1925​​—⁠Vyawa 100 vivirilevyo

VYONGO VYADEDHI-EDHELA IYO VYA-AIREYE

Mu yawa ya 1925 Anamafunjedha Bibilya anjinji tanodedi-edhela ira ilambwila inodha kala paradaiso. N’nga mwasiwa Ngwan’ni? Bali Albert Schroeder oi vasogolovee atotumikela mu Gulu lotonga aongile ira: “Naroromela ira mu yawa ya 1925 ozoziwa anodha dhowa dhulu thitho Makristau ororomeleya ninga Abrahamu, Davide na enango, anodha venyathi-iwa nosogolela atu vailambwila ninga anamaing’anela a Umwene wa Nlungu.” Mbwenye abali naarongola tatoosukwala tangaoni ira yawa inafiya komoni thitho vyadedi-edhela aliwa kavyaireile.—San. 13:12.

Angalive ira tatoosukwala, anamafunjedha Bibilya anjinji tatoodhowanave laba basa yolalelela mwatindhi. Aliwa tatooroma zindiyela ira laleela vyokhuza Yohova yali basa yofuneya maningi. Mwaifwanafwani-o, dhoweni nione vyevyo vyairile aliwa ira talaleele atu anjinji vo-idhi-edha basa Radiyo.

TATOOMANGA NYUMBA DHINJINJI DHA MARADIYO

Mu yawa ya 1924 atu anjinji tatoovuruwana Radiyo ya WBBR. Vyevi vyatooiri-a ira mu yawa ya 1925, anamafunjedha Bibilya tamange nyumba inango yakopolo maningi ya Radiyo vaduzi na Chicago wu Illinois. Nyumbila yanoogiwa ira WORD. Ralph Leffler wenuo ali mutu wadodoliso amangile nyumbila atoonga ira “muhora yodidila namaulo atu visa vyolapela tanoovuruwana Radiyola.” Mwaifwanafwani-o, Banja linango linokala olapela kwaranya makilometro 5000 mu sidadi la Pilot Station wu Alaska latoovuruwana imbo-i mwa myasa yoroma garavariwa va radiyola. Vasogolo vovuruwana, latoolemba karta waatu talaba basa wu Radiyonio yowasimba na mwasa wa porograma yauzimu yolimbi-iyo.

Nsanja yanamaing’anela ya 1 wa Dezembro ya 1925 yatoonga mwasee atu a visa vyolapela aodela vuruwana Radiyola, yaongile ira: “Radiyola ali mbo-i mwamaradiyo akopolo maningi mu ilambo ya Estados Unidos. Atu anjinji takala chereerani mwa bara umakhumelo aduwa na mavirelo adhuwa awu Estados Unidos Cuba thitho wu makhumelo adhuwa wa Alaska tanoodha vuruwana Radiyola. Radiyola wanookami-a atu enao tali ta-anavwevo imbarimbari kaana ifunelo yofuna uvwa vinjinji.”

Vahora yeniyo thitho anamafunjedha Bibilya tatooira masaka-edho oi ta-indi-edhenga basa Radiyo volaleela milanyu yapama wu Canada. Mu yawa ya 1924 tatoomanga nyumba ya Radiyo yoongiwa CHUC wu Saskatoon wu Saskatchewan. Nyumbila yali imbo-i mwa nyumba dha Marelegiau oroma a maradiyo wu Canada. Mu yawa ya 1925 tatoothami-edha nyumba yaradiyola wu limburo lilukhulu. Ee-no gulu la Watch Tower Society latoogula nyumba inango ya Regent Building yeniyo mwaireliwa mawaredhelo wu, Saskatoon noisakha-edha ira taongengamo madhu thitho tatootami-edhelamo vyongo vyalabana aliwa.

Nyumbila yatookami-a atu anjinji takala masidadi an’gono thitho visa vyolapela maningi wu Saskatchewan ira tavwe milanyu yapama wa hora yoroma. Mwaifwanafwani-o mu sidadi yolapela maningi, m’ma mwinango dhinalee Graham angavuruwanile Radiyo atoolemba karta yovepa mabukhu okami-a vofunjedha Bibilya. Bali George Naish aongile ira, “Yovepa ya m’muo yali yoneelatu ira unofunechecha roma funjedha mombaranya ee-no natoom’tumizela bukhu la Studies in the Scriptures.” Va-anavire hora, m’ma Graham atooroma laleela milanyu ya Umwene mu visa vyolapela maningi.

VWECHECHA MAKHUNDO A IMBARIMBARI

Nsanja yanamaing’anela ya 1 wa março ya 1925 yatookaana muru o-odiwaleya oi “Baliwa wa ziza.” Mwasiwa ngwan’ni mwasula wali ofuneya? Anamafunjedha Bibilya tatoodhiwa ira Satana utokaana gulu laangelo othakala enao ta-anooneya thitho anosogolela magulu a marelegiau, alimbo ira goso thitho avyandale vailambwila. Mbwenye vo-indi-edha basa mwasula “Daari ororomeleya na wazelu” atookami-a abali zindiyela ira Yohova utokaana gululee, lelo ndi lo-iyana maningi na gulu la Satana thitho linoruni-a vyoira vya Satana. (Mat. 24:45) Wenjedhela veva Dhaariyo atoonga ira ‘Umwene wa Nlungu watooroma tonga’ mu yawa ya 1914, thitho Satana na viwandavyee tatootamangi-iwa dhulu. Va-eeni tali vailambo yavathila.—Apk. 12:7-9.

Anamafunjedha Bibilya enango vyanowarucha vwechecha likhundo lipyali. Vothuulela vyevyo Nsanjila vyaongile aliwa ira: “Akala vatokala atu enango ta-anorumelela viongiwile mu mwasula, ninowavepa ira tadhowenave dedi-edha Mbwiye moleva rima, nodhowanave m’labela mororomeleya.”

Tom Eyre wau Britain wenuo ali painiya atoonga moda mwakhuzeile anamafunjedha Bibilya anjinji. Liye aongile ira: “Abali tatoosangalala na mwasa waongile vya bukhu la Apokalipse 12. Ningazindiyele ira Umwene utokaathi-iwa dhulu natoosangalala maningi thitho nanoofunechecha wandela atu enango vya milanyu yapamila. Yatoonilimbi-a ira nikaengana ifunelo yoirana vyongo vinjinji vabasa yolaleela thitho yatoonikami-a idhiwa ira Yohova unosogolela gululee ira liodenga irana vyongo vilukhulu sogolou.”

IRELA UMBONI VYA YOHOVA

Malamboano, Amboni dha Yohova anoidhiwa pama vya madhu ava Esaya 43:10 oi: “‘Nyo muli mboni dhanga,’ uongile ndi Yohova, ‘Ee, rumiwanga wenuo usakunle miyo.’” Mbwenye yawa ya 1925 ya-anafiye lemba leli kala-indi-edhiwa basa maningi mumabukwi-u. Ee-no vyongo vyali vinga-adhi vang’ono chinja. Mu yawa ya 1925 Nsanja yanamaing’anela yatoo-indi-edha basa lemba la Esaya 43:10 na 12 mu myasa 11 ya marevisti-u.

Komoni wa Agosto mu yawa ya 1925, anamafunjedha Bibilya tatooira gumano wagawo musidadi la Indianapolis wu Indiana. Va porograma ya gumanuo bali Joseph F. Rutherford atoolembavo madhu owachelana alendo oi: “Nitodha vagumanula ira nifwanye . . . kopolo yokhumela wa Mbwiye naifunelo yoi nawelelanga mudhi nidhowenave laba basa yolaleela mwathindhi.” Vagumano waireile wa malambo 8 atu tatoolimbi-iwa ira talabi-edhenga basa ngari iliyothene voirela umboni vya Yohova.

Sabudu va 29 wa Agosto Bali Rutherford atoonga mwasa wa muru oi “Laba basa mwathindhi.” Mumwasula atoolimbi-a funeya olaba basa yolaleela. Liye aongile ira: “Yohova unowandela atwee ira . . . : ‘Nyo muli mboni dhanga . . . thitho miyo ndili Nlungwinyu.’ Ee-no atoowatonga na madhu akopolo ira, ‘Atu a maziza o-iyana-iyana mutowagweli-edha izindiyelo.’ Kavali atu enango vailambo yavathi anooni-iwa izindiyelo a-kala [atwee], enao ana zimu wa Mbwiye thitho ndi mboni dhee.”—Esa. 43:12; 62:10.

Bali Rutherford’s angamari-idhe onga mwasee atooleri igamulo ya muru oi “Milanyu ya Idedi-edho.” Abali naarongola tatoovwelana na igamulo yaonga ira Umwene wa Nlungu baa-i ngunofuna dhairi-a ira “vyongo virome wenda pama, nodhi-a maraeli-o rendele, ingumi yapama, ufulu thitho sangalala o-omala.” Va-anavire hora, igamulwiyo yatootapuleliwa mu viongelo vyo-iyana-iyana nofyeteliwa vamatratadoni thitho tatoogawela waatu matratado 40 miliyoji.

Wa vyawa vinjinji Anamafunjedha Bibilya tali ta-anachinje dhina ira tarome indi-edha basa dhina loi Mboni dha Yohova. Mbwenye aliwa tatooroma zindiyela ira atokaana izo yolaleela vya dhina la Yohova.

WELELA WAATU ATONYI-EDHE IFUNELO

Vevo numero yaanamalaleya vyadhowanave aliwa wenjedheleya vailambo yothene, gulu la Yohova yatoolimbi-a abali ira malo mowagawelanga mabukhu baa-i, anofwane thitho dhowa waatu atonyi-edhe ifunelo tangavwide milanyu yapama. Vasogolo va basa yavakhundo yogawela matratado, yoonga ira Milanyu ya idedi-edho, Urumiwi wa Umwenea unoonga ira: “Muire masaka-edho ira muweleleo wu nyumba wa-agawenleo nyo mabukhu mbwenye mwa-iidhe nyo tratado ya Milanyu ya Idedi-edho.”

Mwasa wa Urumiwi wa Umwene wa Janeiro yawa ya 1925, lipoti n’nango latoonga vyaongile namafunjedha Bibilya mwinango wu Plano Sidadi lawu Texas. Liye aongile ira: “Natookaana ifunelo visa vyalaleelamo i-yo moweli-edha weli-edha atwee tanookaana ifunelo kwaranya atu amu visa vinango. Wa vyawa 10 vivirilevi, nikadhi nitumikelanga Sidadi linango ling’ono isa yi-u fendo 5 . . . va-eeni rongola Hendrix vambo-i na m’manga tatoolaleela mu Sidadila thitho tatoogawela mabukhu manjinji kwaranya enao agawenle i-yo ndulimu.”

Ilambo ya Panama, painiya mwinango aongile ira: “Atu oi voroma tanoonditamangi-a mavandhe mwiwa tanoochinja mathuulelwiwa ndawelelao fendo wili venango fendo taaru. Yawa imadhila ndatooira masaka-edho oi ndiwelelenga waatu alaleela miyo ndulimu thitho vyo-arelavovyee vyali vyapama maningi.”

VYONGO VINOFUNA DHAIREYA SOGOLOU

Kartalee layawa lodhowa wa apainiya othene, bali Rutherford atoonga vyongo vyaireile mu yawa yeyo thitho vyongo vyadedi-edhela aliwa ira viireye sogolou. Liye aongile ira: “Yawa ivirile mwatookaana ngari yolimbi-a atu enao tasukwanle thitho ovikhumbanyedha. Basa yen’na yatoukami-ani ira musangalalenga . . . Yawa inodhila munodha kaana ngari yoirela umboni vya Nlungu na Umwenee thitho thonyi-edha ira muli anama-arelee . . . Dhoweni i-yo othene nidhowenave kuwa mogweli-a madhu voomba notitimi-a Nlungu thitho Mweni-u.”

Yawa ya 1925 vyafiya aliwa komoni, abali atooira masaka-edho oi tawenjedhele nyumba ndhinango wu Beteli ya Brooklyn. Thitho mu yawa ya 1926 watooromeya basa ilukulu yomanga yoi yali ya-anaireyevo mugulu la Yohova.