ເອຊາຢາ
58 “ເພິ່ນເວົ້າຕໍ່ອີກວ່າ ໃຫ້ຮ້ອງຈົນສຸດສຽງ.
ໃຫ້ຮ້ອງດັງໆຄືກັບສຽງແກເຂົາສັດ.
ປະກາດໃຫ້ປະຊາຊົນຂອງເຮົາຮູ້ວ່າເຂົາເຈົ້າກະບົດ+
ແລະໃຫ້ລູກຫຼານຂອງຢາໂຄບຮູ້ວ່າເຂົາເຈົ້າເຮັດຜິດ.
2 ເຂົາເຈົ້າເຮັດທຳທ່າວ່າຊອກຫາການຊີ້ນຳຈາກເຮົາທຸກໆມື້
ເຮັດທຳທ່າວ່າດີໃຈທີ່ໄດ້ຮູ້ຈັກແນວທາງຂອງເຮົາ
ເຮັດທຳທ່າວ່າເຂົາເຈົ້າເປັນຊາດທີ່ເຮັດສິ່ງທີ່ຖືກຕ້ອງ
ແລະບໍ່ເຄີຍປະຖິ້ມຄຳສັ່ງຂອງພະເຈົ້າ+
ເຮັດທຳທ່າຂໍໃຫ້ເຮົາຕັດສິນເລື່ອງຕ່າງໆໃຫ້ແບບຍຸຕິທຳ
ແລະເຮັດທຳທ່າວ່າດີໃຈທີ່ໄດ້ໃກ້ຊິດກັບພະເຈົ້າ.+
3 ເຂົາເຈົ້າຖາມວ່າ ‘ຕອນທີ່ພວກເຮົາອົດເຂົ້າ ເປັນຫຍັງພະອົງບໍ່ເຫັນ?+
ຕອນທີ່ພວກເຮົາສະແດງຄວາມເສຍໃຈຍ້ອນວ່າເຮັດຜິດ ເປັນຫຍັງພະອົງບໍ່ສັງເກດເບິ່ງ?’+
ເຮົາຕອບວ່າ ‘ກໍຍ້ອນວ່າໃນມື້ທີ່ພວກເຈົ້າອົດເຂົ້າ ພວກເຈົ້າຍັງຄິດເຖິງຜົນປະໂຫຍດຂອງໂຕເອງ
ແລະກົດຂີ່ຄົນທີ່ເຮັດວຽກໃຫ້ພວກເຈົ້າ.+
4 ເມື່ອພວກເຈົ້າອົດເຂົ້າແລ້ວໆ ພວກເຈົ້າກໍຜິດຖຽງກັນ ຕີກັນ
ແລະຊົກກັນຢ່າງຮຸນແຮງ.
ພວກເຈົ້າອົດເຂົ້າແບບນີ້ແລະຄິດວ່າເຮົາຈະຟັງຄຳອະທິດຖານຂອງພວກເຈົ້າບໍ?
5 ການອົດເຂົ້າທີ່ເຮົາບອກໃຫ້ພວກເຈົ້າເຮັດເປັນແນວນັ້ນບໍ?
ມັນເປັນແຕ່ມື້ທີ່ພວກເຈົ້າຢາກສະແດງຄວາມເສຍໃຈຍ້ອນວ່າເຮັດຜິດ
ກົ້ມຫົວລົງຄືກັບຕົ້ນຫຍ້າທີ່ສູງໆກົ່ງລົງ
ແລະນອນຢູ່ເທິງຜ້າເນື້ອຫຍາບກັບຂີ້ເທົ່າຊື່ໆບໍ?
ພວກເຈົ້າຄິດວ່າພວກເຈົ້າອົດເຂົ້າແບບນີ້ຈະເຮັດໃຫ້ພະເຢໂຫວາພໍໃຈບໍ?
6 ເຮົາບໍ່ພໍໃຈດອກ. ການອົດເຂົ້າທີ່ເຮົາພໍໃຈຕ້ອງເປັນແບບນີ້.
ພວກເຈົ້າຕ້ອງແກ້ໂສ້ຂອງຄວາມບໍ່ຍຸຕິທຳອອກ
ແກ້ເຊືອກທີ່ມັດແອກອອກ+
ປ່ອຍຄົນທີ່ຖືກກົດຂີ່ຂົ່ມເຫງໃຫ້ເປັນອິດສະຫຼະ+
ຫັກແອກທັງໝົດຖິ້ມ
7 ແບ່ງຂອງກິນໃຫ້ຄົນທີ່ຫິວ+
ໃຫ້ຄົນທຸກກັບຄົນທີ່ບໍ່ມີເຮືອນຢູ່ມາຢູ່ນຳພວກເຈົ້າ
ເອົາເຄື່ອງນຸ່ງໃຫ້ຄົນທີ່ບໍ່ມີເຄື່ອງນຸ່ງ+
ແລະສົນໃຈຍາດຕິພີ່ນ້ອງ.
8 ແລ້ວຄວາມສະຫວ່າງຂອງພວກເຈົ້າຈະສ່ອງອອກໄປຄືກັບແສງແດດໃນຕອນເຊົ້າ.+
ພວກເຈົ້າຈະໄດ້ຮັບການປິ່ນປົວໃຫ້ເຊົາໄວໆ.
ຄວາມຖືກຕ້ອງຈະນຳໜ້າພວກເຈົ້າ
ແລະແສງລັດສະໝີຂອງພະເຢໂຫວາຈະປົກປ້ອງພວກເຈົ້າຢູ່ທາງຫຼັງ.+
9 ເມື່ອພວກເຈົ້າເອີ້ນ ພະເຢໂຫວາຈະຕອບ.
ເມື່ອພວກເຈົ້າຮ້ອງຂໍໃຫ້ຊ່ວຍ ເພິ່ນຈະເວົ້າວ່າ “ເຮົາຈະຊ່ວຍພວກເຈົ້າ.”
ຖ້າພວກເຈົ້າຍົກແອກທີ່ໜັກໆອອກຈາກຄົນອື່ນ
ເຊົາຊີ້ໜ້າຄົນອື່ນ ເຊົາໃສ່ຮ້າຍຄົນອື່ນ+
10 ຖ້າພວກເຈົ້າເອົາສິ່ງທີ່ມັກກິນໃຫ້ຄົນທີ່ຫິວ+
ແລະຊ່ວຍຄົນທີ່ທຸກຍາກລຳບາກໃຫ້ມີສິ່ງຈຳເປັນທຸກຢ່າງ
ເຖິງວ່າຢູ່ໃນຄວາມມືດ ພວກເຈົ້າກໍຈະສ່ອງແສງອອກມາ
ແລະມັນຈະເປັນຄືກັບກາງເວັນ.+
11 ພະເຢໂຫວາຈະນຳໜ້າພວກເຈົ້າສະເໝີ
ແລະເຖິງວ່າພວກເຈົ້າຢູ່ໃນແຜ່ນດິນທີ່ແຫ້ງແລ້ງ ພວກເຈົ້າຈະມີສິ່ງຈຳເປັນທຸກຢ່າງ.+
ເພິ່ນຈະເຮັດໃຫ້ພວກເຈົ້າມີແຮງຂຶ້ນ.*
ພວກເຈົ້າຈະເປັນຄືກັບສວນທີ່ຖືກຫົດນ້ຳຈົນປຽກ+
ແລະເປັນຄືກັບນ້ຳອອກບໍ່ທີ່ມີນ້ຳໄຫຼອອກຕະຫຼອດ.
12 ພວກເຈົ້າຈະເຮັດໃຫ້ຄົນທີ່ກັບມານັ້ນສ້າງເມືອງທີ່ເປັນຊາກຫັກພັງເກົ່າແກ່ຄືນໃໝ່+
ແລະພວກເຈົ້າຈະແປງຮາກຖານທີ່ຖືກປະຖິ້ມມາດົນແລ້ວ.+
ພວກເຈົ້າຈະຖືກເອີ້ນວ່າເປັນຜູ້ແປງກຳແພງທີ່ເພມາດົນແລ້ວ+
ແລະເປັນຜູ້ແປງທາງເພື່ອໃຫ້ຄົນມາອາໄສຢູ່ຕາມແຄມທາງນັ້ນ.
13 ຖ້າພວກເຈົ້າຖືວັນຊະບາໂຕ ເຊົາຊອກຫາຜົນປະໂຫຍດໃຫ້ໂຕເອງໃນມື້ບໍລິສຸດຂອງເຮົາ+
ແລະເອີ້ນວັນຊະບາໂຕວ່າເປັນມື້ທີ່ມີຄວາມຍິນດີ ເປັນມື້ທີ່ບໍລິສຸດຂອງພະເຢໂຫວາ ເປັນມື້ທີ່ສຳຄັນ+
ແລະໃຫ້ຄວາມສຳຄັນກັບມື້ນັ້ນແທນທີ່ຈະຊອກຫາຜົນປະໂຫຍດໃຫ້ໂຕເອງແລະເວົ້າເລື່ອງທີ່ບໍ່ເປັນປະໂຫຍດ
14 ເຮົາເຢໂຫວາຈະໃຫ້ພວກເຈົ້າມີຄວາມສຸກຫຼາຍ
ແລະຈະໃຫ້ພວກເຈົ້າໄດ້ປົກຄອງພູຕ່າງໆ.+
ເຮົາຈະໃຫ້ພວກເຈົ້າໄດ້ກິນຜົນລະປູກທີ່ເປັນມໍລະດົກຂອງຢາໂຄບປູ່ຍ່າຕານາຍຂອງພວກເຈົ້າ.+
ພະເຢໂຫວາໄດ້ບອກແບບນີ້.’”