Adamu na Eva katavwele Nlungu

Dambo n’nango Eva angali ekene, nyowa yatoodha nom’fuka ira: ‘N’nga pyaimbarimbari ira Nlungu utoukondi-ani ira kamudyenga yova-a ya muri uliothene wa mundanimu?’ Eva atoowakhula ira: ‘Khabe. Nikondi-iwile vyova-a vya muri m’mbo-i baa-i, ira nadya vyova-a vya muri wenuo ninodhakwa.’ E-no nyowiyo yatoonga ira: ‘Nyo kamunodhakwa. Mwadya vyova-a vya muri wen’na, munodha khala saasawa na Nlungu.’ N’nga vyevyo vyali vyaimbarimbari? Khabe vyali vyonama. Mbwenye Eva atoororomela vyaongile nyowiyo. Adharome viing’anechecha vyova-avyo, atooroma visilila. Moi e-no atoocha yova-a ya murio ongodya, adhamale ongom’va-a Adamu. Adamu anooidhiwa ira ka-avwele Nlungu anodhakwa. Mbwenye angalive e-no naliyene thitho atoodya.

Maulo a dambo lelo Yohova atoonga na Adamu na Eva. Atowafuka ira mwasiwa ngwan’ni katavwele. Eva awakhunle ira ndi nyowa indiiri-idhe mbwenye Adamu awakhunle ira ndi Eva undiiri-idhe. Namwasa o-ovwelao, Yohova atowatamangi-amo mundani mwa Edeni. Ira ta-awelelemo okokha, Yohova atoa-elamo angelo na sarasada lo-inda mulo va limburo lovolowela mundanimo.

Yohova aongile ira nyowiyo thitho inodha langiwa. Mbwenye kaiira yali nyowanyowene yaongile na Eva. Namwasa oi Yohova kaapanduchile nyowa ira dhiongenga. Ngu ngelo othakala airi-idhe ira nyowiyo ionge. Atooirana vyevyo vofuna m’nami-a Eva. Ngelo wenuo ngu Satana Namanami-a. Sogolou Yohova unodha m’nonga Satana ira a-anami-eve okokha atu.