Muonenga ira ingumi chotuva yapereso yavadhulu

I-yo atu ninooda irana thitho sangalala na vyongo vyo-iyana i-yana namwasa oi nitokaana ingumi. Angalive ira ninogumana nyarwa mbwenye hora dhinjinji ninooda sangalala muvyongo vinango vaingumi yi-u. N’nga ninathonyi-edhe a-vi ira ninom’simba Yohova namwasa oniva-a yotuva yaingumi? N’nga mwasiwa ngwan’ni ninofwanela ira vyevi?

1. Mwasiwa ngwan’ni ninofwanela msimba Yohova namwasa oniva-a ingumi?

Ingumi chotuva yokumela wa Babi-u wa udhivela Yohova. E-no ninofwanela msimba namwasa wa yotuva yei. Bibilya linoonga ira liye “chiisime ya ingumi” thapulela ira ngu liye apanduchile vyaigumi vyothene. (Salimo 36:9) Thitho linoonga ira: “Liye ngunava-a atu othene ingumi, mwela na vyongo vyothene.” (Mayirelo 17:25, 28) Yohova unoniva-a vyongo vyothene vyofuneela ira nikaena ingumi. Wenjedhela vevo, Yohova unoniva-a vyongo vinango vyo-iyana i-yana ira nisangalalengana ingumi.—Muleri Mayirelo 14:17.

2. N’nga ninathonyi-edhe a-vi ira ninom’simba Yohova namwasa oniva-a yotuva yaingumi?

Yohova atoona ira nyo muli wa pereso yavadhulu, kumela vahora yan’na m’minyu wise. Lobelo larumeli-idhe Yohova ira lilembiwe m’Madhwee, rumiwee Davide atom’mwandela Yohova ira: “Methwinyu tatoondiona ndingali mbani mwa m’manga.” (Salimo 139:16) Yohova unoona ira ingumi inyu chapereso yavadhulu maningi. (Muleri Mateu 10:29-31.) Yohova vinompi-a rimani maningi, aona ira mutu unango utodhipa mwakomove venango upa mutu unango.a (Ekisodo 20:13) Vinom’pi-a thitho rimani maningi nairanga mwakomove vyongo vyoi vinooda e-la ingumii-u vangovini, venango naimwananangana a-rela malangi-o anaode nivunela vaingumii-u, na vingumi vyaatu enango. Nadhilimbi-edhanga samalela ingumi yi-u thitho nalemezanga vingumi vyaatu enango ninothonyi-edha ira ninosimba yotuva yaingumi thitho ira japereso yavadhulu.

FUNJEDHANI VINJINJI

3. Musamalelenga manungwinyu

Hora dhothene ninodhilimbi-edha irana vinofuna Yohova namwasa oi natom’lanyedha ira ninodha m’labela na ingumii-u yothene. Nairanga vyevi ninokala ninga ninovelela kuto matutwi-u wa Nlungu. Muleri Aroma 12:1, 2, mwamala mutapanye vyofuka vyo-arelavi:

• Mwasiwa ngwan’ni munofwanela samalela manungwinyu?

• N’nga pivyongo viivi vinairenyo vothonyi-edha ira munosamelela manugwinyu?

4. Nidhilimbi-edhenga rambela vyongo vina-ele ingumi yi-u na vingumi vyaa atu enango vangovini

Bibilya linoonga ira ninofwanela rambela vyongo vino-ela ingumii-u na vingumi vyaatu enango vangovini. Muonele VIDIYO ira muone vyongo vinairenyo ira murambele ngovi.

VIDIYO: Muziyesetsa Kupewa Ngozi (8:34)

Muleri Sanganiko 22:3, mwamala mutapanye mwemo nyo naatu enango munarambele nyo ngovi . . .

• mwakala vanyumbani.

• mwakala basani.

• mwawaredhanga masika o-iyana i-yana.

• mwawendi-anga venango mwagwela vyongo ninga Karo, njinga, bote, ngolo, na vyongo vinango.

5. Muonenga ira ingumi yamwana a-anabaliwe chapereso yavadhulu

Davide atoonga ira Yohova unokaana ifunelo va yongo ili yothene inoireya mwana aulukulanga m’mbani mwam’mee. Muleri Salimo 139:13-17, mwamala mutapanye yofukai:

• N’nga Yohova unoona ira ingumi inoroma vahora iivi, hora inoroma m’ma wise, venango hora inobaliwa mwana?

Malamulo avelenle Yohova wa Aisraeli, tanovunela ingumi ya m’ma thitho na yamwana a-anabaliwe. Muleri Ekisodo 21:22, 23, mwamala mutapanye vyofuka vyo-arelavi:

• N’nga Yohova aona a-vi mutu oi utopa mwana a-anabaliwe mwangovi?

• N’nga unaone a-vi mutu oi utopa mwana a-anabaliwe mwakomove?b

• N’nga nyo munoona ira mathuulelo a Nlungu vamwasa wen’na mbovweya?

Muonele VIDIYO.

VIDIYO: Muziona Moyo Mmene Yehova Amauonera (5:00)

Angalive ira hora dhinango m’ma unoona ingumi ya mwana a-anabaliwe kala yapereso yavadhulu, unooda gumanana vyorucha vinam’mwiri-e ona ira kavali ndhila inango, mbwenye tatila wise baa-i. Muleri Esaya 41:10, mwamala mutapanye vyofuka vyo-arelavi:

• Akala ira m’ma unokanyi-edhiwa ira atatile wise, n’nga unofwanela nyindela aani ira am’kami-e? Mwasiwa ngwan’ni munoonga e-no?

MAKUNDO OGWANDELA

Bibilya linonifunji-a ira ninofwanelela dhiveliwana, lemeza, novunela yotuva yaingumi yaniva-idhe Yohova. Vyevi vinothangani-avo ingumi yi-u na vingumi vyaatu enango.

Vyofuka vyowelela

• Mwasiwa ngwan’ni Yohova unoona ira ingumi chapereso yavadhulu?

• N’nga Yohova unovwa a-vi mutu adhipa venango apa mutu unango mwakomove?

• N’nga nyo munosimba yotuva yaingumi?

IDHIWANI VINJINJI

N’nga ninathonyi-edhe a-vi ira ninomsimba Yohova namwasa oniva-a yotuva yaingumi?

Nyimbo 141—Moyo Ndi Wodabwitsa (2:41)

Mufwanye yowakula ya yofuka yoi: N’nga Nlungu unom’levelela m’ma utatinle wise mwakove?

“Kodi Baibulo Limanena Zotani pa Nkhani Yochotsa Mimba?” (Mwasa wavasaiti)

Muone mwemo idhiwa mathuulelo a Nlungu oonga vyaingumi munanikami-edhe aliwa ira nisakulenga vyosangalali-a vyoi kavina-ele ingumi yi-u vangovini.

“‘Masewera Angozi’—Kodi Muyenera Kuika Moyo Wanu Pachiswe Mwakuwachita?” (Galamukani!, wa 8 wa Outubro wa 2000)

Muone mwemo Bibilya munakami-edhe aliwa mutu una mathuulelo ofuna dhipa.

“Kodi Baibulo Lingandithandize—Ngati Ndili ndi Maganizo Ofuna Kudzipha?” (Mwasa wavasaiti)