ເຢເຣມີຢາ
20 ຕອນທີ່ເຢເຣມີຢາພະຍາກອນເລື່ອງເຫຼົ່ານີ້ ປັດຊູລູກຊາຍຂອງອິມເມທີ່ເປັນປະໂລຫິດແລະເປັນຫົວໜ້າໃນວິຫານຂອງພະເຢໂຫວາກໍຟັງລາວຢູ່ຫັ້ນ. 2 ແລ້ວປັດຊູກໍຕີຜູ້ພະຍາກອນເຢເຣມີຢາແລະຈັບລາວໃສ່ຂື່+ຢູ່ປະຕູທີ່ຊື່ວ່າປະຕູທາງເທິງຂອງເບັນຢາມິນ ເຊິ່ງຢູ່ໃນວິຫານຂອງພະເຢໂຫວາ. 3 ແຕ່ມື້ຕໍ່ມາ ຕອນທີ່ປັດຊູປ່ອຍເຢເຣມີຢາອອກຈາກຂື່ ເຢເຣມີຢາກໍເວົ້າກັບລາວວ່າ:
“ພະເຢໂຫວາຈະບໍ່ເອີ້ນເຈົ້າວ່າປັດຊູ ແຕ່ຈະເອີ້ນເຈົ້າວ່າຄວາມຢ້ານທົ່ວທຸກບ່ອນ+ 4 ຍ້ອນພະເຢໂຫວາບອກວ່າ ‘ເຮົາຈະເຮັດໃຫ້ທັງເຈົ້າແລະໝູ່ຂອງເຈົ້າທັງໝົດຢ້ານຫຼາຍຍ້ອນສິ່ງທີ່ຈະເກີດຂຶ້ນກັບເຈົ້າ. ເຂົາເຈົ້າຈະຖືກສັດຕູຂ້າດ້ວຍດາບຕໍ່ໜ້າຕໍ່ຕາເຈົ້າ.+ ເຮົາຈະມອບຄົນຢູດາທັງໝົດໄວ້ໃນມືຂອງກະສັດບາບີໂລນ. ລາວຈະຈັບເຂົາເຈົ້າໄປເປັນຊະເລີຍຢູ່ບາບີໂລນແລະຈະຂ້າເຂົາເຈົ້າຕາຍດ້ວຍດາບ.+ 5 ເຮົາຈະເອົາຊັບສົມບັດ ຊັບພະຍາກອນ ແລະສິ່ງທີ່ມີຄ່າທັງໝົດຂອງເມືອງນີ້ ລວມທັງຊັບສົມບັດທັງໝົດຂອງພວກກະສັດຢູດາໃຫ້ພວກສັດຕູຂອງເຂົາເຈົ້າ.+ ສັດຕູຈະປຸ້ນເອົາສິ່ງເຫຼົ່ານີ້ແລະເອົາໄປບາບີໂລນ.+ 6 ແຕ່ປັດຊູເອີ້ຍ ເຈົ້າກັບທຸກຄົນທີ່ຢູ່ໃນເຮືອນຂອງເຈົ້າຈະຖືກຈັບໄປເປັນຊະເລີຍ. ເຈົ້າຈະຕ້ອງໄປບາບີໂລນແລະຕາຍຢູ່ຫັ້ນ. ເຈົ້າຈະຖືກຝັງໄວ້ຢູ່ຫັ້ນພ້ອມກັບໝູ່ທັງໝົດຂອງເຈົ້າ ຍ້ອນເຈົ້າໄດ້ພະຍາກອນຕົວະໃຫ້ເຂົາເຈົ້າຟັງ.’”+
7 ພະເຢໂຫວາເອີ້ຍ ພະອົງໄດ້ລໍ້ລູກແລະລູກກໍຖືກລໍ້ແລ້ວ.
ພະອົງໄດ້ພິສູດວ່າພະອົງມີກຳລັງຫຼາຍກວ່າລູກແລະໄດ້ເອົາຊະນະລູກ.+
ລູກຖືກຫົວຂວັນໃສ່ໝົດມື້.
ທຸກຄົນກໍເຍາະເຍີ້ຍລູກ.+
8 ມື້ໃດທີ່ລູກເວົ້າ ລູກກໍຕ້ອງຮ້ອງແລະປະກາດວ່າ:
“ຈະມີຄວາມຮຸນແຮງແລະການທຳລາຍ!”
ຍ້ອນຄຳເວົ້າຂອງພະເຢໂຫວາ ລູກຈຶ່ງຖືກດູຖູກແລະຖືກເຍາະເຍີ້ຍໝົດມື້.+
9 ລູກຈຶ່ງເວົ້າວ່າ: “ຂ້ອຍຈະບໍ່ເວົ້າເຖິງເພິ່ນອີກແລ້ວ
ແລະຂ້ອຍຈະບໍ່ເວົ້າໂດຍໃຊ້ຊື່ຂອງເພິ່ນອີກ.”+
ແຕ່ຄຳເວົ້າຂອງພະອົງເຜົາໄໝ້ຢູ່ໃນໃຈຂອງລູກຄືກັບໄຟ ມັນເປັນຄືກັບໄຟຢູ່ໃນກະດູກຂອງລູກ.
ລູກອົດເວົ້າບໍ່ໄດ້ແລ້ວ.
ລູກມິດຢູ່ບໍ່ໄດ້.+
10 ລູກໄດ້ຍິນຂ່າວລືທີ່ບໍ່ດີຫຼາຍຢ່າງ
ແລະລູກກໍຮູ້ສຶກຢ້ານຫຼາຍ.+
ເຂົາເຈົ້າເວົ້າວ່າ: “ໃຫ້ປະຈານລາວແລະໃຫ້ພວກເຮົາປ້ອຍດ່າລາວ!”
ທຸກຄົນທີ່ທຳທ່າເຮັດດີກັບລູກກຳລັງຖ້າເບິ່ງລູກເຈິຄວາມຈິບຫາຍ. ເຂົາເຈົ້າເວົ້າວ່າ:+
“ບາງເທື່ອລາວອາດຈະເຮັດຜິດພາດແບບໂງ່ໆ
ແລະຕອນນັ້ນ ພວກເຮົາກໍຈະເອົາຊະນະລາວແລະແກ້ແຄ້ນລາວໄດ້.”
11 ແຕ່ພະເຢໂຫວາຢູ່ກັບລູກຄືກັບທະຫານທີ່ເກັ່ງໆແລະເປັນຕາຢ້ານ.+
ຍ້ອນແນວນີ້ ຄົນທີ່ຂົ່ມເຫງລູກຈະລົ້ມລົງແລະບໍ່ຊະນະ.+
ເຂົາເຈົ້າຈະອັບອາຍຫຼາຍຍ້ອນແຜນການຂອງເຂົາເຈົ້າບໍ່ສຳເລັດ
ແລະຈະບໍ່ມີຜູ້ໃດລືມຄວາມອັບອາຍຂອງເຂົາເຈົ້າເລີຍ.+
12 ພະເຢໂຫວາຜູ້ບັນຊາການກອງທັບເອີ້ຍ ພະອົງກວດເບິ່ງຄົນທີ່ເຮັດສິ່ງທີ່ຖືກຕ້ອງ.
ພະອົງຮູ້ຈັກຄວາມຮູ້ສຶກທີ່ເລິກທີ່ສຸດ*ແລະຮູ້ຈັກຫົວໃຈຂອງເຂົາເຈົ້າ.+
ຂໍໃຫ້ລູກໄດ້ເຫັນພະອົງແກ້ແຄ້ນສັດຕູຂອງລູກ+
ຍ້ອນລູກໄດ້ມອບຄະດີຂອງລູກໃຫ້ພະອົງຈັດການແລ້ວ.+
13 ໃຫ້ຮ້ອງເພງໃຫ້ພະເຢໂຫວາ! ໃຫ້ສັນລະເສີນພະເຢໂຫວາ!
ຍ້ອນເພິ່ນຊ່ວຍຄົນທຸກໃຫ້ລອດຈາກຄົນຊົ່ວ.
14 ຂ້ອຍບໍ່ໜ້າເກີດມາເລີຍ!
ແມ່ຂ້ອຍບໍ່ໜ້າເກີດຂ້ອຍມາເລີຍ!+
15 ຄົນທີ່ເອົາຂ່າວດີມາບອກພໍ່ຂ້ອຍວ່າ:
“ເຈົ້າໄດ້ລູກຊາຍເດີ້!”
ແລະເຮັດໃຫ້ພໍ່ຂ້ອຍດີໃຈ ຂໍໃຫ້ລາວຖືກສາບແຊ່ງ.
16 ຂໍໃຫ້ຜູ້ຊາຍຄົນນັ້ນເປັນຄືກັບເມືອງທີ່ພະເຢໂຫວາທຳລາຍໂດຍບໍ່ຮູ້ສຶກເສຍໃຈ.
ຂໍໃຫ້ລາວໄດ້ຍິນສຽງຮ້ອງໄຫ້ເສຍໃຈໃນຕອນເຊົ້າແລະສຽງເຕືອນໄພໃນຕອນກາງເວັນ.
17 ເປັນຫຍັງລາວຄືບໍ່ຂ້າຂ້ອຍໃຫ້ຕາຍໃນທ້ອງແມ່
ເພື່ອແມ່ຈະໄດ້ເປັນບ່ອນຝັງສົບຂອງຂ້ອຍ
ແລະແມ່ຈະໄດ້ບໍ່ຕ້ອງເກີດຂ້ອຍມາ?+