ຈົດເຊັນບັນຊີ
17 ພະເຢໂຫວາບອກໂມເຊວ່າ: 2 “ໃຫ້ເຈົ້າໄປເວົ້າກັບພວກອິດສະຣາເອນ ແລະໃຫ້ເຈົ້າເອົາໄມ້ຄ້ອນເທົ້າຂອງຫົວໜ້າແຕ່ລະຕະກູນ+ມາທັງໝົດ 12 ອັນ. ເຈົ້າຕ້ອງຂຽນຊື່ຂອງແຕ່ລະຄົນໃສ່ໄມ້ຄ້ອນເທົ້າຂອງເຂົາເຈົ້າ. 3 ໃຫ້ເຈົ້າຂຽນຊື່ຂອງອາໂຣນໃສ່ໄມ້ຄ້ອນເທົ້າຂອງຕະກູນເລວີ ເພາະວ່າຫົວໜ້າຂອງແຕ່ລະຕະກູນມີໄມ້ຄ້ອນເທົ້າໜຶ່ງອັນ. 4 ໃຫ້ເອົາໄມ້ຄ້ອນເທົ້າທັງໝົດໄປໄວ້ໃນເຕັ້ນສັກສິດ*ຕໍ່ໜ້າຫີບສັນຍາ*+ ບ່ອນທີ່ເຮົາມາຫາເຈົ້າເປັນປະຈຳ.+ 5 ຖ້າເຮົາເລືອກຜູ້ໃດ+ ໄມ້ຄ້ອນເທົ້າຂອງຜູ້ນັ້ນກໍຈະອອກດອກ. ເຮົາຈະເຮັດໃຫ້ພວກອິດສະຣາເອນເຊົາຈົ່ມໃຫ້ເຮົາ+ ແລະເຊົາຈົ່ມໃຫ້ເຈົ້າກັບອາໂຣນນຳ.”+
6 ໂມເຊກໍໄປບອກພວກອິດສະຣາເອນ ແລ້ວຫົວໜ້າແຕ່ລະຕະກູນໄດ້ເອົາໄມ້ຄ້ອນເທົ້າຂອງໂຕເອງມາໃຫ້ໂມເຊທັງໝົດ 12 ອັນ ແລະມີໄມ້ຄ້ອນເທົ້າຂອງອາໂຣນນຳ. 7 ໂມເຊໄດ້ເອົາໄມ້ຄ້ອນເທົ້າທັງໝົດໄປວາງໄວ້ຕໍ່ໜ້າພະເຢໂຫວາໃນເຕັ້ນສັກສິດທີ່ມີຫີບສັນຍາ.
8 ມື້ຕໍ່ມາ ໂມເຊເຂົ້າໄປໃນເຕັ້ນສັກສິດທີ່ມີຫີບສັນຍາ ແລ້ວລາວກໍເຫັນໄມ້ຄ້ອນເທົ້າຂອງອາໂຣນທີ່ເປັນຂອງຕະກູນເລວີອອກດອກ ມີທັງດອກຈູມ ດອກບານ ແລະໝາກແອວມ້ອນສຸກ. 9 ໂມເຊເອົາໄມ້ຄ້ອນເທົ້າທັງໝົດທີ່ຢູ່ຕໍ່ໜ້າພະເຢໂຫວາອອກມາໃຫ້ພວກອິດສະຣາເອນເບິ່ງ ແລ້ວພວກຫົວໜ້າຂອງແຕ່ລະຕະກູນກໍຈັບເອົາໄມ້ຄ້ອນເທົ້າຂອງໂຕເອງ.
10 ພະເຢໂຫວາບອກໂມເຊວ່າ: “ໃຫ້ເອົາໄມ້ຄ້ອນເທົ້າຂອງອາໂຣນ+ໄປໄວ້ຕໍ່ໜ້າຫີບສັນຍາຄືເກົ່າ ເພື່ອເປັນສິ່ງເຕືອນໃຈ+ໃຫ້ພວກກະບົດ+ເຊົາຈົ່ມໃຫ້ເຮົາ ແລ້ວພວກເຂົາກໍຈະບໍ່ຕາຍ.” 11 ໂມເຊເຮັດຕາມທີ່ພະເຢໂຫວາສັ່ງທັນທີ. ລາວເຮັດທຸກຢ່າງຕາມທີ່ເພິ່ນບອກ.
12 ແລ້ວພວກອິດສະຣາເອນກໍເວົ້າກັບໂມເຊວ່າ: “ຕາຍແລ້ວ ພວກເຮົາຕ້ອງຕາຍແທ້ໆ! ພວກເຮົາຕ້ອງຕາຍອີ່ຫຼີ! 13 ຜູ້ໃດທີ່ເຂົ້າໄປໃກ້ເຕັ້ນສັກສິດຂອງພະເຢໂຫວາຈະຕ້ອງຕາຍ.+ ພວກເຮົາຈະຕ້ອງຕາຍໝົດເລີຍແມ່ນບໍນິ?”+