Thapuleliwa wa madhu enango a Bibilyani

A B C D E F G H I K L M N O P Q R S T U V W Y Z

A

• Afarisi.

  Ndi gulu lovweya la anamalambela Aiyuda a muhora ya arumiwi. Aliwa katali a ziza la alimbo velela sembe, mbwenye tanoovwela Lamulo muvikhundu vyothene, masiki muvyongo ving’ono maningi. Thitho aliwa tanoolemeza sanganiko dhiwa ninga vyaira aliwa na Lamulo. (Mat 23:23) Aliwa tanooidanana maningi makalelo a Igiriki, thitho ninga atu oidhiwechecha Ilamulo ya Mose na sanganiko dhinango, aliwa tatookaana utongi ulukhulu vari vaatu. (Mat 23:2-6) Enango mwa aliwa tali mugulu la Tribunale Nlukhulu lotongela miselu. Hora dhinjinji, aliwa tanoom’mwidanana Yesu namwasa oi liye kaalokota Sabudu, kaa-arela sanganiko dhiwa, thitho anoowaredha naatu odawa vambo-i na alimbo khomi-a misoko. Afarisi enango tatookala Makristau, ninga Saulo wau Tarsi.—Mat 9:11; 12:14; Mrk 7:5; Luk 6:2; May 26:5.

• Alabastala.

  Ndi dhina la magarafwa mang’ono o-elamo makhura onukela asaka-edhiwile na libwe linofwanyeya duzi na Alabastroni wu Iguputu. Magarafwa enala hora dhinjinji anookaana lomo ung’ono olapa oi wanooda fungiwa ira makhura a-abomeye venango phurumuwa. Vasogolovee libwe leli lanooitaniwa na dhina loi Alabastala.—Mrk 14:3.

• Asaduki.

  Ndi gulu lovweya la anamalambela Aiyuda, loi mwatookala atu ofuma, autongi na alimbo velela sembe oi tanoosogolela mabasa airiwa vakachisini.

  Aliwa tanookonda sanganiko dhinjinji dha Afarisi na vyongo vinango vyaroromela aliwa. Aliwa kataroromela ira atu okwa tanodha venyathi-iwa, thitho kataroromela ira utokala angelo. Asaduki tanoom’mwidanana Yesu.—Mat 16:1; May 23:8.

B

• Belizebule.

  Belizebule ndi dhina n’nango la Satana, mwinyaa, venango namatonga wa viwanda. Vinooneya ira tachinjile dhina la Baala-Zebube, Baala alambeliwa na Afilisti au Ekironi.—2Ma 1:3; Mat 12:24.

C

• Chinyuwa.

  Bibliyani, madhu enala anothonyi-edha chinja wa mathuulelo oi unothangani-avo sukwala maningi namwasa wa ingumi yana mutu walelene, vyongo vyothakala viirile liye, venango imwanana irana vyongo vyafuna liye. Chinyuwa waimbarimbari unova-a vyova-a, vyoi khuchinja makalelo.—Mat 3:8; May 3:19; 2Pe 3:9.

D

• Dekapoli.

  Ndi dhina la masidadi mangaasi awu Gresiya. Voroma masidadala talivo 10 (Mu Igiriki ndi deka, loi linothapulela “10,” thitho madhu oi polis, anothapulela “sidadi”). Dekapoli lali dhina la tatamu lawu makhumelo adhuwa wa bara la Galileya na wu i-nje wa Yordani. Khuweo wafwanyeya manjinji mwa masidadi enala. Masidadi enala ali mamburo malukhulu mwaguli-edhiwa malonda, thitho ndi mamburo enala mwaoni-iwa makalelo awu Gresiya. Yesu atoovira tatamu yen’na, mbwenye kavali yongo ilembiwile inothonyi-edha ira liye atoodhowa maona masidadi enala. (Mat 4:25; Mrk 5:20).

• Denario.

  Ndi kobiri ya fero yoi yanoonyemela magrama 3,85. Ikhundu imbo-i ya kobirila, vatookala kove ya Kaisara. Ndi kobiri yatambili-iwa mutu alaba basa vadambo limbo-i, thitho ndi kobiri ya “soko” yavepa Aroma ira Ayuda tapagalinga. (Mat 22:17; Luk 20:24).

G

• Gehena.

  Ndi dhina la Igiriki la ipedipedi ya Inomu, lafwanyeya wu sul ikhundu ya mavirelo adhuwa a Yerusalemu wa wale. (Jer 7:31) Ulosula watoonga ira ndi limburo linofuna dhaponyedhiwa mitembo yaatu okwa. (Jer 7:32; 19:6) Kavali umboni unooni-a ira vinyama venango atu vyanooponyedhiwa wu Gehena vyangana ingumi, ira vika-iwe venango vioni-iwe nyarwa. Moi ee-no limburo leli kalinothapulela ira ndi limburo lo-ooneya loi atu okwa anooni-iwa nyarwa na mulo odhowa nodhowa. Mbwenye madhu oi Gehena, atoo-indi-edhiwa basa na Yesu vambo-i na anamafunjedhee vofuna pipirisa “wukwa wanambili”, venango thapulela ira nongiwa odhowa nodhowa.—Apk 20:14; Mat 5:22; 10:28.

• Goli.

  Ndi pedaso ya imuri ino-eliwa mafudini mwa mutu. Ikhundi imbo-i na imbo-i ya pedaswila inomangeleliwao mitolo. Pedaso yaimurila yanoomangeleliwa thitho ko-i mwa vinyama vinli (simbwasimbwa ng’ombe) ira vimburule mafwaramento olimana venango ngolo. Voi fendo dhinjinji adhaari tanoo-indi-edha basa goli vofuna tukula mitolo yonyemela, ngumwasiwa madhu oi goli ano-indi-edhiwa basa mopipirisa vofuna onga vya udhaari, venango tongiwa na mutu mwinango, thangani-avo nyingaleliwa nooni-iwa nyarwa. Khumi-iwa venango gwandiwa wa goli, unothapulela thathuliwa muudhaari, mala onyingaleliwa na ooni-iwa nyarwa.—Lev 26:13; Mat 11:29, 30.

H

• Herodi.

  Ndi dhina la ziza la anamatonga Aiyuda asakuliwile na Aroma. Herodi wa ndimuwa atoovweya maningi namwasa omangi-a okoka kachisi wu Yerusalemu thitho namwasa ophi-a a-ima vahora yasaka liye Yesu ira am’phe. (Mat 2:16; Luk 1:5) Herodi Arkelau na Herodi Antipa ndi a-ima a Herodi wandimuwa. Aliwa tatoosakuliwa ira tatongenga visa vinango vyamuilambo yatonga babiwa. (Mat 2:22) Antipa ali namatonga wa distrito oidhiweya pama ninga “mwene,” oi atootonga vyawa viraru na meya wari mwa urumiwi wa Kristu thitho atoodhowanave tonga fiyedha hora yaireya vyongo vilembiwile va Mayirelo kapitulo 12. (Mrk 6:14-17; Luk 3:1, 19, 20; 13:31, 32; 23:6-15; May 4:27; 13:1) Adhamale, Herodi Agiripa oroma oi ali dhuulu wa Herodi wandimuwa, atoophiwa na ngelo wa Nlungu, angatongile muhora yoyeva. (May 12:1-6, 18-23) Mwanee Herodi Agiripa wanambili, atookala namatonga fiyedha hora yadhimbinuweliwile Aroma na Ayuda.—May 23:35; 25:13, 22-27; 26:1, 2, 19-32.

I

• Iguwa ya sembe.

  Iguwa yosaka-edhiwa na mateya, mabwe, mabuloko a mabwe, venango matabwa a fero. Vaiguwanivo vanooveleliwa sembe dhoka-a venango dhonukela volambela. Mu kwartu loroma la sasa na la kachisi, mwatookala “isiiguwa ya sembe ya oro” yosaka-edhiwa na matabwa opintariwa na oro, vovelelelavo sembe dhonukela. Vaindharoni vatookala “iguwa ya sembe ya kuwa,” iguwa ilukhulu ya-indi-edhiwa basa vovelelelavo sembe dhoka-a.—Eki 39:38, 39; 1Ma 6:20; Mat 5:23, 24; Luk 1:11; May 17:23.

• Imuri yoonelavo nyarwa.

  Mu Igiriki madhu enala ndi staurós, anothapulela imuri yodhongowa ninga yathomeiwilevo Yesu. Kavali umboni unothonyi-edha ira madhu a Igirikala anothapulela randa venango kuruju, ninga vya-indi-edhiwa basa na mareligiau manjinji onama mu vyawa vinjinji Yesu a-anadhe vailambo yavathi. Madhu oi “Imuri yoonelavo nyarwa,” anovwei-a pama madhu a Igiriki, namwasa oi Yesu atoo-indi-edha basa madhu oi staurós vofuna simikizela nyarwa na manyadho vyafuna dhagunana anama-arelee.—Mat 16:24; Aeb 12:2.

• Izindiyelo.

  Ndi yongo, mayirelo, makalelo venango yongo yodabwi-a inothonyi-edha vyongo vinofuna ireya va-eeni venango sogolo.—Maro 9:12, 13; 2Ma 20:9; Mat 24:3; Apk 1:1.

K

• Kalavo.

  Makhundo enango a Malemba a Igiriki Aikristau, madhu enala ano-indi-edhiwa basa voonga vya kalavo wa Yesu Kristu ninga Mwene oi ngu Mesiya, romela vakaathi-iwile liye va pandoni wa Umwene dhulu nodhowanave muhora ya khomoni wa malambo omari-ala. Kalavo wa Kristu kunothapulela udha nowelela mombaranya, mbwenye unothapulela hora ikaathi-iwile.—Mat 24:3.

• Kokolani.

  Madhu enala anooda thapulele kokola lo-okala atu, lo-olimiwa venango louma. Madhu enala katinothapulela kokola lauseva baa-i.

• Khomoni wa malamboano.

  Ndi hora inodhowanave fiyedha khomoni wa malamboano, venango vyongo vili mu utongi wa Satana. Kalavo wa Kristu unooneela muhora yen’na. Mosogoleliwa na Yesu, angelo “tanodhadha dhakhumi-a atu othakala vari vaatu olongomana.” (Mat 13:40-42, 49) Anamafujedha a Yesu tanoofunechecha ira taidhiwe vya “khomoni” wa hora yen’na. (Mat 24:3) Yesu a-ana welele dhulu, atoalanyedha anamafunjedhee ira unodha kala vambo-i naaliwa fiyedha muhora yen’na.—Mat 28:20.

• Kristu.

  Madhu enala ndi izo ya Yesu, thitho akhumi-iwile mu madhu Aigiriki oi Khristos. Ndi saasawa na madhu Aiyebere oi “Mesiya,” venango “Ozoziwa.”—Mat 1:16; Ju 1:41.

L

• Libwe lavakhomoni.

  Libwe lo-eliwa vakhomoni ya nyumba, vanogumana machi-i menli ira takale o-indana. Libwe nlukhulu lavakhomoni, lali libwe la-eliwa kala sapato. Hora dhinjinji libwe leli lanoosakuliwecha ira limangiwena nyumba dhaatu na mipanda ya masidadi. Madhu enala ano-indi-edhiwa basa mopipirisa voonga vyopanduchiwa wa ilambo yavathi. Yesu unoongiwa kala “libwe lavakhomoni lino-eliwa kala sapato” la pingo wa Ikristau oi unofwanafwani-edhiwa na nyumba yauzimu.—Aef 2:20; Yob 38:6.

• Longomano.

  Bibilyani madhu enala ano-indi-edhiwa basa vofuna onga vyongo vyapama movwelana na maonelo a Nlungu va vyongo vyapama na vyothakala. Anooda thapulela thitho longomana wa mutu vamethoni va Nlungu.—Mar 15:6; Dot 6:25; San 11:4; Zef 2:3; Mat 6:33.

M

• Mabudu atembe o-elamo vinyu.

  Ndi mabudu atembe a vinyama ninga mbudi venango libila, thitho anoo-indi-edhiwa basa volokotedhamo vinyu. Vinyu wanoo-eliwa mabuduni atembe mapya, namwasa oi hora inothanuwa aliwa, unokhumi-a mwela oi unotupi-a mabudu atembao. Matembe mapya anotupa, mbwenye matembe awale mbouma, na-eno vinyu wathanuwa anoothweya.—Yoswa 9:4; Mat 9:17.

• Madrakima.

  Mu Malemba Aigiriki Aikristau, yen’na ndi kobiri ya fero yau Gresiya, yoi vahora yeniyo yanyemela magrama 3,4. Malemba Aiyebere anooni-a ira vatookala drakima ya oro muhora ya utongi wa Persiya, yoi pereswee yali imbo-ive na kobiri ya dariko. (Nee 7:70; Mat 17:24).

• Mwana Davide.

  Fendo dhinjinji madhu enala anoonga vya Yesu, vofuna gogomedha ira liye ngu mulimbo wachela yotuva ya vwelano ya Umwene yoi ingakwakwaneli-edhiwe dhela mwa mutu wa ziza la Davide.—Mat 12:23; 21:9.

• Mwana mutu.

  Madhu enala anofwanyeya fendo dhokwakwana 80 mu mabukhu a milanyu yapama. Anoonga vya Yesu Kristu thitho anooni-a ira namwasa obaliwawee mwaututuni atookala mutu, a-kala ngelo oi atoochinja manungwee. Madhu enala anothonyi-edha thitho ira Yesu ngwafuna kwakwaneli-edha ulosi ulembiwile va Danieli 7:13, 14. Mu Malemba Aiebere, madhu enala atoo-indi-edhiwa basa wa Zakiyeli na Danieli vofuna thonyi-edha i-yana wa anamavelela milanyu enala oi tanookwa, no i-yana ulivo na Mwinyaa wam’velelela aliwa milanyiwo.—Zak 3:17; Dan 8:17; Mat 19:28; 20:28.

N

• Namanami-a.

  Ndi dhina la Satana linofwanyeya mu Malemba Aigiriki Aikristau loi linothapulela “Mulimbo nukhedha.” Satana utova-iwa dhina loi Namanami-a namwasa oi liye ndi mulimbo nukhedha lukhulu, thitho unom’mongela Yohova vyongo vyonama, Madhwee apama na Dhinalee lochena.—Mat 4:1; Ju 8:44; Apk 12:9.

R

• Raruwa.

  Mutu wavabanjani mofunawee agonathi na mutu oi kai ma’nee venango i-yanee, utoraruwa.—Eki 20:14; Mat 5:27; 19:9.

S

• Satana.

  Ndi madhu Aiebere oi anothapulela “Oruni-a.” Satana Namanami-a ndi dhina la mwidani lukhulu wa Nlungu.—Yob 1:6; Mat 4:10; Apk 12:9.

T

• Talento.

  Ndi mwezo lukhulu maningi wa Iebere opimana vyongo venango kobiri. Talento imbo-i yanyemela makilu 34,2. Mbwenye talento ya Igiriki yali ing’ono maningi, moi yanyemela makilu 20,4. (1Li 22:14; Mat 18:24).

U

• Ubadizo; Badiziwa.

  Madhu enala anothapulela “bwini-a.” Yesu utoonga ira anama-arelee anofwanela badiziwa. Bibliya linoonga thitho vya ubadizo wa Juwau, badiziwa na zimu ochena, badiziwa na mulo na mitundu inango ya ubadizo.—Mat 3:11, 16; 28:19; Ju 3:23; 1Pe 3:21.

• Umwene wa Nlungu.

  Ndi madhu ano-indi-edhiwa basa voonga vya utongi ulukhulu wa Nlungu unoimeleliwa na utongi wa Mwanee, Kristu Yesu.—Mat 12:28; Luk 4:43; 1Ak 15:50.

• Unyambi.

  Muigiriki ndi porneia, enala ndi madhu ano-indi-edhiwa basa voonga vya tundu unango ogonana oi unokondi-iwa na Nlungu. Vyevi vinothangani-avo raruwa, unyambi, gonana waatu oi katili vabanjani, gonana wa alombwanave venango a-iyanave thitho gonana na inyama. Mu bukhu la Apokalipse, madhu oi unyambi tano-indi-edhiwa basa mopipirisa voonga vinoira “Babulo Nlukhulu.” Liye unofwanafwani-edhiwa na puta wa mareligiau, namwasa oi unoira uxamwali na anamatonga a ilambo ira aganyali kopolo na fuma.—Apk 14:8; 17:2; 18:3; Mat 5:32; May 15:29; Agl 5:19.

Y

• Yohova.

  Bibilyanimu dhina loi “Yohova” linofwanyeya fendo 241. Mu maverso manai a Malemba Aigiriki Aikristau oi dhina la Yohova lilembiwile “Yah,” Bibilyanimu lilembiwile lothene, “Yohova” (Apokalipse 19:1, 3, 4, 6 madhu achindo). Myasa iiri-idhe ira dhina la Nlungu li-indi-edhiwe basa njiila:

  1. 1. Mu mathakuru a Malemba Aiebere a-indi-iwile basa mu hora ya Yesu na arumiwee, mwali Tetragrama (yoi ndi dhina la Nlungu linoimelela maletra manai Aiebere יהוה).

  2. 2. Mu hora ya Yesu naarumiwee, Tetragrama yanoofwanyeya mu Malemba a Igiriki athapuleliwile khumela wu Malemba Aiebere.

  3. 3. Malemba Aigiriki Aikristau anothonyi-edha ira Yesu fendo dhinjinji anoongecha dhina la Nlungu thitho atooliidhiwi-a waatu enango.—Ju 17:6, 11, 12, 26.

  4. 4. Voi Malemba Aigiriki Aikristau alembi-iwile na Nlungu ira awenjedhele Malemba Aiebere alembi-iwile na liye, aakale ira dhina la Yohova kalinofwanyeya mu Malemba Aigiriki, vingathonyi-edhe ira makhundu enala mbo-ovwelana.

  5. 5. Mabukhu awale Aiyuda, anothonyi-edha ira Makristau Aiyuda tanoo-indi-edha basa dhina la Nlungu mu mabukhu alembile aliwa.

  6. 6. Atu enango osakasaka vyongo vya Bibilyani, anorumelela ira pyofwanelela ira dhina la Nlungu loi linofwanyeya mu Malemba Aiebere, lifwanyeye thitho mu Malemba Aigiriki Aikristau.

  Mabibilya okwaranya 100 a viongelo vyo-iyana-iyana, atokaana dhina la Nlungu mu Malemba Aigiriki Aikristau. Mo-okaikela, vatokala myasa yovweya ira dhina la Nlungu, Yohova, lilembiwe mu Malemba Aigiriki Aikristau. Piyevyo viirile anamathapulela a Bibilya la Ilambo Ipya. Aliwa tanolemeza maningi dhina la Nlungu, thitho aliwa katinokhumi-a yongo iliyothene inofwanyeya mu malemba oroma.—Apk 22:18, 19.

Z

• Zimu.

  Madhu oi “zimu” Muiebere ndi rúahh, Muigiriki ndi pneuma. Madhu enala anothapulela vyongo vyo-iyana-iyana. Vyongo vyothene vinothapulela madhu enala, anoonga vya yongo yoi atu katinooda iyona na metho, thitho inothonyi-edha ira ndi kopolo inolaba basa. Muiebere na Muigiriki, madhu enala anoonga vya (1) lipevo, (2) kopolo ya ingumi ili mu vyongo vyava ilambo yavathi, (3) kopolo inokanyi-edha mutu yoi inokhumela rimanimwee mopipirisa, inom’sogolela ira aonge venango irana yongo, (4) madhu ovudheleliwa oi kakhumile waatu, (5) angelo na (6) kopolo ya Nlungu venango zimu ochena.—Eki 35:21; Sal 104:29; Mat 12:43; Luk 11:13.

• Zimu ochena.

  Ndi kopolo yo-ooneya inolabi-edha basa Nlungu vofuna kwakwaneli-edha ifuneloyee. Zimu wen’na ngochena namwasa oi unokhumela wa Yohova, oi ngochena thitho olongomana maningi. Thitho namwasa oi unolabi-edhiwa basa na Nlungu, vofuna irana vyongo vyochena.—Luk 1:35; May 1:8.