“Yohova ngumwinyaa khondo”

Mu 1999, guverno wau Farasa watoonga ira tambi ya ilambwiyo yanofuneela velela kobiri dhamisoko dhedho dhavelela aliwa romela mu yawa ya 1993 fiyedha mu yawa ya 1996. Natoodhilimbi-edha tukula mwasula wu guverno lau Farasa ira longomano lioneye mbwenye kavyakami-idhe. Natodhilimbi-edha tukula karta lamwasula mbwenye kavyakami-idhe iliyothene ee-no guverno latoowaka kobiri dhokwaranya mamilyau 6.3 dolare dhedho dhali kota ya ofesi yatambi. Ngari yan’na i-yo ira niweli-edhiwe kobiridhi ali tukula mwasuo dhowana wu tribunale loona vyaufulu waatu lau Europa. Wa-anatongiwe selula tribunale latoira masaka-edho oi rumiwi oimelela tribunalelo, i-yo vambo-i na alimbo imelela guverno nitapanye noona akala ninooda fwanya ndhila yomali-edha mwasula wa-anadhowe tribunale.

Nadedi-edhela ira rumiwi oimelela tribunalelo unonikanyi-edha velela kobiri vang’ono dhedho dhafuna guverno. Mbwenye nanoidhiwa ira velela kobiri masiki dhikale dhoyeva wakale o-iyana namakhundo a Bibilyani. Mwasiwa abali naarongola tali tangavelenle kobiridho ira dhikami-e vabasa la Umwene. Ee-no kadhafuneela dhowa wamaguverno. (Mat. 22:21) Natodhowa gumanonio vofuna lemeza malamulo a tribunalelo.

Gumanula waireele kwartuni vatribunale lelo lali lobaleya maningi. Tapanyao kwaaromile pama. Mwasiwa madhwee oroma, Oimelela tribunalelo atoonga ira adedi-edhela ira Amboni dha Yohova tanofwanela velela kobiri dhinango wu guverno lau Farasa. Mo-odedi-edhela ndatoofuka ira, “N’nga munoidhiwa ira guverno litoniwaka wale kobiri dhokwakwana mamilyau 6.3 dolare?”

Liye atodabwa maningi angavwide vyevyo. Alimbo imelela miselwiyo tangarumelele ira guverno litoiradi vyevyo, mathuulelo amulimbo imelela tribunalule tatoochinjelatu hora imbo-ive. Liye atoanyanyuwela maningi alimbo ing’anela miselwao thitho atoomali-a mwasuo. Ndatoozindiyela ira Yohova utonikami-a mundhila ya-adedi-edhela i-yo ira niganyali vaselula. Natookumavo vagumanonivo nangali osangalala maningi thitho kanavwechechile vyevyo vyaireilevyo.

Va 30 wa Junho yawa ya 2011, tribunale loona vyaufulu waatu au Europa latootonga seluo moniriyela rima. Tribunalelo latootonga ira kaninofwanela velela misoko thitho guverno linofwanela weli-a kobiri dhothene thitho wenjedhelavo dhinango. Tonga o-odiwaleyau watoiri-a ira lambela uwendenga pama wu Farasa fiyedhela va-eni. Yofuka yo-odedi-edhelaile yali ninga libwe lelo Davide lampidhena liye Goliyati. Latokami-a ira vyongo vichinje. N’nga mwasiwa ngwani natoganyali selula ee-ni? Namwasa movwelana namadhu a Davide am’mwandele liye Goliyati, “Yohova ngumwinyaa khondo.”—1 Sa. 17:45-47.

Selu waganyanle i-yo kaali wena ba-i. Mwaifwanafwani-o, matribunale malukulu malukulu avilambo 70 thitho matribunale enango oona vyamiselu tatotonga miselu yokwakwana 1.183 Moriyela rima Amboni dha Yohova. Matongelwala tatoobarela ufulwi-u, ninga ufulwi-u oidhiwa malamulo areligiawi-u, ufulu olaleela, okonda sanganiko dhothonyi-edha dhiveliwa ilamboyaa, thitho okonda e-liwa sangiri.

N’nga vyaodeile a-vi ira nifwanyeevo va miselu yawu Europa vevo varumiwile miyo na Sede lavailambo yothene yavathi la Mboni dha Yohova musidadi la Nova York, wu Estados Unidos wa America?

NDAULUKUNLE NA ANAMABALA ENAO TALI ODHOWA VASOGOLO VAMABASA AWU MISIONARIO

Anamabalanga George na Lucille, enao tavolowile mu kalasi ya numero 12 ya xikola ya Giliyadi, tatoolabela wu Etiyopiya thitho miyo ndabaliwile mu 1956. Aliwa tatondiva-a dhina loi Filipi votukulela dhina la namalaleya mwinango wamuhora ya arumiwi. (May. 21:8) Yawa yo-arela guverno latookondi-a lambela wi-u. Angalive ira ndali mwana maningi banjali-u lanolambelecha mo-odhioneli-edha. Ninga mwana, ndathuulela ira vyevyi pyosangalali-a. Mbwenye pyovwi-a tangaranga ira andimuwa andimuwa amaguverno, tatooniwandela ira nikumemo muilambwiyo mu yawa ya 1960.

Banja li-u latoothamela wu sidadi lawu Wichita, wu Kansasi wu Estados Unidos wa America. Anamabalanga tanoodhiveliwana laleela ninga mwairela aliwa tangali amisionario. Aliwa tanodhiveliwana mainingi imbarimbari moi tatoondifunji-a miyo, balanga wa-iyana wandimuwa Judy, nang’onwanga Leslie, ira nidhiveliwangana Yohova thitho nom’lambela narimi-u othene. Ndabadiziwile ndingana vyawa 13. Vangavirile vyawa viraru, banjali-u latoothamela wu Arekipa, wu Peru, weo wafuneela anamalaleya anjinji.

Mu 1974, ndangan’na vyawa 18 baa-i, ofesi ya tambi yawu Peru yatondiruma miyo na abali enango 4 ira nimalabelenga ninga Apainiya avakundu. Nanoolaleela tatamo lelo lali la-analaleeliwevo wu myango ya Andesi. Nanoolaleela thitho atu amutatamu laongiwa iongelo ya Quechua na Aymara. Nadhowecha na karo yairomolecha i-yo ira mwadiya namwasa wamaoneelwiwa. Ndinosangalala ndathuulela hora ya-indi-edha miyo basa Bibilya vokami-a atu atatamuiyo idhiwa ira vachineneeva Yohova unodha mali-a nyarwa dhothene ninga upawi, marenda thitho na ukwa. (Apk. 21:3, 4) Atu anjinji tavwa milanyu ya Umwene tanooroma m’lambela Yohova.

NDATOOROMA LABELA WU SEDELI-U LAVAILAMBO YOTHENE

Mu yawa 1977, Bali Albert Schroeder, ali wagulu lotonga la Mboni dha Yohova, liye atodha dhaona thambi yawu Peru. Liye atondilimbi-a ira ndilembe petisau ya urumiwi wavabeteli thitho ndatooiranadi vyevyo. Va-anavire hora, va 17 wa Junhu mu yawa ya 1977, ndatooroma tumikela wu beteli yawu Brooklyn. Va vyawa 4 vyo-arela, ndatolabela mu departameto locheni-a thitho yosaka-edha vyongo.

Mu Junhu yawa ya 1978, ndatoogumanana na Elizabeth Avallone wu gumano wavilambo, wenuo waireile wu Nova Orleans, wu Louisiana. Liye thitho aulukunle na anamabelee enao mofwanafwana na anamabalanga tanoodhiveliwa imbarimbari. Elizabeth ali angalambenlevo Yohova ninga Painiya okaatheya wavyawa 4 thitho anofuna ira urumiwi wahora dhothene waingumiyee yothene. Natoroma waredha, thitho va-anavire hora indendai natoroma dhivelana maningi. Natothelana va 20 wa outubro yawa ya 1979 thitho natoroma tumikela va Beteli ninga banja.

Abali naarongola a Pingwi-u oroma wau Espanhol Brooklyn tanoonidhiveliwana maningi. Wa vyawa vyevyo natotumikela thitho mipingo inango miraru thitho abali na arongola takadhi tanilimbi-anga nonikami-a vaurumiwi wava Beteli. Ninosimba maningi kami-o liwa thitho laafwi-u naabali-u enao tanikami-idhe samalela anamabali-u oulula.

NDATOROMA LABELA MU DEPARTAMETO LAVYA MALAMULO

Mu Janeiro yawa ya 1982, ndatoodabwa ira ndatoitaniwa ira ndimalambelenga wu departameto la vya malamulo va Beteli. Vangavirile vyawa viraru, tatoonditumiza wu universidade ira ndimafunjedhe vya malamulo ira ndikale mulimbo ing’anela miselu. Vahora yafunjedhamiyo, ndatodabwa ona ira maufulu manjinji enao atu apwaza aliwa mu ilambo ya Estados unidos thitho vilambo vinango, tatoolimbi-iwa namwasa miselu yeniyo Amboni dha Yohova yaganyali aliwa. Atu tanootapanya maningi miselu yofuneila kalasini.

Mu yawa ya 1986 ndangana vyawa 30, ndatoo-eliwa kala oing’anela vya malamulo. Ndanoona ira njingari ilukulu, mbwenye namwasa oi ndali mwana kandaidhiwa vinjinji vyokuza urumiwula, ndanoova.

Ndatomari-a funjawanga thitho ndatookala mulimbo ing’anela miselu mu 1988, mbwenye kandaidhiwa ira funjedhawu ungaodile dodomi-a ingumi yanga yauzimu. Funjedha wavadhulu unoiri-a ira mutu arome dhigweli-a vionanga ira ngofuneya kwaranya atu a-afunjile mofwanafwana naliye. Mbwenye Elizabeth atoondikami-a ira ndirome okoka irana vyongo vyevyo vinandikami-e ira ndikale vauxamwali wapama na Yohova ninga mwali aliwa nda-anadhowe wu xikola ya malamulo. Vatovira hora , ee-no adhamale uxamwalanga na Yohova watoolimba okoka. Nditosikimizela ira yofuneya maningi vaingumi kai kala ofunja maingi. Yofuneya kukala vauxamwali wapama na Yohova, thitho dhiveliwana atwee.

BARELA NOKHATHEI-A MALAMULO ABASA YOLALEELA MILANYO YAPAMA

Ndingamari-idhe funjedha vyamalamulo ndatooroma khami-a vabasa yokhuza vyamalamulo vabeteli thitho barela gulu la Nlungu na ufuluwi-u olaleela. Basa langa ali yosangalali-a mbwenye vanokala vyorucha akala vyongo vitochinja mombaranya mugulunimwi-u. Mwaifwanafwani-o, romela mu yawa ya 1991, departamento ya vyamalamulo yatoovephiwa ira imakhami-e velela malangi-o ira mabukwi-u ta-akhaengana pereso. Romela vahora yeniyo, amboni dha Yohova anogawa mabuku vo-oonga pereso mbweye unokalenga funa wamutuo. Vyevi vitoyevi-a mabasa wu beteli thitho kobiri fiyedhela va-eni, vitonikhami-a ira na-apagali-iwenga misoko yo-ofuneela. Enango tathuulela ira chinja wewu unoiri-a ira gululi-u lifwanyenga kobiri dhoyeva thitho vinododomi-a mabasa olaleela. Mbwenye kavyaireile ninga mwathuulela aliwa. Numero yaatu anolabela Yohova romela mu 1990 itowenjedheleya maningi, thitho malamboano atu anoodha fwanya yodya yauzimu yova-a ingumi vo-opagali yongo iliyothene. Nditoona ira kopolo dhinoniva-a Yohova thitho malangi-o anovelela liye dhela wa daari ororomeleya na wazelu, ndivyevyo vinokami-a ira chinja weu thitho chinja unango weo uireile mugulunimu ukale owodeya.—Eki. 15:2; Mat. 24:45.

Kaira ninoganyali miselwila namwasa okaana oimelela miselu apama. Hora dhinjinji, inoiri-a andimua-andimuwa amaguverno ira tanikani-e ndi kalelo lapama laatu a Yohova. Ndatoona ifwanafwani-o yavyevi mu 1998 vevo abali araru a gulu lotonga naa-iyaniwa tatoofwanyeya vagumano wavakhundu wu Cuba. Aliwa tali oriya rima thitho alemezo, thitho vyevi vyatoovelela umboni wakopolo wa andimuwa-andimuwa amaguverno oi kaninovolowela vyandale kwaranya vyatapanyilena i-yo vamigumano yo-iyana-iyana.

Mbwenye hora dhinango myasa yokhuza malamulo daimwananeya vothapanya, nanofuneela dhowana wu tribunale naifunelo ‘yobarela milanyo yapama nokhathei-a malamulo a basa yolaleela milanyo yapama.’ (Afi. 1:7) Mwaifwanafwani-o, wavyawa vinjinji andimuwa andimuwa amaguverno awu Europa na awu korea do Sul katazindieele ufulu wi-u okhonda kala nyakhondo. Namwasa wa vyevi, abali 18,000 awu Europa thitho okwaranya 19,000 awu korea do Sul tatoomangiwa namwasa okhonda volowa unyakhondo.

Khomoniwee, va 7 mwedi wa Julho yawa ya 2011, tribunale loona vya ufulu waatu awu Europa latootonga mo-odhiwaleya va selu wa vari va Bayatyan na guverno la Armenia. Tonga wewu watokami-a ira amboni dha Yohova awu Europa ira tava-iwenga mabasa enango malo mwaunyakhondo. Tonga ninga weu watoireya thitho natribunale la wu Korea do Sul va 28 mwedi wa Junho yawa ya 2018. Khavyaodeye ganyali va miselu yen’na aakale ira abali azombwe avilambo vyevi atorumela laba basa launyakhondo.

Abali a departamento la vyamalamulo wu sedeli-u thitho maofesi atambi vailambo yothene anolaba basa mwathindhi vobarela ufulwi-u wolambela thitho basa li-u lolaleela milanyo yapama. Ninosimba maningi ngari yoimelela abali naarongola enao anoruni-iwa namaguverno. Akala ninoganyali selu venango kabe, fwanyeya wi-u matribunale unokhami-a ira nilaleelenga andimuwa andimuwa amaguverno, mamwene thitho maziza aaatu. (Mat. 10:18) Anamatonga, oimelela guverno, majornalista thitho atu enango anothuulela malemba anoindhi-edhela i-yo basa vamiselwila. Atu oriya rima anoidhiwa vinjinji vyokuza amboni dha Yohova thitho ira vinororomela aliwa vinokumela Bibilyani. Enango mwa atu enala tanoroma m’lambela Yohova.

NDINOSIMBA YOHOVA!

Va vyawa 40 vivirilevi, ndatokaana ngari yolaba basa naabali amuofesi yatambi vailambo yothene vamyasa ya malamulo thitho oneela matribunale o-iyana-iyana thitho vamethoni va andimuwa andimuwa amaguverno anjinji. Ndinodhiveliwana thitho simba afwanga enao ndalabana miyo basa wu departamento ya vyamalamulo wu sedeli-u thitho enao tali maofesi atambi vailambo yothene. Yohova ukadhi andiraeli-anga thitho ndinosangalala.

Elizabeti ukadhi andikami-anga mororomeleya thitho mwaudhivela wa vyawa 45 vivirile ndulimu, vahora yapama thitho yorucha. Ndinom’simba namwasa ukadhi airangana vyevi angalive ira unobulela marenda enao anoiri-a ira yobarela manungwee ikalenga yothitha thitho kopolodhee dhiyevenga.

Nitoona ira Yohova ngwenuo aniva-a kopolo thitho nikami-a ira niganyali. Vale Davide atoonga ira “Yohova ndi kopolo waatwee.” (Sal. 28:8) Onga mwaimbarimbari, “Yohova ndi mwinyaa khondo.”