ເອຊາຢາ
12 ໃນມື້ນັ້ນ ພວກເຈົ້າຈະເວົ້າວ່າ:
“ພະເຢໂຫວາ ພວກເຮົາຂອບໃຈພະອົງ.
ເຖິງພະອົງເຄີຍໃຈຮ້າຍໃຫ້ພວກເຮົາ
ແຕ່ຕອນນີ້ ພະອົງເຊົາໃຈຮ້າຍແລ້ວ. ຂອບໃຈທີ່ພະອົງປອບໂຍນພວກເຮົາ.+
2 ພະອົງຊ່ວຍພວກເຮົາໃຫ້ລອດ.+
ພວກເຮົາຈະໄວ້ວາງໃຈພະອົງ ແລະຈະບໍ່ຢ້ານ.+
ພະເຢໂຫວາ* ພະເຢໂຫວາ ພະອົງເປັນກຳລັງຂອງພວກເຮົາ
ແລະເປັນຜູ້ຊ່ວຍພວກເຮົາໃຫ້ລອດ.”+
3 ພວກເຈົ້າຈະຕັກນ້ຳດ້ວຍຄວາມສຸກ
ຈາກນ້ຳພຸທີ່ຊ່ວຍໃຫ້ລອດ.+
4 ໃນມື້ນັ້ນ ພວກເຈົ້າຈະເວົ້າວ່າ:
“ໃຫ້ພວກເຮົາຂອບໃຈພະເຢໂຫວາແລະຮ້ອງຊື່ເພິ່ນ.
ບອກທຸກຄົນໃຫ້ຮູ້ວ່າເພິ່ນໄດ້ເຮັດຫຍັງແດ່.+
ບອກທຸກຄົນໃຫ້ຮູ້ວ່າຊື່ຂອງເພິ່ນໄດ້ຮັບການຍົກຍ້ອງຫຼາຍສ່ຳໃດ.+
5 ໃຫ້ຮ້ອງເພງ*ສັນລະເສີນພະເຢໂຫວາ+ ຍ້ອນເພິ່ນໄດ້ເຮັດສິ່ງທີ່ຍິ່ງໃຫຍ່ຫຼາຍຢ່າງ.+
ໃຫ້ບອກຄົນທົ່ວໂລກໃຫ້ຮູ້ເລື່ອງນີ້ນຳ.
6 ຄົນເມືອງຊີໂອນເອີ້ຍ ໃຫ້ຮ້ອງດັງໆຢ່າງມີຄວາມສຸກ
ເພາະພະເຈົ້າອົງບໍລິສຸດຂອງອິດສະຣາເອນຢູ່ນຳພວກເຈົ້າ.”