ພະບັນຍັດ
22 “ຖ້າເຈົ້າເຫັນງົວຫຼືແກະຂອງພີ່ນ້ອງຂອງເຈົ້າຫຼົງມາ ຢ່າມີແຕ່ເບິ່ງຊື່ໆ.+ ເຈົ້າຕ້ອງເອົາມັນສົ່ງຄືນໃຫ້ລາວ. 2 ແຕ່ຖ້າເຈົ້າຂອງສັດໂຕນັ້ນຢູ່ໄກຫຼືເຈົ້າບໍ່ຮູ້ຈັກລາວ ໃຫ້ເຈົ້າພາມັນມາໄວ້ຢູ່ເຮືອນຂອງເຈົ້າຈົນກວ່າເຈົ້າຂອງຈະມາຊອກຫາ ແລ້ວຈຶ່ງຄ່ອຍສົ່ງຄືນໃຫ້ລາວ.+ 3 ເຈົ້າຕ້ອງເຮັດແນວນີ້ກັບທຸກສິ່ງທີ່ຄົນອື່ນເຮັດເສຍ ບໍ່ວ່າຈະເປັນລາ ເຄື່ອງນຸ່ງ ຫຼືສິ່ງອື່ນໆ. ຖ້າເຈົ້າເຫັນແລ້ວ ຢ່າມີແຕ່ເບິ່ງຊື່ໆ.
4 ຖ້າເຈົ້າເຫັນລາຫຼືງົວຂອງພີ່ນ້ອງຂອງເຈົ້າລົ້ມຢູ່ຫົນທາງ ໃຫ້ເຈົ້າໄປຊ່ວຍລາວໂຈມມັນຂຶ້ນ. ຢ່າມີແຕ່ເບິ່ງຊື່ໆ.+
5 ຢ່າໃຫ້ຜູ້ຍິງນຸ່ງເຄື່ອງຂອງຜູ້ຊາຍ ແລະຢ່າໃຫ້ຜູ້ຊາຍນຸ່ງເຄື່ອງຂອງຜູ້ຍິງ ເພາະພະເຢໂຫວາພະເຈົ້າຂອງເຈົ້າຂີ້ດຽດຄົນທີ່ເຮັດແນວນີ້.
6 ຖ້າເຈົ້າເຫັນຮັງນົກຢູ່ເທິງຕົ້ນໄມ້ຫຼືຢູ່ພື້ນດິນ ແລະເຫັນແມ່ນົກກຳລັງຕຸ້ມລູກຫຼືກຳລັງຟັກໄຂ່ຢູ່ ຢ່າເອົາທັງແມ່ທັງລູກໄປນຳກັນ.+ 7 ຖ້າເຈົ້າຢາກເອົາລູກຂອງມັນກໍເອົາໄປໄດ້ ແຕ່ໃຫ້ປ່ອຍແມ່ມັນໄວ້. ຖ້າເຈົ້າເຮັດແນວນີ້ ເຈົ້າຈະຢູ່ດີມີແຮງແລະມີອາຍຸຍືນຍາວ.
8 ເມື່ອເຈົ້າປຸກເຮືອນໃໝ່ ເຈົ້າຕ້ອງເຮັດແນວກັ້ນອ້ອມດາດຟ້າ+ເພື່ອບໍ່ໃຫ້ຄົນຕົກລົງໄປ ແລ້ວເຈົ້າກັບຄອບຄົວຂອງເຈົ້າກໍຈະບໍ່ມີຄວາມຜິດຍ້ອນຂ້າຄົນຕາຍ.
9 ຢ່າເອົາແນວປູກຊະນິດອື່ນໄປຫວ່ານໃນສວນໝາກລະແຊັງຂອງເຈົ້າ.+ ຄັນບໍ່ຊັ້ນ ເຈົ້າຈະຕ້ອງເອົາໝາກລະແຊັງຈາກສວນນັ້ນກັບຜົນລະປູກທີ່ເອົາມາປູກໃໝ່ນັ້ນໄປໃຫ້ຢູ່ເຕັ້ນສັກສິດ.
10 ຢ່າເອົາງົວກັບລາມາທຽມແອກໄຖນານຳກັນ.+
11 ຢ່ານຸ່ງເຄື່ອງທີ່ເຮັດຈາກດ້າຍຂົນສັດປະສົມກັບເສັ້ນປ່ານ.+
12 ໃຫ້ເຈົ້າເຮັດຍອຍໃສ່ 4 ແຈຂອງຜ້າພາດບ່າ.+
13 ຖ້າຜູ້ຊາຍຄົນໜຶ່ງແຕ່ງດອງກັບຜູ້ຍິງແລະໄດ້ນອນນຳລາວ ແຕ່ຫຼັງຈາກນັ້ນກໍຊັງລາວ 14 ກ່າວຫາວ່າລາວເຮັດໂຕບໍ່ດີ ແລະເວົ້າໃຫ້ລາວແບບເສຍໆຫາຍໆວ່າ ‘ຫຼັງຈາກຂ້ອຍແຕ່ງດອງກັບຜູ້ຍິງຄົນນີ້ແລະນອນນຳລາວແລ້ວ ຂ້ອຍກໍໄດ້ຮູ້ວ່າລາວບໍ່ແມ່ນຜູ້ຍິງບໍລິສຸດ’* 15 ພໍ່ແມ່ຂອງຜູ້ຍິງຄົນນັ້ນຕ້ອງເອົາຫຼັກຖານທີ່ບອກວ່າລູກສາວຂອງເຂົາເຈົ້າບໍລິສຸດໄປໃຫ້ພວກຜູ້ນຳທີ່ຢູ່ປະຕູເມືອງເບິ່ງ. 16 ພໍ່ຂອງຜູ້ຍິງຄົນນັ້ນຕ້ອງບອກພວກຜູ້ນຳວ່າ ‘ຂ້ອຍໄດ້ຍົກລູກສາວໃຫ້ເປັນເມຍຂອງຜູ້ຊາຍຄົນນີ້ ແຕ່ລາວພັດຊັງລູກສາວຂອງຂ້ອຍ 17 ແລະກ່າວຫາລູກສາວຂອງຂ້ອຍແບບເສຍໆຫາຍໆວ່າ “ຂ້ອຍບໍ່ເຫັນຫຼັກຖານວ່າລູກສາວຂອງເຈົ້າບໍລິສຸດ” ແຕ່ນີ້ເດ້ ຫຼັກຖານທີ່ວ່າລູກສາວຂອງຂ້ອຍບໍລິສຸດ.’ ພໍ່ແມ່ຕ້ອງພືຜ້າທີ່ເປັນຫຼັກຖານນັ້ນໃຫ້ພວກຜູ້ນຳເບິ່ງ 18 ແລ້ວພວກຜູ້ນຳ+ຈະຕ້ອງລົງໂທດຜູ້ຊາຍຄົນນັ້ນ.+ 19 ເຂົາເຈົ້າຕ້ອງປັບໄໝລາວເປັນເງິນໜັກ 100 ເຊເກນ* ແລະເອົາເງິນໃຫ້ພໍ່ຂອງຜູ້ຍິງຄົນນັ້ນ ຍ້ອນລາວໄດ້ເຮັດໃຫ້ຜູ້ຍິງບໍລິສຸດຄົນໜຶ່ງໃນອິດສະຣາເອນເສຍຊື່ສຽງ.+ ຜູ້ຍິງຄົນນັ້ນຕ້ອງເປັນເມຍຂອງລາວຕໍ່ໄປ. ຫ້າມລາວປະຮ້າງກັບຜູ້ຍິງຄົນນັ້ນເດັດຂາດ.
20 ແຕ່ຖ້າຂໍ້ກ່າວຫານັ້ນເປັນຄວາມຈິງແລະບໍ່ມີຫຼັກຖານວ່າຜູ້ຍິງຄົນນັ້ນບໍລິສຸດ 21 ໃຫ້ພວກຜູ້ນຳເອົາຜູ້ຍິງຄົນນັ້ນໄປຕໍ່ໜ້າເຮືອນຂອງພໍ່ ແລ້ວກໍໃຫ້ຄົນໃນເມືອງນັ້ນດຶກກ້ອນຫີນໃສ່ລາວໃຫ້ຕາຍ ຍ້ອນຜູ້ຍິງຄົນນັ້ນເຮັດສິ່ງທີ່ເປັນຕາຂີ້ດຽດ+ໃນອິດສະຣາເອນ ໂດຍເຮັດຜິດສິນລະທຳທາງເພດໃນເຮືອນຂອງພໍ່.+ ເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກເຈົ້າ.+
22 ຖ້າມີຄົນຮູ້ວ່າຜູ້ຊາຍຄົນໃດໄປນອນນຳເມຍຄົນອື່ນ ຜູ້ຊາຍຄົນນັ້ນກັບຜູ້ຍິງທີ່ລາວນອນນຳຈະຕ້ອງຕາຍ.+ ພວກເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກອິດສະຣາເອນ.
23 ຖ້າຜູ້ຊາຍຄົນໃດເຈິຜູ້ຍິງບໍລິສຸດຢູ່ໃນເມືອງແລະໄດ້ນອນນຳລາວ ແຕ່ຜູ້ຍິງຄົນນັ້ນມີຄູ່ໝັ້ນແລ້ວ 24 ເຈົ້າຕ້ອງພາທັງສອງຄົນອອກໄປນອກປະຕູເມືອງ ແລະໃຫ້ຄົນດຶກກ້ອນຫີນໃສ່ເຂົາເຈົ້າໃຫ້ຕາຍ. ເຈົ້າຕ້ອງເຮັດແນວນີ້ກັບຜູ້ຍິງ ຍ້ອນລາວຢູ່ໃນເມືອງແຕ່ບໍ່ໄດ້ຮ້ອງໃຫ້ຄົນອື່ນຊ່ວຍ ແລະເຈົ້າຕ້ອງເຮັດແນວນີ້ກັບຜູ້ຊາຍຄືກັນ ຍ້ອນລາວໄດ້ນອນນຳເມຍ*ຂອງຄົນອື່ນ.+ ພວກເຈົ້າຕ້ອງກຳຈັດຄວາມຊົ່ວຮ້າຍໃຫ້ໝົດໄປຈາກພວກເຈົ້າ.
25 ແຕ່ຖ້າລາວເຈິຜູ້ຍິງຢູ່ນອກເມືອງແລະໄດ້ຂົ່ມຂືນຜູ້ຍິງຄົນນັ້ນ ມີແຕ່ຜູ້ຊາຍເທົ່ານັ້ນທີ່ຈະຕ້ອງຕາຍ. 26 ຢ່າເຮັດຫຍັງໃຫ້ຜູ້ຍິງຄົນນັ້ນ ເພາະລາວບໍ່ໄດ້ເຮັດຫຍັງຜິດ ແລະລາວກໍບໍ່ຕ້ອງຕາຍ. ຄະດີນີ້ຄືກັບກໍລະນີທີ່ຄົນໜຶ່ງໄດ້ທຳຮ້າຍແລະຂ້າຄົນອື່ນ.+ 27 ເປັນແນວນີ້ກໍຍ້ອນວ່າຜູ້ຊາຍໄດ້ເຈິຜູ້ຍິງທີ່ມີຄູ່ໝັ້ນແລ້ວຢູ່ນອກເມືອງ ແລະຜູ້ຍິງກໍໄດ້ຮ້ອງຂໍໃຫ້ຄົນມາຊ່ວຍແລ້ວ ແຕ່ບໍ່ມີໃຜມາຊ່ວຍລາວ.
28 ຖ້າຜູ້ຊາຍເຈິຜູ້ຍິງທີ່ບໍລິສຸດແລະຍັງບໍ່ມີຄູ່ໝັ້ນເທື່ອ ແລ້ວລາວໄດ້ບັງຄັບ*ໃຫ້ຜູ້ຍິງຄົນນັ້ນໄປນອນນຳ ແລະຄົນອື່ນກໍຮູ້ເລື່ອງນີ້+ 29 ຜູ້ຊາຍຕ້ອງເອົາເງິນໜັກ 50 ເຊເກນ*ໃຫ້ພໍ່ຂອງຜູ້ຍິງຄົນນັ້ນ ແລະລາວຕ້ອງເອົາຜູ້ຍິງຄົນນັ້ນໄປເປັນເມຍ.+ ລາວຈະປະຮ້າງກັບຜູ້ຍິງຄົນນັ້ນບໍ່ໄດ້ເດັດຂາດ ຍ້ອນລາວເຮັດໃຫ້ຜູ້ຍິງຄົນນັ້ນເສຍກຽດແລ້ວ.
30 ຢ່າເອົາເມຍຂອງພໍ່ມາເປັນເມຍຂອງເຈົ້າ ເພາະການເຮັດແນວນີ້ຈະເຮັດໃຫ້ພໍ່ຂອງເຈົ້າເສຍກຽດ.”+