ເພງສັນລະເສີນ

127 ຖ້າ​ພະ​ເຢໂຫວາ​ບໍ່​ສ້າງ​ເຮືອນ

ເຖິງ​ວ່າ​ຊ່າງ​ກໍ່​ສ້າງ​ຈະ​ເຮັດ​ວຽກ​ໜັກ​ສ່ຳ​ໃດ​ກໍ​ບໍ່​ມີ​ປະໂຫຍດ.+

ຖ້າ​ພະ​ເຢໂຫວາ​ບໍ່​ປົກປ້ອງ​ເມືອງ+

ເຖິງ​ວ່າ​ຄົນຍາມ​ຈະ​ຕື່ນ​ຢູ່​ຕະຫຼອດ​ເວລາ​ກໍ​ບໍ່​ມີ​ປະໂຫຍດ​ຫຍັງ​ເລີຍ.

 2 ຖ້າ​ພະເຈົ້າ​ບໍ່​ອວຍພອນ​ເຈົ້າ ເຖິງ​ວ່າ​ເຈົ້າ​ຈະ​ຕື່ນ​ແຕ່​ເຊົ້າ​ໆ​

ເຮັດ​ວຽກ​ຈົນ​ເດິກ​ແລະ​ເຮັດ​ວຽກ​ໜັກ​ເພື່ອ​ຊອກຫາ​ອາຫານ

ກໍ​ບໍ່​ມີ​ປະໂຫຍດ​ຫຍັງ​ດອກ

ຍ້ອນ​ພະເຈົ້າ​ເບິ່ງແຍງ​ຄົນ​ທີ່​ເພິ່ນ​ຮັກ​ແລະ​ໃຫ້​ເຂົາເຈົ້າ​ນອນ​ຫຼັບ​ສະບາຍ.+

 3 ລູກ​ເປັນ​ມໍລະດົກ​ຈາກ​ພະ​ເຢໂຫວາ.+

ເດັກນ້ອຍ​ທີ່​ເກີດ​ມາ​ເປັນ​ຂອງຂວັນ​ຈາກ​ເພິ່ນ.+

 4 ລູກ​ຊາຍ​ຂອງ​ຄົນ​ທີ່​ຍັງ​ໜຸ່ມ

ກໍ​ເປັນ​ຄື​ກັບ​ລູກທະນູ​ຂອງ​ຄົນ​ທີ່​ເກັ່ງ​ໆ​.+

ເຂົາເຈົ້າ*​ຈະ​ບໍ່​ອັບອາຍ​ຂາຍໜ້າ

ຍ້ອນ​ເຂົາເຈົ້າ​ຈະ​ເວົ້າ​ກັບ​ພວກ​ສັດຕູ​ຢູ່​ປະຕູ​ເມືອງ.