Mukami-enga namafunjedhinyu Bibilya ira afiye vom’labela Yohova

1-2. (a) Mwasiwa ngwan’ni anamafunjedha Bibilya enango anovwalavwali-a m’lambela Yohova? (b) N’nga ninotapanyan’ni muyofunjedha yei?

N’NGA vahora inango mwatooroma vwalavwali-avo kala wa Mboni dha Yohova? Venango mwaova ira afwinyu anolabana nyo basa, venango abalinyu tanodha sukwala mwakala wa Mboni dha Yohova. Venango thitho mwaona ira kamunaode a-rela makhundo a Nlungu. Akala ndi-eeno, munodha vwechecha mwasee anamafunjedha enango anovwalavwali-a roma m’labela Yohova.

² Yesu atoozindiyela ira vyongo ninga vyevi vinodha m’mwimwanani-a mutu roma m’lambela Yohova. (Mat. 13:20-22) Mbwenye liye ka-iidhe kami-a atu enao tavwalavwali-a m-arela. Malomwee atoofunji-a anamafunjedhee kami-a atu ninga enala (1) idhiwa vyongo vyevyo vinom’mwimwanani-a dhowa vasogolo, (2) m’dhiveliwana maningi Yohova, (3) ona vyongo vyofwanelela e-la valimburo loroma, thitho (4) limbanana vyorucha vinogumanana aliwa. N’nga nina-indi-edhe a-vi basa makhundo enao aongile Yesu vowandela anamafunedhee na-indi-edhanga basa bukhu loi Ingumi Yokalao Dhowa Nodhowa vokami-a namafunjedhi-u Bibilya ira am’labelenga Yohova?

MUKAMI-ENGA NAMAFUNJEDHA BIBILYA IDHIWA VYONGO VINOM’MWIMWANANI-A DHOWA VASOGOLO

3. N’nga chini yam’mwimwanani-a Nikodemu kala nama-arela wa Yesu?

³ Nikodemu, wenuo ali mbo-i mwaanamatonga atiribunale mlukulu la Ayuda, vahora inango atookaana yorucha yeniyo yam’mwimwanani-a kala namafunjedha wa Yesu. Vangavirile myedhi 6 kumela varomile Yesu urumiwee, Nikodemu atoozindiyela ira Yesu arumiwile na Nlungu. (Ju. 3:1, 2) Mbwenye liye atoosakula gumanana Yesu mo-oneela “namwasa oova Ayuda.” (Ju. 7:13; 12:42) Venango liye athuulela ira unodha luza vyongo vinjinji akala namafunjedha wa Yesu.a

4. N’nga Yesu am’kami-idhe a-vi Nikodemu idhiwa vyongo vyafuna Nlungu ira liye aire?

⁴ Nikodemu anooidhiwa vyailamulo, mbwenye anofuneela kami-iwa ira aidhiwe vinofuna Yohova ira liye aire. N’nga Yesu am’kami-idhe a-vi? Yesu kaonile horiyo kala yofuneya wa liye mbwenye atooira masaka-edho ogumanana na Nikodemu nama-iyu. Yesu atoomwandela pama vyongo vyafwanela liye ira akale nama-arelee. Vommwandela vyongo vyafwanela liye irana, atoomwandela movweya pama ira unofwanela chinyuwa, badiziwa, thitho roromela Mwana Nlungu.—Ju. 3:5, 14-21.

5. N’nga ninakami-e a-vi namafunjedha Bibilya idhiwa vyongo vinom’mwimwanani-a dhowa vasogolo?

⁵ Masiki namafunjedha Bibilya wenuo unoidhiwa pama malemba, unofuneela kami-iwa idhiwa vyongo vinom’mwimwanani-a dhowa vasogolo. Mwaifwanafwani-o, vinango vinam’mwimwanani-e vinodha kala basa inolaba liye venango runi-iwa naabalee. Ee-no mukaengana hora yoi mum’kami-enga. Venango munooda m’vepa ira muwende vambo-i venango thitho m’mwitanela waninyu. Vahora ninga yen’na, munodha m’vepa ira akale omasuwa nouwandelani nyarwa dhinogumanana liye. Munlimbi-enga namafunjedhinyuo thitho m’mwandela ira adhilimbi-edhenga chinja akala vanofuneela irana ee-no, a-kala ira ausangalali-eni, mbwenye athonyi-edhenga ira unom’ndhiveliwana Yohova.

6. N’nga munakami-e a-vi namafunjedha Bibilya ira akale olimba rima noroma a-rela vyongo vinofunjedha liye? (1 Akoritiyo 16:13)

⁶ Namafunjedha Bibilya aroromelanga ira Yohova unom’kami-a a-rela makhundo a Bibilyani, unodha limba rima noromanga a-rela vyongo vinofunjedha liyevyo. (Muleri 1 Akoritiyo 16:13.) Vyongo vinoira nyoovyo vinolandana na vyaira namafunji-a. Vahora yafunja nyo xikola, n’nga mwadhiveliwana purusori uvi? Mo-okaikela mwanoodhiveliwana purusori wenuo aleva rima nanyo noukami-ani ona ira munooda ira vyongo vinjinji. Mofwanafwana na vyevi, namafunji-a wapama wa Bibilya unofunji-a namafunjedheuo idhiwa vyongo vinofuna Nlungu ira liye airena, thitho unomusikimizela ira Yohova unooda m’kami-a chinja akala vanofuneela irana ee-no. N’nga munaire a-vi ira mukale ninga purusori wen’na?

MUM’KAMI-ENGA NAMAFUNJEDHA BIBILYA IRA AM’DHIVELIWENGANA MANINGI YOHOVA

7. N’nga Yesu akami-idhe a-vi atu enao tam’vuruwana ira tam’ndhiveliwengana Yohova?

⁷ Yesu anooidhiwa ira m’dhiveliwana Nlungu wangaodile kami-a anamafunjedhee indi-edha basa vyongo vyafunjedha aliwavyo. Hora dhinjinji liye anowafunji-a vyongo vyowakami-a ira tam’dhiveliwengana maningi Babiwa wadhulu. Mwaifwanafwani-o, vahora inango liye atoofwanafwani-edhela Yohova na baba wenuo unovelela vyongo vyapama wa mwanee. (Mat. 7:9-11) Vinooneya ira enango mwaatu enao tavuruwanao, katinakalevo na baba waudhivela ninga wen’na. Kathuulelani mwemo mwadhivwenle aliwa Yesu angaongile ifwanafwani-o ya baba watangaranga wenuo awachenle namandha meli mwanee adimenle. Aliwa vinooneya ira tanoona mwemo Yohova munodhiveliwana liye a-imee ailambo yavathi.—Luk. 15:20-24.

8. N’nga ninakami-e a-vi namafunjedhi-u Bibilya ira am’ndhiveliwengana maningi Yohova?

⁸ Nyo thitho munodha kami-a namafunjedhinyu ira am’dhiveliwengana maningi Yohova vommwandela hora dhothene makalelo apama enao ana Nlungu. Vofunjedha dambo nlilothene mum’kami-enga ona vwelana weo ulivo vari va vyongo vinofunjedha liye namakhundo oi Yohova ngwa udhivela. Mwatapanyanga vyokuza khuto, mum’mwandelenga mwemo khutuwo munom’kuzela aliwa. (Aro. 5:8; 1 Ju. 4:10) Namafunjedhuo unooda roma m’dhiveliwangana maningi Yohova athuulelanga ira Yohovuo unom’dhiveliwana liye vaekhene.—Agl. 2:20.

9. N’nga chini yam’kami-idhe Michaeli ira am’lambelenga Yohova?

⁹ Kathuulelani ifwanafwani-o ya Michaeli unokala wu Indonesia. Liye aulukulele mubanja la Amboni mbwenye kaabadiziwile. Angana vyawa 18, atoodhowa ilambo inango malaba basa yowendi-a makaro malukulu. Ee-no atoothela thitho atoo-iya i-yane wu Indonesia dhowa malabanga basa uilambo inango. Vahoriyo i-yanee na mwanee tatooroma funjedha Bibilya thitho tanoodhowa vasogolo maningi. M’mee angakwide, Michaeli atoothuulela vyowelela wu Indonesia ira amasamalelenga babee thitho atoorumela funjedha Bibilya. votapanya ikhundo yoi “funjedhani vinjinji” muyofunjedha 27 bukhu loi Ingumi Yokalao Dhowa Nodhowa, Michaeli atookhuziwa maningi. Vothuulela moda mwadhivwela Yohova angaoni mwanee arucheyanga, Michaeli atoogwi-a mi-odi. Liye atooroma simba maningi yotuva ya khuto thitho vyevi vyatom’kami-a ira achinje vyongo vaingumiyee nobadiziwa.

MUKAMI-E NAMAFUNJEDHINYU BIBILYA IRA AONENGA M’LABELA YOHOVA KALA OFUNEYA MANINGI

10. N’nga Yesu akami-idhe a-vi anamafunjedhee ira taonenga m’ela Yohova valimburo loroma kala ofuneya maningi? (Luka 5:5-11) (Muone thitho iruthiruthi.)

¹⁰ Anamafunjedha a Yesu tatoozindiyela mombaranya ira liye ngumesiya. Mbwenye tafuneela kami-iwa ira taonenga basa yolaleela kala yofuneya maningi vaingumiiwa. Pedru na Andreya tali tangakanle anamafunjedha a Yesu wahora indendai vevo vaawandela liye ira tam’arelenga hora dhothene. (Mat. 4:18, 19) Aliwa taira goso yoguli-a somba thitho vinooneya ira tairela vambo-i na Yakobo na Juwau. (Mrk. 1:16-20) Vahora Pedru na Andreya “vya-iidhe aliwa malicheliwa” tatokaana ndhila yoi tafwanyelenga vyofuneeleya vya mabanjiwa wu ta-arelanga Yesu. N’nga chini yaakami-idhe ira taonenga basa yolaleela kala yofuneya kwaranya kobiri? Mwasa wa bukhu la Luka, unoonga ira Yesu atooira yodabwi-a yeniyo yaakami-idhe ira taroromelenga maningi ira Yohova unodha ava-a vyosowa viwa.—Muleri Luka 5:5-11.

11. N’nga nina-indi-edhe a-vi basa vyongo vyaireile vaingumii-u ira nilimbi-e iroromelo yaatu anofunjedhana i-yo Bibilya?

¹¹ Kaninaode ira vyodabwi-a ninga Yesu, mbwenye ninooda mmwandelamo namafunjedhi-u Bibilya mwemo Yohova munokami-edhela liye atu enao ano-ela lambela ochena valimburo loroma. Mwaifwanafwani-o, n’nga mwatooroma thuulela mwemo Yohova muukami-idheni liye mungaromile fwanyeya vamigumanoni ya pingo? Venango mwanoofuneela tapanya na patarawinyu ira kamunalabenga mahora owenjedheleya akala tanoolingana na mahora oi mumafwanyeye vamigumanoni. Mwammwandelanga vyongo vyauirelenivyo, mumwandelenga mwemo iroromelo inyu mwalimbile aliwa ona mwemo Yohova moda mwaukami-edheleni liye vavyongo vyasakunle nyo ira mu-ele lambela ochena valimburo loroma.

12. (a) Mwasiwa ngwan’ni ninofwanela mafunji-a namafunjedhi-u na anamalaleya o-iyana i-yana? (b) N’nga muna-indi-edhe a-vi basa mavidiyo vokami-a namafunjedhinyu? Muonge ifwanafwani-o.

¹² Namafunjedhinyu unooda ganyali maningi uvwa mwemo Makristau enango mwachinjile aliwa vyongo vaingumiiwa ira ta-elenga lambela Yohova valimburo loroma. Ee-no mwairi-anga funjedha wa Bibilya, mudhowenga naabali naarongola enao taguman’nenavo na vyongo vyo-iyana i-yana vaingumiiwa. Mwaafukenga ira taonge mwemo mwafunjedhile aliwa imbarimbari thitho vyongo vyaira aliwa ira ta-ele m’lambela Yohova valimburo loroma. Wenjedhela vevo, muonelenga na namafunjedhinyu vidiyo yavaikhundo yoi “funjedhani vinjinji” venango “muone vifwanafwani-o” mubukhu loi Ingumi Yokalao Dhowa Nodhowa. Mwaifwanafwani-o mwafunjedhanga yofunjedha 37, munooda tapanya makhundo amuvidiyo yoi Yehova adzatisamalira.

MUKAMI-ENGA NAMAFUNJEDHINYU BIBILYA IRA AVILELENGA NYARWA DHINAGUMANENA LIYE

13. N’nga Yesu akami-idhe a-vi anamafunjedhee kozeela runi-iwa?

¹³ Moweli-edha weli-edha, Yesu anoowandela anamafunjedhee ira tanodha oni-iwa nyarwa naatu enango masiki abaliwa. (Mat. 5:11; 10:22, 36) Komoni wa urumiwee, liye atoowenjeli-a anamafunjedhee awo ira tanodha phiwa namwasa om’lambela Yohova. (Mat. 24:9; Ju. 15:20; 16:2) Ee-no atoawandela ira takalenga owenjela talaleelanga. Atowalangi-a thitho ira katikanganenga naalimbo runi-a thitho ira takalenga osamala maningi.

14. N’nga ninakami-e a-vi anamafunjedhi-u kozeela runi-iwa? (2 Timoteo 3:12)

¹⁴ Munooda kami-a namafunjedha Bibilya kozeela runi-iwa vommwandela vyongo vinadedi-edhele liye gumanana sogolou kumela wa afwee abasani, afwee enango thitho abalee. (Muleri 2 Timoteo 3:12.) Afwee enango abasani anooda m’nyoza namwasa o-arela makhundo a Bibilyani. Atu enango masiki abalee tanodha m’nyoza navyongo vinororomela liye. Naakozeli-edhanga mombaranya, vinodha akami-a ira takale okozeya taruni-iwanga.

15. Chini inakami-e namafunjedha Bibilya ira avilele abalee tam’runi-anga?

¹⁵ Namafunjedha Bibilya aruni-iwanga na abalee, munlimbi-e ira athuulelenga vyevyo viiri-idhe abaleeao ira tasukwale. Venango aliwa tanooda onanga ira baliuo utodimeli-iwa venango thitho vinodha kala ira abaliwa tanoidanana maningi na Amboni dha Yohova. Masiki abalee a Yesu, vahora inango katasangalala na vyongo vyaira liye. (Mrk. 3:21; Ju. 7:5) Mukami-enga namafunjedhinyuo ira akalenga oleva rima thitho aongenga moriya rima naatu enango votapanya naabalee.

16. N’nga ninakami-e a-vi namafunjedha Bibilya ira aongenga movweya vyongo vinororomela liye?

¹⁶ Angalive ira abalee tanooda thonyi-edha ifunelo, ndipama ira namafunjedhuo a-aawandelenga vyongo vinjinji vahora imbo-ive ovela ira tanodha chenyela na vyevyo thitho vyevyo vinodha iri-a ira ta-afunenga vuruwana. Ee-no munlimbi-enga ira aongenga vyongo vinororomela liye mundhila yoi unooda tapanya naaliwa hora inango. (Ako. 4:6) Venango thitho unooda limbi-a abaleeao ira tavolowenga va jw.org. vyevi vinodha akami-a ira tafunjedhenga vyongo vinjinji vyokuza Amboni dha Yohova vahora iwene.

17. N’nga munakami-e a-vi namafunjedhinyu ira aodenga wakula pama atu enao anokaana mathuulelo odaweya okuza Amboni dha Yohova? (Muone thitho iruthiruthi.)

¹⁷ Munooda indi-edha basa jw.org vaikhundu yoi “vyofuka vyokumela waalimbo leri” vokami-a namafunjedhinyu idhiwa mwemo munawakulele liye vyofuka vyevyo vinafuke abalee venango afwee abasani. (2 Ti. 2:24, 25) Komoni wa yofunjedha iliyothene mubukhu loi Ingumi Yokalao Dhowa Nodhowa, mutapanyenga ikhundu yoi “vinoonga atu enango.” Mum’libi-enga namafunjedhinyuo ira adhilimbi-edhenga wakula madhu eene baa-i. Mum’kami-enga lemba vyowakulavyee ira vikale vyapama. Vyevi vinooda m’kami-a ira aongenga molimba rima vyongo vinororomela liye.

18. N’nga ninakami-e a-vi namafunjedhi-u ira arome m’lambela Yohova? (Mateu 10:27)

¹⁸ Yesu atoowandela anamafunjedhee ira talaleelenga milanyu yapama waatu othene. (Muleri Mateu 10:27.) Namafunjedha aroma mombara wandela atu enango vyongo vinororomela liye, paevo vanoroma liye m’nyindela maningi Yohova. N’nga munam’kami-e a-vi ira akaena vifunelo vyevi? Vakala milanyu yoonga basa lavakhundu lolaleela, munlimbi-enga namafunjedhinyuo ira athuulelenga vyongo vinaire liye ira akale namalaleela ofwanelela. Munooda mmwandela mwasee atu anjinji anoona ira vinokala vyo-orucha roma laleela vahora ninga yen’na. Unooda ganyali thitho akala utokaana ifunelo yoi unooda onganga ikhundu vamigumano yavari vasumana. Akwakwaneli-edhanga ifunelo yen’na, unodha funjedha mwemo munaongele liye pama vyongo vinororomela liye.

MUM’THONYI-EDHENGA NAMAFUNJEDHINYU IRA MUNOM’ROROMELA

19. N’nga Yesu athonyi-edhe a-vi ira anoororomela anamafunjedhee, n’nga ninam’sazi-edhe a-vi?

¹⁹ A-anadhowe dhulu, Yesu atoowandela anamafunjedhee ira, hora inango, aliwa tanodha kala vambo-i na liye. Kataidhiwa ira Yesu athapulela ira aliwa tanodha dhowa dhulu. Mbwenye Yesu athuulela vya iroromelwiwa a-kala kaikela wiwa. (Ju. 14:1-5, 8) Liye anooidhiwa ira vanoofuneela hora yokwakwanela ira aliwa tavwecheche vyongo vinango, ninga vyokuza idedi-edho yodhowa dhulu. (Ju. 16:12) I-yo thitho nithonyi-edhenga ira ninororomela ira namafunjedhi-u unofuna m’sangalali-a Yohova.

20. N’nga rongola mwinango wa Malawi athonyi-edhe a-vi ira anoororomela namafunjedhee?

²⁰ Kanikaikelenga ira namafunjedhi-u unofuna irana vyongo vyofwanelela. Ifwanafwani-o vamwasula ndi rongola mwinango wau Malawi dhinalee Chifundo. Liye anoofunjedha Bibilya na m’ma mwinango waikatolika dhinalee Alinafe vo-indi-edha basa bukhu loi Ingumi Yokalao Dhowa Nodhowa. Tangafiile komoni wa yofunjedha 14, Chifundo atoom’fuka namafunjedhee mathuulelwee vamwasa o-indi-edha basa vifwano volambela. Alinafe angathakaleliwile na yofuka yen’na liye aongile ira: “Mutu uliwethene unooda sakula i-ndi-edha basa vifwano venango kabe.” Chifundo athuulela ira funjedhao kunodha dhowave vasogolo, mbwenye moleva rima atoodhowanave funjedha na Alinafe wu adedi-edhelanga ira dambo n’nango unodha rumela pama likhundo leli. Vangavirile myedi yoyeva, Chifundo atoofuka namafunjedheuo yofuka yeniyo ili muyofunjedha 34 yoi: “Vofiya va-eeni, funjedha Bibilya thitho vyokuza Nlungu waimbarimbari, uukami-idheni a-vi? Voonga vyongo vyawakunle Alinafe, Chifundo aongile ira: “liye atoonga makhundo manjinji osangalali-a. Limbo-i mwamakhundwala, lali loi Amboni dha Yohova katinoira yongo iliyothene yoi Bibilya kinorumeli-a.” Va-anavire hora indendai, Alinafe atoo-iya i-ndi-edha basa vifwano thitho atoobadiziwa.

21. N’nga ninalimbi-e a-vi namafunjedhi-u ira akale ofunechecha sakula m’lambela Yohova?

²¹ Angalive ira Yohova ngwenuo “unoulukuli-a,” nitokaana izo yofunji-a anamafunjedha Bibilya ira tadhowe vasogolo. (1 Ak. 3:7) Vatokala vyongo vinjinji vyevyo vinaire i-yo vowenjedhela vom’funji-a ira aidhiwe vyongo vinofuna Nlungu. Ninom’kami-a ira am’dhiveliwengana maningi Yohova. Ninom’limbi-a thitho ira athonyi-edhenga ira unom’dhiveliwana Yohova thitho m’ela valimburo loroma. Ninon’funji-a thitho ira am’nyidelenga Yohova agumanangana vyowesedha. Nathonyi-edhanga ira ninom’nyindela, ninom’kami-a ira a-akaikelenga masiki a-rela makhundo a Yohova thitho sakula nlabela.