Mwemo Yohova musikimizele liye yolanyedhayee ya paradaizo

1. N’nga ndi milanyu iivi Esaya yawandenle liye Aisraeli afwee?

NAMAONGELA Esaya atoonga ira Yohova ndi “Nlungu oonga vyaimbarimbari.” Madhu athapuleliwile ira “vyaimbarimbari” anooda thapulela “ame.” (Esaya 65:16, madhu achindo.) Madhu oonga ira “ame” anothapulela ira “vikale e-no.” Madhu enala talambi-edhiwanga basa Bibilyani voonga vya Yohova na Yesu, tanosikimizela ira vyongo vinango pyaimbarimbari. Ee-no milanyu yeniyo Esaya yawandela liye Aisraeli afwee yali yoi vinoonga Yohova hora dhothene pyonyindeleya. Yohova ukadhi athonyi-edhelanga ira likundo leli taimbarimbari vokwakwaneli-edha vyolanyedhavyee vyothene.

2. N’nga mwasiwa ngwan’ni kaninofwanela kaikela vyolanyedha vya Yohova vyokuza paradaizo, n’nga ninotapanyani vyofuka viivi?

² N’nga na i-yene thitho ninonyindela vyevyo Yohova vyalanyedhile liye ira unodhairana sogolou? Vangavirile vyawa vaduzi duzi 800 kumela muhora ya Esaya, rumiwi Paulo atoonga mwasee vyolanyedha vya Nlungu vinokala vyonyindeleya hora dhothene. Paulo aongile ira: “Pyo-oodeya ira Nlungu aname.” (Aeb. 6:18) Puno dhama-inje kadhinaode kumi-a ma-inje aphama na ma-inje amunyu vahora imbo-ive. Molandana na vyevi, Yohova mwinyaa waimbarimbari kanonama. Ee-no ninooda nyindela yongo iliyothene yeyo Yohova inoonga liye thangani-avo vilanyedhile liye vyoonga sogolo. Muyofunjedha yei, ninotapanyani vyofukavi: N’nga Nlungu unilanyedhile vyongo viivi sogolou? N’nga unisikimizele a-vi ira unodha kwakwaneli-dha vyolanyedhavyee?

N’NGA YOHOVA UNILANYEDHILEN’NI?

3. (a) N’nga cholanyedha iivi yeyo arumiwi a Nlungu inodhiveliwana aliwa? (Apokalipse 21:3, 4) (b) N’nga atu enango anoonga a-vi naawandela vya yolanyedhai?

³ Ninotapanya yolanyedha yeniyo arumiwi a Nlungu availambo yothene yavathi inodhiveliwana aliwa. (Muleri Apokalipse 21:3, 4.) Yohova utolanyedha ira “ukwa kunodha kalaove. Venango ula venango dubela thitho bulela.” Anjinji a i-yo ninodhiveliwana alerela atu vya lemba lolimbi-ali voawandela mwemo ingumi munofuna aliwa dhakalela paradaizo. N’nga atu enango tanoonga a-vi naawandela yolanyedha yei? Aliwa anoonga ira: “Yolanyedhai chaphama mbwenye chorucha iroromela.”

4. (a) N’nga Yohova aidhiweletu vya likundo liivi? (b) Vowenjedhela va yolanyedha, n’nga Yohova airile thitho n’ni?

⁴ Vevo rumiwi Juwau valembile liye yolanyedha yokuza paradaizo, Yohova unoidhiwa ira ninodha wandelanga atu enango yolanyedhai volaleela milanyu ya Umwene. Unoidhiwa thitho ira atu anjinji anodha rucheya maningi dharoromela yolanyedha ya “vyongo vipya.” (Esaya 42:9; 60:2; 2 Akor. 4:3, 4) N’nga ninasikimizele a-vi ira yolanyedha yava Apokalipse 21:3, 4 inodha kwakwaneli-edhiwa? Yohova angaongile yolanyedhai, atoonga thitho myasa inango yovweya yoniiri-a ira niroromelenga. N’nga ndi myasa iivi yaongile liye?

YOHOVA ATOONISIKIMIZELA IRA UNODHA KWAKWANELI-EDHA VILANYEDHILE LIYE

5. N’nga ndi myasa iivi inoniiri-a roromela yolanyedha ya Nlungu yokuza paradaizo, n’nga ninoifwanya wani?

⁵ Maversu o-arela mutokala myasa inoniiri-a roromela yolanyedha ya Yohova yokuza paradaizo. Mumaverusunimo ninolerimo ira: “Nlungu wenuo ukaathide vapandoni wa Umwene aongile ira: ‘Kaonani! Vyongo vyothene vinosaka-edha miyo ndi vipya.’ Atoonga thitho ira: ‘Ulembe, namwasa oi madhu enala mbonyindeleya thitho aimbarimbari.’ Liye atoondiwandela ira: ‘Vitokwakwaneli-edhiwa! Miyo ndili Alefa na Omega, maromelo na magomelo.’”—Apok. 21:5, 6a.

6. N’nga naleringa va lemba la Apokalipse 21:5, 6, vinonikami-a a-vi roromela yolanyedha ya Nlungu?

⁶ N’nga madhu enala anonikami-a a-vi ira niroromelenga maningi vyolanyedha vya Nlungu? Voonga vya madhu amaverusu enala, bukhu loi Mapeto a Chivumbulutso linoonga ira: “Vyevi vili ninga Yohova unaasinari ekene karta yosikimizela ira atu ororomeleya anodha wachela maraeli-o sogolou.”b Yolanyedha ya Nlungu yei inofwanyeya va Apokalipse 21:3, 4. Mbwenye muversu 5 na 6, mutokala madhu a Yohova anokala ninga unaasinari ira vilanyedhile liyevyo unodha vikwakwaneli-edha. Va ee-ni dhoweni nioneni madhu enao Yohova a-indi-edhele liye basa vosikimizela yolanyedha yei.

7. Mwasiwa ngwan’ni ninoonga ira madhu oroma ava lemba la Apokalipse 21:5 mbova-a ifunelo, n’nga ninofunjedhavon’ni vamadhu enala?

⁷ Versu 5 liromile na madhu oonga ira: “Nlungu ukaathidhe vapandoni wa Umwene unoonga ira.” (Apok. 21:5a) Yen’na ndi imbo-i mwa hora dhiraru vevo Yohova vyaongile liye ekene m’masompenya mubukhu la Apokalipse. Ee-no, Yohova unasikimizela ekene, a-kala dhela mwa ngelo wakopolo venango Yesu. Likundo leli linothonyi-edha ira madhu o-arelao mbonyindeleya maningi. Mwasiwa ngwan’ni ninoonga e-no? Namwasa oi Yohova “kanonama.” (Titu 1:2) Vyevi vinothonyi-edha ira vinoleri i-yo va Apokalipse 21:5, 6 pyonyindeleya maningi.

“KAONANI! VYONGO VYOTHENE VINOSAKA-EDHA MIYO NDI VIPYA”

8. N’nga Yohova asikimizele a-vi ira yolanyedhayee inodha kwakwaneli-edhiwa? (Esaya 46:10)

⁸ Va e-ni, dhoweni nitapanyeni madhu oonga ira: “Kaonani!” (Apok. 21:5) Madhu Aigiriki athapuleliwile ira “kaonani!” anoromoliwa moweli-edha weli-edha mubukhu la Apokalipse. Bukhu n’nango linoonga ira madhwala ano-indi-edhiwa basa “vofuna kami-a mutu unoleri ira akaena ifunelo na madhu o-arela.” N’nga madhu o-arelao anoonga vyan’ni? Nlungu unoonga ira: “Vyongo vyothene vinosaka-edha miyo ndi vipya.” Pyaimbarimbari ira Yohova unoonga vyongo vipya vinofuna dhaireya sogolou, mbwenye wa liye vyevi vyali vyo-okaikeli-a voi unoonga ninga vinaaireya.—Muleri Esaya 46:10.

9. (a) N’nga madhu oonga ira “vyongo vyothene vinosaka-edha miyo ndi vipya,” anothonyi-edha ira Yohova unodha ira vyongo vinli viivi? (b) N’nga chini inofuna dhaireela “dhulu” na “ilambo yavathi” vilivovi?

⁹ Dhoweni nitapanyeni madhu anofwanyeya va lemba la Apokalipse 21:5 oonga ira: “Vyongo vyothene vinosaka-edha miyo ndi vipya.” Mukapitulo leli madhwala anoonga vyongo vinli vyevyo vinoira Yohova vyevyo vili chinja venango weleli-edha. Yoroma, n’nga liye unochinjan’ni? Va Apokalipse 21:1 ninoleri ira: “Dhulu wawale na ilambo yavathi yawale vyali vingamadhi.” “Dhulu wawale” unoimelela utongi waatu anoira vyongo mosogoleliwa na Satana na viwandavyee. (Mat. 4:8, 9; 1 Ju. 5:19) Bibilya lino-indi-edha basa madhu oonga ira “ilambo yavathi” voonga vya atu. (Maro. 11:1; Sal. 96:1) Ee-no “ilambo yavathi yawale” inoimelela atu othakala enao tali ilamboi. Kaiira Yohova unongosaka-edha vyongo vinango vyokuza “dhulu” na “ilambo yavathi,” vyevyo vilivo. Malomwee unodha chinja, venango kumi-elavotu. Unodha kumi-avo dhulu na ilambo yavathi vyevyo vilivo va ee-ni noweleli-edha “dhulu upya na ilambo yavathi ipya,” vyevyo vinoimelela utongi upya thitho atu olongomana.

10. N’nga chini vinofuna dhasaka-edha Yohova kala vipya?

¹⁰ Va Apokalipse 21:5, ninolerivo vyoonga Yohova vyevyo vinofuna liye dhasaka-edha kala vipya. Yohova atoonga ira: “Vyongo vyothene vinosaka-edha miyo ndi vipya.” Veva vyali ninga unoonga ira “ndinosaka-edha vyongo vyothene kala vipya.” Ee-no Yohova unodha chinja ilamboi thitho unodhairi-a ira atu takale apya vowakami-a ira takale olongomana. Movwelana na vyaongile Esaya, ilambo yothene inodha kala yobaleya ninga mundani mwa Edeni. Mutu uliwethene vaekene unodha kami-iwa ira akale m’pya. Atu orangala, tana nyarwa yo-oona venango lo-ovwa, anodha ili-iwa thitho enao takwide anodha kaana okoka ingumi.—Esaya 25:8; 35:1-7.

“MADHU ENALA MBONYINDELEYA THITHO MBAIMBARIMBARI. . . . VITOKWAKWANELI-EDHIWA!”

11. N’nga Yohova am’va-idhe Juwau lamulo liivi mbwenye thitho vamwasa uvi?

¹¹ N’nga Nlungu asikimizele a-vi ira vyaonga liye vinodhaireyadi? Liye atom’mwandela Juwau ira: “Ulembe, namwasa oi madhu enala mbonyindeleya thitho mbaimbarimbari.” (Apok. 21:5) Kaiira Yohova ate onga ira “ulembe,” mbwenye atoonga mwasee. Liye aongile ira: “Namwasa oi madhu enala mbonyindeleya thitho mbaimbarimbari,” venango ira madhu a Nlungu kai okaikeli-a thitho mbolinyali. Ninosimba ira Juwau atovwela lamulo loi “alembe.” Vamwasa wen’na, ninooda leri yolanyedha ya Nlungu yokuza paradaizo nothuulelanga maraeli-o anodedi-edhela i-yo.

12. Mwasiwa ngwan’ni pyovweya ira Yohova atoonga ira: “Vitokwakwaneli-edhiwa”?

¹² Ee-no Nlungu atoonga ira: “Vitokwakwaneli-edhiwa.” (Apok. 21:6) Veva Yohova aonga ninga vyongo vyothene vyaonga liye vyokuza yolanyedha ya paradaizo vitokwakwaneli-edhiwa wale. Thitho pyovweya ira liye unooda onga e-ni namwasa oi kavali yongo inamuimwanani-e kwakwaneli-edha ifunelwee. Yohova atoonga madhu enango osikimizela ira vilanyedhile liye unodha vikwakwaneli-edha. N’nga liye aongilen’ni?

“MIYO NDILI ALEFA NA OMEGA”

13. Mwasiwa ngwan’ni Yohova atoonga ira: “Miyo ndili Alefa na Omega”?

¹³ Ninga muongile i-yo wale, Yohova atoonga ekene fendo dhiraru mumasompenya odhowa wa Juwau. (Apok. 1:8; 21:5, 6; 22:13) Va ulendo wen’na, Yohova toonga ira: “Miyo ndili Alefa na Omega.” Madhu oi Alefa anofwanyeya maromelo wa abesedhario wa Igiriki thitho madhu oi Omega anofwanyeya komoni. Vo-indi-edha basa madhu oi: “Alefa na Omega,” Yohova unothonyi-edha ira aroma yongo kanoi-iya ya-anaodeye.

14. (a) Muonge ifwanafwani-o vahora yeniyo vyakala aliwa ninga Yohova unoonga ira “Alefa,” n’nga ndi e-lini vanofuna liye dhakala ninga unoonga ira “Omega.” (b) N’nga mbamadhu avi anofwanyeya va lemba la Maromelo 2:1-3, anosikimizeli-a ira Yohova unodha kwakwaneli-edha ifunelwee?

¹⁴ Yohova angapanduchile Adamu na Eva atoonga ifunelwee vopanducha ilambo naatu. Bibilya linoonga ira: “Nlungu atowaraeli-a noawandela ira: ‘Mubalane, muinjive, mudhali-e ilambo yavathi thitho mwiing’anele.’” (Maro. 1:28) Vahora yen’na vyali ninga Yohova unoonga ira “Alefa.” Veva liye atoonga phama ifunelwee. Ifunelwiyo yali ira vavira hora, a-ima a Adamu na Eva enao tafuna kala olongomana thitho ovwela tadhali-e ilambo noisaka-edha kala paradaizo. Vahora yen’na vyakala ninga unoonga ira “Omega.” Angamari-idhe panducha vyongo “dhulu na ilambo yavathi na vyongo vyothene vyali mwemo,” atoonga madhu osikimizela ira ifunelwee itoodeya. Madhwao anofwanyeya va lemba la Maromelo 2:1-3. (Muleri.) Yohova atoonga ira dambo la 7 lali lopambuleya. N’nga vyevyi vyathapulelan’ni? Veva Yohova atoosikimizela ira ifunelwee yokuza ilambo thitho atu kavinodha imwananeya. Ifunelweila yatokwakwaneli-edhiwa va dambo la 7.

15. Mwasiwa ngwan’ni ninoonga ira vinooneya ninga Satana utoimwanani-a ifunelo ya Nlungu?

¹⁵ Adamu na Eva vyadawile aliwa tatoova-a a-imiwa vyodawa na wukwa. (Aroma 5:12) Veva vyaoneya ninga Satana utoimwanani-a ifunelo ya Nlungu yoi vailamboi vakale atu olongomana thitho ovwela. Vyali ninga Satana utoimwanani-a Yohova onga ira “Omega.” Vinooneya ira Satana athuulela ira Yohova kanaode kwakwaneli-edha ifunelwee. Liye athuulela ira Yohova unom’pha Adamu na Eva nopanducha banja n’nango ira akwakwaneli-edhe ifunelwee yokuza atu. Mbwenye aakale ira Nlungu atoirana vyevi, vinooneya ira Namanami-uo angaongile ira Nlungu ngonama. Mwasiwa ngwan’ni ninoonga e-no? Namwasa oi movwelana na lemba la Maromelo 1:28, Yohova ali angaongile na Adamu na Eva ira a-imiwa anodha dhali-a ilambo yavathi.

16. Chini yam’muiri-idhe Satana onga ira Yohova ngoimwanana?

¹⁶ N’nga ndi vyongo vinango viivi vyevyo Satana vyathuulela liye ira Nlungu kanaode viirana? Venango athuulela ira Yohova unodha rumela ira Adamu na Eva takaena a-ima oi kavyaodeye ira takale olongomana. (Namal. 7:20; Aroma 3:23) Namanami-a angaongile ira Yohova ngoimwanana. Mwasiwa ngwan’ni? Namwasa oi ndhila yen’na chaakwakwaneli-edhe ifunelo ya Nlungu yoi vailamboi vakale a-ima a Adamu na Eva olongomana thitho ovwela.

17. N’nga Yohova amali-idhe a-vi mwasa waromi-idhe Satana thitho Adamu na Eva, n’nga vyo-arelavovyee vinodha kala vyoi a-vi? (Muone thitho iruthiruthi.)

¹⁷ Yohova atoomali-a mwasa waromi-idhe Satana naatu oroma mundhila yoi Satana kaanave madhu enango. (Sal. 92:5) Vorumeli-a Adamu na Eva ira takaena a-ima, Yohova atoothonyi-edha ira unoonga vyaimbarimbari a-kala vyonama. Yohova unothonyi-edha ira aonga yongo inangoyee, kavali yongo inam’muimwanani-e. Yohova atoonechecha ira ifunelwee inodha kwakwaneli-edhiwa vovelela “maziza” oi tavulumuche a-ima ovwela a Adamu na Eva. (Maro. 3:15; 22:18) Vinooneya ira Satana atoodabwa na vyevyo Yohova vyasaka-edhile liye vyokuza khuto. Mwasiwa ngwan’ni ninoonga e-no? Namwasa oi vyatoothonyi-edha ira Yohova ngwaudhivela a-kala waidyani. (Mat. 20:28; Ju. 3:16) Satana kana kalelo leli namwasa oi liye ngwaidyani. N’nga ndi vyongo viivi vinofuna dhaireya sogolou namwasa wa khuto? Komoni wautongi wa Kristu wa vyawa 1.000, a-ima olongomana na ovwela a Adamu na Eva, anodha kala paradaizoni vailambo yavathi movwelana na ifunelo yoroma ya Yohova. Vahora yeniyo vinodhakala ninga Yohova unoonga ira “Omega.”

VINAIRE I-YO IRA NIROROMELENGA MANINGI YOLANYEDHA YA YOHOVA YOONGA PARADAIZO

18. N’nga Yohova atoosikimizela ndhila dhiraru dhiivi ira unodha kwakwaneli-edha vyolanyedhavyee? (Muone thitho kwadru loi “myasa miraru yoniiri-a roromela yolanyedha ya Yohova.”)

¹⁸ Movwelana na vifunjedhile i-yo, n’nga ninakami-e a-vi atu anokaikela yolanyedha ya Nlungu yokuza paradaizo? Yoroma, uongile yolanyedhai ngu Yohova. Bukhu la Apokalipse linoonga ira: “Nlungu ukaathide vapandoni wa umwene aongile ira: ‘Kaonanai! Vyongo vyothene vinosaka-edha miyo ndi vipya.’” Liye utokaana zelu na kopolo thitho unofunechecha angakwakwaneli-edhe vyolanyedhavyee. Yanambili, pyo-okaikeli-a ira yolanyedhai inodha kwakwaneli-edhiwa thitho wa Yohova vinokala ninga vitomala kwakwaneli-edhiwa wale. Voi liye aongile ira: “Madhu enala mbonyindeleya thitho mbaimbarimbari. . . . Vitokwakwaneli-edhiwa.” Yaneraru, madhu oonga ira, “miyo ndili Alefa na Omega,” anosikimizeli-a ira Yohova aroma yongo kano-iyachi a-anakwakwaneli-edhe. Vyevyo vinofuna dhaira Yohova, vinothonyi-edha ira Satana ngonama thitho utoimwanana.

19. N’nga munaawandelen’ni atu anokaikela yolanyedha ya Nlungu yokuza paradaizo?

¹⁹ Idhiwani ira hora iliyothene inolaleela nyo nosikimizela ira vyolanyedha vya Nlungu vinodha kwakwaneli-edhiwa, vinoukami-ani ira muroromelenga vyolanyedha vya Yohova. Mwalerelanga mutu mwinango yolanyedha yolimbi-a yokuza paradaizo yava Apokalipse 21:4, mutuo noonga ira, “vinovweya phama mbwenye pyorucha viroromela,” n’nga munodha m’mwandela vyan’ni? Munooda m’lerela thitho versu 5 na 6 nom’mwandela vyaongile Yohova vosikimizela yolanyedhiyo, vyevyo vili ninga unosinarela madhwee.—Esaya 65:16.