Munooda kwakwaneli-edha ifunelo inyu yauzimu

1. N’nga anjinji a i-yo ninogumanana nyarwa dhiivi?

N’NGA mwatooroma dhi-elelavo ifunelo inango yauzimu, mbwenye nyo imwanananga ikwakwaneli-edha?b Akala ndi e-no idhiwani ira kamuli mwekene. Mwaifwanafwani-o, Philip anoofuna ira alobelenga vaduzi navaduzi thitho malobelwee takalenga apama, mbwenye vyanomrucha kaana hora yolobela. Erika atokaana ifunelo yoi a-adembuwenga fiya vamigumanoni yokozeela urumiwi mbwenye anoodembuwa vaduzi navaduzi gumano uliothene. Fendo dhingasi Tomáš atoodhilimbi-edha saka-edha thandha ira aleri Bibilya lothene. Liye aongile ira: “Voi leri Bibilya kwaandhisangalali-a. Ndatoodhilibi-edha fendo dhiraru mbwenye ndafiya bukhu la levitiko ndanoo-iya.”

2. Mwasiwa ngwan’ni kaninofwanela fooka akala kanikwakwaneli-edhe ifunelo inangoyee yauzimu?

² Akala va-eni mutokaana ifunelo inango yeniyo ya-aikwakwaneli-edhe nyo, idhiwani ira kamuli oimwanana. Ira mutu akwakwaneli-edhe ifuneloyee unofuneela hora thitho thindhi. Mwafunechechanga kwakwaneli-edha ifunelo inangwee, munothonyi-edha ira uxamwalinyu na Yohova ngwapereso yavadhulu thitho munofunechecha mva-a vyongo vyapama maningi. Yohova unosimba thindhi linyu. Pyaimbarimbari ira kanodedi-edhela vyongo vinjinji kwaranya vya-anaode nyo. (Sal. 103:14; Mik. 6:8) E-no mukaengana vifunelo vyevyo vinakwakwaneli-edhe nyo movwelena na mwemo mukalele inguminyu. N’nga mwadhi-elela ifunelo, munaire a-vi ira muikwakwaneli-edhe? Dhoweni nioneni makundo enango anaukami-eni.

KAANA RIMA OFUNECHECHA KOFUNEYA MANINGI

3. Mwasiwa ngwan’ni kaana rima ofunechecha kofuneya?

³ Ninofuneela kaana rima ofunechecha ira nikwakwaneli-edhe vifunelo vi-u vyauzimu. Mutu akaana rima ofunechecha kwakwaneli-edha vifunelovyee unokaana thindhi. Rima ofunechecha uli ninga lipevo lelo linokami-a baruku lokaana nguwo ira imafiye pama unaaliwa. Akala utokala lipevo maningi barukwiyo inooda fiya pama unaaliwa. Akala lipevolo linodha mwakopolo barukwiyo inofiya mombaranya. Mofwanafwana na vyevi, nakala ofunechecha vinokala thitho vyo-orucha kwakwaneli-edha vifunelo vi-u. Bali unango wau El Salvador dhinalee Davide, atoonga ira: “Wakaana rima ofunechecha unokaana thindhi ira ukwakwaneli-edhe ifunelo yaayo, kunorumeli-a ira yongo iliyothene iimwanani-e kwakwaneli-edha ifuneloyaa.” N’nga chini inanikami-e ira nikaena rima ofunechecha?

4. N’nga ninalobelelen’ni? (Afilipi 2:13) (Muone thitho iruthiruthi.)

⁴ Mumvepenga Yohova ira mukaena rima ofunechecha. Vo-indi-edha basa zimwee Yohova unooda ukami-ani ira mukaena rima ofunechecha kwakwaneli-edha ifunelo inyu. (Muleri Afilipi 2:13.) Hora dhinango ninodhi-elela ifunelo namwasa oi ninoidhiwa ira piyevyo vinofuneela i-yo thitho ndipama irana vyevi. Mbwenye venango kaninaode kaana rima ofunechecha kwakwaneli-edha ifunelo yi-u. Vyevi ndi vyevyo vyam’mwireele rongola unango wa Uganda dhinalee Norina. liye atoodhi-elela ifunelo yoi akaena namafunjedha Bibilya angalive ira kaana rima ofunechecha ira akwakwaneli-edhe ifuneloyee namwasa oi anoodhikaikela ira kanofunji-a pama. N’nga chini yamkami-idhe? Liye aongile ira: “Ndatooroma lobela wa Yohova dambo nlilothene ira andikami-e kaana rima ofunechechanga maningi kaana namafunjedha Bibilya. Movwelana na malobelwanga, dhatoodhilimbi-edha thitho ira dhiwenjedhele dodoliso langa lofunji-a. Vangavirile myedi yoyeva dhatoona ira dhitoroma funechecha iri-a funjedha wa Bibilya. Yawa yeyo ndatooroma funji-a atu ambili.”

5. N’nga ninathuulelen’ni ira nikaena rima ofunechecha kwakwaneli-edha ifunelo yi-u?

⁵ Muthuulelenga vyevyo viuireleni Yohova. (Sal. 143:5) Rumiwi Paulo anothuulela modi-a mwemo Yohova mwathonyi-edhe liye riya rimawee ulukulu thitho vyevi vyathomlimbi-a ira akaengana thindhi vomlabela. (1 Akor. 15:9, 10; 1 Timo. 1:12-14) Mofwanafwana na vyevi, nyo thitho mwathuulelanga maningi vyevo viuireleni Yohova, munodha kaana rima ofunechecha kwakwaneli-edha ifunelo inyu. (Sal. 116:12) Kathuulelani vyevyo vyamkami-idhe rongola unango wau Honduras ira akwakwaneli-edhe ifuneloyee yokala painiya okaatheya. Liye aongile ira: “Ndatothuulela mwemo Yohova munothonyi-edhela liye ira unondidhiveliwana. Atoondikami-a ira ndikale guluni mwaatwee. Unondisamalela thitho ndivunela. Thuulela vyevi watoondikami-a ira ndimdhiveliwengana maningi thitho dhikaena rima ofunechecha ira upainiya.”

6. N’nga chini inanikami-e ira nifunechechenga kwakwaneli-edha ifunelo yi-u?

⁶ Muthuulelenga maraeli-o anafanye nyo namwasa okwakwaneli-edha ifunelo inyu. Muone vyevyo vyamkami-idhe Erika, wenuo um’mongile i-yo maromelou kwakwaneli-edha ifuneloyee yoi akaengana hora. Liye aongile ira: “Ndatoozindiyela ira ndanooluza vyongo vinjinji namwasa ofiyanga modembuwa vamigumanoni yokozeela urumiwi. Mbwenye fiya mombaranya watoondikami-a ira dhimwenyulengana abali naarongola thitho waredha naaliwa. Ndingaodile vuruwana malangi-o enao tandikami-e ira ndikalenga osangalala thitho wenjedhela dodoliso langa lolaleela.” Erika anoothuulela maraeli-o enao afwanye liye namwasa okaana hora yokwakwaneli-edha ifuneloyee. N’nga ndi maraeli-o avi enao nyo thitho anaathuulele nyo? Akala ifunelo inyu njokuza leri Bibilya venango lobela, muthuulelenga mwemo kwakwaneli-edha ifunelwiyo munaukami-edheni aliwa limbi-a uxamwalinyu na Yohova. (Sal. 145:18, 19) Akala ifunelo inyu choi mukaena kalelo n’nangolee, muthuulelenga mwemo kalelolo munaukami-edheni aliwa ira muvwelanenga maningi naatu enango. (Akol. 3:14) N’nga a-vi lemba myasa yothene inouiri-ani ira mufunenga kwakwaneli-edha ifunelwinyu? Mwaira e-no, muwelelengamo vaduzi navaduzi ira muvionenga vyongovyo. Tomáš, um’mongile i-yo maromelou aongile ira: “Ndakaana myasa injinji yokwakwaneli-edha ifunelo inangoyee, paevo vanodhilimbi-edha miyo ira ndiikwakwaneli-edhe.”

7. Chini yamkami-idhe Julio na i-yane kwakwaneli-edha ifunelo yiwa?

⁷ Muwaredhenga naatu enao tanaulimbi-eni. (Sang. 13:20) Kathuulelani vyevyo vyamkami-idhe Julio na-iyane ira takwakwaneli-edhe ifunelo yiwa yoi tairenga vyongo vinjinji va basa lolaleela. Liye aongile ira: “Natoosakula waredha naatu enao tanilimbi-a thitho nanootapanya naaliwa vifunelo vi-u. Anjinji mwaafwi-uao tali tangakwakwaneli-edhe wale ifunelo yi-ui thitho tangaodile niva-a malangi-o onikami-a. Afwi-uao tanoonifuka masaka-edho airile i-yo ira nikwakwaneli-edhe ifunelo yi-uiyo thitho tanoonilimbi-a vahora yafuna i-yo limbi-iwa.”

NAONANGA IRA KANINA RIMA OFUNECHECHA

8. Chini inaireye akala ninofuna kwakwaneli-edha ifunelo yi-u vahora yeniyo inoona i-yo ira nitokaana rima ofunechecha irana vyevyo? (Muone thitho iruthiruthi.)

⁸ Onga mwaimbarimbari i-yo othene malambo enango ninoona ira kaninofuna irana vyongo vinango. N’nga vyevi vinothapulela ira kaninaode kwakwaneli-edha ifunelo yi-u? Kabe. Mofwanafwani-a, lipevo ndi linofuna iri-a ira baruku ifiye unaaliwa. Mbwenye hora dhinango lipevo linoodha kala lo-iyana-iyana venango akalaove. N’nga vyevi vinothapulela ira Mulimbo wendhi-a barukulo kanafiye unaaliwa? Kabe. Mofwanafwani-a, mabaruku enao ana nguo anokaanecha thitho mothori venango yochapana. Mulimbo wendhi-a barukuo unooda i-ndi-edha basa vyongo vyevi ira tamafiye unaaliwa. Rimi-u ofunechecha ninooda ufwanafwani-edha na lipevo. Malambo enango ninooda funechecha kwakwaneli-edha ifunelwi-u i-yana naathu enago thitho malambo enago vinooda kala vyorucha kwakwaneli-edha ifunelwi-u. Akala ninofuna kwakwaneli-edha ifunelwi-u votukulela mwemo monovwela i-yo, kaninaode ikwakwaneli-edha. Mbwenye mofwanafwana na mulimbo wendhi-a baruku wenuo unofwanya ndhila dhinango ira amafiye unaaliye, ninooda kwakwaneli-edha ifunelo yi-u angalive ira hora dhinango kaninakaena rima ofunechecha. Angalive ira irana vyevi kavinakale vyokweya mbwenye vyo-arelavovyee vinokala vya pama maningi. Na-anatapanye vyevyo vinofuna i-yo irana dhoweni nitapanyeni yofuka inofuna kalavo.

9. N’nga ninofwanela dhilimbi-edha dhowanave kwakwaneli-edha vifunelo vinangovyee vyauzimu angalive ira kanina rima ofunechecha ira vyevyo? Muongemo.

⁹ Yohova unofuna ira nimlabelenga mosangalala thitho mofunechecha. (Sal. 100:2; 2 Akor. 9:7) N’nga ninofwanela dhilimbi-edha dhowanave kwakwaneli-edha vifunelo vinangovyee vyauzimu angalive ira kanina rima ofunechecha ira vyevyo? Kathuulelani ifwanafwani-o ya rumiwi Paulo. Liye aongile ira: “Ndhinokoma manungwanga noasogolera ninga dhaari.” (1 Akor. 9:25-27) Paulo anoovikanyi-edha irana vyofanelela angalive ira anoona ira kaafuna irana vyevyo. N’nga Yohova anoosangalala na vyevyo vyaira paulo vomlambela? Ee. Thitho liye atomraeli-a namwasa wa thindhilee.—2 Timo. 4:7, 8.

10. N’nga ninoraeli-iwa a-vi nadhilimbi-edha kwakwaneli-edha ifunelo yi-u angalive ira kanina rima ofunechecha irana vyevyo?

¹⁰ Mofwanafwana na vyevi, Yohova unosangalala anionanga nidhilimbi-edhanga kwakwaneli-edha ifunelwi-u angalive ira kanina rima ofunechecha irana vyevyo. Liye unosangalala namwasa oi unoidhiwa ira masiki ira kai hora dhothene vevo vanoira i-yo vyongovyo namwasa oi vinonisangalali-a, ninoira namwasa oi ninomdhiveliwana. Ninga mwemo Yohova mwaraeli-idhe liye Paulo na i-yene thitho unodha niraeli-a namwasa wathindhi li-u. (Sal. 126:5) Thitho naonanga mwemo Yohova munoniraeli-edha liye ninooda kaana rima ofunechecha. Rongola unango wau Poland dhinalee Lucyna, aongile ira: “Hora dhinango kandinofuna dhowa muurumiwini simbwasimbwa ndachenyela. Mbwenye ndadhowa imwerumweru inokaana miyo inokala yo-oongeya.” Dhoweni nioneni vevyo vinaire i-yo naonanga ira kaninave rima ofunechecha kwakwaneli-edha ifunelo yi-u.

11. N’nga Yohova unanikami-e a-vi ira nikale odhikondi-a?

¹¹ Mumvepenga Yohova ira aukami-eni kala odhikondi-a. Dhikondi-a unothangani-avo mwemo munovwela i-yo thitho vyoira vi-u. Hora dhinjinji madhwala anoonga vyodhilimbi-edha ira na-aire vyongo vinango vyotakala. Dhikondi-a unofuneya thitho ira niire vyongo vyapama simbwasimbwa akala ira vinofuna i-yo iravyo pyorucha venango kanina rima ofunechecha viirana. Muthuulelenga ira dhikondi-a ndi imbo-i mwa makalelo enao zimu ochena anokumi-a aliwa, ee-no muvepenga zimu ochena wa Yohova ira uukami-eni kaana kalelo lofuneyali. (Luka 11:13; Agal. 5:22, 23) Davide wenuo um’mongile i-yo wale atoonga mwemo lobelo mwamkami-edhe aliwa. Liye anoofunechecha ira hora dhothene a-alupi-enga funjedhawe wa Bibilya wavaekene. Liye aongile ira: “Ndinomvepa Yohova ira andikami-e kala odhikondi-a. Liye atoondikami-a ira ndikaena thandha wapama ofunjedha wavadekene thitho nda-aulupi-enga.”

12. N’nga likundo lava lemba la Namalaleya 11:4, linanikami-e a-vi kwakwaneli-edha vifunelo vi-u vyauzimu?

¹² Kamudedi-edhelenga ira vyongo vikale pama. Muilamboi kavali hora yoi vyongo vyothene viniwendelenga pama. Akala ninooda dedi-edha ira vyongo vikale pama, kaninaode kwakwaneli-edha ifunelwi-u. (Muleri Namalaleya 11:4.) Bali unango dhinalee Dayniel aongile ira: “Kavali hora yeniyo vyongo vyothene vinokala aliwa pama. Ee-no, kaninofwanela dedi-edha, mbwenye ninofuneela romavo.” Bali unango wa Uganda dhinalee Paul, atoonga thitho mwasa unango wenuo wa-anofwanela i-yo ira vyongo mokaikela. Liye aongile ira: “Naromavo masiki vyongo vya-akale pama Yohova unonikami-a.”—Malak. 3:10.

13. N’nga roma nokwakwaneli-edha vifunelo ving’onoving’ono kokami-a moi a-vi?

¹³ Muromenga mwavang’ono navang’ono. Hora dhinango kaninaode kaana rima ofunechecha kwakwaneli-edha ifunelo yi-u, namwasa oi ifunelwi-uiyo inooda oneyanga ninga njorucha. Akala mwemo ndi moda ulinyo, n’nga munooda roma na vyongo ving’onoving’ono vokwakwaneli-edha ifunelwiyo? Akala ifunelwinyu choi mukaena kalelo n’nangolee munoona a-vi nyo roma lithonyi-edha kalelolo mundhila dhing’onodhing’ono? Akala ira ifunelo inyu choi muleringa Bibilya, munoona a-vi nyo roma leringa hora yoyeva? Tomás um’mongile i-yo maromelo ule anoorucheya kwakwaneli-edha ifuneloyee yoi yawa yamalanga akale angamadhi leri Bibilya lothene. Liye aongile ira: “Ndatoozindiyela ira ndanooleri vyongo vinjinji vahora yoyeva. Ee-no ndatoothuulela ira ndirome okoka mbwenye vahora yeniyo ndatoira masaka-edho ira ndileringa ndima dhoyeva thitho thuulela modi-a vyevyo vilerile miyovyo. Ndingairilena vyevi, ndatooroma sangalala ndaleringa Bibilya.” Tomáš angaromile sangalala atoowenjedhela hora yaleri liye Bibilya. Vamamari-edhovee atooleri Bibilya lothene.c

KAMUFOOKE AKALA MUTOGUMANANA VYOIMWANANI-A

14. N’nga ninagumanena vyoimwanani-a viivi?

¹⁴ Mbwenye masiki nidhilimbi-edhe kala odhikondi-a venango kaana rima ofunechecha ninooda gumanana vyoimwanani-a. Mwaifwanafwani-o “vyongo vyo-odedi-edhela” vinooda ninongela hora yeniyo yafuneela i-yo kwakwaneli-edha ifunelo yi-u. (Namal. 9:11) Ninooda gumanana nyarwa inaniiri-e ira nifooke thitho na-akaena kopolo. (Sang. 24:10) Voi nili atu odawa ninooda irana vyongo vyevyo vya-ananikami-e kwakwaneli-edha ifunelo yi-u. (Aroma 7:23) Venango ninooda dhivwanga ira nitochenyela. (Mat. 26:43) N’nga chini inanikami-e nagumanangana vyoimwanani-a?

15. N’nga nagumanana vyoimwanani-a vinothonyi-edha ira nili oimwanana? Muongemo. (Salimo 145:14)

¹⁵ Nithuulelengani ira nagumanangana vyoimwanani-a kavinothapulela ira nili oimwanana. Bibilya linoonga ira ninooda gumanana nyarwa moweli-edha weli-edha. Mbwenye linoonga movweya pama ira ninooda kwakwaneli-edha vyofuna vi-u simbwasimbwa akala ninokami-iwa na Yohova. (Muleri Salimo 145:14.) Philip wenuo um’mongile i-yo walelene aongile ira: “Kandinathuulela maningi vya hora yeniyo yaimwanena miyo kwakaneli-edha ifunelwanga. Malomwee ndinothuulela vya hora yeniyo yadhilimbi-edhe miyo ira ndiikwakwaneli-edhe.” David wenuo um’mongile i-yo walelene aongile ira: “Ndinodhilimbi-edha ira ndionenga ira vyoimwanani-a ndingari yanga yoi ndimthonyi-edhe Yohova mwemo munomdhiveliwana miyo.” Mwadhilimbi-edhanga ira mukwakwaneli-edhe vifunelo vinyu masiki vakale vyoimwanani-a munomthonyi-edha Yohova ira munofuna msangalali-a. Liye unosangalala aona ira munadhowanave dhilimbi-edha kwakwaneli-edha vifunelo vinyu.

16. N’nga vyoimwanani-a vinanifunji-en’ni?

¹⁶ Mufunjedhengavo yongo mwagumanana vyoimwanani-a. Muthuulelenga yeyo iuimwanani-idheni kwakwaneli-edha ifunelo inyu. Mwaira ee-no mudhifukenga ira: ‘N’nga vatokala vyongo vinofuneela miyo irana ira vyevi vya-aireye okoka?’ (Sang. 27:12) Hora dhinango vyoimwanana vinooda thonyi-edha ira natovi-elela ifunelo yeyo ya-aode i-yo ikwakwaneli-edha. Akala ndi moda ulinyo muthuulelenga akala ifunelwiyo inovwelana na mwemo vyongo mukalele aliwa vainguminyu.d Yohova kanodha uonani ira muli oimwanana namwasa o-okwakaneli-edha ifunelo yeyo ya-anaodenyo ikwakwaneli-edha.—2 Akor. 8:12.

17. Mwasiwa ngwan’ni ninofwanela thuulela vyevyo vyakwakwaneli-edhe i-yo walelene?

¹⁷ Muthuulelenga vyevyo vyaodilenyo vikwakwaneli-edha walelene. “Nlungu kai o-olongomana oi unooda diwala mabasinyu.” (Aeb. 6:10) Ee-no nyo thitho kamudiwalenga vyevyo vyairilenyo. Muthuulelenga ifunelo yeyo yaikwakwaneli-edhe nyo walelene. Akala kulimbi-a uxamwalinyu na Yohova venango badiziwa. Ninga mwemo mukalelenyo mukwakwaneli-edhanga vifunelo vinyu ndulimu, mudhowenave kwakwaneli-edha ifunelo inyu va-eeni.—Afil. 3:16.

18. N’nga nithuulelenga irana’ni vevo vanodhilimbi-edha i-yo kwakwaneli-edha ifunelo yi-u? (Muone thitho iruthiruthi.)

¹⁸ Mokami-iwa na Yohova nyo thitho munooda kwakwaneli-edha ifunelo inyu mofwanafwana na mulimbo wendi-a baruku wenuo unosangalala afiya wewo unaaliye. Mbwenye thuulelani thitho ira alimbo wendi-a baruku tanosangalala na ulendwiwa. Nyo thitho mudhilimbi-edhenga ira mukwakwaneli-edhe ifunelo inyu yauzimu. (2 Limb. 4:7) Musangalalenga na mwemo Yohova muukami-idheni liye, thitho uraeli-ani. Akala kamufookile munodha fwanya maraeli-o manjinji.—Agal. 6:9.