ເຢເຣມີຢາ
25 ນີ້ແມ່ນຄຳເວົ້າທີ່ພະເຈົ້າເວົ້າກັບເຢເຣມີຢາກ່ຽວກັບຄົນຢູດາໃນປີທີ 4 ທີ່ກະສັດເຢໂຮຢາກີມ+ລູກຊາຍຂອງໂຢສີຢາປົກຄອງຢູດາ ເຊິ່ງເປັນປີທີ 1 ທີ່ກະສັດເນບູກາດເນັດຊາ*ປົກຄອງບາບີໂລນ. 2 ນີ້ແມ່ນສິ່ງທີ່ຜູ້ພະຍາກອນເຢເຣມີຢາເວົ້າກ່ຽວກັບ*ຄົນຢູດາແລະຄົນທີ່ຢູ່ໃນເມືອງເຢຣູຊາເລັມທັງໝົດ. ລາວເວົ້າວ່າ:
3 “ຕັ້ງແຕ່ປີທີ 13 ທີ່ກະສັດໂຢສີຢາ+ລູກຊາຍຂອງອາໂມນປົກຄອງຢູດາຈົນຮອດທຸກມື້ນີ້ກໍໄດ້ 23 ປີແລ້ວ ພະເຢໂຫວາໄດ້ເວົ້າກັບຂ້ອຍຕະຫຼອດ ແລະຂ້ອຍກໍເວົ້າກັບພວກເຈົ້າເທື່ອແລ້ວເທື່ອອີກ* ແຕ່ພວກເຈົ້າກໍບໍ່ຍອມຟັງ.+ 4 ພະເຢໂຫວາໄດ້ສົ່ງພວກຜູ້ພະຍາກອນທີ່ເປັນຜູ້ຮັບໃຊ້ຂອງເພິ່ນມາຫາພວກເຈົ້າຫຼາຍເທື່ອແລ້ວ* ແຕ່ພວກເຈົ້າກໍບໍ່ສົນໃຈແລະບໍ່ຍອມຟັງເລີຍ.+ 5 ພວກຜູ້ພະຍາກອນບອກພວກເຈົ້າວ່າ ‘ຂໍໃຫ້ພວກເຈົ້າກັບໃຈແລະເຊົາເຮັດຊົ່ວ+ເພື່ອພວກເຈົ້າຈະໄດ້ຢູ່ດີມີແຮງແລະໄດ້ເຂົ້າໄປໃນແຜ່ນດິນທີ່ພະເຢໂຫວາເອົາໃຫ້ພວກເຈົ້າແລະປູ່ຍ່າຕານາຍຂອງພວກເຈົ້າຕັ້ງແຕ່ດົນນານມາແລ້ວ. 6 ຢ່າໄປຕິດຕາມ ຮັບໃຊ້ ຫຼືກົ້ມກາບພະເຈົ້າອື່ນ ແລະຢ່າເຮັດໃຫ້ເພິ່ນບໍ່ພໍໃຈໂດຍເຮັດຮູບບູຊາຂຶ້ນມາ. ຄັນບໍ່ຊັ້ນ ເພິ່ນຈະເຮັດໃຫ້ພວກເຈົ້າຈິບຫາຍ.’
7 ພະເຢໂຫວາເວົ້າວ່າ ‘ແຕ່ພວກເຈົ້າບໍ່ເຊື່ອຟັງເຮົາແລະເຮັດໃຫ້ເຮົາບໍ່ພໍໃຈໂດຍເຮັດຮູບບູຊາຂຶ້ນມາຈົນເຮັດໃຫ້ໂຕເອງເຈິຄວາມຈິບຫາຍ.’+
8 ພະເຢໂຫວາຜູ້ບັນຊາການກອງທັບຈຶ່ງເວົ້າວ່າ ‘“ຍ້ອນພວກເຈົ້າບໍ່ເຊື່ອຟັງເຮົາ” 9 ພະເຢໂຫວາບອກວ່າ “ເຮົາຈະເອີ້ນທຸກຄອບຄົວຂອງປະເທດຕ່າງໆທີ່ຢູ່ທາງເໜືອ+ແລະເອີ້ນເນບູກາດເນັດຊາກະສັດຂອງບາບີໂລນທີ່ເປັນຜູ້ຮັບໃຊ້ຂອງເຮົາມາ.+ ເຮົາຈະໃຫ້ເຂົາເຈົ້າມາຕໍ່ສູ້ແຜ່ນດິນນີ້+ ຄົນທີ່ຢູ່ແຜ່ນດິນນີ້ ແລະຊາດຕ່າງໆທີ່ຢູ່ອ້ອມຂ້າງແຜ່ນດິນນີ້.+ ເຮົາຈະທຳລາຍພວກເຈົ້າແລະຊາດເຫຼົ່ານີ້. ຜູ້ຄົນຈະຕົກໃຈແລະເຍາະເຍີ້ຍ*ເມື່ອເຫັນພວກເຈົ້າ ແລະແຜ່ນດິນນີ້ຈະກາຍເປັນຊາກຫັກພັງຕະຫຼອດໄປ. 10 ເຮົາຈະເຮັດໃຫ້ສຽງຂອງຄວາມຍິນດີແລະຄວາມສຸກ+ ສຽງຂອງເຈົ້າບ່າວແລະເຈົ້າສາວ+ ແລະສຽງບົດແປ້ງບໍ່ມີອີກຕໍ່ໄປ. ແສງຈາກຕະກຽງກໍຈະບໍ່ມີຄືກັນ. 11 ແຜ່ນດິນທັງໝົດນີ້ຈະກາຍເປັນຊາກຫັກພັງແລະກາຍເປັນບ່ອນທີ່ເປັນຕາຢ້ານ ແລະຊາດເຫຼົ່ານີ້ຈະຕ້ອງຮັບໃຊ້ກະສັດບາບີໂລນ 70 ປີ.”’+
12 ພະເຢໂຫວາເວົ້າວ່າ ‘ແຕ່ເມື່ອຄົບ 70 ປີແລ້ວ+ ເຮົາຈະລົງໂທດກະສັດບາບີໂລນແລະຊາດຂອງລາວສຳລັບຄວາມຜິດຂອງເຂົາເຈົ້າ+ ແລະເຮົາຈະເຮັດໃຫ້ແຜ່ນດິນຂອງພວກການເດອາຮ້າງເປົ່າຕະຫຼອດໄປ.+ 13 ເຮົາຈະເຮັດໃຫ້ຊາດນັ້ນເຈິຄວາມຈິບຫາຍທຸກຢ່າງທີ່ເຮົາເຄີຍເວົ້າໄວ້ກ່ຽວກັບຊາດນັ້ນ ລວມທັງຄວາມຈິບຫາຍທີ່ເຢເຣມີຢາໄດ້ພະຍາກອນແລະຂຽນໄວ້ໃນປຶ້ມນີ້ກ່ຽວກັບຊາດຕ່າງໆ. 14 ຊາດຕ່າງໆແລະພວກກະສັດທີ່ຍິ່ງໃຫຍ່+ຈະບັງຄັບເຂົາເຈົ້າໃຫ້ເປັນທາດ+ແລະເຮົາຈະລົງໂທດເຂົາເຈົ້າຕາມສິ່ງທີ່ເຂົາເຈົ້າເຮັດ.’”+
15 ພະເຢໂຫວາພະເຈົ້າຂອງອິດສະຣາເອນເວົ້າກັບຂ້ອຍວ່າ: “ເຮົາຈະສົ່ງເຈົ້າໄປຫາຊາດຕ່າງໆ. ໃຫ້ເຈົ້າເອົາຈອກເຫຼົ້າແວງຂອງຄວາມໃຈຮ້າຍຈາກມືຂອງເຮົາໄປໃຫ້ເຂົາເຈົ້າກິນ. 16 ເຂົາເຈົ້າຈະກິນເຫຼົ້າແວງ ຍ່າງເຊໄປເຊມາ ແລະເຮັດຄືກັບຄົນຜີບ້າເມື່ອເຮົາສົ່ງສັດຕູໄປເຮັດສົງຄາມກັບເຂົາເຈົ້າ.”+
17 ຂ້ອຍຈຶ່ງໄປຫາທຸກຊາດທີ່ພະເຢໂຫວາສົ່ງຂ້ອຍໄປ ແລ້ວເອົາຈອກນັ້ນຈາກມືຂອງພະເຢໂຫວາໃຫ້ເຂົາເຈົ້າກິນ.+ 18 ເລີ່ມຈາກເມືອງເຢຣູຊາເລັມແລະເມືອງຕ່າງໆຂອງຢູດາ+ ພວກກະສັດແລະພວກເຈົ້ານາຍຂອງເມືອງເຫຼົ່ານັ້ນ ເພື່ອຈະທຳລາຍເຂົາເຈົ້າແລະເຮັດໃຫ້ຄົນອື່ນທີ່ເຫັນເຂົາເຈົ້າຢ້ານ ເຍາະເຍີ້ຍ ແລະສາບແຊ່ງ+ເຂົາເຈົ້າຄືກັບທີ່ເປັນຢູ່ໃນທຸກມື້ນີ້. 19 ແລ້ວກໍເອົາໄປໃຫ້ກະສັດຂອງເອຢິບ* ພວກຄົນຮັບໃຊ້ຂອງລາວ ພວກເຈົ້ານາຍຂອງລາວ ປະຊາຊົນທັງໝົດຂອງລາວ+ 20 ຄົນຕ່າງຊາດທັງໝົດທີ່ຢູ່ໃນເອຢິບ ກະສັດທັງໝົດຂອງແຜ່ນດິນອູເຊ ກະສັດທັງໝົດຂອງແຜ່ນດິນຟີລິດສະຕີນ+ ອາຊະກາໂລນ+ ຄາຊາ ເອັກໂຣນ ຄົນອາຊະໂດດທີ່ຍັງເຫຼືອຢູ່ 21 ຄົນເອໂດມ+ ຄົນໂມອາບ+ ຄົນອຳໂມນ+ 22 ກະສັດທັງໝົດຂອງຕີເຣ ກະສັດທັງໝົດຂອງຊີໂດນ+ ກະສັດທັງໝົດຂອງເກາະທີ່ຢູ່ໃນທະເລ 23 ເດດານ+ ເຕມາ ບູເຊ ທຸກຄົນທີ່ໄດ້ແຖຜົມຂ້າງຫູອອກ+ 24 ກະສັດທັງໝົດຂອງຄົນອາຣັບ+ ກະສັດທັງໝົດຂອງຄົນຕ່າງຊາດທີ່ຢູ່ໃນບ່ອນກັນດານ 25 ກະສັດທັງໝົດຂອງຊິມຣີ ກະສັດທັງໝົດຂອງເອລາມ+ ກະສັດທັງໝົດຂອງເມເດຍ+ 26 ແລະກະສັດທັງໝົດຈາກທາງເໜືອທີ່ຢູ່ໃກ້ແລະໄກ. ຂ້ອຍເອົາຈອກນັ້ນໄປໃຫ້ກະສັດເທື່ອລະອົງແລະເອົາໄປໃຫ້ປະເທດອື່ນໆທັງໝົດທີ່ຢູ່ເທິງແຜ່ນດິນໂລກ. ກະສັດຂອງເຊຊັກ*+ກໍຈະກິນຈາກຈອກນັ້ນຄືກັນ.
27 “ເຈົ້າຕ້ອງບອກເຂົາເຈົ້າວ່າ ‘ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ “ໃຫ້ກິນຈົນເມົາ ກິນຈົນຮາກແລະລົ້ມລົງຈົນລຸກຂຶ້ນບໍ່ໄດ້ອີກ+ ຍ້ອນເຮົາຈະສົ່ງສັດຕູໄປເຮັດສົງຄາມກັບພວກເຈົ້າ.”’ 28 ຖ້າເຂົາເຈົ້າບໍ່ຍອມເອົາຈອກຈາກມືຂອງເຈົ້າໄປກິນ ໃຫ້ເຈົ້າບອກເຂົາເຈົ້າວ່າ ‘ພະເຢໂຫວາຜູ້ບັນຊາການກອງທັບບອກວ່າ “ເຈົ້າຕ້ອງກິນ! 29 ຖ້າເຮົາຈະເຮັດໃຫ້ເມືອງທີ່ຖືກເອີ້ນຕາມຊື່ຂອງເຮົາເຈິຄວາມຈິບຫາຍ+ ເຈົ້າຄິດວ່າເຈົ້າຊິລອດບໍ?”+
ເຈົ້າຈະຖືກລົງໂທດແນ່ນອນ ຍ້ອນເຮົາກຳລັງສົ່ງສັດຕູໄປເຮັດສົງຄາມກັບທຸກຄົນທີ່ຢູ່ໃນໂລກ.’ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
30 ເຈົ້າຕ້ອງພະຍາກອນເລື່ອງທັງໝົດນີ້ໃຫ້ເຂົາເຈົ້າຟັງແລະບອກເຂົາເຈົ້າວ່າ
‘ພະເຢໂຫວາຜູ້ທີ່ຢູ່ບ່ອນສູງຈະແຜດສຽງຮ້ອງ.
ເພິ່ນຈະເຮັດໃຫ້ຄົນໄດ້ຍິນສຽງຂອງເພິ່ນຈາກບ່ອນບໍລິສຸດຂອງເພິ່ນ.
ເພິ່ນຈະແຜດສຽງດັງໆໃສ່ບ່ອນຢູ່ຂອງເພິ່ນທີ່ຢູ່ເທິງໂລກ.
ເພິ່ນຈະຮ້ອງດ້ວຍຄວາມດີໃຈຄືກັບຄົນທີ່ຢຽບໝາກລະແຊັງຢູ່ໃນອ່າງ.
ເພິ່ນຈະຮ້ອງເພງແຫ່ງໄຊຊະນະໃສ່ທຸກຄົນທີ່ຢູ່ໃນໂລກນີ້.’
31 ພະເຢໂຫວາເວົ້າວ່າ ‘ສຽງຈະດັງກ້ອງໄປຈົນສຸດຂອບໂລກ
ຍ້ອນພະເຢໂຫວາມີຄະດີກັບຊາດຕ່າງໆ.
ເພິ່ນຈະຕັດສິນມະນຸດທຸກຄົນດ້ວຍໂຕເພິ່ນເອງ+
ແລະເພິ່ນຈະເຮັດໃຫ້ຄົນຊົ່ວຖືກຂ້າຕາຍດ້ວຍດາບ.’
32 ພະເຢໂຫວາຜູ້ບັນຊາການກອງທັບບອກວ່າ
‘ເບິ່ງແມ້! ຄວາມຈິບຫາຍກຳລັງແພ່ກະຈາຍຈາກຊາດໜຶ່ງໄປອີກຊາດໜຶ່ງ+
ແລະພາຍຸໃຫຍ່ຈະຖືກປ່ອຍມາຈາກບ່ອນທີ່ຢູ່ໄກໆຂອງໂລກ.+
33 ຄົນທີ່ຖືກພະເຢໂຫວາຂ້າໃນມື້ນັ້ນຈະມີຕັ້ງແຕ່ສຸດຂອບໂລກຟາກນີ້ໄປຈົນຮອດສຸດຂອບໂລກຟາກນັ້ນ. ຈະບໍ່ມີໃຜໄວ້ທຸກໃຫ້ເຂົາເຈົ້າແລະຈະບໍ່ມີໃຜເອົາສົບເຂົາເຈົ້າໄປຝັງ. ສົບຂອງເຂົາເຈົ້າຈະເປັນຄືກັບຂີ້ສັດຢູ່ດິນ.’
34 ພວກເຈົ້າທີ່ເປັນຄົນລ້ຽງແກະເອີ້ຍ ໃຫ້ຮ້ອງໄຫ້ອອກມາດັງໆແມ້!
ພວກເຈົ້າທີ່ເປັນແກະໂຕສຳຄັນໃນຝູງ ໃຫ້ນອນກິ້ງເກືອກຢູ່ດິນແມ້!
ຍ້ອນເວລາທີ່ພວກເຈົ້າຈະຖືກເຮັດໃຫ້ກະຈັດກະຈາຍໄປແລະຖືກຂ້າມາຮອດແລ້ວ.
ພວກເຈົ້າເປັນຄືກັບໝໍ້ດິນລາຄາແພງທີ່ຕົກແຕກ!
35 ພວກຜູ້ລ້ຽງແກະບໍ່ມີບ່ອນໜີ
ແລະພວກແກະໂຕສຳຄັນໃນຝູງກໍໜີໄປໃສບໍ່ໄດ້.
36 ຟັງແມ້! ຟັງສຽງຮ້ອງຂອງຄົນລ້ຽງແກະ
ແລະຟັງສຽງຮ້ອງໄຫ້ຂອງພວກແກະໂຕສຳຄັນໃນຝູງ
ຍ້ອນພະເຢໂຫວາໄດ້ທຳລາຍທົ່ງຫຍ້າຂອງເຂົາເຈົ້າແລ້ວ.
37 ບ່ອນຢູ່ທີ່ສະຫງົບສຸກກໍບໍ່ມີສິ່ງທີ່ມີຊີວິດເຫຼືອຢູ່ເລີຍ
ຍ້ອນຄວາມໃຈຮ້າຍແຮງຂອງພະເຢໂຫວາ.
38 ຄືກັບໂຕສິງໃຈຮ້າຍທີ່ອອກມາຈາກຖ້ຳ ເພິ່ນກໍໄດ້ອອກມາຈາກບ່ອນຢູ່ຂອງເພິ່ນ.+
ຜູ້ຄົນກໍຮູ້ສຶກຢ້ານເມື່ອເຫັນແຜ່ນດິນຂອງເຂົາເຈົ້າ
ຍ້ອນເພິ່ນໄດ້ໃຊ້ດາບຂ້າໂດຍບໍ່ອີ່ຕົນ
ແລະຍ້ອນເພິ່ນໃຈຮ້າຍແຮງ.”