ປະຖົມມະການ
31 ຕໍ່ມາ ຢາໂຄບໄດ້ຍິນພວກລູກຊາຍຂອງລາບານລົມກັນວ່າ: “ຢາໂຄບເອົາທຸກສິ່ງທຸກຢ່າງຂອງພໍ່ພວກເຮົາໄປ. ຊັບສົມບັດທັງໝົດທີ່ລາວມີຢູ່ກໍມາຈາກພໍ່ຂອງພວກເຮົາ.”+ 2 ເມື່ອຢາໂຄບເບິ່ງໜ້າຂອງລາບານ ລາວກໍເຫັນວ່າສີໜ້າພໍ່ເຖົ້າບໍ່ຄືເກົ່າ.+ 3 ພະເຢໂຫວາເວົ້າກັບຢາໂຄບວ່າ: “ໃຫ້ກັບໄປແຜ່ນດິນຂອງປູ່ຍ່າຕານາຍຂອງເຈົ້າ ແລະໄປຫາຍາດຕິພີ່ນ້ອງຂອງເຈົ້າ+ ແລ້ວເຮົາຈະຊ່ວຍເຈົ້າຕໍ່ໆໄປ.” 4 ຢາໂຄບສົ່ງຄົນໃຫ້ໄປບອກຣາເຄນກັບເລອາໃຫ້ມາຫາຢູ່ບ່ອນທີ່ລາວລ້ຽງສັດ 5 ແລະເວົ້າກັບເຂົາເຈົ້າວ່າ:
“ອ້າຍເຫັນວ່າພໍ່ຂອງພວກນ້ອງປ່ຽນໄປແລ້ວ+ ແຕ່ພະເຈົ້າຂອງພໍ່ອ້າຍຍັງຊ່ວຍອ້າຍຢູ່.+ 6 ພວກນ້ອງກໍເຫັນແລ້ວວ່າອ້າຍເຮັດວຽກໃຫ້ພໍ່ຂອງພວກນ້ອງຈົນສຸດເຫື່ອສຸດແຮງແລ້ວ.+ 7 ພໍ່ຂອງພວກນ້ອງພະຍາຍາມໂກງແລະປ່ຽນຄ່າຈ້າງຂອງອ້າຍ 10 ເທື່ອແລ້ວ ແຕ່ພະເຈົ້າກໍຊ່ວຍອ້າຍຕະຫຼອດ. 8 ຄືຈັ່ງຕອນທີ່ພໍ່ບອກວ່າ ‘ສັດທີ່ເປັນໂຕດ່າງຈະເປັນຄ່າຈ້າງຂອງລູກເດີ້’ ສັດທີ່ເກີດມາກໍເປັນໂຕດ່າງໝົດ. ແຕ່ຖ້າພໍ່ປ່ຽນໃຈແລະບອກວ່າ ‘ໂຕລາຍກ່ານຈະເປັນຄ່າຈ້າງຂອງລູກເດີ້’ ໂຕທີ່ເກີດມາກໍເປັນໂຕລາຍກ່ານໝົດ.+ 9 ພະເຈົ້າໄດ້ເອົາສັດຈາກຝູງຂອງພໍ່ພວກນ້ອງມາໃຫ້ອ້າຍເລື້ອຍໆ. 10 ມີເທື່ອໜຶ່ງໃນຍາມທີ່ສັດຕິດເຊີງ ອ້າຍຝັນເຫັນແບ້ໂຕຜູ້ທີ່ມີລາຍດ່າງກັບລາຍກ່ານມາເຊີງກັບແບ້ໂຕແມ່.+ 11 ຈາກນັ້ນ ພະເຈົ້າທ່ຽງແທ້ເອີ້ນອ້າຍຜ່ານທາງທູດສະຫວັນຂອງເພິ່ນໃນຄວາມຝັນວ່າ ‘ຢາໂຄບເອີ້ຍ!’ ແລ້ວອ້າຍກໍຕອບວ່າ ‘ໂດຍ ພະອົງ.’ 12 ທູດສະຫວັນເວົ້າ*ຕື່ມອີກວ່າ ‘ແນມເບິ່ງແມ້ ແບ້ໂຕຜູ້ທີ່ເຊີງກັບແບ້ໂຕແມ່ມີທັງລາຍດ່າງກັບລາຍກ່ານ ເພາະເຮົາໄດ້ເຫັນທຸກສິ່ງທີ່ລາບານເຮັດກັບເຈົ້າແລ້ວ.+ 13 ເຮົາແມ່ນພະເຈົ້າທ່ຽງແທ້ທີ່ມາຫາເຈົ້າຢູ່ເບເທນ+ ບ່ອນທີ່ເຈົ້າເທນ້ຳມັນໃສ່ເສົາຫີນແລະສັນຍາກັບເຮົາ.+ ໃຫ້ເຈົ້າອອກຈາກແຜ່ນດິນນີ້ກັບໄປແຜ່ນດິນທີ່ເຈົ້າເກີດ.’”+
14 ຣາເຄນກັບເລອາຕອບຢາໂຄບວ່າ: “ພວກເຮົາຄືຊິບໍ່ໄດ້ມໍລະດົກຈາກພໍ່ດອກ. 15 ເພິ່ນຖືວ່າພວກເຮົາເປັນຄົນອື່ນຕັ້ງແຕ່ຕອນທີ່ຂາຍພວກເຮົາແລ້ວ ແລະເພິ່ນກໍໃຊ້ເງິນນັ້ນໝົດແລ້ວ.+ 16 ຊັບສົມບັດທຸກຢ່າງທີ່ພະເຈົ້າເອົາໄປຈາກພໍ່ຂອງພວກເຮົາ ລ້ວນແຕ່ແມ່ນຂອງພວກເຮົາແລະຂອງລູກພວກເຮົາ.+ ຄັນຊັ້ນກໍໃຫ້ເຮັດທຸກຢ່າງຕາມທີ່ພະເຈົ້າບອກໃຫ້ອ້າຍເຮັດ.”+
17 ແລ້ວຢາໂຄບກໍໃຫ້ລູກກັບເມຍຂຶ້ນຂີ່ຫຼັງອູດໄປ.+ 18 ຢາໂຄບໄດ້ເອົາຝູງສັດແລະສິ່ງຂອງທັງໝົດທີ່ລາວສະສົມ+ຢູ່ປາດັນອາລຳ ໄປຫາອີຊາກພໍ່ຂອງລາວຢູ່ແຜ່ນດິນການາອານ.+
19 ຕອນທີ່ລາບານອອກໄປຕັດຂົນແກະ ຣາເຄນກໍໄປລັກເອົາຮູບພະເທຣາຟີມ*+ຂອງພໍ່ໄປ.+ 20 ຢາໂຄບລັກໜີໄປຈາກລາບານຄົນອາຣາມ. 21 ລາວໜີຂ້າມແມ່ນ້ຳ*+ໄປພ້ອມກັບຄອບຄົວແລະທຸກສິ່ງທຸກຢ່າງທີ່ລາວມີ ແລ້ວລາວກໍເດີນທາງໄປເຂດພູກິລຽດ.+ 22 ໃນມື້ທີ 3 ລາບານຈຶ່ງຮູ້ວ່າຢາໂຄບໜີໄປ. 23 ລາບານກໍເລີຍພາພວກພີ່ນ້ອງຂອງລາວໄລ່ຕິດຕາມຢາໂຄບໄປ 7 ມື້ຈຶ່ງນຳທັນຢາໂຄບຢູ່ເຂດພູກິລຽດ. 24 ໃນຕອນກາງຄືນ ພະເຈົ້າມາຫາລາບານຄົນອາຣາມ+ໃນຄວາມຝັນ+ແລະເວົ້າວ່າ: “ໃຫ້ລະວັງຄຳເວົ້າທີ່ຈະເວົ້າກັບຢາໂຄບໃຫ້ດີໆ.”+
25 ຢາໂຄບຕັ້ງເຕັ້ນຢູ່ເຂດພູກິລຽດ. ເມື່ອລາບານກັບຍາດຕິພີ່ນ້ອງມາຮອດກໍຕັ້ງເຕັ້ນຢູ່ໃກ້ໆຫັ້ນ ແລ້ວລາບານກໍມາຫາຢາໂຄບ. 26 ລາບານເວົ້າກັບຢາໂຄບວ່າ: “ເປັນຫຍັງລູກຈຶ່ງເຮັດແນວນີ້? ເປັນຫຍັງລູກຈຶ່ງລັກອອກມາແລະພາລູກສາວຂອງພໍ່ອອກມາ ຄືກັບວ່າເຂົາເຈົ້າເປັນຊະເລີຍໃນສົງຄາມ? 27 ເປັນຫຍັງລູກຈຶ່ງລັກໜີມາໂດຍບໍ່ບອກພໍ່? ຖ້າລູກບອກພໍ່ ພໍ່ກໍຊິໃຫ້ຄົນມາຮ້ອງເພງ ຕີກອງແທມບູຣິນ* ແລະດີດພິນສົ່ງລູກເມືອຢ່າງມີຄວາມສຸກ. 28 ແຕ່ລູກບໍ່ໄດ້ໃຫ້ພໍ່ຈູບລາລູກສາວແລະຫຼານຂອງພໍ່ເລີຍ. ຈັ່ງແມ່ນລູກເຮັດຄືກັບຄົນໂງ່ແທ້. 29 ຖ້າພໍ່ຊິທຳຮ້າຍລູກພໍ່ກໍເຮັດໄດ້ ແຕ່ພະເຈົ້າຂອງປູ່ຍ່າຕານາຍຂອງລູກໄດ້ມາບອກພໍ່ໃນຄວາມຝັນໃນຄືນແລ້ວນີ້ວ່າ ‘ໃຫ້ລະວັງຄຳເວົ້າທີ່ຈະເວົ້າກັບຢາໂຄບໃຫ້ດີໆ.’+ 30 ພໍ່ເຂົ້າໃຈທີ່ລູກອອກມາແບບນີ້ ກໍຍ້ອນລູກບໍ່ໄດ້ກັບບ້ານເກີດດົນແລ້ວ. ແຕ່ເປັນຫຍັງລູກຄືລັກເອົາພະຂອງພໍ່ມານຳ?”+
31 ຢາໂຄບຕອບລາບານວ່າ: “ລູກຢ້ານ ເພາະລູກຄິດວ່າພໍ່ຊິບັງຄັບເອົາລູກສາວຂອງພໍ່ໄປຈາກລູກ. 32 ເລື່ອງພະຂອງພໍ່ນັ້ນ ຖ້າເຫັນຢູ່ນຳໃຜ ຄົນນັ້ນຈະຕ້ອງຕາຍ. ໃຫ້ພໍ່ຄົ້ນເຄື່ອງຂອງຂອງລູກຕໍ່ໜ້າຍາດຕິພີ່ນ້ອງຂອງພວກເຮົາ ແລະຖ້າເຫັນອີ່ຫຍັງທີ່ເປັນຂອງພໍ່ກໍເອົາໄປໂລດ.” ຢາໂຄບເວົ້າແນວນັ້ນກໍຍ້ອນລາວບໍ່ຮູ້ວ່າຣາເຄນໄດ້ລັກເອົາພະຂອງພໍ່ມາ. 33 ລາບານເຂົ້າໄປຄົ້ນເຕັ້ນຂອງຢາໂຄບ ເຕັ້ນຂອງເລອາ ແລະເຕັ້ນຂອງສາວໃຊ້ 2 ຄົນ+ ແຕ່ກໍບໍ່ເຫັນພະຂອງລາວ. ແລ້ວລາວກໍອອກຈາກເຕັ້ນຂອງເລອາ ແລະເຂົ້າໄປໃນເຕັ້ນຂອງຣາເຄນ. 34 ແຕ່ຣາເຄນເອົາພະໃສ່ບ່ອນເກັບເຄື່ອງທີ່ຢູ່ອານເທິງຫຼັງອູດ ແລະລາວກໍນັ່ງເຕັງຢູ່ເທິງ. ລາບານເຂົ້າໄປຄົ້ນໃນເຕັ້ນຂອງຣາເຄນ ແຕ່ກໍຊອກບໍ່ເຫັນ. 35 ຣາເຄນເວົ້າກັບພໍ່ວ່າ: “ຂໍໂທດເດີ້ພໍ່. ລູກເປັນປະຈຳເດືອນຢູ່+ ລຸກຈາກຫຼັງອູດບໍ່ໄດ້.” ລາບານຊອກຢ່າງລະອຽດ ແຕ່ກໍບໍ່ເຫັນພະຂອງລາວ.+
36 ຢາໂຄບກໍເລີຍໃຈຮ້າຍແລະເວົ້າໃຫ້ລາບານວ່າ: “ລູກເຮັດຫຍັງຜິດບໍ? ເປັນຫຍັງພໍ່ຄືໄລ່ຕິດຕາມລູກແບບນີ້? 37 ພໍ່ຄົ້ນເຄື່ອງຂອງລູກໝົດແລ້ວ ພໍ່ເຫັນອີ່ຫຍັງທີ່ເປັນຂອງພໍ່ບໍ? ໃຫ້ເອົາເຄື່ອງນັ້ນອອກມາຕໍ່ໜ້າຄົນຂອງລູກແລະຄົນຂອງພໍ່ ແລ້ວໃຫ້ເຂົາເຈົ້າຕັດສິນພວກເຮົາ. 38 ຕະຫຼອດ 20 ປີທີ່ລູກຢູ່ນຳພໍ່ ແກະກັບແບ້ຂອງພໍ່ບໍ່ເຄີຍຫຼຸລູກຈັກເທື່ອ+ ແລະລູກກໍບໍ່ເຄີຍກິນແກະນ້ອຍ*ຂອງພໍ່ເລີຍ. 39 ລູກບໍ່ເຄີຍປ່ອຍໃຫ້ສັດປ່າມາກັດແກະຂອງພໍ່+ ຖ້າໂຕໃດເສຍລູກກໍໄຊ້ຄືນ. ຖ້າໂຕໃດຖືກລັກ ບໍ່ວ່າຈະເປັນກາງເວັນຫຼືກາງຄືນ ພໍ່ກໍໃຫ້ລູກໄຊ້ຄືນໝົດ. 40 ຕອນກາງເວັນລູກຖືກແດດເຜົາ ຕອນກາງຄືນກໍໜາວສັ່ນຈົນນອນບໍ່ຫຼັບ.+ 41 ລູກເຮັດວຽກໃຫ້ພໍ່ມາ 20 ປີແລ້ວ. ລູກຕ້ອງເຮັດວຽກ 14 ປີ ເພື່ອຊິໄດ້ລູກສາວ 2 ຄົນຂອງພໍ່ ແລະເຮັດວຽກອີກ 6 ປີເພື່ອຊິໄດ້ຝູງສັດ. ແຕ່ພໍ່ກໍປ່ຽນຄ່າຈ້າງຂອງລູກໄປເລື້ອຍໆຕັ້ງວ່າ 10 ເທື່ອ.+ 42 ພະເຈົ້າຂອງປູ່ຍ່າຕານາຍຂອງລູກ+ ພະເຈົ້າຂອງອັບຣາຮາມ ແລະພະເຈົ້າທີ່ອີຊາກນະມັດສະການ+ໄດ້ອວຍພອນລູກ. ຖ້າເພິ່ນບໍ່ໄດ້ຢູ່ກັບລູກ ລູກຄືຊິບໍ່ໄດ້ຫຍັງອອກມານຳເລີຍ. ແຕ່ພະເຈົ້າເຫັນວ່າລູກຕ້ອງເຮັດວຽກໜັກແລະທົນທຸກ ເພິ່ນຈຶ່ງມາເຕືອນພໍ່ມື້ຄືນນີ້.”+
43 ລາບານຕອບຢາໂຄບວ່າ: “ພວກລູກສາວນັ້ນເປັນລູກສາວພໍ່ເອງ ລູກຂອງເຂົາເຈົ້າກໍເປັນຫຼານຂອງພໍ່ ແລະພວກຝູງສັດກໍເປັນຂອງພໍ່ຄືກັນ. ທຸກສິ່ງທີ່ລູກເຫັນເປັນຂອງພໍ່ແລະເປັນຂອງລູກສາວຂອງພໍ່ທັງໝົດ. ໃນມື້ນີ້ພໍ່ຈະເຮັດແນວບໍ່ດີໃຫ້ລູກໃຫ້ຫຼານຂອງພໍ່ໄດ້ຈັ່ງໃດ? 44 ຄັນຊັ້ນ ໃຫ້ພວກເຮົາມາເຮັດສັນຍານຳກັນ ແລະສ້າງສິ່ງໜຶ່ງຂຶ້ນມາເພື່ອໃຫ້ພວກເຮົາຈື່ສັນຍານີ້.” 45 ຢາໂຄບເອົາຫີນໃຫຍ່ກ້ອນໜຶ່ງຕັ້ງຂຶ້ນເປັນຫຼັກເສົາ.+ 46 ແລ້ວຢາໂຄບກໍບອກພວກຜູ້ຊາຍວ່າ: “ເອົາກ້ອນຫີນມາ!” ເຂົາເຈົ້າກໍເອົາຫີນມາກອງລວມກັນເຮັດເປັນບ່ອນກິນເຂົ້າ ແລ້ວທຸກຄົນກໍກິນເຂົ້ານຳກັນ. 47 ລາບານຈຶ່ງເອີ້ນບ່ອນນັ້ນວ່າເຢກາຊາຮາດູທາ* ແຕ່ຢາໂຄບເອີ້ນວ່າກາລາເອັດ.*
48 ລາບານເວົ້າວ່າ: “ມື້ນີ້ຂໍໃຫ້ກອງຫີນນີ້ເປັນພະຍານລະຫວ່າງພວກເຮົາສອງຄົນ.” ບ່ອນນັ້ນຈຶ່ງຖືກເອີ້ນວ່າກາລາເອັດ+ 49 ແລະຫໍສັງເກດການ* ຍ້ອນລາບານບອກວ່າ: “ເຖິງວ່າພວກເຮົາຊິບໍ່ໄດ້ຢູ່ນຳກັນກໍຂໍໃຫ້ພະເຢໂຫວາເຝົ້າເບິ່ງພວກເຮົາຕະຫຼອດ. 50 ຖ້າລູກເຮັດບໍ່ດີຕໍ່ລູກສາວຂອງພໍ່ ແລະຖ້າລູກໄປເອົາເມຍໃໝ່ຕື່ມອີກ ເຖິງວ່າຄົນອື່ນຊິບໍ່ເຫັນ ແຕ່ຢ່າລືມວ່າພະເຈົ້າທີ່ເປັນພະຍານລະຫວ່າງພວກເຮົາສອງຄົນເຝົ້າເບິ່ງຢູ່.” 51 ລາບານເວົ້າກັບຢາໂຄບຕື່ມອີກວ່າ: “ເບິ່ງຫີນທີ່ພວກເຮົາກອງໄວ້ແລະເສົານີ້ທີ່ພວກເຮົາຕັ້ງຂຶ້ນເພື່ອເຮັດສັນຍານຳກັນ. 52 ກອງຫີນນີ້ຈະເປັນພະຍານ ແລະເສົາຫີນນີ້ກໍຈະເປັນພະຍານຄືກັນ+ວ່າ ພໍ່ຈະບໍ່ຂ້າມກອງຫີນນີ້ເພື່ອໄປທຳຮ້າຍລູກ ລູກເອງກໍຈະບໍ່ຂ້າມກອງຫີນແລະເສົາຫີນນີ້ມາທຳຮ້າຍພໍ່ຄືກັນ. 53 ຂໍໃຫ້ພະເຈົ້າຂອງອັບຣາຮາມ+ ພະເຈົ້າຂອງນາໂຮ ແລະພະເຈົ້າຂອງປູ່ຍ່າຕານາຍເປັນຜູ້ຕັດສິນພວກເຮົາສອງຄົນ.” ແລ້ວຢາໂຄບກໍສາບານຕໍ່ໜ້າພະເຈົ້າທີ່ອີຊາກພໍ່ຂອງລາວນະມັດສະການ.+
54 ຫຼັງຈາກນັ້ນ ຢາໂຄບໄດ້ເອົາເຄື່ອງບູຊາໃຫ້ພະເຈົ້າຢູ່ເທິງພູ ແລ້ວເຊີນພີ່ນ້ອງໃຫ້ມາກິນເຂົ້ານຳກັນ. ເຂົາເຈົ້າກໍກິນແລະນອນຄ້າງຄືນຢູ່ເທິງພູນັ້ນ. 55 ລາບານຕື່ນແຕ່ເຊົ້າ ຈູບລາລູກສາວກັບພວກຫຼານ+ແລະອວຍພອນເຂົາເຈົ້າ.+ ຈາກນັ້ນ ລາວກໍກັບເມືອເຮືອນ.+