Mwasiwa ngwan’ni ninofwanela m’mova Yohova?

1-2. Movwelana na lemba la Salimo 25:14, n’nga ninofwanela iran’ni akala ninofuna kala vauxamwali wapama na Yohova?

N’NGA munothuulela ira ndi makalelo a-vi ofuneya ira mukale vauxamwali na mutu unango? Mo-okaikela, munooda onga ira axamwali aimbarimbari anofwanela dhivelangana thitho kami-ana. Pyoodeya ira kamunathuulelevo ira ova tikalelo lofuneya ira atu takale vauxamwali wapama. Mbwenye ninga mwemo lemba linosogolela mwasula munothonyi-edha aliwa, atu anofuna kala vauxamwali olimba na Yohova anofwanela “m’mova.”—Muleri Salimo 25:14.

² Akala ninomlabela Yohova wa hora indendai moi a-vi, i-yo othene ninofwanela dhowanave m’mova maningi. N’nga m’mova Nlungu unothapulelan’ni? N’nga ninofunjedhavoni vamwasa om’mova Yohova? N’nga ninofunjedhevon’ni wa Obadiya, ndimuwa waalimbo velela sembe, Yehoyada thitho mwene Yehoasi vamwasa om’mova Nlungu?

N’NGA OVA NLUNGU UNOTHAPULELA N’NI?

3. Muonge vyongo vinango vyevyo vinaniiri-e ova, thitho munanikuzele aliwa.

³ Hora dhinango ninooda ova akala ira ninoidhiwa ira ninogumanana nyarwa dhinango. Ova oi e-ni kofwanelela thitho unonikami-a ira niire vyongo mwazelu. Ova ugwa unoniiri-a ira na-awende chereerani mwaipedipedi. Ova peya unooda niiri-a ira na-avire valimburo loopi-a. Thitho ova mali-a uxamwali-u na mutu unomdhiveliwana i-yo, unoniiri-a ira na-aongenga venango irana vyongo vyevyo vinamsukwali-e.

4. N’nga Satana unofuna ira niovenga moi a-vi voonga vya Yohova?

⁴ Satana unofuna ira atu tam’movenga Yohova mo-ofwanelela. Liye unolimbi-a mathuulelo ana Elifazi oi Yohova ngu Nlungu unoiri-a vyongo vyauwalanga, ngwauwali thitho pyo-oodeya msangalali-a. (Yobo 4:18, 19) Satana unofuna ira nim’movenga maningi Yohova thitho nifiye vo-iya mlambela. Ira nirambele go-i wen’na, ninofwanela mlemezanga Yohova thitho m’movanga mofwanelela.

5. N’nga m’momva Nlungu unothapulelan’ni?

⁵ Mutu unom’mova Nlungu mofwanelela unomdhiveliwana thitho kanofuna irana yongo iliyothene yeniyo inadodomi-e uxamwalee na liye. “Yesu anom’mova Nlungu” mwandhila yen’na. (Aeb. 5:7) Liye kaam’mova Yohova ninga mutu unango oopi-a. (Esaya 11:2, 3) Malomwee, anomdhiveliwana maningi thitho anofuna mvwela. (Ju. 14:21, 31) Moladana na Yesu, i-yo thitho ninomlemeza maningi Yohova namwasa oi ngwaudhivela, wazelu, walongomano thitho wakopolo. Ninoidhiwa thitho ira Yohova unonidhiveliwana maningi thitho unokuziwa na vyevyo vinoira i-yo aniva-a malangi-o. Ninooda m’mwiri-a ira avwenga upa rimanimwee venango sangalali-a rimee.—Sal. 78:41; Sang. 27:11.

NINOODA FUNJEDHA M’MOMVA NLUNGU

6. N’nga ndi ndhila imbo-i ivi yeniyo inanikami-e ira nifunjedhe m’mova Nlungu? (Salimo 34:11)

⁶ I-yo othene kaninodabwa na rima om’mova Yohova, malomwee ninofwanela dhilimbi-edha ira nikaena rima wenuo. (Muleri Salimo 34:11.) Ndhila imbo-i inofwanela i-yo irela vyevi, ndi thuulela vyongo vipanduchile liye. Naonanga zelu, kopolo thitho udhivela wa Nlungu wa i-yo atu, vyevyo vinooneela “muvyongo vipanduchile liye,” ninoroma mlemeza thitho mdhiveliwana maningi. (Aroma 1:20) Rongola unango dhinalee Adrienne aongile ira: “Zelu dha Yohova, dhedho dhinooneela muvyongo vipanduchile liye, vinondidabwi-a maningi thitho vinondikami-a zindiyela ira liye unoidhiwa vyongo vili vyapama maningi wa miyo.” Thuulela vyevi modi-a watom’mwiri-a onga ira: “N’nga ndinairelen’ni vyongo vyevyo vinadodomi-e uxamwalanga na Yohova, wenuo undiva-idhe ingumi?” N’nga nyo munooda kaana hora sumana leli yoi muthuulele vyongo vinangovyee vipanduchile Yohova? Irana vyevi unooda nikami-a ira nimlemezenga thitho mdhiveliwana maningi Yohova.—Sal. 111:2, 3.

7. N’nga lobelo linanikami-e a-vi ira nim’movenga Yohova mofwanelela?

⁷ Ndhila inango inanikami-e ira nim’movenga Nlungu ndi lobelanga hora dhothene. Nalobelanga maningi, paevo thitho Yohova vinokala liye waimbarimbari wa i-yo. Hora iliyothene inomvepa i-yo ira animva-e kopolo ira niode vilela vyowesedha vinangovyee, ninothuulela ira liye utokaana kopolo dhodabwi-a. Namsimbanga Yohova namwasa wa yotuva ya Mwanee, vinonithuucha ira liye unonidhiveliwana maningi. Thitho nalobelanga malobelo osembezela ira anikami-e va nyarwa inangoyee, ninothuulela ira liye ngwazelu maningi. Malobelo ninga enala, anoniiri-a ira nimlemezenga maningi Yohova. Thitho unoniiri-a kala osikimizela rima ira na-airena yongo iliyothene inadodomi-e uxamwali-u na Yohova.

8. N’nga ninaire a-vi ira nidhowenave m’mova Nlungu?

⁸ Ninooda dhowanave m’mova Nlungu voleri Bibilya naifunelo yoi nifunjedhe vifwanafwani-o vyapama thitho vyothakala vyevyo vili mubukhuli. Dhoweni nitapanyeni vifwanafwani-o vinli vya arumuwi ororomeleya a Yohova, wenuo uli ndimuwa waalimbo velela sembe Yehoyada na Obadiya, wenuo ali namaing’anela wava nyumbani ya mwene. Namala ninoonani vyevyo vinafunjedhevo i-yo wa mwene Yehoasi wau Yuda, wenuo aromile pama mbwenye vasogolovee liye i-ya mlambela Yohova.

MUKALENGA OLIMBA RIMA NINGA OBADIYA, WENUO AM’MOVA NLUNGU

9. N’nga m’mova Nlungu wamkami-idhe a-vi Obadiya? (1 Mam. 18:3, 12)

⁹ Bibilya linoroma onga vya Obadiyab na madhu oi: “Obadiya ali angathonyi-edhe ira ali mutu om’mova Yohova.” (Muleri 1 Mamwene 18:3, 12.) N’nga ova ofwanelela wamkami-idhe a-vi Obadiya? Mwavinango vyatomkami-a ira akale oriya rima thitho onyindeleya, vyevyo vyatoiri-a ira mwene am-ele kala namaing’anela wava nyumbanivee. (Mufwanafwani-edhe na Neemiya 7:2.) Ova Nlungu watomkami-a Obadiya kala olimba rima maningi, thitho liye anofuneeladi kaana kalelo leli. Liye atokaana ingumi vahora yautongi wa mwene Ahabu “wenuo aira vyongo vyothakala maningi vamethoni va Yohova kwaranya [mamwene] othene enao takanleo liye a-anakaleo.” (1 Mam. 16:30) Thitho Yezebeli mwadhi Ahabu, wenuo alambela Baala, anom’mwidanana maningi Yohova, moi atoodhilimbi-edha mali-elatu lambela waimbarimbari muumwene wa mavirelo adhuwa. Liye atoapa anamaongela anjinji a Nlungu. (1 Mam. 18:4) Mo-okaikela, Obadiya amlambela Yohova vahora yorucha.

10. N’nga Obadiya athonyi-edhe a-vi ira ali olimba rima maningi?

¹⁰ N’nga Obadiya athonyi-edhe a-vi ira ali olimba rima maningi? Yezebeli angaromile sakasaka anamaongela a Nlungu ira aape, Obadiya atoalokota anamaongela 100 “mumagurupu menli aanamaongela 50 mugurupu nlilothene, thitho ali aava-anga pau nama-inje.” (1 Mam. 18:13, 14) Aakale ira vyevi vyatoidhiweya, pyo-okaikeli-a ira Obadiya angapiwile. Pyaimbarimbari ira Obadiya ali mutu ninga i-yo vano thitho kaafuna wukwa. Mbwenye liye anomdhiveliwana maningi Yohova thitho arumiwee kwaranyedha mwemo mwadhiveliwana liye ingumiyee.

11. N’nga arumiwi a Yohova amalamboano anofwanafwana a-vi na Obadiya?

¹¹ Malamboano arumiwi anjinji a Yohova anokala muilambo yoi basa li-u tokondi-iwa. Aliwa anovelela lemezo lofwanelela waandimuwa andimuwa amaguverno, thitho molandana na Obadiya, anovelela lemezo lukulu maningi wa Yohova thitho katino-iya mlambela. (Mat. 22:21) Aliwa anothonyi-edha ira anom’mova Nlungu movwela malo moovanga atu. (Mayir. 5:29) Tanoirana vyevi vodhowanave laleela milanyu yapama thitho ira migumano molokoteya. (Mat. 10:16, 28) Aliwa anoonechecha ira abali naarongoliwa tatokaana yodya yauzimu yeyo inofuneela aliwa. Kathuulelani ifwanafwani-o ya Henri, wenuo unokala wu Africa muilambo inango weo basa lil-u lakondi-iwile aliwa. Vahora yeniyo, liye atodhivelela ira avelelenga vyodya vyauzimu wa Amboni afwee. Henri aongile ira: “Mwaibaliwelo ndili wamanyadho maningi. Ndinororomela ira lemezo nlukulu linovelela miyo wa Yohova ndi landikami-idhe ira ndikale olimba rima.” Nyo thitho munooda kala olimba rima ninga Henri. Vyevi vinoodeya akala munom’mova Nlungu mofwanelela.

MUKALENGA OROROMELEYA NINGA NDIMUWA WAALIMBO VELELA SEMBE YEHOYADA WENUO ALI OM’MOVA NLUNGU

12. N’nga Yehoyada na-iyanee tathonyi-edhe a-vi ira tali ororomeleya maningi wa Yohova?

¹² Ndimuwa waalimbo velela sembe Yehoyada anom’mova Yohova, thitho vyevi vyatom’mwiri-a ira akale ororomeleya no limbi-anga lambela waimbarimbari. Umboni wa vyevi waoneele vevo Ataliya, mwana wa Yezebeli, vyatukunle liye umwene wau Yuda. Vatookala myasa yovweya yoi atu tam’movenga Ataliya. Liye ali wauwalanga thitho namwasa ofunechecha kala namatonga, atoofiya vodhilimbi-edha upa a-ima othene a mwene, enao tali adhulee! (2 Limb. 22:10, 11) Yehoasi, wenuo ali mbo-i mwaa-imao, kaapiwile namwasa oi Yehosabati mwadhi Yehoyada atomvulumucha. Liye naman’nee tatomlokota nomsamalela. Vyevyo Yehoyada na Yehosabati vyairile aliwavi, vyatookami-a vunela ziza la mwene Davide. Yehoyada ali ororomeleya wa Yohova thitho kaam’movile Ataliya.—Sang. 29:25.

13. N’nga Yehoasi vyana liye vyawa 7, Yehoyada athonyi-edhile a-vi ira ali ororomeleya?

¹³ Yehoasi angana vyawa 7, Yehoyada atothonyi-edha ira ali ororomeleya vamethoni va Yohova. Liye atoira masakaedho oi Yehoasi akale mwene, thitho aakale ira vyevi vitoodeya, mutu ofwanelela angakaathidhe vapadoni wa umwene wa Davide. Pyooneelatu thitho ira aakale ira vyatoimwananeya, Yehoyada angapiwile. Mokami-iwa na Yohova, masakaedho airile liyao tatoodeya. Yehoyada atokami-iwa na anamasogolela amagurupu aanyakodo thitho Alevi, vom-ela Yehoasi kala mwene thitho Ataliya atoopiwa. (2 Limb. 23:1-5, 11, 12, 15; 24:1) Voi e-no Yehoyada “atoira vwelano vari va Yohova, mwene, naatu, ira atwao tathonyi-edhenga ira ndi atu a Yohova.” (2 Mam. 11:17) Mbwenye liye “ato-ela anamaing’anela avalango vaduzi na valango wava nyumbani ya Yohova, uliothene othakali-iwa mwandhila iliyothene kaavolowe.”—2 Limb. 23:19.

14. N’nga Yehoyada alemeziwile a-vi namwasa olemeza Yohova?

¹⁴ Hora ya Yehoyada ya-anafiye, Yohova ali angaongile ira: “Wenuo unofuna ndilemeza miyo ndinomlemeza.” Thitho liye atomraeli-a Yehoyada. (1 Sam. 2:30) Mofwanafwani-a, liye atorumeli-a ira vyapama vyevyo ndimuwa waalimbo velela sembula vyairile liye vilembiwe mumadhwe ira vinilangi-enga. (Aroma 15:4) Mbwenye Yehoyada angakwide, atova-iwa lemezo lavakundo vo-eliwa masiyeni “musidade la Davide, namwasa oi atoira vyapama mu Israeli thitho wa Nlungu waimbarimbari na nyumbee.”—2 Limb. 24:15, 16.

15. N’nga ninofunjedhavon’ni vaifwanafwani-o ya Yehoyada? (Muone thitho iruthiruthi.)

¹⁵ Mwasa wa Yehoyada unooda nikami-a i-yo othene ira nim’movenga Nlungu. Andimuwa anooda sazi-edha Yehoyada voira polepole vovunela mabila a Nlungu mororomeleya. (Mayir. 20:28) Oulula anooda funjedhavo thitho yongo wa Yehoyada ira akala unom’mova Yohova nokalave ororomeleya, liye unooda a-indi-edha basa ira takwakwaneli-edhe ifuneloyee. Liye kanowaona ira mbo-ofuneya. Azombwe thitho anooda funjedhavo yongo mwemo Yohova mwairile liye vyongo na Yehoyada nomsazi-edhanga volemeza oulula, simbwasimbwa enao talambenle Nlungu mororomeleya muhora indendai. (Sang. 16:31) Vomari-edha, i-yo othene ninooda funjedhavo yongo wa anamasogolela a magurupu aanyakodo thitho Alevi enao tamkami-idhe Yehoyada. Dhoweni nikami-engani mororomeleya “enao anosogolela vari vi-u” voavwela.—Aeb. 13:17.

KAMUKALENGA NINGA MWENE YEHOASI

16. N’nga mwene Yehoasi athonyi-edhe a-vi ira ali ofooka?

¹⁶ Vyoira vya Yehoyada vyatomkami-a Yehoasi ira akale mwene wapama. (2 Mam. 12:2) Vyo-arelavovyee vyali vyoi mwene wa zombula anofuna msangalali-a Yohova. Mbwenye Yehoyada angakwide, Yehoasi atovwela akalonga opanduwa. N’nga vyo-arelavovyee vyali vyoi a-vi? Liye naafwee “tatoroma lambela mizati yopambuleya na mafwano.” (2 Limb. 24:4, 17, 18) Angalive ira Yohova atosukwala na vyevi, “liye atodhowanave tumiza anamaongela vari viwa ira taaweleli-edhe wa liye . . . , mbwenye katavwele.” Aliwa katavwenle angalive ira Zakariya mwana wa Yehoyada, oi kaatekala baa-i namaongela na mulimbo velela sembe wa Yohova, mbwenye ali thitho balee wa Yehoasi. Thitho mwene Yehoasi kaathonyi-edhe simba vyevyo banja la Zakariya vyairile aliwa vovulumucha ingumiyee, voi atofiya voiri-a ira Zakariya apiwe.—2 Limb. 22:11; 24:19-22.

17. N’nga vyongo vyam’mwendele a-vi Yehoasi?

¹⁷ Yehoasi kaadhowilenave m’mova Yohova thitho vyongo kavyam’mwendele pama. Yohova ali angaongeletu ira: “Wenuo unondinyoza ngo-okaana basa wa miyo.” (1 Sam. 2:30) Va-anavire hora indendai, gulu ling’ono laanyakondo lau Siriya latogonji-a “gulu laanyakondo nlukulu maningi” la Yehoasi thitho latom-iya “arucheyanga maningi” na vilonda. Asiriyao tangadhowile, Yehoasi atoopiwa naarumiwe namwasa ompa Zakariya. Atu tatoona ira mwenula ali othakala maningi moi katamlokotile “masiyeni amamwene.”—2 Limb. 24:23-25; muone “mwana wa Barakiya” madhu achindo avalemba la Mateu 23:35.

18. Movwelana na lemba la Jeremiya 17:7, 8, n’nga ninaire a-vi ira na-akale ninga Yehoasi?

¹⁸ N’nga ninofunjedhavon’ni vaifwanafwani-o ya Yehoasi? Liye ali ninga imwiri yo-okaana michichi yodhowa wathi maningi inonyindela imwiri inango ira iimele pama. Ee-no Yehoyada wenuo ali ninga imwiri yeniyo yanyindela liye angakwide, Yehoasi atoroma vuruwana atu opanduwa thitho atokala o-ororomeleya wa Yohova. Vyevi vinothonyi-edha pama ira kaninofwanela nyindelanga ifwanafwani-o yapama ya Makristau afwi-u, masiki ya abali-u ira nim’movenga Nlungu. Ira nidhowenave kala vauxamwali olimba na Yohova, na i-yene thitho vaokene ninofwanela mdhiveliwangana thitho mlemeza maningi vofunjedha madhwee hora dhothene, voathuulela modi-a thitho lobela.—Muleri Jeremiya 17:7, 8; Akol. 2:6, 7.

19. N’nga Yohova unofuna ira niirengan’ni?

¹⁹ Yohova kanofuna vyongo vinjinji wa i-yo. Vinofuna liye vitolembiwa va lemba la Namalaleya 12:13, vevo vanoonga ira: “Ova Nlungwaa waimbarimbari nolokota malamulwee namwasa oi vyevi ndi vyevyo mutu vinofwanela liye irana.” Naovanga Nlungu, ninooda vilela nyarwa dhedho dhinagumanane i-yo nokalave olimba ninga Obadiya na Yehoyada. Kavali yongo yeyo inaode dhodhomi-a uxamwali-u na Yohova.