“Musakhule . . . Unofuna nyo m’labelanga”

1. N’nga ninofwanela iran’ni ira nikalenga osangalala, n’nga mwasiwa ngwan’ni? (Esaya 48:17, 18)

BABI-U wa dhulu unonidhiveliwana maningi thitho unofuna ira nikhalenga osangalala va-eeni thitho sogolou. (Nam. 3:12, 13) Liye atoonipanducha mundhila yoi niodenga thonyi-edha madodoliso o-iyana i-yana. Mbwenye kanipanduchile mundhila yoi nivitongenga nokhene venango thitho sakula nokhene vyongo yapama venango yothakala. (Nam. 8:9; Jer. 10:23) Liye utoidhiwa ira ninooda kala osangalala maningi akala nim’labelanga thitho a-rela malangi-oee.—Muleri Esaya 48:17, 18.

2. N’nga Satana afuna ira niroromelenga yonama iivi, n’nga Yohova awakhunle a-vi yonama yen’na?

² Satana unofuna ira niroromelenga ira ninooda kala osangalala mo-osogoleliwa na Yohova, venango ira atu tanooda dhitonganga pama. (Mar. 3:4, 5) Yohova atoowakhula yonama yei vorumela ira atu tavitongenga okhene wahora yoyeva. Uliwethene unoona umboni oi utongi waatu kai wapama. Mbwenye Mumalemba mutokala vifwanafwani-o vyaalombwana naa-iyana enao takhanle osangalala namwasa om’labela Yohova. Mutu m’mbo-i wenuo asangalanle maningi ndi Yesu Kristu. Yoroma, dhoweni nioneni mwasee liye atoosakula m’labela Yohova. Namala ninotapanya mwasee Babi-u wa dhulu uli ofwanelela lambeliwa. Vomari-a ninotapanya mwasee wairi-idhe sakula m’labela Yohova.

MWASIWA NGWAN’NI YESU ATOOSAKULA M’LABELA YOHOVA

3. N’nga Satana awandenle ira Yesu aire n’ni, n’nga Yesu awakhunle a-vi?

³ Yesu angali vailambo yavathi anoofuna sakula oi am’labelenga. Angamadhi badiziwa, Satana atom’mwandela ira ndinouva-a maumwene othene availambo yavathi wandikokorela fendo imbo-i baa-i nondilambela. Yesu atoom’mwakhula ira: “Khumavo vano Satana! Namwasa oi malemba anoonga ira, ‘Yohova Nlungwaa ngunofwanelawee m’lambela thitho unofwanela m’labelanga liye baa-i.’” (Mat. 4:8-10) Mwasiwa ngwan’ni Yesu atoonga vyevi? Dhoweni nioneni vyongo viraruvi.

4-5. Mwasiwa ngwan’ni Yesu atoosakula m’labela Yohova?

⁴ Yongo ilukhulu yairi-idhe Yesu sakula ira am’labelenga Yohova ndi udhivela. Yesu unodhiveliwana maningi Babee thitho kana-iye m’ndhiveliwana. (Ju. 14:31) Wenjedhela vevo, Yesu anom’labela Yohova namwasa oi anooidhiwa ira pievyo vyafuna liye irana. (Ju. 8:28, 29; Apk. 4:11) Anooidhiwa thitho ira Yohova ngunova-a ingumi, onyindeleya thitho ova-a mo-oumeleliwa. (Sal. 33:4; 36:9; Yak. 1:17) Yohova atom’mwandela Yesu vyaimbarimbari thitho ngwam’va-idhe vyongo vyothene vyana liye. (Ju. 1:14) Satana ndi wenuo aromi-idhe wukwa. Liye ngonama thitho unoira vyongo namwasa waidyani thitho ngovidhiveliwana. (Ju. 8:44) Namwasa oidhiwa makhundo enala, Yesu kathuulele vyo-iya m’vwela Yohova ninga mwairile Satana.—Afl. 2:5-8.

⁵ Yongo yairi-idhe ira Yesu asakule m’labela Yohova choi athuulela vyongo vinaireye akala unodhowanave kala ororomeleya. (Aeb. 12:2) Liye anoidhiwa ira akala unodhowanave kala ororomeleya unodha cheni-a dhina la Babee thitho unodha mali-a nyarwa dhiromi-idhe Namanami-a.

MWASIWA NGWAN’NI YOHOVA NGOFWANELELA LAMBELIWA?

6-7. Mwasiwa ngwan’ni atu malamboano anokhonda m’labela Yohova, n’nga mwasiwa ngwan’ni liye ngofwanelela lambeliwa?

⁶ Atu anjinji malamboano katinom’labela Yohova namwasa oi katinoidhiwa makalelo apama ana liye thitho katinozindiyela vyongo vyothene vinowairela liye. Mu ndi mwemo mwakalela atu awu Atena enao rumiwi Paulo alaleela liye.—May. 17:19, 20, 30, 34.

⁷ Paulo atoowandela atwao ira Nlungu waimbarimbari ”‏unova-a atu othene ingumi, mwela na vyongo vyothene.” Atoowenjedhela thitho onga ira: “Namwasa wa liye nitokaana ingumi, ninowenda thitho nitokalao.” Nlungu ngofwanela lambeliwa namwasa oi ndi napanducha wenuo “khumela wa mutu mbo-i atoopanducha maziza othene aatu.”—May. 17:25, 26, 28.

8. N’nga chini ya-anofuna ira Yohova? Muongemo.

⁸ Voi Yohova ndi Namapanducha thitho wa vyongo vyothene, angaodile khanyi-edha atu ira tam’labelenga. Mbwenye Yohova kairilena vyevyo. Malomwee unoniva-a umboni oi liye utokalaodi thitho unonidhiveliwana maningi. Unofuna ira atu anjinji takhale afwee modhowa nodhowa. (1 Ti. 2:3, 4) Ira vyevi viodeye, Yohova utonifunji-a moda munawandele i-yo atu enango vyaifunelwee thitho vyokhuza vyongo vyapama vinofuna liye dhairela atu sogolou. (Mat. 10:11-13; 28:19, 20) Ira nim’lambelenga pama, liye utoniva-a pingo naandimuwa audhivela ira tanikami-enga.—May. 20:28.

9. N’nga Yohova athonyi-edhe a-vi udhivelee?

⁹ Udhivela wa Yohova unooneela pama nathuulela mwemo munoirela liye vyongo naatu oi katinororomela ira liye utokalao. Kathuulelani makhundwala: Romela walelene, atu anjinji takadhi tasakulanga wendela makhudhwiwa okhuza vyapama na vyothakala. Mbwenye moriya rima, Yohova ukadhi aava-anga vyongo vyowakami-a ira takaena ingumi thitho tasangalalenga. (Mat. 5:44, 45; May. 14:16, 17) Unoakami-a ira taodenga kaana afwiwa, kaana banja thitho nganyali na mabasiwa. (Sal. 127:3; Nam. 2:24) Vyevi vinothonyi-edha ira Babi-u wa dhulu unodhiveliwana atu othene. (Eki. 34:6) Va-eeni dhoweni nitapanyeni myasa yeniyo inoiri-a sakula ira nim’labelenga Yohova thitho na mwemo munoniraeli-edha liye.

MWASIWA NGWAN’NI NINOSAKULA M’LABELA YOHOVA?

10. (a) N’nga yongo ilukhulu inom’labelelana i-yo Yohova chini? (Mateu 22:37) (b) N’nga leva rima wa Yohova uukami-idheni a-vi? (Salimo 103:13, 14)

¹⁰ Molandana na Yesu, ninom’labela Yohova namwasa oi ninom’dhiveliwana maningi. (Muleri Mateu 22:37.) Funjedha vyongo vinjinji vyokhuza makalelwee utoniiri-a ira nikhale vauxamwali wapama na liye. Mofwanafwani-a, kathuulelani mwemo Yohova mwathonyi-edhele liye leva rima. Vahora inango Aisraeli vyakhondile aliwa avwela, liye atowasembezela ira: “Welelani no-iya ndhila dhinyu dhothakala.” (Jer. 18:11) Yohova unothuulela ira i-yo aatu kanili olongomana mbwenye nili tumbulu. (Muleri Salimo 103:13, 14.) Nathuulela moda munonilevela Yohova rima thitho makalelwee apama, ninofunechecha m’labela modhowa nodhowa.

11. N’nga ndi myasa inango iivi inoiri-a sakula ira nim’labelenga Babi-u wa dhulu?

¹¹ Ninofunechecha thitho m’labela Yohova namwasa oi ninoidhiwa ira ndi vyongo vinofwanela i-yo irana. (Mat. 4:10) Ninoidhiwa thitho vyongo vinaireye akala ninodhowanave kala ororomeleya. Nakala ororomeleya ninokami-a ira dhina la Yohova licheni-iwe, nothonyi-edha ira Namanami-a ngonama thitho ninosangalali-a rima wa Babi-u. Thitho nasakula m’labela Yohova va-eeni, ninokaana idedi-edho yodha m’labela modhowa nodhowa.—Ju. 17:3.

12-13. N’nga ninofunjedhavon’ni va mwasa wa Jane na Pam?

¹² Akala niromile m’dhiveliwana Yohova romela ningali a-ima, udhiveluo unooda dhowanave fiyedha naulula. Vi pyaireele Jane narongolee Pam.a Aliwa tatooroma funjedha Bibilya unango angana vyawa 10 unango 11. Anamabalee katadhiveliwana funjedha mbwenye tatoorumela ira Jane na Pam tafunjedhenga Bibilya na Amboni. Ee-no aliwa tafuna ira komoni wa sumana tadhowenga gerejani wiwa. Jane aongile ira: “Vyongo vyandifunji-a Amboni khumela Bibilyani vyatoondikami-a ira nda-atukhulelenga vyaafwanga enao ano-indi-edha basa mirombwe yodhodhomi-a ugogo thitho ira vyamararuo.”

¹³ Asikana othene enala tali anamalaleya ta-anafii-e vyawa 20. Ee-no tatooroma ira upainiya wu tasamalelanga anamabaliwa oulula. Jane atoonga moda mwavivwela liye athuulela mwemo Yohova vim’mwirele liye. Liye aongile ira: “Nditofunjedha ira Yohova ngororomeleya thitho unosamalela atwee. Molandana na lemba la 2 Timoteo 2:19, ‘Yohova unoidhiwa atwee.’” Pyo-oira fuka ira Yohova unosamalela atu enao anom’dhiveliwana thitho anom’labela.

14. N’nga vyoonga na vyoira vi-u vinokhami-a a-vi cheni-a dhina la Yohova? (Muone thitho iruthiruthi.)

¹⁴ Ninofuna kami-a vocheni-a dhina la Nlungu. Nifwanafwani-edhele ira mutokaana fwinyu oriya rima, ova-a thitho olevelela. Ee-no dambo n’nango munovwa mutu unango auwandelangani ira fwinyuo ndi mutu wauwalanga thitho wainyengo. N’nga munaire a-vi? Munooda m-elela nduli fwinyuo. Mofwanafwana na vyevi, Satana naatu enao tali uikhundu yee anofuna thakali-a limbili la Yohova voonga vyonama vuyokhuza liye. Ee-no nino-elela nduli Yohova vowandela atu enango vyokhuza liye na dhinalee. (Sal. 34:1; Esa. 43:10) Vyoonga vi-u vithonyi-edhenga ira ninofuna m’labela Yohova na rimi-u othene.

15. N’nga rumiwi Paulo anganyanle avi namwasa osakula vyongo vaingumiyee? (Afilipi 3:7, 8)

¹⁵ Ninochinja vyongo vinango vaingumii-u naifunelo yoi nim’labelenga Yohova morumeleya na rima othene. Mofwanafwani-a, rumiwi Paulo atoololela i-ya izo yavadhulu yana liye naifunelo yoi akale namafunjedha wa Kristu nom’labela Yohova. (Agl. 1:14) Vi vyatookami-a ira akhaena ingumi yapama thitho idedi-edho yotonga na Kristu dhulu. Liye kaavikhumbanyedhile na vyongo vyasakhunle liye. Akala i-yo thitho nitosakula m’labela Yohova, kaninodha vikhumbanyedha.—Muleri Afilipi 3:7, 8.

16. N’nga ninofunjedhavon’ni vaifwanafwafi-o ya Julia? (Muone thitho iruthiruthi.)

¹⁶ Naona ira m’labela Yohova kofuneya maningi ninodha kaana ingumi yapama va-eeni thitho sogolou. Ifwanafwani-o va mwasula ndi rongola mwinango dhinalee Julia. Angali mwana thitho a-anafunjedhe imbarimbari, Julia anoomba kwaya wu religiau liwa. Siyetista mwinango oomba nyumbo aoni ira Julia utokaana dodoliso thitho atoom’funji-a omba pama. Va-anavire hora indendai Julia atookala oomba ovweya thitho anoomba mumasalau malukhulu malukhulu. Angali xikola inango yofunji-a omba, fwee mwinango atooroma m’mwandela vyokhuza Nlungu thitho atoonga ira dhina la Nlungu ndi Yohova. Va-anavire hora indendai, Julia atooroma funjedha Bibilya fendo winli va sumana. Ee-no atoo-iya funjedha omba nyumbo naifunelo yoi am’labelenga Yohova. Mbwenye vyevi kavyali vyokweya. Julia aongile ira: “Atu anjinji tatoondiwandela ira nditotatila ngari. Mbwenye miyo ndinofuna m’labela Yohova waingumi yanga yothene. N’nga Julia unovivwa a-vi va-eeni namwasa wa vyongo visakhunle liye wa vywa 30 vivirilevi? Liye aongile ira: “Nditokaana rendele wa rimani thitho ndinororomela ira Yohova unodha ndiva-a vyongo vyothene vinofuna rimanga vachineneeva.”—Sal. 145:16.

DHOWANANIVE M’LABELA YOHOVA!

17. N’nga likhundo loi komoni uli duzi inokhuza a-vi atu enao anom’labela Nlungu na anokhonda am’labela?

¹⁷ Komoni wailamboi uli dhuzi maningi. Rumiwi Paulo atoolemba ira: “U-adhi ‘isihora yoyeva’ thitho ‘unodhuo mo-odembuwa unofiya.’” (Aeb. 10:37) N’nga vyevi vinothapulelan’ni? Yoroma, hora yoi asakhule m’labela Yohova ndi yoyeva. (1 Ak. 7:29) Akala nasakhunle wale m’labela Yohova ninoidhiwa ira nyarwa dhinavilele i-yo “tahora yoyeva.”

18. N’nga Yohova na Yesu anoniirelan’ni?

¹⁸ Yesu atoolimbi-a atu ira takale anama-arelee thitho ira tadhowenganave m-arela. (Mat. 16:24) Ee-no akala nikadhi nim’labelanga Yohova wa vyawa vinjinji dhoweni na-akaenani pwadho. Nidhowenave kaana ingumi yovwelana na vyongo vyasakhunle i-yo thitho naira e-no ninodha fwanya maraeli-o masiki va-eeni.—Sal. 35:27.

19. N’nga ninofunjedhavon’ni va mwasa wa Gene?

¹⁹ Atu enango anothuulela ira mutu am’labelanga Yohova kanokhala osangalala. Akala muli zombwe, n’nga munothuulela ira munodha maniwa vyongo vinango namwasa om’labela Yohova? Bali mwinango wa zombwe dhinalee Gene aongile ira: “Vyaoneya ninga afwanga anaasangalala na vyongo ninga mapwando, kaana vimweendi thitho mawarendhelo auwalanga voi miyo ndakhalela dhowanga muurumiwini. N’nga mathuulelo enala am’khuzile a-vi Gene? Liye aongile ira: “Ndatoona ingumi yainyengo thitho wahora yoyeva ndaona ira ndinaasangalala. Mbwenye sangalalawee wali o-odimbela. Ndatooroma thuulela makhundo aimbarimbari enao avwalavwali-a miyo thitho ndatoothuulela vyom’labela Yohova na rimanga othene. Khumela hora yeniyo, Yohova ukadhi awakhulanga malobelwanga othene.”

20. N’nga ninofwanela sikimizela rima iranan’ni?

²⁰ Olemba salimo mwinango atoombela Yohova nyumbo ira: “Osangalala ndi mutu wenuo usakhunle nyo nom’dhi-a vaduzi na nyo, ira akale muvindaroni vinyu.” (Sal. 65:4) Ee-no dhoweni nikaenani mathuulelo ninga ana Yoswa, oi: “Miyo na banjalanga ninongo m’labela Yohova.”—Yos. 24:15.