ກະສັດສະບັບທີສອງ
20 ຕອນທີ່ເຮເຊກີຢາບໍ່ສະບາຍແຮງແລະໃກ້ຊິຕາຍ+ ຜູ້ພະຍາກອນເອຊາຢາລູກຊາຍຂອງອາມອດມາຫາລາວແລະເວົ້າວ່າ: “ພະເຢໂຫວາບອກວ່າ ‘ໃຫ້ສັ່ງລາຄອບຄົວ*ຂອງເຈົ້າ ເພາະວ່າເຈົ້າຈະບໍ່ເຊົາເຈັບປ່ວຍແລະຈະຕາຍ.’”+ 2 ເມື່ອໄດ້ຍິນແບບນັ້ນເຮເຊກີຢາກໍປິ່ນໜ້າເຂົ້າຝາແລະອະທິດຖານຫາພະເຢໂຫວາວ່າ: 3 “ພະເຢໂຫວາ ຂໍໃຫ້ຈື່ວ່າລູກໃຊ້ຊີວິດຢ່າງສັດຊື່ໃນແນວທາງຂອງພະອົງ ຮັບໃຊ້ພະອົງດ້ວຍສຸດຫົວໃຈ ແລະເຮັດສິ່ງທີ່ພະອົງເບິ່ງວ່າຖືກຕ້ອງສະເໝີ.”+ ແລ້ວເຮເຊກີຢາກໍໄຫ້ແທ້ໄຫ້ວ່າ.
4 ເອຊາຢາອອກໄປບໍ່ທັນຮອດເດີ່ນຂອງວັງຊ້ຳ ພະເຢໂຫວາກໍບອກລາວວ່າ:+ 5 “ກັບໄປຫາເຮເຊກີຢາຜູ້ປົກຄອງປະຊາຊົນຂອງເຮົາແລະບອກລາວວ່າ ‘ພະເຢໂຫວາພະເຈົ້າຂອງດາວິດປູ່ຍ່າຕານາຍຂອງເຈົ້າບອກວ່າ “ເຮົາໄດ້ຍິນຄຳອະທິດຖານຂອງເຈົ້າ ແລະເຫັນນ້ຳຕາຂອງເຈົ້າແລ້ວ.+ ເຮົາຈະປົວເຈົ້າໃຫ້ເຊົາ.+ ອີກ 3 ມື້ເຈົ້າຈະໄດ້ໄປວິຫານຂອງພະເຢໂຫວາ.+ 6 ເຮົາຈະໃຫ້ເຈົ້າມີຊີວິດຢູ່ຕໍ່ອີກ 15 ປີ. ເຮົາຈະຊ່ວຍເຈົ້າກັບເມືອງນີ້ໃຫ້ລອດຈາກກະສັດອັດຊີເຣຍ.+ ເຮົາຈະປົກປ້ອງເມືອງນີ້ເພື່ອເຫັນແກ່ຊື່ຂອງເຮົາແລະເພື່ອເຫັນແກ່ດາວິດຜູ້ຮັບໃຊ້ຂອງເຮົາ.”’”+
7 ຈາກນັ້ນ ເອຊາຢາບອກຄົນຮັບໃຊ້ຂອງກະສັດວ່າ: “ໄປເອົາໝາກເດື່ອແຫ້ງທີ່ປັ້ນເປັນກ້ອນມາ.” ເຂົາເຈົ້າກໍເອົາມາໃຫ້ລາວແລະໂພະໃສ່ຝີ. ຫຼັງຈາກນັ້ນ ເຮເຊກີຢາກໍຄ່ອຍໆໄຄຂຶ້ນ.+
8 ເຮເຊກີຢາຖາມເອຊາຢາວ່າ: “ມີຫຍັງຢືນຢັນ+ວ່າພະເຢໂຫວາຈະປົວຂ້ອຍໃຫ້ເຊົາແລະອີກ 3 ມື້ຂ້ອຍຈະໄດ້ໄປວິຫານຂອງພະເຢໂຫວາ?” 9 ເອຊາຢາຕອບວ່າ: “ພະເຢໂຫວາຈະໃຫ້ທ່ານເຫັນສິ່ງຕໍ່ໄປນີ້ເພື່ອຢືນຢັນວ່າພະເຢໂຫວາຈະເຮັດຕາມທີ່ເພິ່ນໄດ້ເວົ້າ. ທ່ານຢາກໃຫ້ເງົາທີ່ຢູ່ຂັ້ນໄດ*ຍ້າຍໄປທາງໜ້າ 10 ຂັ້ນຫຼືຢາກໃຫ້ຖອຍກັບຫຼັງ 10 ຂັ້ນ?”+ 10 ເຮເຊກີຢາເວົ້າວ່າ: “ເງົານີ້ຍ້າຍໄປທາງໜ້າ 10 ຂັ້ນໄດ້ຢູ່ແລ້ວ ແຕ່ມັນຖອຍຫຼັງກັບມາ 10 ຂັ້ນບໍ່ໄດ້ດອກ.” 11 ຜູ້ພະຍາກອນເອຊາຢາຈຶ່ງອະທິດຖານຫາພະເຢໂຫວາ ແລະເພິ່ນໄດ້ເຮັດໃຫ້ເງົາທີ່ສ່ອງໃສ່ຂັ້ນໄດຂອງອາຮາດຖອຍກັບຫຼັງ 10 ຂັ້ນ ຫຼັງຈາກທີ່ເງົານັ້ນສ່ອງກາຍໄປແລ້ວ.+
12 ໃນຕອນນັ້ນ ເບໂຣດັກບາລາດານ*ກະສັດຂອງບາບີໂລນທີ່ເປັນລູກຊາຍຂອງບາລາດານໄດ້ສົ່ງຈົດໝາຍພ້ອມກັບຂອງຂວັນມາໃຫ້ເຮເຊກີຢາ ຍ້ອນລາວໄດ້ຍິນວ່າເຮເຊກີຢາບໍ່ສະບາຍ.+ 13 ເຮເຊກີຢາກໍເຕັມໃຈຕ້ອນຮັບຄົນທີ່ກະສັດສົ່ງມາ ແລະໃຫ້ເຂົາເຈົ້າເຂົ້າໄປເບິ່ງຄັງຊັບສິນທັງໝົດຂອງລາວ.+ ລາວຍັງໃຫ້ເຂົາເຈົ້າເບິ່ງເງິນ ຄຳ ນ້ຳມັນຫອມ ນ້ຳມັນອື່ນໆທີ່ມີຄ່າ ແລະບ່ອນທີ່ລາວເອົາອາວຸດໄວ້. ເຮເຊກີຢາໃຫ້ເຂົາເຈົ້າເບິ່ງທຸກຢ່າງທີ່ຢູ່ໃນວັງແລະຢູ່ໃນປະເທດຂອງລາວ.
14 ຈາກນັ້ນ ຜູ້ພະຍາກອນເອຊາຢາໄດ້ມາຫາກະສັດເຮເຊກີຢາແລະຖາມວ່າ: “ເຂົາເຈົ້າມາແຕ່ໃສແລະມາເວົ້າເລື່ອງຫຍັງ?” ເຮເຊກີຢາຕອບວ່າ: “ເຂົາເຈົ້າມາແຕ່ບາບີໂລນທີ່ຢູ່ໄກໆພຸ້ນ.”+ 15 ເອຊາຢາຖາມອີກວ່າ: “ເຂົາເຈົ້າເຫັນຫຍັງແດ່ຢູ່ໃນວັງຂອງທ່ານ?” ເຮເຊກີຢາຕອບວ່າ: “ເຂົາເຈົ້າເຫັນທຸກສິ່ງທຸກຢ່າງທີ່ຢູ່ໃນວັງຂອງຂ້ອຍ. ຂ້ອຍໃຫ້ເຂົາເຈົ້າເບິ່ງທຸກຢ່າງທີ່ຢູ່ໃນຄັງຊັບສິນຂອງຂ້ອຍ.”
16 ເອຊາຢາຈຶ່ງເວົ້າກັບເຮເຊກີຢາວ່າ: “ໃຫ້ທ່ານຟັງສິ່ງທີ່ພະເຢໂຫວາເວົ້າ.+ 17 ພະເຢໂຫວາບອກວ່າ ‘ອີກຈັກໜ້ອຍທຸກສິ່ງທີ່ຢູ່ໃນວັງຂອງເຈົ້າແລະທຸກສິ່ງທີ່ປູ່ຍ່າຕານາຍຂອງເຈົ້າສະສົມໄວ້ຈະຖືກຂົນໄປບາບີໂລນ+ ຈະບໍ່ມີຫຍັງເຫຼືອຢູ່ນີ້ເລີຍ. 18 ລູກຫຼານຂອງເຈົ້າບາງຄົນຈະຖືກພາໄປບາບີໂລນ+ ແລະຈະເປັນຂ້າລາຊະການຢູ່ໃນວັງຂອງກະສັດ.’”+
19 ແລ້ວເຮເຊກີຢາກໍເວົ້າກັບເອຊາຢາວ່າ: “ສິ່ງທີ່ພະເຢໂຫວາເວົ້າກໍຍຸຕິທຳ.”+ ເຮເຊກີຢາເວົ້າຕື່ມອີກວ່າ: “ຂ້ອຍຂອບໃຈທີ່ໃນສະໄໝຂອງຂ້ອຍຈະມີຄວາມສະຫງົບສຸກແລະບໍ່ມີບັນຫາ.”+
20 ເລື່ອງຕ່າງໆຂອງເຮເຊກີຢາ ຄວາມສຳເລັດຕ່າງໆຂອງລາວ ເລື່ອງທີ່ລາວສ້າງບ່ອນເກັບນ້ຳ+ກັບຮ່ອງນ້ຳແລະໃຫ້ນ້ຳໄຫຼເຂົ້າມາໃນເມືອງ+ກໍຂຽນໄວ້ໃນປຶ້ມປະຫວັດຂອງພວກກະສັດຢູດາ. 21 ເມື່ອເຮເຊກີຢາຕາຍ+ ມານາເຊລູກຊາຍຂອງລາວ+ກໍເປັນກະສັດແທນ.+