Adamu na Eva tangatamangi-iwile mudani mwa Edeni, tatoobala a-ima anjinji. Mwaniwa oroma ali Kaini wanambili ali Abeli. Kaini ali namalima mbwenye Abeli ali namakumbiza.

Dambo n’nango Kaini na Abeli tatoovelela yotuva wa Yohova. N’nga utoidhiwa moda atu mwaitanelecha aliwa yotuvai? Taitanecha ira yotuva yavakundu venango sembe. Yohova atoosangalala maningi na yotuva ya Abeli mbwenye kaasangalale na yotuva ya Kaini. Moi e-no Kaini atoothakaleliwa maningi. Yohova atom’langi-a ira a-iye thakaleliwa namwasa oi unooda irana vyothakala. Mbwenye Kaini kaavwele.

Ee-no Kaini atoom’mwandela Abeli ira: ‘Dhowenga minda.’ Tangali mindao, atooroma m’koma baleuo fiyedhela m’pha. N’nga Yohova airile n’ni? Atoom’langa Kaini vom’tamangi-edha undendai na waniwa thitho kaam’rumeli-idhe ira awelele okokha waniwa.

N’nga ninofunjedhavo n’ni vamwasa wen’na? Hora dhinango ninooda sukwala akala vyongo vinango kaviireile ninga mwafunela i-yo. Mbwenye naona ira nitoroma thakaleliwa maningi venango atu enango taniva-a malangi-o, ninofwanela i-ya thakaleliwao ovela ira ninooda irana vyongo vyo-ofwanelela.

Voi Abeli anom’dhiveliwana Yohova thitho anoirana vyongo vyapama, Yohova kanodha m’diwala. Unodha m’venyathi-a ira adhakale paradaizoni.

Vangavirile hora injinji, atu tatooroma injiva vailambo yavathi, mbwenye atu anjinji tali amakalelo othakala. Thitho angelo enango tali amakalelo othakala. Aliwa tatookuma dhulu nodha vailambo yavathi. N’nga utoidhiwa mwasiwa angelwala mwairele aliwa vyevi? Aliwa tafuna ira tadhakaena matutu ninga atu naifunelo yoi tathele a-iyana availambo yavathi.

Angelwao tangathenle a-iyanao, tatoobala a-ima. A-imao tali olapa na akopolo maningi thitho tanooruchi-a atu enango. Yohova kaarumeli-idhe ira vyevyo vidhowenave kala e-no. Ee-no Yohova atothuulela vyodhi-a igumula venango nionge ira dhongwe wakopolo ira anonge atu amakalelo othakalao.

Mbwenye vatookala mutu mwinango wamakalelo apama thitho anoom’dhiveliwana Yohova. Mutu wen’na dhinalee ali Nowa. Liye atokaana i-yana na a-ima aalombwana araru. Madhiniwa ali Semu, Hamu na Yafeti thitho ararwene tatokaana a-iyaniwa. Yohova atoom’mwandela Nowa ira asaka-edhe mwadiya nlukulu oi liye na banjalee tavulumuwelemo. Mwadiya nlukuluo waoneya ninga bokosi nlukulu loi lingaodilenga mbeluwa vadhulu vama-inje. Yohova atom’mwandela Nowa ira avoloche vinyama vinjinji mwadiyanimo ira viode vulumuwa.

Vahora yeniyene Nowa atooroma saka-edha mwadiya. Liye vambo-i na banjalee tatoolaba basalo wa vyawa 50. Vosaka-edha mwadiya Nowa atoo-arela malangi-o othene am’mwandenle Yohova. Vahora imbo-ive yeniyo Nowa anoowenjeli-a atu ira unodhadha igumula. Mbwenye kavali mutu nam’mbo-ene am’vwele.

Voi e-no yatoofiya hora yoi tavolowe mwadiyanimo. Mumuru o-arela ninoonani vyaireile.