ເອເຊກຽນ
47 ຈາກນັ້ນ ລາວພາຂ້ອຍກັບໄປທາງເຂົ້າວິຫານ.+ ທາງໜ້າຂອງວິຫານປິ່ນໄປທາງທິດຕາເວັນອອກ ແລະຂ້ອຍເຫັນນ້ຳໄຫຼໄປທາງທິດຕາເວັນອອກຈາກທາງລຸ່ມຂອງວິຫານ.+ ນ້ຳໄຫຼອອກມາຈາກເບື້ອງຂວາຂອງປະຕູວິຫານ ແລະໄຫຼຜ່ານທາງໃຕ້ຂອງແທ່ນບູຊາ.
2 ແລ້ວລາວກໍພາຂ້ອຍອອກໄປທາງນອກວິຫານທາງທາງເຂົ້າທີ່ຢູ່ທິດເໜືອ+ ແລະພາຂ້ອຍຍ່າງອ້ອມຈົນຮອດທາງເຂົ້າທີ່ຢູ່ທິດຕາເວັນອອກ.+ ຂ້ອຍເຫັນນ້ຳໄຫຼອອກມາຄ່ອຍໆຢູ່ເບື້ອງຂວາຂອງທາງເຂົ້າ.
3 ລາວໃຊ້ສາຍແທກ+ແທກອອກໄປທາງທິດຕາເວັນອອກ 1.000 ສອກ* ແລະລາວໃຫ້ຂ້ອຍຍ່າງຂ້າມນ້ຳ. ນ້ຳຢູ່ຫັ້ນເລິກຮອດຂໍ້ຂາ.
4 ລາວແທກອອກໄປອີກ 1.000 ສອກ* ແລະໃຫ້ຂ້ອຍຍ່າງຂ້າມນ້ຳ. ນ້ຳຢູ່ຫັ້ນເລິກຮອດຫົວເຂົ່າ.
ລາວແທກອອກໄປອີກ 1.000 ສອກ ແລະໃຫ້ຂ້ອຍຍ່າງຂ້າມນ້ຳ. ນ້ຳຢູ່ຫັ້ນເລິກຮອດແອວ.
5 ລາວແທກອອກໄປອີກ 1.000 ສອກ* ແລະຢູ່ຫັ້ນມັນເປັນຄືແມ່ນ້ຳແລ້ວ. ຂ້ອຍຍ່າງຂ້າມໄປບໍ່ໄດ້ຍ້ອນນ້ຳເລິກຫຼາຍ. ຖ້າຜູ້ໃດຈະຂ້າມກໍຕ້ອງໄດ້ລອຍໄປ.
6 ລາວຖາມຂ້ອຍວ່າ: “ລູກມະນຸດ ເຈົ້າເຫັນທັງໝົດນີ້ແລ້ວແມ່ນບໍ?”
ຈາກນັ້ນ ລາວກໍໃຫ້ຂ້ອຍຍ່າງກັບມາແຄມຝັ່ງ. 7 ເມື່ອກັບມາ ຂ້ອຍກໍເຫັນມີຕົ້ນໄມ້ບັກຫຼາຍໆຢູ່ແຄມແມ່ນ້ຳທັງສອງເບື້ອງ.+ 8 ລາວບອກຂ້ອຍວ່າ: “ນ້ຳນີ້ໄຫຼໄປທາງທິດຕາເວັນອອກຜ່ານເຂດອາຣາບາ*+ ແລ້ວໄຫຼລົງໄປທະເລ.* ເມື່ອນ້ຳນີ້ໄຫຼລົງໄປທະເລ+ ນ້ຳໃນທະເລກໍຈະກາຍເປັນນ້ຳທີ່ດີ. 9 ນ້ຳນີ້ໄຫຼໄປຮອດໃສ ສິ່ງທີ່ມີຊີວິດທຸກຊະນິດກໍຈະຢູ່ຫັ້ນໄດ້. ມີນ້ຳນີ້ຢູ່ບ່ອນໃດ ບ່ອນນັ້ນກໍຈະມີປາຫຼາຍ. ນ້ຳທະເລຈະກາຍເປັນນ້ຳທີ່ດີ ແລະແມ່ນ້ຳນີ້ໄຫຼໄປບ່ອນໃດກໍຈະມີສິ່ງທີ່ມີຊີວິດຢູ່ບ່ອນນັ້ນ.
10 ຈະມີຄົນຫາປາແລະເດີ່ນຕາກດາງກວາດຢູ່ແຄມທະເລນັ້ນຕັ້ງແຕ່ເອັນເກດີ+ໄປຈົນຮອດເອັນເອັກລາຢິມ. ໃນທະເລນັ້ນຈະມີປາຫຼາຍຊະນິດຄືກັບຢູ່ທະເລໃຫຍ່.*+
11 ນ້ຳຢູ່ໃນໜອງໃນບຶງຈະເປັນນ້ຳທີ່ບໍ່ດີ. ມັນຈະເປັນນ້ຳເຄັມ.+
12 ຕົ້ນໄມ້ທຸກຊະນິດທີ່ກິນໄດ້ຈະຂຶ້ນຢູ່ແຄມແມ່ນ້ຳທັງສອງເບື້ອງ. ໃບຂອງມັນຈະບໍ່ຫ່ຽວແຫ້ງແລະຈະເປັນໝາກຕະຫຼອດ. ມັນຈະເປັນໝາກທຸກໆເດືອນຍ້ອນໄດ້ນ້ຳທີ່ໄຫຼມາຈາກວິຫານ.+ ໝາກຂອງມັນຈະເປັນແນວກິນແລະໃບກໍຈະເປັນຢາ.”+
13 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: “ນີ້ແມ່ນເຂດທີ່ພວກເຈົ້າຕ້ອງແບ່ງເປັນດິນມໍລະດົກໃຫ້ອິດສະຣາເອນ 12 ຕະກູນ ແລະລູກຫຼານຂອງໂຢເຊັບຈະໄດ້ 2 ສ່ວນ.+ 14 ພວກເຈົ້າຈະໄດ້ດິນຂະໜາດສ່ຳກັນເປັນມໍລະດົກ. ເຮົາໄດ້ສັນຍາວ່າຈະເອົາດິນນີ້ໃຫ້ປູ່ຍ່າຕານາຍຂອງພວກເຈົ້າ+ ແລະຕອນນີ້ມັນເປັນມໍລະດົກຂອງພວກເຈົ້າແລ້ວ.
15 ເຂດແດນທາງທິດເໜືອຂອງແຜ່ນດິນນີ້ເລີ່ມຕັ້ງແຕ່ທະເລໃຫຍ່ໄປຕາມເສັ້ນທາງໄປເຮດໂລນ+ ແລະໄປທາງເຊດາດ+ 16 ຮາມັດ+ ເບໂຣທາ+ ແລະສິບຣາຢິມທີ່ຢູ່ລະຫວ່າງເຂດດາມາເຊກັບເຂດຮາມັດ ໄປຈົນຮອດຮາເຊີຮັດຕິໂກນທີ່ຕິດກັບເຂດແດນຮາອູຣານ.+ 17 ເຂດແດນຈະເລີ່ມຈາກທະເລໄປຈົນຮອດຮາຊາເອໂນນ.+ ເຂດແດນນີ້ຈະໄປຕາມເຂດແດນທາງເໜືອຂອງດາມາເຊ ແລະໄປຕາມເຂດແດນຂອງຮາມັດ.+ ນີ້ແມ່ນເຂດແດນທາງທິດເໜືອ.
18 ເຂດແດນທາງທິດຕາເວັນອອກຢູ່ລະຫວ່າງຮາອູຣານກັບດາມາເຊ ແລະໄປຕາມແມ່ນ້ຳຈໍແດນທີ່ຢູ່ລະຫວ່າງກິລຽດ+ກັບແຜ່ນດິນອິດສະຣາເອນ. ພວກເຈົ້າຕ້ອງແທກຈາກເຂດແດນນີ້ໄປຈົນຮອດທະເລຕາເວັນອອກ.* ນີ້ແມ່ນເຂດແດນທາງທິດຕາເວັນອອກ.
19 ເຂດແດນທາງໃຕ້ເລີ່ມຈາກຕາມາໄປຈົນຮອດນ້ຳເມຣີບາກາເດັດ+ ລົງໄປຮອດຮ່ອມພູ*ແລະທະເລໃຫຍ່.+ ນີ້ແມ່ນເຂດແດນທາງໃຕ້.
20 ເຂດແດນທາງທິດຕາເວັນຕົກແມ່ນທະເລໃຫຍ່ຈົນຮອດຈຸດທີ່ກົງກັນຂ້າມກັບເລໂບຮາມັດ.*+ ນີ້ແມ່ນເຂດແດນທາງທິດຕາເວັນຕົກ.
21 ພວກເຈົ້າຕ້ອງແບ່ງແຜ່ນດິນນີ້ໃຫ້ອິດສະຣາເອນ 12 ຕະກູນ. 22 ພວກເຈົ້າຕ້ອງແບ່ງແຜ່ນດິນນີ້ເປັນມໍລະດົກຂອງໂຕເອງ ແລະຕ້ອງແບ່ງໃຫ້ຄົນຕ່າງຊາດທີ່ຢູ່ນຳພວກເຈົ້າ ເຊິ່ງມີລູກມີຫຼານຕອນທີ່ຢູ່ນຳພວກເຈົ້າ. ພວກເຈົ້າຕ້ອງຖືວ່າເຂົາເຈົ້າເປັນຄືກັບຄົນອິດສະຣາເອນ. ເຂົາເຈົ້າຈະໄດ້ຮັບມໍລະດົກຄືກັບພວກເຈົ້າທີ່ຢູ່ໃນຕະກູນຕ່າງໆຂອງອິດສະຣາເອນ. 23 ຄົນຕ່າງຊາດຢູ່ກັບຕະກູນໃດ ພວກເຈົ້າກໍຕ້ອງເອົາມໍລະດົກໃນເຂດຂອງຕະກູນນັ້ນໃຫ້ເຂົາເຈົ້າ.” ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.