22 ຈາກ​ນັ້ນ ໃຫ້​ເອົາ​ນ້ຳ​ມັນ​ຈາກ​ໂຕ​ແກະ ຫາງ​ທີ່​ມີ​ນ້ຳ​ມັນ* ນ້ຳມັນ​ທີ່​ປົກ​ໄສ້ ນ້ຳມັນ​ທີ່​ຕິດ​ຢູ່​ຕັບ ໝາກ​ໄຂ່​ຫຼັງ 2 ໜ່ວຍ​ກັບ​ນ້ຳ​ມັນ​ທີ່​ຕິດ​ຢູ່​ຫັ້ນ+ ແລະ​ຂາ​ຫຼັງ​ເບື້ອງ​ຂວາ​ຂອງ​ແກະ​ມາ​ເພື່ອ​ຈະ​ໃຊ້​ແກະ​ໂຕ​ນີ້​ເປັນ​ເຄື່ອງ​ບູຊາແຕ່ງຕັ້ງ+​ໃຫ້​ເປັນ​ປະໂລຫິດ. 23 ໃຫ້​ເອົາ​ເຂົ້າຈີ່​ບໍ່​ມີ​ເຊື້ອ​ກ້ອນ​ມົນ​ໆ​ ເຂົ້າຈີ່​ບໍ່​ມີ​ເຊື້ອ​ທີ່​ນວດ​ໃສ່​ນ້ຳມັນ​ເຮັດ​ເປັນ​ຮູບ​ວົງ​ມົນ ແລະ​ເຂົ້າຈີ່​ບໍ່​ມີ​ເຊື້ອ​ແຜ່ນ​ບາງ​ໆ​ທີ່​ທາ​ນ້ຳມັນ​ຈາກ​ກະດົ້ງ​ທີ່​ຢູ່​ຕໍ່​ໜ້າ​ພະ​ເຢໂຫວາ. 24 ໃຫ້​ເອົາ​ເຄື່ອງ​ພວກ​ນີ້​ໃສ່​ມື​ຂອງ​ອາໂຣນ​ແລະ​ໃສ່​ມື​ຂອງ​ພວກ​ລູກ​ຊາຍ​ຂອງ​ລາວ. ໃຫ້​ເຂົາ​ເຈົ້າ​ເອົາ​ເຄື່ອງ​ທັງ​ໝົດຊູໄປ​ຊູມາ​ເປັນ​ເຄື່ອງ​ບູຊາ​ຊູ​ໄປ​ມາ​ຕໍ່​ໜ້າ​ພະ​ເຢໂຫວາ. 25 ຈາກ​ນັ້ນ ໃຫ້​ເຈົ້າ​ຈັບ​ເອົາ​ເຄື່ອງ​ທີ່​ຢູ່​ມື​ຂອງ​ເຂົາ​ເຈົ້າ ແລ້ວ​ເອົາ​ໄປ​ເຜົາ​ຢູ່ແທ່ນ​ບູຊາ​ເທິງ​ແກະ​ທີ່ເປັນ​ເຄື່ອງ​ບູຊາ​ເຜົາ ເພື່ອ​ເຮັດ​ໃຫ້​ມີ​ກິ່ນ​ຫອມ​ທີ່​ພະ​ເຢໂຫວາ​ພໍ​ໃຈ. ນີ້​ແມ່ນ​ເຄື່ອງ​ບູຊາ​ດ້ວຍ​ໄຟ​ໃຫ້​ພະ​ເຢໂຫວາ.