ເອເຊກຽນ
27 ພະເຢໂຫວາເວົ້າກັບຂ້ອຍອີກວ່າ: 2 “ລູກມະນຸດເອີ້ຍ ໃຫ້ເຈົ້າຮ້ອງເພງໄວ້ອາໄລໃຫ້ເມືອງຕີເຣ.+ 3 ໃຫ້ຮ້ອງວ່າ
‘ເຈົ້າອາໄສຢູ່ທາງເຂົ້າທະເລ.
ເຈົ້າຄ້າຂາຍກັບຄົນທີ່ຢູ່ຕາມເກາະຕ່າງໆ.
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
“ຕີເຣເອີ້ຍ ເຈົ້າເວົ້າວ່າເຈົ້າງາມທີ່ສຸດ.+
4 ເຂດຂອງເຈົ້າຢູ່ກາງທະເລ
ແລະຜູ້ທີ່ສ້າງເຈົ້າໄດ້ເຮັດໃຫ້ເຈົ້າງາມທີ່ສຸດ.
5 ເຂົາເຈົ້າເອົາໄມ້ຈູນິເປີ້*ຈາກເສນີມາເຮັດໄມ້ແປ້ນຂອງເຈົ້າທັງໝົດ+
ແລະເອົາໄມ້ຊີດ້າ*ຈາກເລບານອນມາເຮັດເສົາຂອງເຈົ້າ.
6 ເຂົາເຈົ້າເອົາໄມ້ໂອກຈາກບາຊານມາເຮັດໄມ້ພາຍຂອງເຈົ້າ
ແລະເອົາໄມ້ແປກທີ່ຕົກແຕ່ງດ້ວຍງາຊ້າງຈາກເກາະກິດຕີມ+ມາເຮັດຫົວເຮືອຂອງເຈົ້າ.
7 ເຂົາເຈົ້າເອົາຜ້າລີນິນຫຼາຍໆສີຈາກເອຢິບມາເຮັດໃບເຮືອຂອງເຈົ້າ
ແລະເອົາດ້າຍສີຟ້າກັບດ້າຍຂົນແກະທີ່ຍ້ອມສີມ່ວງຈາກເກາະເອລິຊາ+ມາເຮັດກັນສາດຂອງເຈົ້າ.
8 ພວກຊີໂດນກັບພວກອາວາດ+ມາເປັນຄົນພາຍເຮືອຂອງເຈົ້າ.
ຕີເຣເອີ້ຍ ຄົນທີ່ເກັ່ງໆກໍມາເປັນລູກເຮືອຂອງເຈົ້າ.+
9 ຄົນເກບານທີ່ເກັ່ງໆແລະມີປະສົບການ+ມາເປັນຄົນຢາຮອຍຕໍ່ເຮືອຂອງເຈົ້າ.+
ເຮືອທຸກລຳໃນທະເລກັບພວກລູກເຮືອຂອງເຂົາເຈົ້າກໍມາຄ້າຂາຍນຳເຈົ້າ.
10 ຄົນເປີເຊຍ ຄົນລູດີມ ຄົນພຸດ+ກໍຢູ່ໃນກອງທັບຂອງເຈົ້າ.
ເຂົາເຈົ້າເອົາໂລ້ກັບໝວກເກາະຫ້ອຍໃສ່ເຈົ້າແລະເຮັດໃຫ້ເຈົ້າງາມ.
11 ຄົນອາວາດທີ່ຢູ່ໃນກອງທັບຂອງເຈົ້າຢືນອ້ອມກຳແພງຂອງເຈົ້າ
ແລະພວກຄົນທີ່ກ້າຫານເຝົ້າຢູ່ເທິງປ້ອມສູງໆຂອງເຈົ້າ.
ເຂົາເຈົ້າເອົາໂລ້ມົນໆຫ້ອຍອ້ອມກຳແພງຂອງເຈົ້າ
ແລະເຮັດໃຫ້ເຈົ້າງາມຫຼາຍ.
12 ຕາຊິດ+ຄ້າຂາຍກັບເຈົ້າຍ້ອນເຈົ້າຮັ່ງຫຼາຍ.+ ເຂົາເຈົ້າເອົາເງິນ ເຫຼັກ ຊືນ ແລະກົ່ວມາແລກປ່ຽນກັບສິນຄ້າຂອງເຈົ້າ.+ 13 ຢາວານ ຕູບານ+ ແລະເມເຊກ+ກໍຄ້າຂາຍກັບເຈົ້າ. ເຂົາເຈົ້າເອົາທາດ+ກັບເຄື່ອງໃຊ້ທີ່ເຮັດຈາກທອງແດງມາແລກປ່ຽນກັບສິນຄ້າຂອງເຈົ້າ. 14 ຄົນໂຕກາມາ+ເອົາມ້າແລະລໍ*ມາແລກປ່ຽນກັບສິນຄ້າຂອງເຈົ້າ. 15 ພວກເດດານ+ຄ້າຂາຍກັບເຈົ້າ. ເຈົ້າຈ້າງພວກພໍ່ຄ້າທີ່ຢູ່ຕາມເກາະຕ່າງໆໃຫ້ຄ້າຂາຍໃຫ້ເຈົ້າ. ເຂົາເຈົ້າເອົາງາຊ້າງ+ແລະໄມ້ເນື້ອດີ*ເສຍສ່ວຍໃຫ້ເຈົ້າ. 16 ເອໂດມຄ້າຂາຍກັບເຈົ້າຍ້ອນເຈົ້າມີສິນຄ້າຫຼາຍ. ເຂົາເຈົ້າເອົາຫີນເທີຄອຍສ໌ ດ້າຍຂົນແກະທີ່ຍ້ອມສີມ່ວງ ຜ້າແສ່ວສີສົດໃສ ຜ້າເນື້ອດີ ປະກາລັງ ແລະແກ້ວພິລາມາແລກປ່ຽນກັບສິນຄ້າຂອງເຈົ້າ.
17 ຢູດາກັບແຜ່ນດິນອິດສະຣາເອນກໍຄ້າຂາຍກັບເຈົ້າ. ເຂົາເຈົ້າເອົາເຂົ້າວີດ*ຈາກເມືອງມິນນິດ+ ຂອງກິນທີ່ດີໆ ນ້ຳເຜີ້ງ+ ນ້ຳມັນໝາກກອກ ແລະນ້ຳມັນຫອມ+ມາແລກປ່ຽນກັບສິນຄ້າຂອງເຈົ້າ.+
18 ເມືອງດາມາເຊ+ຄ້າຂາຍກັບເຈົ້າຍ້ອນເຈົ້າມີສິນຄ້າຫຼາຍແລະຮັ່ງຫຼາຍ. ເມືອງນີ້ເອົາເຫຼົ້າແວງຈາກເຮນໂບນແລະຂົນແກະຈາກຊາຮາ*ມາແລກປ່ຽນກັບສິນຄ້າຂອງເຈົ້າ. 19 ເວດານແລະຢາວານທີ່ຢູ່ໃກ້ກັບອູຊານເອົາເຄື່ອງໃຊ້ທີ່ເຮັດຈາກເຫຼັກ ແຄັດເຊຍ*ແລະໄມ້ອໍ້ຫອມມາແລກປ່ຽນກັບສິນຄ້າຂອງເຈົ້າ. 20 ເດດານ+ຄ້າຂາຍກັບເຈົ້າໂດຍເອົາອານມ້າທີ່ເປັນຜ້າມາແລກປ່ຽນກັບສິນຄ້າຂອງເຈົ້າ. 21 ເຈົ້າຈ້າງພວກອາຣັບແລະພວກຫົວໜ້າທຸກຄົນຂອງເກດາ+ໃຫ້ຄ້າຂາຍໃຫ້ເຈົ້າ. ເຂົາເຈົ້າຂາຍແກະນ້ອຍ ແກະໂຕຜູ້ ແລະແບ້.+ 22 ພວກພໍ່ຄ້າຂອງເຊບາແລະຣາອາມາ+ກໍຄ້າຂາຍກັບເຈົ້າ. ເຂົາເຈົ້າເອົາເຄື່ອງເທດທີ່ດີທີ່ສຸດທຸກປະເພດ ເພັດນິນຈິນດາ ແລະຄຳມາແລກປ່ຽນກັບສິນຄ້າຂອງເຈົ້າ.+ 23 ຮາຣານ+ ການເນ້ ເອເດັນ+ ພວກພໍ່ຄ້າຂອງເຊບາ+ ເມືອງອັດຊູເລ+ ແລະກິນມາດກໍຄ້າຂາຍກັບເຈົ້າ. 24 ເຂົາເຈົ້າເອົາເຄື່ອງນຸ່ງທີ່ງາມໆ ເສື້ອຄຸມສີຟ້າທີ່ແສ່ວດ້ວຍສີແຈ້ງໆ ແລະພົມທີ່ມີຫຼາຍສີມາຂາຍເປັນມັດໃຫຍ່ໆຢູ່ຕະຫຼາດຂອງເຈົ້າ.
25 ເຮືອຫຼາຍລຳຈາກຕາຊິດ+ຂົນສິນຄ້າໃຫ້ເຈົ້າ.
ເຈົ້າຈຶ່ງລວຍແລະມີເຄື່ອງຂອງຫຼາຍ*ຢູ່ກາງທະເລ.
26 ຄົນທີ່ພາຍເຮືອໃຫ້ເຈົ້າພາເຈົ້າອອກໄປທະເລທີ່ມີຄື້ນໃຫຍ່ໆ.
ລົມຈາກທິດຕາເວັນອອກເຮັດໃຫ້ເຈົ້າຫຼົ້ມຢູ່ກາງທະເລ.
27 ທຸກຄົນທີ່ຢູ່ນຳເຈົ້າ
ຈະຈົມຢູ່ກາງທະເລໃນມື້ທີ່ເຈົ້າຖືກທຳລາຍ.+
ຊັບສົມບັດ ສິນຄ້າ ຄົນທີ່ເຮັດວຽກໃນເຮືອຂອງເຈົ້າ
ຄົນທີ່ຢາຮອຍຕໍ່ເຮືອຂອງເຈົ້າ ຄົນທີ່ຄ້າຂາຍກັບເຈົ້າ+ ແລະທຸກຄົນທີ່ຢູ່ໃນກອງທັບຂອງເຈົ້າຈະຈົມໝົດ.+
28 ເມື່ອພວກລູກເຮືອຂອງເຈົ້າຮ້ອງສຽງດັງໆ ແຄມທະເລຈະສັ່ນສະເທືອນ.
29 ຄົນພາຍເຮືອກັບລູກເຮືອທັງໝົດ ແລະທຸກຄົນທີ່ເຮັດວຽກໃນເຮືອ
ຈະອອກຈາກເຮືອແລະໄປຢືນຢູ່ເທິງຝັ່ງ.
30 ເຂົາເຈົ້າຈະຮ້ອງສຽງດັງດ້ວຍຄວາມເສຍໃຈຫຼາຍໃຫ້ເຈົ້າ.+
ເຂົາເຈົ້າຈະເອົາຂີ້ດິນໂຮຍໃສ່ຫົວແລະນອນເກືອກຂີ້ເທົ່າ.
31 ເຂົາເຈົ້າຈະແຖຫົວແລະນຸ່ງຜ້າເນື້ອຫຍາບ.
ເຂົາເຈົ້າຈະຮ້ອງໄຫ້ເສຍໃຈດ້ວຍຄວາມທຸກໂສກໃຫ້ເຈົ້າ.
32 ໃນຕອນທີ່ເຂົາເຈົ້າກຳລັງໂສກເສົ້າ ເຂົາເຈົ້າຈະຮ້ອງເພງໄວ້ອາໄລໃຫ້ເຈົ້າວ່າ
‘ມີເມືອງໃດບໍທີ່ເປັນຄືກັບຕີເຣທີ່ຕອນນີ້ຖືກທຳລາຍແລ້ວ*ຢູ່ກາງທະເລ?+
33 ເມື່ອສິນຄ້າຕ່າງໆຂອງເຈົ້າເຂົ້າມາຈາກທະເລ ເຈົ້າເຮັດໃຫ້ຫຼາຍຊາດມີຄວາມສຸກ.+
ຊັບສົມບັດກັບສິນຄ້າຂອງເຈົ້າເຮັດໃຫ້ພວກກະສັດໃນໂລກລ່ຳລວຍ.+
35 ຄົນທີ່ຢູ່ຕາມເກາະຕ່າງໆຈະແນມເບິ່ງເຈົ້າດ້ວຍຄວາມຕົກໃຈ.+
ພວກກະສັດຂອງເຂົາເຈົ້າຈະຢ້ານຈົນໂຕສັ່ນ+ແລະໜ້າຂອງເຂົາເຈົ້າຈະໂສກເສົ້າ.
36 ພວກພໍ່ຄ້າໃນຊາດຕ່າງໆຈະພາກັນຜິວປາກ*ຍ້ອນສິ່ງທີ່ເກີດຂຶ້ນກັບເຈົ້າ.
ຈຸດຈົບຂອງເຈົ້າຈະເກີດຂຶ້ນແບບກະທັນຫັນແລະເປັນຕາຢ້ານ
ແລະເຈົ້າຈະດັບສູນຕະຫຼອດໄປ.’”’”+