ປັນຍາຈານ
4 ຂ້ອຍໄດ້ຄິດອີກເທື່ອໜຶ່ງກ່ຽວກັບການກົດຂີ່ຂົ່ມເຫງຕ່າງໆທີ່ເກີດຂຶ້ນໃຕ້ດວງຕາເວັນ. ຂ້ອຍເຫັນນ້ຳຕາຂອງຄົນທີ່ຖືກກົດຂີ່ແລະເຫັນວ່າບໍ່ມີໃຜປອບໃຈເຂົາເຈົ້າເລີຍ.+ ພວກທີ່ກົດຂີ່ຄົນອື່ນມີອຳນາດຫຼາຍ ແຕ່ກໍບໍ່ມີໃຜປອບໃຈຄົນທີ່ຖືກກົດຂີ່. 2 ຂ້ອຍຈຶ່ງດີໃຈແທນຄົນທີ່ຕາຍແລ້ວຫຼາຍກວ່າຄົນທີ່ຍັງມີຊີວິດຢູ່.+ 3 ຄົນທີ່ຍັງບໍ່ທັນເກີດມາກໍແຮ່ງດີກວ່າຄົນທີ່ຕາຍໄປແລ້ວກັບຄົນທີ່ຍັງມີຊີວິດຢູ່+ ຍ້ອນເຂົາເຈົ້າຍັງບໍ່ທັນໄດ້ເຫັນສິ່ງຊົ່ວຕ່າງໆທີ່ຄົນພາກັນເຮັດຢູ່ໃຕ້ດວງຕາເວັນ.+
4 ຂ້ອຍໄດ້ເຫັນອີກວ່າຄວາມພະຍາຍາມ*ແລະຜົນງານທີ່ດີໆເກີດຂຶ້ນມາໄດ້ກໍຍ້ອນຄົນຢາກແຂ່ງຂັນກັນ.+ ສິ່ງນີ້ກໍບໍ່ມີປະໂຫຍດແລະເປັນການແລ່ນໄລ່ຕາມລົມ.
5 ຄົນໂງ່ກອດເອິກຢູ່ຊື່ໆແລະເຮັດໃຫ້ໂຕເອງຈິບຫາຍ.+
6 ການໄດ້ພັກຜ່ອນຈັກໜ້ອຍໜຶ່ງ*ກໍດີກວ່າການເຮັດວຽກໜັກ*ແລະແລ່ນໄລ່ຕາມລົມ.+
7 ຂ້ອຍຄິດກ່ຽວກັບອີກຕົວຢ່າງໜຶ່ງຂອງສິ່ງທີ່ບໍ່ມີປະໂຫຍດໃຕ້ດວງຕາເວັນ. 8 ມີຜູ້ຊາຍຄົນໜຶ່ງຢູ່ຜູ້ດຽວ. ລາວບໍ່ມີໝູ່ ບໍ່ມີລູກ ບໍ່ມີອ້າຍນ້ອງ ແຕ່ລາວກໍຍັງເຮັດວຽກໜັກບໍ່ຢຸດບໍ່ເຊົາ. ລາວໄດ້ຊັບສົມບັດຫຼາຍສ່ຳໃດກໍບໍ່ເຄີຍຮູ້ຈັກພໍ.+ ລາວຄືຊິບໍ່ເຄີຍຖາມໂຕເອງວ່າ: “ຂ້ອຍເຮັດວຽກໜັກຫຼາຍປານນີ້ເພື່ອໃຜ? ຂ້ອຍເຮັດໃຫ້ໂຕເອງພາດສິ່ງດີໆໄປເພື່ອໃຜ?”+ ສິ່ງນີ້ກໍບໍ່ມີປະໂຫຍດແລະເປັນວຽກທີ່ເຮັດໃຫ້ເສົ້າໃຈແທ້ໆ.+
9 ສອງຄົນກໍດີກວ່າຄົນດຽວ+ ເພາະເຂົາເຈົ້າຈະໄດ້ຮັບລາງວັນທີ່ດີໆສຳລັບວຽກໜັກຂອງເຂົາເຈົ້າ. 10 ຖ້າຄົນໜຶ່ງລົ້ມ ອີກຄົນໜຶ່ງກໍຈະຊ່ວຍລາວໃຫ້ລຸກຂຶ້ນມາໄດ້. ແຕ່ຈະເກີດຫຍັງຂຶ້ນຖ້າຄົນໜຶ່ງລົ້ມແລະບໍ່ມີໃຜຊ່ວຍລາວໃຫ້ລຸກຂຶ້ນ?
11 ນອກຈາກນັ້ນ ຖ້າ 2 ຄົນນອນຢູ່ນຳກັນເຂົາເຈົ້າກໍຈະອຸ່ນ ແຕ່ຖ້ານອນຢູ່ຄົນດຽວຈະອຸ່ນໄດ້ແນວໃດ? 12 ຖ້າຢູ່ຄົນດຽວອາດຈະຖືກຄົນອື່ນເອົາຊະນະໄດ້ ແຕ່ຖ້າມີ 2 ຄົນກໍຈະສູ້ໄດ້. ເຊືອກ 3 ກຽວຈະບໍ່ຂາດງ່າຍໆ.*
13 ເດັກນ້ອຍທີ່ທຸກຍາກແຕ່ເປັນຄົນສະຫຼາດກໍດີກວ່າກະສັດເຖົ້າທີ່ເປັນຄົນໂງ່+ທີ່ບໍ່ມີເຫດຜົນແລະບໍ່ຍອມຟັງຄຳເຕືອນອີກຕໍ່ໄປ.+ 14 ເຖິງວ່າລາວ*ເກີດມາເປັນຄົນທຸກໃນຊ່ວງທີ່ກະສັດເຖົ້າປົກຄອງ+ ລາວກໍໄດ້ອອກຈາກຄຸກມາເປັນກະສັດ.+ 15 ຂ້ອຍຄິດເຖິງທຸກຄົນທີ່ມີຊີວິດຢູ່ໃຕ້ດວງຕາເວັນແລະຄິດເຖິງຊີວິດຂອງກະສັດໜຸ່ມທີ່ໄດ້ຂຶ້ນມາປົກຄອງແທນຄົນອື່ນ. 16 ເຖິງວ່າລາວຈະໄດ້ປົກຄອງປະຊາຊົນຫຼາຍແທ້ຫຼາຍວ່າ ແຕ່ຄົນທີ່ມານຳຫຼັງກໍຈະບໍ່ມັກລາວ.+ ສິ່ງນີ້ກໍບໍ່ມີປະໂຫຍດແລະເປັນການແລ່ນໄລ່ຕາມລົມຄືກັນ.