Vyofuka Vyokumela Waalimbo Leri

N’nga rumiwi Paulo athapulelan’ni, vevo vyadhiongile liye ira ali ninga “kombwani obaliwa malambo ta-anakwakwane”? (1 Akoritiyo 15:8)

Va 1 Akoritiyo 15:8, Paulo atoonga ira: “Vomari-edhavee atooneela wa miyo ninga kombwani obaliwa malambo ta-anakwakwane.” Voroma vyaoneya ira veva Paulo aonga vya vile vyaireile vahora yeniyo yaone liye masopenya a Yesu mutitimi-o wee dhulu. Vyali ninga utova-iwa ngari yobaliwa venango ira venyathi-iwa mwauzimu. Tundu ovenyathi-iwa wewo wali udhaireyanga vyawa vinjinji sogolou. Mbwenye sakasaka makundo owenjedheleya va versu leli, utothonyi-edha ira vanofuneeleya chinja mwemo mwaliongela i-yo.

Pyaimbarimbari ira va lemba leli Paulo aonga vya vyevyo vyaireile vahora yeniyo vyadhimbinuile liye nokala Kristau. N’nga athapulelan’ni vaonga liye ira ali ninga “kombwani obaliwa malambo ta-anakwakwane”? Pyoodeya ira athapulela vyongo vingaasi.

Dhimbinuwawee watoireya morurumucha thitho mo-odedi-edhela. Hora dhinjinji ira mwana abaliwe malambo ta-anakwakwane vinoireya morurumucha. Saulo (wenuo vasogolovee aromile idhiweyana ira Paulo) adhowanga wu Damasku ira ama-are-are Makristau, kaadedi-edhela ira unoona masopenya a Yesu Kristu wenuo uvenyathi-iwile. Dhimbinuwa wa Paulo kwaali odabwi-a wa liye baa-i, mbwenye wali odabwi-a thitho wa Makristau enao afuna liye maaoni-a nyarwa sidadinimo. Wenjedhela vevo vyaireilevi, vyali vyoovi-a moi atofiyedha i-ya ona wahora yoyeva.—Mayir. 9:1-9, 17-19.

Liye adhimbinuwile vahora yodaweya. Madhu Aigiriki athapuleliwile ira “baliwa malambo ta-anakwakwane,” anooda thapuleliwa thitho ira “baliwa vahora yodaweya.” Bibilya n’nango lathapulele madhwala ira: “Vyali ninga ndibaliwile vahora yeniyo kavali wenuo adedi-edhela.” (The Jerusalem Bible) Vahora yadhimbinuwa Paulo, Yesu ali angawelele wale dhulu. Mo-iyana naatu enao Paulo aaonga liye mumaversu oroma, liye kaaoni Yesu a-anadhowe dhulu. (1 Akor. 15:4-8) Oneela morurumucha wairile Yesu, watomva-a Paulo ngari yoona Yesu angalive ira vinooda oneya ira vyatoireya “vahora yodaweya.”

Anoonga vyokuza liye modhiyevi-a. Movwelana na vyevyo vinoonga adodoliso enango, madhu enao Paulo a-indi-edhe liye basala, anothonyi-edha kala o-ofwanela. Akala mwemo ndi moda wathuulela liye, vinooneya ira atorumela ira kaali ofwanela va-iwa ngari yen’na. Thitho atodhowanave onga ira: “Miyo ndili wang’ono maningi mwaarumiwi othene thitho kandili ofwanelela itaniwa rumiwi, namwasa oi ndato-ara-ara pingo wa Nlungu. Mbwenye mooma rima ulukulu wa Nlungu, ndili ninga muli miyomu.”—1 Akor. 15:9, 10.

Ee-no vinooneya ira Paulo aonga vya vile vyaireile vevo Yesu vaoneele liye wa liye morurumucha. Dhimbinuwawee vahora yo-odedi-edhela, venango ira ali o-ofwanelela mwauzimu ira aone masopenya odabwi-ala. Mulimothene Paulo aona ira vyevyo vyaireilevi vyali vya pereso yavadhulu. Vyatomkami-a ira a-akaikelenga navang’onovene ira Yesu atoovenyathi-iwa. Pyo-odabwi-a ira hora dhinjinji anoonga vyevyo vyam’mwireelevi alaleelanga waatu enango vyokuza venyathi-iwa wa Yesu.—Mayir. 22:6-11; 26:13-18.