unom’funadi,” liye angaodile irana vyevi. (Mat. 27:42, 43) Mbwenye aakale ira Nlungu atooirana vyevi, kuto kaaveleliwe thitho nakale o-okaana idedi-edho. Ee-no Yohova atoorumela ira Mwanee arucheye fiyedha wukwa.

8. N’nga Yohova avwide a-vi upha rimanimwee voona Mwanee arucheyanga? Muongemo. (Muone thitho iruthiruthi.)

⁸ Kanithuulelenga ira voi Nlungu ngwakopolo dhothene kuongela ira kanovwa upha. I-yo atu napanduchiwile muifwanafwani-oyee, ee-no akala ninovwa upha, naliyene thitho unovwa upha rimanimwee. Bibilya linoonga ira liye “unosukwala” thitho “unovwa tangaranga.” (Sal. 78:40, 41) Kathuulelani mwasa wa Abrahamu na Isaki. Venango munooda thuulela ira Abrahamu atoowandeliwa ira avelele sembe mwanee mbo-ula. (Mar. 22:9-12; Aeb. 11:17-19) Kathuulelani moda mwam’pha rima Abrahamu vasaka-edha liye ira am’phe Isaki na mbene. Naliyene Yohova vyatom’pha maningi rimani voona Mwanee aoni-iwanga nyarwa naatu othakala fiyedha wukwa!—Muone va jw.org vidiyo yoi Tsanzirani Chikhulupiriro Chawo—Abulahamu, Mbali Yachiwiri.

9. N’nga lemba la Aroma 8:32, 38, 39 linoukami-ani a-vi vwechecha ira Yohova unoudhiveliwanani maningi nyo thitho Makristau afwinyu?

⁹ Kuto linonifunji-a ira Yohova unonidhiveliwana maningi, moi kavali bali-u venango fwi-u unanidhiveliwena e-no. (Muleri Aroma 8:32, 38, 39.) Kaninokaikela ira Yohova unonidhiveliwana maningi kwanyara moda munodhidhiveliwana i-yo. N’nga nyo munofuna kaana ingumi modhowa nodhowa? Idhiwani ira Yohova ngu liye unofuna maningi vyevi. N’nga munofuna ira muleveleliwe vyodawa vinyu? Yohova ngunofuna maningi ulevelelani. Liye unofuna ira nisimbenga yotuva ya kuto, nim’roromelenga thitho nim’vwelenga. Onga mwaimbarimbari, kuto linothonyi-edha ira Nlungu unonidhiveliwana maningi. Thitho ilambo ipya, ninodha funjedha vyongo vinjinji vyokhuza udhivela wa Yohova.—Nam. 3:11.

KUTO LINONIFUNJI-A VYOKHUZA YESU

10. (a) N’nga chini yam’sukwali-a maningi Yesu athuulela wukwawee? (b) N’nga Yesu acheni-idhe a-vi dhina la Babee? (Muone thitho kwadru loi “Roromeleya wa Yesu watoocheni-a dhina la Yohova.”)

¹⁰ Yesu anookhumbanyedha maningi vyathuulela atu vyokhuza Babee. (Ju. 14:31) Yesu anoovikhumbanyedha namwasa oombiwa landu ira ngonyoza Nlungu thitho odhimbinuwela, onyozi-a dhina la Babee. Ngumwasee liye atoovepha ira: “Babanga, akala pyoodeya muikhumi-e kopwila vali miyo.” (Mat. 26:39) Vokalave ororomeleya wa Yohova fiyedha wukwa, Yesu atoothonyi-edha ira vyongo vinoonga Satana vyokhuza Babee pyonama.

11. N’nga Yesu athonyi-idhe a-vi ira unodhiveliwana maningi atu? (Ju. 13:1)

¹¹ Kuto linonifunji-a ira Yesu unodhiveliwana maningi atu, simbwasimbwa anama-arelee. (San. 8:31; muleri Juwau 13:1.) Mofwanafwani-a Yesu anooidhiwa ira nyarwa dhothene dhinofuna liye dhagumanana muurumiwee dhinodha kala dhorucha maningi, simbwasimbwa wukwawee. Mbwenye, Yesu atooira vyothene vyevi, a-kala namwasa oi ndi vyam’rumile Yohova irana, mbwenye namwasa oi anoodhiveliwana atu. Ee-no liye atoo-ela rimee va basa lolaleela, funji-a nolabela atu enango. Masiki va dambo laphiwile liye, Yesu atoo-uwa manyalo aarumiwee, voava-a malangi-o thitho awandela madhu olimbi-a. (Ju. 13:12-15) Ee-no Yesu angali vaimurini yoonelavo nyarwa, atookami-a lipanga kaana idedi-edho thitho atooira masaka-edho oi m’mee asamaleliwenga. (Luk. 23:42, 43; Ju. 19:26, 27) Va Yesu athonyi-edha ira anoodhiveliwana atu, a-kala vonikwena baa-i, mbwenye vaingumiyee yothene.

12. N’nga Yesu unonikami-a a-vi malamboano?

¹² Angalive ira Kristu atoonikwela “fendo imbo-i baa-i,” vatokala vyongo vinjinji vinoira liye vonikami-a. (Aro. 6:10) N’nga ndi vyongo viivi vinoira Yesu? Liye unave laba basa ira aniva-e vyongo vyapama vyevyo vinoodeya namwasa wa kuto. Mofwanafwani-a, liye unolaba basa mwathindhi ninga Mwene, ndimuwa waalimbo velela sembe thitho muru wapingo. (1 Ak. 15:25; Aef. 5:23; Aeb. 2:17) Liye unolaba basa yogumani-a ozoziwa amwinji lukhulu thitho unomari-a irana vyevi nyarwa ilukhulu ya-anamale.b (Mat. 25:32; Mrk. 13:27) Yesu unoonechecha ira arumiwee ororomeleya anowachela yodya yauzimu yokwakwanela malambo omari-ala. (Mat. 24:45) Thitho muutongee wa vyawa 1.000, liye unodhowanave nikami-a. Va Yohova unodha velela Mwanee na rima othene ira anikami-e.

KAMU-IYE FUNJEDHA

13. N’nga munaire a-vi ira mufunjedhe vyongo vinjinji vyokhuza udhivela wa Nlungu na Kristu?

¹³ Munooda funjedha vyongo vinjinji vyokhuza udhivela wa Yohova Nlungu na Kristu Yesu mwadhowanave thuulela vyongo vyauireeleni liye. Venango vahora ya ithuulelo ya manene munodha leri mosamala bukhu limbo-i venango mangasi a milanyu yapama. Munooda leri makapitulu manjinji vahora imbo-i. Mbwenye mwaleringa vang’ono navang’ono thitho musakesakenga myasa inango inauiri-eni ira mum’dhiveliwengana Yohova na Yesu. Mbwenye thitho mudhilimbi-edhenga wandela atu enango vyongo vinofunjedhanyo.

14. Movwelana na lemba la Salimo 119:97 na madhu achindo, n’nga sakasaka unanikami-e a-vi ira nifunjedhe vyokhuza kuto thitho vyongo vinango? (Muone thitho iruthiruthi.)

¹⁴ Akala mukadhi mukalanga muimbarimbari wa vyawa vinjinji venango munooda onanga ira kamunaode fwanya makhundo enango mapya okhuza longomano la Nlungu udhivelee thitho kuto. Mbwenye imbarimbari choi kaninaodhe mari-a funjedha vyokhuza myasa dhedhi venango dhinango. N’nga munofwanela iranan’ni? Muleringa thitho funjedha myasa dhinango dha Bibilyani dhedho dhinofwanyeya mu mabukhwi-u. Mwafwanya mwasa oi kamunouvwechecha pama, musakesakenga. Dambo lothene muthuulelenga vyongo vifunjedhile nyo vyokhuza Yohova, Mwanee thitho na mwemo munoudhiveliwanani aliwa.—Muleri Salimo 119:97 na madhu achindo.

15. Mwasiwa ngwan’ni ninofwanela dhowanave sakasaka makhundo apereso avadhulu ofwanyeya mu madhu a Nlungu?

¹⁵ Kamukaengana pwadho akala hora dhinango kamunofwanya makhundo mapya venango inova-a ifunelo vahora inoleri nyo no sakasaka. Vahoriyo munokala ninga mutu unosakasaka oro. Atu enao anosakasaka oro anomala mahora manjinji venango malambo ta-anafwanye na pedaswene ya oro. Aliwa anokala oleva rima namwasa oi anoidhiwa ira ipedaso iliyothene ya oro chapereso yavadhulu. Mofwanafwana na vyevi, likhundo nlilothene la Bibilyani linafwanye nyo tapereso lavadhulu! (Sal. 119:127; San. 8:10) Ee-no mulevenga rima thitho nodhowenganave leri Bibilya hora dhothene.—Sal. 1:2.

16. N’nga ninasazi-edhe a-vi Yohova na Yesu?

¹⁶ Mwafunjedhenga, muthuulelenga moda muna-indi-edhe nyo basa vinofunjedha nyoovyo. Mofwanafwani-a, Mu-arelenga longomano la Nlungu moira vyongo mo-okaana sakulo naatu enango. Musazi-edhenga mwemo Yesu munodhiveliwana liye Babee naatu vokala ofunechecha irana vyongo vinofuna Yohova vokami-a atu enango angalive irana vyevyo korucha. Musazi-edhenga Yesu volaleela waatu enango naifunelo yoi naaliwene thitho takaena ngari yowachela yotuva yavadhulu yokhumela wa Yohova.

17. N’nga ninodha tapanyan’ni muyofunjedha yo-arela?

¹⁷ Navilimbi-edhanga vwechecha no simba kuto, paevo thitho vanom’dhiveliwana i-yo maningi Yohova na Mwanee. Vyo-arelavovyee pyoi naaliwene thitho anodha roma nidhiveliwana maningi. (Ju. 14:21; Yak. 4:8) Ee-no nidhowenave laba mabasa othene aniva-idhe Yohova ira nifunjedhe vyokhuza kuto. Muyofunjedha yo-arela ninodha tapanya maraeli-o anofwanya i-yo namwasa wa kuto thitho mwemo munathonyi-edhele i-yo ira ninosimba udhivela wa Yohova.