Vyevyo andimuwa avapingoni vinafunjedhevo aliwa va ifwanafwani-o ya Gidiyoni

1. Movwelana na lemba la 1 Pedru 5:2, n’nga andimuwa avapingoni tava-iwile izo yoi a-vi?

ANDIMUWA avapingoni tatova-iwa izo yosamalela mabila apereso yavadhulu a Yohova. Aliwa tanosimba maningi ngari yolabela abali naarongoliwa thitho tanothonyi-edha thindhi ira taode kala “anamakumbiza . . . anosamalela mabila a Nlungu.” (Jer. 23:4; muleri 1 Pedru 5:2.) Ninosimba maningi namwasa okaana alombwana ninga enala mipingoni mwi-u!

2. N’nga tinyarwa dhiivi dhedho andimuwa avapingoni enango dhagumanena aliwa?

² Andimuwa avapingoni tanogumanana nyarwa dhinjinji talabanga basa liwa. Mwavinango ninooda onga ira, aliwa tanofuneela laba basa mwathindhi ira taode samalela pingo. Tony wenuo uli ndimuwa wu Estados Unido anoofuna zindiyela vyongo vinaode liye vamwasa orumela mabasa ava-iwile liye. Liye atoonga ira: “Sau wa COVID-19 wangaromile wene, ndanoopingeya maningi kami-a abali naarongola ira tairenga migumano thitho laleela. Angalive ira ndanooirana vyongo vinjinji vanookala vyongo vinango vinjinji vyaimwanana miyo viirana. Vang’ono navang’ono, ndatooroma rambulela hora yoleri Bibilya, funjedha wavameka thitho lobela.” Ndimuwa unango wavapingoni wau Kosovo, atoogumanana thitho nyarwa inango. Tatamo la waniwa wangaromeile kondo, liye atoona ira kavyali vyokweya vwela malangi-o a gulu. Liye atoonga ira: “Limba rima wanga watoowesedhiwa vevo ofesi ya tambi vandivepile aliwa ira ndimakami-e abali naarongola atatamo lelo lali loopi-a. Ndanoova thitho malangi-o ava-iwile miyo, taoneya kala o-okami-a.” Tim wenuo unokala wu Asia, anoona ira vyanomrucha irana vyongo vyothene vyevyo vyafuneya ira airena va dambo na dambo. Liye atoonga ira: “Hora dhinango ndanoochenyela maningi moi ndaona ira kandinaode kami-a abali naarongola.” N’nga chini inakami-e andimuwa avapingoni anogumanana nyarwa ninga dhedhi?

3. N’nga i-yo othene ninaganyali a-vi nathuulelanga ifwanafwani-o ya Gidiyoni?

³ Andimuwa anooda funjedhavo yongo, vaifwanafwani-o ya Gidiyoni wenuo ali namatonga. (Aeb. 6:12; 11:32) Liye anoovunela thitho sogolela atu a Nlungu. (Anam. 2:16; 1 Limb. 17:6) Mofwanafwana na Gidiyoni, andimuwa avapingoni tatova-iwa izo yosamalela atu a Nlungu vahora yorucha maningi. (Mayir. 20:28; 2 Timo. 3:1) Ninooda funjedhavo vyongo vinjinji vamwasa okala odhiyevi-a thitho vwela. Vilelawee watoowesedhiwa vevo valaba liye basalee. Ee-no mo-obala akala nili ndimuwa venango kabe, i-yo othene ninofwanela asimbanga maningi andimuwa avapingoni. Ninooda akami-a abali athindhala enao tanolaba basa losamalela pingo.—Aeb. 13:17.

VEVO THONYI-EDHA DHIYEVI-A UNAKALE ALIWA ORUCHA

4. N’nga Gidiyoni athonyi-edhe a-vi ira anooidhiwa madile oirela vyongo thitho ali odhiyevi-a?

⁴ Gidiyoni anoozindiyela madile ana liye oirela vyongo thitho ali mutu odhiyevi-a.b Vevo ngelo wa Yohova vyam’mwandele liye ira ngwasakuliwile ira amaode awanela kondo ana Israeli mandhani mwa Amidiyani enao tali akopolo, mutu odhiyevi-ula atoowakula ira: “Banja li-u tiling’ono maningi muziza lothene la Manase, thitho nyumbani wa babanga wang’ono maningi ngu miyo.” (Anam. 6:15) Liye aona ira kanaode laba basa lava-iwile liye mbwenye Yohova aona ira angaodile. Mokami-iwa na Yohova, Gidiyoni atooroma laba urumiwi wava-iwile liye.

5. N’nga ndi vahora iivi vinakale aliwa vyorucha ira ndimuwa wavapingoni azindiyele madilee no kala odhiyevi-a?

⁵ Andimuwa tanodhilimbi-edha ira tazindiyele madiliwa thitho kala odhiyevi-a vavyongo vyothene. (Mik. 6:8; Mayir. 20:18, 19) Aliwa katinovitukulela namwasa wa vyongo viodile aliwa viirana thitho katinoviona kala o-ofuneya namwasa wa vyongo vinodawi-a aliwa. Mbwenye hora dhinango ndimuwa wavapingoni vinooda mrucha kala odhiyevi-a venango zindiyela madilee. Mofwanafwani-a, liye unooda rumela mabasa o-iyana-iyana ava-iwile liye mbwenye imwanananga akwakwaneli-edha. Venango unooda simbiwa namwasa wa mwemo muodele liye kwakwaneli-edha basa n’nango thitho oombiwa landu namwasa wa mwemo muirele liye basa n’nango. N’nga andimuwa tanafunjedhevo ifwanafwani-o iivi ya Gidiyoni va vyevyo vinaakami-e va vyoireya ninga vyevi?

6. N’nga andimuwa avapingoni tanofunjedhavon’ni wa Gidiyoni vamwasa ozindiyela madiliwa? (Muone thitho iruthiruthi.)

⁶ Muvepenga atu enango ira taukami-engani. Mutu wenuo unozindiyela madilee, unoidhiwa vyongo vya-anaode liye irana. Gidiyoni anooidhiwa vyongo vya-aoda liye irana no vepa atu enango ira tamkami-e. (Anam. 6:27, 35; 7:24) Andimuwa avapingoni adodoliso tanoira thitho vyongo vimbo-ive. Tony um’mongile i-yo maromeloule atoonga ira: “Namwasa wa weo waulukulele miyo, ndanoodhiveliwana rumela mabasa manjinji kwaranya enao anaode miyo alaba. Ee-no ndatoothuulela ira volambela wi-u wavabanjani, nitapanye mwasa okuza zindiyela madili-u thitho ndatomfuka i-yananga ira andiwandelemo moda unoirela miyo vyongo vamwasula. Ndatoonela thitho va jw.org vidiyo ya muru oonga ira, Muziphunzitsa, Kukhulupirira Komanso Kuthandiza Ena Ngati Mmene Yesu Amachitira.” Tony atooroma vepa atu enango ira tamkami-enga mabasa ana liye. N’nga vyo-arelavovyee vyali vyoi a-vi? Tony atoonga ira: “Mabasa othene pingoni anowenda pama thitho ndinokaana hora injinji yolimbi-a uxamwalanga na Yohova.”

7. N’nga andimuwa avapingoni tanasazi-edhe a-vi ifwanafwani-o ya Gidiyoni atu enango taaombanga landu? (Yakobo 3:13)

⁷ Kamunyanyuenga atu enango tauombangani landu. Hora dhinango andimuwa avapingoni anowesedhiwa taombiwanga landu va vyongo vinango viirile aliwa. Veva thitho ifwanafwani-o ya Gidiyoni inooda akami-a. Liye anoidhiwa ira anoodawi-a vyongo thitho vyevi vyatom’mwiri-a ira aode wakula mopwaseya vevo alombwana au Efuraimu vyam’momba aliwa landu. (Anam. 8:1-3) Gidiyoni kaarumenle monyanyuwa. Liye atoothonyi-edha ira ali odhiyevi-a voavuruwana thitho aongana moriya rima, vyevi vyatoiri-a ira mirima yaatwao iode kurudheya. Andimuwa avapingoni azelu tanomsazi-edha Gidiyoni vovuruwana mopwaseya thitho wakula mokurudheya taombiwanga landu. (Muleri Yakobo 3:13.) Tairangana vyevi, tanokami-a ira pingoni mukale rendele.

8. N’nga andimuwa avapingoni anofwanela iran’ni atu enango taasimbanga? Muonge ifwanafwani-o.

⁸ Murumeli-enga ira titimi-o lidhowenga wa Yohova. Vevo atu vyaromile aliwa mtitimi-a Gidiyoni namwasa oganyali kondo yolimbanana Amidiyani, liye atoakami-a atwao ira tavelelenga titimi-olo wa Yohova. (Anam. 8:22, 23) N’nga abali tana vizo tanasazi-edhe a-vi ifwanafwani-o ya Gidiyoni? Aliwa anofwanela velela titimi-o wa Yohova namwasa wa vyongo viirile aliwa. (1 Akor. 4:6, 7) Mofwanafwani-a, akala ndimuwa wavapingoni unaasimbiwa namwasa wa dodoliso lofunji-a lina liye, unooda akami-a atwao ira tathuulelenga weo ukumele makundo anofunji-a liye enao ali Madhu a Nlungu venango mafunji-edho enao gulu la Yohova linovelela aliwa. Hora dhothene andimuwa avapingoni tanofwanela dhisakasaka ira taone akala tanoiri-a atu enango asimbanga venango msimba Yohova. Kathuulelani vyevyo vyam’mwireele ndimuwa unango dhinalee Timothy. Anga-eliwile wene kala ndimuwa, liye anoosangalala onga myasa dhaothene. Liye atoonga ira: “Ndanooroma myasadhanga na madhu manjinji thitho ndanoo-indi-edha basa vifwanafwani-o vyo-orucha vivwechecha. Vyevi vyatoiri-a ira atu enango tandisimbenga. Ee-no atu tanothuulela maningi vya miyo malo mothuulelanga vya Bibilyani venango vya Yohova.” Vira wa hora, Timothy atoona ira anofuneela chinja moda wa funji-a liye vofuna rambela iri-a atu thuulelanga vya liye. (Sang. 27:21) N’nga vyo-arelavovyee vyali vyoi a-vi? Liye atoonga ira: “Vachineneeva abali naarongola anjinji tanondiwandela mwemo mwasanga mwaakami-edhele aliwa limbanana nyarwa dhiwa, vilela vyowesedha venango kala vauxamwali wapama na Yohova. Ndinosagalala na vyongo vinoonga aliwa kwaranya mwasangalalela miyo vya ndisimba aliwa muvyawa vinjinji vivirile.”

VEVO VWELA VENANGO KALA OLIMBA RIMA UNAKALE ALIWA ORUCHA

9. N’nga vwela thitho limba rima wa Gidiyoni, wawesedhiwile a-vi? (Muone iruthiruthi yavakapani.)

⁹ Gidiyoni anga-eliwile kala namatonga anoofuneela kala ovwela thitho olimba rima. Liye atoova-iwa basa lorucha ira amagwi-e guwa ya sembe ya babee vevo valambelavo aliwa Baala. (Anam. 6:25, 26) Vasogolovee angagumani-idhe anyakondwee fendo dhambilidhene, atowandeliwa ira ayevi-e numero yaanyakondwao. (Anam. 7:2-7) Vamamari-edhovee tatowandeliwa ira tamadhimbinuwele amwidaniwa vari vama-iyu.—Anam. 7:9-11.

10. N’nga andimuwa avapingoni tanawesedhiwe a-vi vamwasa okala ovwela?

¹⁰ Andimuwa avapingoni anofwanela kala “okozeya vwela.” (Yak. 3:17) Ndimuwa ovwela unokala ofunechecha gonjela vinoonga malemba thitho a-rela malangi-o okumela wu gulu la Nlungu. Aira e-no unovelela ifwanafwani-o yapama waatu enango. Mbwenye angalive e-no hora dhinango vinokala vyorucha ira tavwele. Mofwanafwani-a, venango hora dhinango vinooda mrucha a-rela malangi-o enao aveleliwile. Vavyoireya vinango liye unooda kaikela akala malangi-oao mbazelu thitho okami-a. Venango unooda vepiwa ira alabe basa n’nango lelo linam’mwiri-e ira aode mangiwa. N’nga andimuwa avapingoni tanasazi-edhe a-vi ifwanafwani-o ya Gidiyoni vavyoireya ninga vyevi?

11. N’nga chini inakami-e andimuwa avapingoni kala ovwela?

¹¹ Muvuruwanenga malangi-o mwapolepole thitho a-indi-edha basa. Nlungu atom’mwandela Gidiyoni mwemo mwagwi-edhe liye guwa ya sembe ya babee, wafuna liye manga guwa ya sembe ya Yohova thitho nyama yafuna liye i-ndi-edha basa vovelela sembe. Gidiyoni kaakaikele navang’onovene malangi-o ava-iwile liye. Ee-no liye atoa-arela. Malamboano andimuwa avapingoni tanowachela malangi-o okumela wu gulu la Yohova. Dhela mumakarta, milanyu thitho malangi-o enango okami-a kala ovuneleya no kala vauxamwali wapama na Yohova. Ninoadhiveliwana maningi andimuwa avapingoni namwasa o-arela mororomeleya malangi-o anovelela gulu la Yohova. Thitho pingo othene unoganyali.—Sal. 119:112.

12. N’nga andimuwa avapingoni tanasazi-edhe a-vi malangi-o avalemba la Aebere 13:17, akala malangi-o agulu tatochinja?

¹² Mukalenga okozeya chinja. Kathuulelani ira Yohova atom’mwandela Gidiyoni ira ayevi-e maningi numero yaanyakondwee. (Anam. 7:8) Liye angaodile thuulela ira ‘Pyofuneyadi irana vyevi? N’nga vyevi pyokami-a?’ Angalive ira vyali e-no, Gidiyoni atoovwela. Malamboano thitho andimuwa avapingoni tano-arela ifwanafwani-o ya Gidiyoni vo-arela malangi-o agulu la Yohova enao tachinjile. (Muleri Aebere 13:17.) Mofwanafwani-a, muyawa ya 2014 gulu la Yohova latoochinja ndhila yopagalela kobiri dhomangela Nyumba dha Umwene thitho mamburo oirela migumano milukulu. (2 Akor. 8:12-14) Mipingo chaafuneya weli-a mangawa. Malomwee, vyovelela vya mipingo yavailambo yothene yavathi ya Mboni dha Yohova, vyatooroma i-indi-edhiwa basa vomanga mamburo uliothene weo wafuneela mo-obala akala mipingo ingaodile velela kobiri dhothene. José angavwide vyamachinjo enala atooroma kaikela akala vyevyo vingakanle vyokami-a thitho athuulela ira: ‘Ndhila yen’na kai ino-indi-edha i-yo basa wani-u wuno. Kavinoodeya manga nyumba naimbo-ene.’ N’nga chini yamkami-idhe José a-rela malangi-oala? Liye atoonga ira: “Madhu avalemba la Sanganiko 3:5, 6 tatoondithuucha ira ndinofwanela mroromela Yohova. Vyo-arelavovyee vyali vyoi vyongo vikadhi viwendanga pama maningi! Kaiira ninomanga nyumbave dha Umwene dhinjinji baa-i, mbwenye nitofunjedha mwemo muna-indi-edhele i-yo basa ndhila dhinjinji vyovelela vi-u ira va-akale i-yana.”

13. (a) N’nga Gidiyoni kaakaikela vyan’ni? (b) N’nga andimuwa avapingoni tanasazi-edhe a-vi ifwanafwani-oyee? (Muone thitho iruthiruthi.)

¹³ Muirengana vinofuna Yohova molimba rima. Gidiyoni atoovwela angalive ira anoova thitho vyafuna liye iranavyo vyali vyongo vyoopi-a. (Anam. 9:17) Yohova angamsikimizele Gidiyoni kaakaikele ira Nlungu unodha mkami-a adhowa mawana kondo yovunela atu a Yohova. Andimuwa avapingoni anokala mumatatamo unokondi-iwa basa li-u, tanosazi-edha ifwanafwani-o ya Gidiyoni. Molimba rima aliwa anosogolela migumano thitho basa lolaleela angalive ira vyevyo vinooda airi-a ira taode mangiwa, fukiwa vyofuka, ireliwa vyongo vyauwalanga venango kumi-iwa vabasani.c Vahora ya nyarwa ilukulu andimuwa avapingoni tanodha funeela kala olimba rima ira taode a-rela malangi-o anofuna aliwa dhava-iwa mo-obala akala anogumanana vyoopi-a moi a-vi. Malangi-oala anodha kala okuza mwemo munofuna aliwa dha mwadhela milanyu yokala ninga matalala thitho mwemo abali naarongola munofuna aliwa dha vulumuwela tadha dhimbinueliwa na Gogi wa Magogi.—Zakiy. 38:18; Apok. 16:21.

VEVO VILELA UNOKALA ALIWA ORUCHA

14. N’nga Gidiyoni awesedhiwile a-vi vamwasa okala ovilela?

¹⁴ Gidiyoni anoofuneya ira vyongo mwathindhi vabasalee ninga namatonga. Amidiyani tangatawile nama-iyu vakondoni, atoatamangi-a kumela wu ipedipedi ya Yezereeli dhowa mafiya i-njeni wa Yorodano, vinooneya ira wali u-ruve. (Anam. 7:22) N’nga atoo-iyachi atamangi-a angafiile i-njeniwo? Kabe! Angalive ira atoochenyela, liye vambo-i naalombwana okwakwana 300 tatoovandela i-nje nodhowanave atamangi-a. Vamamari-edhovee, tatoafwanya thitho tatoagonji-a.—Anam. 8:4-12.

15. N’nga ndi vahora ivi vevo vilela unakale aliwa orucha waandimuwa avapingoni?

¹⁵ Hora dhinango ndimuwa wavapingoni unooda roma dhivwa kala ochenyela maningi namwasa wa basa lilabile liye pingoni venango samalela banjalee. Vavyoireya ninga vyevi, andimuwa avapingoni tanasazi-edhe a-vi ifwanafwani-o ya Gidiyoni?

16-17. N’nga chini yamkami-idhe Gidiyoni vilela, n’nga andimuwa avapingoni tanakale osikimiza vyan’ni? (Esaya 40:28-31) (Muone thitho iruthiruthi.)

¹⁶ Muroromelenga ira Yohova unodha uva-ani kopolo. Gidiyoni anoororomela ira Yohova unomva-a kopolo, thitho kaa-indi-iwile tiwa la mulo. (Anam. 6:14, 34) Gidiyoni na anyakondwee tatoatamangi-a amwene ambili au Midiyani namendo, venango mamwenao tagwenle ngamila. (Anam. 8:12, 21) Mbwenye mokami-iwa na Nlungu, Aisraeli athindhala tatooganyali kondwiyo. Molandana na vyevi, andimuwa avapingoni anofwanela mnyindelanga Yohova wenuo “a-anochenyela venango fooka.” Liye unodha ava-a kopolo vahora inofuneela aliwa kopolodho.—Muleri Esaya 40:28-31.

¹⁷ Kathuulelani vyevyo vyam’mwireele Mateu, wenuo uli mukomisau yoongi-ana na ximitari. N’nga chini yamkami-idhe vilela? Liye aongile ira: “Nditoona ira makundo avalemba la Afilipi 4:13, mbaimbarimbari. Hora dhinjinji ndachenyela ndaona ira kandinaode irana yongo iliyothene, ndinolobelecha kumela vathi va rima mvepa Yohova ira andiva-e kopolo dhedho dhinofuneela miyo ira ndikami-e abali naarongolanga. Vavyoireya ninga vyevi, nditoona ira Yohova unondiva-a kopolo dhedho dhinondikami-a ira ndivilele.” Mofwanafwana na Gidiyoni, andimuwa avapingoni odhivelela tanooda gumanana nyarwa vahora inokumbiza aliwa mabila a Yohova. Pyaimbarimbari ira aliwa tanofuneela zindiyela vyongo vya-anooda aliwa noirangana vyevyo vinooda aliwa. Mbwenye tanororomela ira Yohova unovuruwana malobelwiwa ovepa ira aakami-e no ava-a kopolo dhooda vilela.—Sal. 116:1; Afil. 2:13.

18. Movwelana na vifunjedhile i-yo, n’nga andimuwa avapingoni tanasazi-edhe a-vi ifwanafwani-o ya Gidiyoni?

¹⁸ Vatokala vyongo vinjinji vyevyo andimuwa avapingoni vinafunjedhevo aliwa kumela va ifwanafwani-o ya Gidiyoni. Andimuwa avapingoni tanofwanela idhiwa vya-anaode aliwa irana va mwasa wa mabasa anolaba aliwa thitho kala odhiyevi-a atu enango taasimbanga venango aomba landu. Aliwa tanofwanela thonyi-edha ira mbovwela thitho olimba rima simbwasimbwa vevo komoni wa ilambo yothakalai vanowandamela aliwa maningi. Tanofwanela roromelanga maningi ira masiki tagumanena nyarwa dhoi a-vi, Nlungu unodha ava-a kopolo. Ninosimba maningi anamakumbiza athindhala thitho “abali ninga enala ninofwanela alemezanga maningi.”—Afil. 2:29.