ເອັດສະເທີ
3 ກະສັດອາຫະສຸເອຣັດເລື່ອນຕຳແໜ່ງຮາມານ+ລູກຊາຍຂອງຮຳເມດາທາຄົນອາກັກ+ໃຫ້ສູງກວ່າເຈົ້ານາຍທຸກຄົນທີ່ເຮັດວຽກນຳຮາມານ.+ 2 ພວກຂ້າລາຊະການທຸກຄົນທີ່ຢູ່ປະຕູວັງຂອງກະສັດຕ້ອງໝູບໜ້າລົງພື້ນເພື່ອສະແດງຄວາມນັບຖືຮາມານ ຍ້ອນກະສັດສັ່ງໃຫ້ເຮັດແບບນັ້ນ ແຕ່ມໍເດກາຍບໍ່ຍອມກົ້ມຫົວລົງຫຼືໝູບໜ້າລົງ. 3 ພວກຂ້າລາຊະການທີ່ຢູ່ປະຕູວັງຂອງກະສັດຈຶ່ງຖາມມໍເດກາຍວ່າ: “ເປັນຫຍັງເຈົ້າບໍ່ເຮັດຕາມຄຳສັ່ງຂອງກະສັດ?” 4 ເຂົາເຈົ້າຖາມມໍເດກາຍທຸກໆມື້ ແຕ່ມໍເດກາຍບໍ່ສົນໃຈຟັງສິ່ງທີ່ເຂົາເຈົ້າເວົ້າ ແລະບອກເຂົາເຈົ້າວ່າລາວເປັນຄົນຢິວ.+ ເຂົາເຈົ້າຈຶ່ງໄປບອກຮາມານແລະຖາມວ່າສິ່ງທີ່ມໍເດກາຍເຮັດເໝາະສົມຫຼືບໍ່.+
5 ເມື່ອຮາມານເຫັນວ່າມໍເດກາຍບໍ່ຍອມກົ້ມຫົວລົງຫຼືໝູບໜ້າລົງເພື່ອສະແດງຄວາມນັບຖືລາວ ລາວກໍໃຈຮ້າຍຫຼາຍ.+ 6 ແຕ່ຮາມານຄິດວ່າຖ້າຂ້າແຕ່ມໍເດກາຍຜູ້ດຽວກໍຍັງບໍ່ສະໃຈແລະລາວໄດ້ຮູ້ມາວ່າມໍເດກາຍເປັນຄົນຊາດໃດ ລາວຈຶ່ງວາງແຜນທີ່ຈະຂ້າຄົນຢິວທັງໝົດໃນທຸກແຂວງທີ່ກະສັດອາຫະສຸເອຣັດປົກຄອງ. ຮາມານຢາກຂ້າທຸກຄົນທີ່ເປັນຄົນຊາດດຽວກັບມໍເດກາຍ.
7 ໃນເດືອນທີ 1 ເຊິ່ງແມ່ນເດືອນນີຊານຂອງປີທີ 12 +ທີ່ກະສັດອາຫະສຸເອຣັດປົກຄອງ ເຂົາເຈົ້າໄດ້ຈົກສະຫຼາກ*+ຕໍ່ໜ້າຮາມານເພື່ອກຳນົດມື້ແລະເດືອນ.* ເຂົາເຈົ້າຈົກສະຫຼາກຖືກເດືອນທີ 12 ເຊິ່ງແມ່ນເດືອນອາດາ.+ 8 ຈາກນັ້ນ ຮາມານກໍໄປເວົ້າກັບກະສັດອາຫະສຸເອຣັດວ່າ: “ມີຄົນຊາດໜຶ່ງຢາຍກັນຢູ່ກັບຄົນຊາດອື່ນໆ+ໃນທຸກແຂວງທີ່ທ່ານປົກຄອງ.+ ກົດໝາຍຂອງເຂົາເຈົ້າບໍ່ຄືກັບກົດໝາຍຂອງຄົນຊາດອື່ນແລະເຂົາເຈົ້າກໍບໍ່ໄດ້ເຊື່ອຟັງກົດໝາຍຂອງກະສັດຊ້ຳ. ເຖິງວ່າກະສັດຈະເອົາເຂົາເຈົ້າໄວ້ກໍບໍ່ມີປະໂຫຍດຫຍັງ. 9 ຖ້າກະສັດເຫັນດີ ຂໍໃຫ້ກະສັດອອກກົດໝາຍແລະຂຽນໄວ້ວ່າໃຫ້ກຳຈັດຄົນຢິວ. ຂ້ອຍຈະເອົາເງິນໜັກ 10.000 ຕະລັນ*ໃຫ້ຂ້າລາຊະການຂອງທ່ານເອົາໄປໄວ້ໃນຄັງຊັບສິນຂອງທ່ານ.”*
10 ເມື່ອໄດ້ຍິນແນວນັ້ນກະສັດກໍຖອດແຫວນ*ອອກຈາກມື+ ແລ້ວເອົາໃຫ້ຮາມານ+ລູກຊາຍຂອງຮຳເມດາທາຄົນອາກັກ+ທີ່ເປັນສັດຕູຂອງຄົນຢິວ. 11 ກະສັດບອກຮາມານວ່າ: “ຂ້ອຍຍົກຄົນຊາດນັ້ນແລະເງິນຂອງເຂົາເຈົ້າໃຫ້ເຈົ້າຈັດການ. ເຈົ້າຢາກເຮັດຫຍັງກັບເຂົາເຈົ້າກໍເຮັດໂລດ.” 12 ພວກເລຂາຂອງກະສັດ+ຖືກເອີ້ນມາໃນວັນທີ 13 ຂອງເດືອນທີ 1. ເຂົາເຈົ້າຂຽນ+ຄຳສັ່ງທັງໝົດຂອງຮາມານແລ້ວສົ່ງໄປໃຫ້ພວກຂ້າລາຊະການລະດັບສູງຂອງກະສັດ ພວກເຈົ້າແຂວງ ແລະພວກເຈົ້ານາຍຂອງຊາດຕ່າງໆ. ເຂົາເຈົ້າສົ່ງຄຳສັ່ງນັ້ນໄປທຸກແຂວງໂດຍຂຽນເປັນໂຕໜັງສືແລະພາສາທີ່ຄົນໃນແຕ່ລະແຂວງໃຊ້. ຄຳສັ່ງນັ້ນຂຽນໃນນາມຂອງກະສັດອາຫະສຸເອຣັດແລະຈ້ຳກາດ້ວຍແຫວນຂອງກະສັດ.+
13 ຜູ້ສົ່ງຂ່າວໄດ້ເອົາຈົດໝາຍໄປສົ່ງໃຫ້ທຸກແຂວງທີ່ກະສັດປົກຄອງ. ໃນຈົດໝາຍໄດ້ສັ່ງໃຫ້ກວາດລ້າງ ກຳຈັດ ແລະຂ້າຄົນຢິວທຸກຄົນ ທັງຄົນໜຸ່ມ ຜູ້ເຖົ້າ ຜູ້ຍິງແລະເດັກນ້ອຍພາຍໃນມື້ດຽວເທົ່ານັ້ນຄືໃນວັນທີ 13 ເດືອນທີ 12 ເຊິ່ງແມ່ນເດືອນອາດາ+ແລະໃຫ້ຍຶດເອົາເຄື່ອງຂອງທັງໝົດຂອງເຂົາເຈົ້າ.+ 14 ມີການຄັດລອກສິ່ງທີ່ຂຽນໄວ້ໃນຈົດໝາຍແລະອອກເປັນກົດໝາຍຂອງແຕ່ລະແຂວງ ແລ້ວປະກາດໃຫ້ຄົນທຸກຊາດຮູ້ເພື່ອເຂົາເຈົ້າຈະໄດ້ກຽມໂຕສຳລັບມື້ນັ້ນ. 15 ຜູ້ສົ່ງຂ່າວກໍຟ້າວອອກໄປ+ເຮັດຕາມຄຳສັ່ງຂອງກະສັດ. ມີການອອກກົດໝາຍນີ້ຢູ່ວັງໃນເມືອງຊູຊາ+ນຳ. ຈາກນັ້ນ ກະສັດກັບຮາມານກໍນັ່ງກິນເຫຼົ້າແວງນຳກັນ ແຕ່ເມືອງຊູຊາເກີດຄວາມສັບສົນວຸ່ນວາຍຫຼາຍ.