ເອັດຊະຣາ
6 ກະສັດດາຣິອຸດສັ່ງໃຫ້ຄົນໄປຄົ້ນເບິ່ງບ່ອນມ້ຽນເອກະສານເກົ່າໆທີ່ຢູ່ໃນຄັງຊັບສິນຂອງບາບີໂລນ. 2 ເຂົາເຈົ້າເຫັນມ້ວນໜັງສືມ້ວນໜຶ່ງຢູ່ປ້ອມໃນເມືອງເອັກບາທານາໃນແຂວງຂອງເມເດຍ. ມ້ວນໜັງສືນັ້ນຂຽນວ່າ:
3 “ໃນປີທຳອິດທີ່ກະສັດໄຊຣັດປົກຄອງ ລາວອອກຄຳສັ່ງກ່ຽວກັບວິຫານຂອງພະເຈົ້າໃນເມືອງເຢຣູຊາເລັມວ່າ+ ‘ໃຫ້ຄົນຢິວສ້າງວິຫານຄືນໃໝ່ເພື່ອເຂົາເຈົ້າຈະເຜົາເຄື່ອງບູຊາຢູ່ຫັ້ນ. ໃຫ້ສ້າງວິຫານນີ້ສູງ 60 ສອກ* ກວ້າງ 60 ສອກ+ແລະຮາກຖານວິຫານຕ້ອງແຂງແຮງ. 4 ສຳລັບກຳແພງ ໃຫ້ເອົາຫີນກ້ອນໃຫຍ່ໆກໍ່ເປັນ 3 ຊັ້ນແລະອີກຊັ້ນໜຶ່ງໃຫ້ເປັນໄມ້.+ ຄ່າໃຊ້ຈ່າຍທັງໝົດໃນການກໍ່ສ້າງແມ່ນໃຫ້ເອົາຈາກວັງຂອງກະສັດ.+ 5 ເຄື່ອງໃຊ້ຕ່າງໆທີ່ເປັນເງິນເປັນຄຳທີ່ເນບູກາດເນັດຊາເອົາມາຈາກວິຫານຂອງພະເຈົ້າຢູ່ເມືອງເຢຣູຊາເລັມແລະເອົາມາໄວ້ຢູ່ບາບີໂລນ+ ໃຫ້ເອົາກັບໄປໄວ້ຢູ່ວິຫານຂອງພະເຈົ້າໃນເມືອງເຢຣູຊາເລັມຄືເກົ່າ.’+
6 ຂ້ອຍກະສັດດາຣິອຸດອອກຄຳສັ່ງໃຫ້ຕັດເຕນາຍທີ່ເປັນເຈົ້າແຂວງຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດ+ກັບເຊທາໂບເຊນາຍແລະພວກໝູ່ທີ່ເຮັດວຽກນຳເຂົາເຈົ້າທີ່ເປັນຮອງເຈົ້າແຂວງວ່າ ບໍ່ໃຫ້ໄປກວນຄົນທີ່ເຮັດວຽກຢູ່ເມືອງເຢຣູຊາເລັມ. 7 ຢ່າໄປວຸ່ນວາຍໃນວຽກສ້າງວິຫານຂອງພະເຈົ້າເພື່ອເຈົ້າແຂວງຄົນຢິວແລະພວກຜູ້ນຳຄົນຢິວຈະສ້າງວິຫານຂອງພະເຈົ້າຄືນໃໝ່ໃນບ່ອນທີ່ເຄີຍຢູ່. 8 ນອກຈາກນັ້ນ ຂ້ອຍອອກຄຳສັ່ງໃຫ້ພວກເຈົ້າຊ່ວຍພວກຜູ້ນຳຄົນຢິວສ້າງວິຫານຂອງພະເຈົ້າຄືນໃໝ່. ຄ່າໃຊ້ຈ່າຍທັງໝົດແມ່ນໃຫ້ເອົາຈາກຄັງຊັບສິນທີ່ຢູ່ໃນວັງຂອງກະສັດ+ ເຊິ່ງໄດ້ມາຈາກການເກັບພາສີນຳເຂດທີ່ຢູ່ທາງທິດຕາເວັນຕົກຂອງແມ່ນ້ຳເອິຟາຣາດ. ໃຫ້ເອົາຄ່າໃຊ້ຈ່າຍຕ່າງໆໃຫ້ເຂົາເຈົ້າທັນທີເພື່ອເຂົາເຈົ້າຈະເຮັດວຽກໄດ້ຕໍ່ໆໄປ.+ 9 ພວກເຈົ້າຕ້ອງເອົາທຸກສິ່ງທີ່ພວກປະໂລຫິດໃນເມືອງເຢຣູຊາເລັມຕ້ອງການໃຫ້ເຂົາເຈົ້າ ບໍ່ວ່າຈະເປັນງົວໂຕຜູ້+ ແກະໂຕຜູ້+ ຫຼືແກະນ້ອຍ+ເພື່ອໃຊ້ເປັນເຄື່ອງບູຊາໃຫ້ພະເຈົ້າທີ່ຢູ່ໃນສະຫວັນ ຫຼືບໍ່ວ່າຈະເປັນເຂົ້າວີດ*+ ເກືອ+ ເຫຼົ້າແວງ+ ຫຼືນ້ຳມັນໝາກກອກ+ 10 ເພື່ອເຂົາເຈົ້າຈະເຜົາເຄື່ອງບູຊາໃຫ້ພະເຈົ້າທີ່ຢູ່ໃນສະຫວັນໃນແບບທີ່ເພິ່ນພໍໃຈຕໍ່ໆໄປ ແລະເພື່ອເຂົາເຈົ້າຈະອະທິດຖານໃຫ້ກະສັດກັບພວກລູກຂອງກະສັດໃຫ້ຢູ່ດີມີແຮງ.+ 11 ຂ້ອຍອອກຄຳສັ່ງອີກວ່າ ຖ້າຜູ້ໃດບໍ່ເຮັດຕາມຄຳສັ່ງນີ້ ໃຫ້ແກະເອົາໄມ້ທ່ອນໜຶ່ງທີ່ຢູ່ໃນເຮືອນຂອງລາວແລະຄຶງລາວໄວ້ໃຫ້ຕາຍຢູ່ເທິງໄມ້ນັ້ນ ແລະໃຫ້ເຮືອນຂອງລາວເປັນຫ້ອງນ້ຳສາທາລະນະ*ຍ້ອນຄວາມຜິດນີ້. 12 ໃຫ້ພະເຈົ້າທີ່ໄດ້ເລືອກບ່ອນນີ້ສຳລັບຊື່ຂອງເພິ່ນ+ຈັດການກະສັດແລະຜູ້ໃດກໍຕາມທີ່ບໍ່ເຮັດຕາມຄຳສັ່ງນີ້ແລະພະຍາຍາມທຳລາຍວິຫານຂອງພະເຈົ້າໃນເມືອງເຢຣູຊາເລັມ. ຂ້ອຍກະສັດດາຣິອຸດເປັນຜູ້ອອກຄຳສັ່ງນີ້. ໃຫ້ທຸກຄົນເຮັດຕາມທັນທີ.”
13 ຕັດເຕນາຍທີ່ເປັນເຈົ້າແຂວງຢູ່ເຂດທາງທິດຕາເວັນຕົກຂອງແມ່ນ້ຳເອິຟາຣາດກັບເຊທາໂບເຊນາຍ+ແລະພວກໝູ່ທີ່ເຮັດວຽກນຳເຂົາເຈົ້າກໍເຮັດຕາມທຸກຢ່າງທີ່ກະສັດດາຣິອຸດສັ່ງທັນທີ. 14 ພວກຜູ້ນຳຄົນຢິວເຮັດວຽກກໍ່ສ້າງວິຫານຕໍ່ໆໄປແລະວຽກກໍກ້າວໜ້າດີ+ ຍ້ອນເຂົາເຈົ້າໄດ້ຮັບກຳລັງໃຈຈາກສິ່ງທີ່ຜູ້ພະຍາກອນຮັກກາຍ+ແລະເຊຄາຣີຢາ+ຫຼານຊາຍຂອງອິດໂດເວົ້າ. ເຂົາເຈົ້າສ້າງວິຫານແລ້ວຕາມທີ່ພະເຈົ້າຂອງອິດສະຣາເອນສັ່ງ+ ແລະຕາມທີ່ໄຊຣັດ+ ດາຣິອຸດ+ ແລະອາຕາເຊເຊັດ*+ກະສັດຂອງເປີເຊຍສັ່ງ. 15 ເຂົາເຈົ້າສ້າງວິຫານແລ້ວໃນວັນທີ 3 ເດືອນອາດາ* ເຊິ່ງເປັນປີທີ 6 ທີ່ກະສັດດາຣິອຸດປົກຄອງ.
16 ຈາກນັ້ນ ພວກອິດສະຣາເອນທຸກຄົນເຊິ່ງລວມມີພວກປະໂລຫິດ ພວກເລວີ+ ແລະຄົນອື່ນໆທີ່ເຄີຍເປັນຊະເລີຍໄດ້ຈັດງານສະຫຼອງອຸທິດວິຫານຂອງພະເຈົ້າດ້ວຍຄວາມມ່ວນຊື່ນ. 17 ສັດທີ່ເຂົາເຈົ້າເຜົາໃນການອຸທິດວິຫານຂອງພະເຈົ້າມີ: ງົວໂຕຜູ້ 100 ໂຕ ແກະໂຕຜູ້ 200 ໂຕ ແລະແກະນ້ອຍໂຕຜູ້ 400 ໂຕ. ເຂົາເຈົ້າຍັງໄດ້ເອົາແບ້ໂຕຜູ້ 12 ໂຕເປັນເຄື່ອງບູຊາໄຖ່ຄວາມຜິດສຳລັບພວກອິດສະຣາເອນທຸກຄົນຕາມຈຳນວນຕະກູນຂອງອິດສະຣາເອນ.+ 18 ເຂົາເຈົ້າແບ່ງກຸ່ມພວກປະໂລຫິດແລະພວກເລວີຕາມກຸ່ມຂອງໂຕເອງເພື່ອໃຫ້ຮັບໃຊ້ພະເຈົ້າຢູ່ເມືອງເຢຣູຊາເລັມ+ຄືກັບທີ່ໂມເຊໄດ້ຂຽນໄວ້ໃນປຶ້ມຂອງລາວ.+
19 ຄົນທີ່ເຄີຍເປັນຊະເລີຍໄດ້ຈັດການສະຫຼອງປັດສະຄາໃນວັນທີ 14 ຂອງເດືອນທີ 1.+ 20 ພວກປະໂລຫິດກັບພວກເລວີທຸກຄົນໄດ້ເຮັດໃຫ້ໂຕເອງສະອາດ.*+ ເຂົາເຈົ້າຂ້າສັດເພື່ອໃຊ້ເປັນເຄື່ອງບູຊາໃນເທດສະການປັດສະຄາສຳລັບທຸກຄົນທີ່ເຄີຍເປັນຊະເລີຍ ສຳລັບພວກປະໂລຫິດຄົນອື່ນໆ ແລະສຳລັບໂຕເອງ. 21 ຈາກນັ້ນ ພວກອິດສະຣາເອນທີ່ກັບມາຈາກການເປັນຊະເລີຍກໍກິນເຄື່ອງບູຊານັ້ນນຳກັນກັບຄົນທີ່ເຊົາເຮັດຕາມທຳນຽມທີ່ບໍ່ສະອາດຂອງຊາດຕ່າງໆ ແລະໄດ້ປ່ຽນມານະມັດສະການ*ພະເຢໂຫວາພະເຈົ້າຂອງອິດສະຣາເອນ.+ 22 ເຂົາເຈົ້າຍັງໄດ້ສະຫຼອງເທດສະການກິນເຂົ້າຈີ່ບໍ່ມີເຊື້ອ+ເປັນເວລາ 7 ມື້ຢ່າງມ່ວນຊື່ນ ຍ້ອນພະເຢໂຫວາເຮັດໃຫ້ເຂົາເຈົ້າມີຄວາມສຸກ ແລະຍ້ອນເພິ່ນໄດ້ເຮັດໃຫ້ກະສັດອັດຊີເຣຍ*ສະໜັບສະໜູນເຂົາເຈົ້າ+ໃນການສ້າງວິຫານຂອງພະເຈົ້າທ່ຽງແທ້ທີ່ເປັນພະເຈົ້າຂອງອິດສະຣາເອນ.