ຊາມູເອນສະບັບທີໜຶ່ງ
9 ມີຜູ້ຊາຍຄົນໜຶ່ງໃນຕະກູນເບັນຢາມິນຊື່ກີເຊ.+ ລາວເປັນລູກຫຼານຂອງອາບີເອນ ອາບີເອນເປັນລູກຊາຍຂອງເຊໂຣ ເຊໂຣເປັນລູກຊາຍຂອງເບໂກຣາດ ເບໂກຣາດເປັນລູກຫຼານຂອງອາຟີຢາ. ກີເຊເປັນຄົນໃນຕະກູນເບັນຢາມິນ+ທີ່ຮັ່ງຫຼາຍ. 2 ກີເຊມີລູກຊາຍຜູ້ໜຶ່ງຊື່ຊາອູນ.+ ລາວເປັນຄົນຫຼໍ່. ໃນອິດສະຣາເອນບໍ່ມີໃຜຫຼໍ່ສ່ຳລາວແລະບໍ່ມີໃຜສູງກາຍບ່າລາວ.
3 ຕອນທີ່ລາ*ຂອງກີເຊເສຍ ລາວບອກຊາອູນວ່າ: “ໃຫ້ລູກພາຄົນຮັບໃຊ້ໄປນຳຜູ້ໜຶ່ງເພື່ອໄປຊອກຫາຝູງລາ.” 4 ເຂົາເຈົ້າເດີນທາງຜ່ານເຂດພູເອຟຣາຢິມແລະຜ່ານເຂດຊາລິຊາ ແຕ່ເຂົາເຈົ້າກໍບໍ່ເຫັນຝູງລາ. ເຂົາເຈົ້າເດີນທາງຜ່ານເຂດຊາອາລີມ ແຕ່ກໍບໍ່ເຫັນຝູງລາຢູ່ຫັ້ນ. ເຂົາເຈົ້າພະຍາຍາມຊອກຫາໃນເຂດຂອງຕະກູນເບັນຢາມິນ ແຕ່ກໍບໍ່ເຫັນ.
5 ເມື່ອເຂົາເຈົ້າເຂົ້າໄປຮອດເຂດຂອງເມືອງຊູບ ຊາອູນຈຶ່ງເວົ້າກັບຄົນຮັບໃຊ້ວ່າ: “ໄປ໋ເມືອ ຢ້ານພໍ່ຊິເປັນຫ່ວງພວກເຮົາຫຼາຍກວ່າເປັນຫ່ວງຝູງລາ.”+ 6 ແຕ່ຄົນຮັບໃຊ້ເວົ້າວ່າ: “ໃນເມືອງນີ້ມີຄົນຂອງພະເຈົ້າແລະທຸກຄົນນັບຖືລາວ. ທຸກສິ່ງທີ່ລາວເວົ້າເກີດຂຶ້ນແທ້.+ ໄປຫາລາວຕອນນີ້ເລີຍເບາະ ລາວອາດບອກພວກເຮົາໄດ້ວ່າຄວນໄປທາງໃດ.” 7 ຊາອູນເວົ້າກັບຄົນຮັບໃຊ້ວ່າ: “ຖ້າເຮົາໄປ ເຮົາຈະເອົາຫຍັງໄປໃຫ້ລາວ? ເຮົາບໍ່ມີເຂົ້າຈີ່ແລ້ວ ແລະເຮົາກໍບໍ່ມີຫຍັງທີ່ຈະເອົາໄປເປັນຂອງຂວັນໃຫ້ຄົນຂອງພະເຈົ້າທ່ຽງແທ້. ເຮົາຈະເຮັດແນວໃດ?” 8 ຄົນຮັບໃຊ້ຈຶ່ງຕອບຊາອູນວ່າ: “ຂ້ອຍມີເງິນ 1 ສ່ວນ 4 ເຊເກນ.* ຂ້ອຍຈະເອົາເງິນນີ້ໃຫ້ຄົນຂອງພະເຈົ້າ ແລ້ວລາວຈະບອກພວກເຮົາວ່າຄວນໄປທາງໃດ.” 9 (ໃນອິດສະຣາເອນສະໄໝແຕ່ກີ້ ເມື່ອມີຄົນຢາກໃຫ້ພະເຈົ້າຊ່ວຍ ລາວຈະເວົ້າວ່າ: “ໄປ໋ ໄປຫາຜູ້ເຫັນນິມິດ.”+ ໃນທຸກມື້ນີ້ເອີ້ນວ່າຜູ້ພະຍາກອນ ແຕ່ໃນຕອນນັ້ນເອີ້ນວ່າຜູ້ເຫັນນິມິດ.) 10 ຊາອູນເວົ້າກັບຄົນຮັບໃຊ້ວ່າ: “ດີໆ ໄປ໋.” ເຂົາເຈົ້າຈຶ່ງໄປເມືອງທີ່ຄົນຂອງພະເຈົ້າຢູ່.
11 ຕອນທີ່ຍ່າງຂຶ້ນໄປເມືອງນັ້ນ ເຂົາເຈົ້າເຫັນພວກຜູ້ສາວອອກມາຕັກນ້ຳ ເຂົາເຈົ້າຈຶ່ງຖາມວ່າ: “ຜູ້ເຫັນນິມິດ+ຢູ່ນີ້ບໍ່?” 12 ພວກຜູ້ສາວຕອບວ່າ: “ແມ່ນແລ້ວ. ລາວຢູ່ຫັ້ນເດ້. ໃຫ້ຟ້າວໄປຫາລາວ. ມື້ນີ້ລາວເຂົ້າມາໃນເມືອງ ເພາະປະຊາຊົນເອົາເຄື່ອງບູຊາມາເຜົາ+ໃຫ້ພະເຈົ້າຢູ່ບ່ອນນະມັດສະການ.+ 13 ເມື່ອເຂົ້າໄປໃນເມືອງ ພວກເຈົ້າຈະເຈິລາວກ່ອນທີ່ລາວຈະຂຶ້ນໄປບ່ອນນະມັດສະການ. ຄົນທີ່ຢູ່ຫັ້ນຈະບໍ່ກິນເຄື່ອງບູຊາຈົນກວ່າລາວໄປຮອດ ເພາະລາວເປັນຜູ້ທີ່ຈະອະທິດຖານກ່ອນກິນເຄື່ອງບູຊາ. ເມື່ອອະທິດຖານແລ້ວ ຄົນທີ່ຖືກເຊີນຈຶ່ງຈະກິນໄດ້. ໃຫ້ຟ້າວຂຶ້ນໄປດຽວນີ້ ແລ້ວພວກເຈົ້າຈະເຈິລາວ.” 14 ເຂົາເຈົ້າກໍຟ້າວຂຶ້ນໄປເມືອງນັ້ນ. ເມື່ອເຂົ້າໄປໃນເມືອງ ຊາມູເອນໄດ້ອອກມາຫາເຂົາເຈົ້າເພື່ອຈະພາຂຶ້ນໄປບ່ອນນະມັດສະການ.
15 ມື້ໜຶ່ງກ່ອນຊາອູນຈະມາຮອດ ພະເຢໂຫວາໄດ້ບອກຊາມູເອນວ່າ: 16 “ມື້ອື່ນປະມານໂມງນີ້ ເຮົາຈະສົ່ງຜູ້ຊາຍຄົນໜຶ່ງໃນຕະກູນເບັນຢາມິນ+ມາຫາເຈົ້າ. ເຈົ້າຕ້ອງແຕ່ງຕັ້ງລາວໃຫ້ເປັນຜູ້ປົກຄອງພວກອິດສະຣາເອນປະຊາຊົນຂອງເຮົາ+ ແລະລາວຈະຊ່ວຍປະຊາຊົນຂອງເຮົາຈາກພວກຟີລິດສະຕີນ. ຍ້ອນເຮົາໄດ້ເຫັນຄວາມທຸກຂອງປະຊາຊົນຂອງເຮົາ ແລະເຮົາໄດ້ຍິນສຽງຮ້ອງທຸກຂອງເຂົາເຈົ້າ.”+ 17 ເມື່ອຊາມູເອນເຫັນຊາອູນ ພະເຢໂຫວາບອກລາວວ່າ: “ແມ່ນຜູ້ນີ້ແຫຼະທີ່ເຮົາບອກເຈົ້າ. ລາວຈະປົກຄອງປະຊາຊົນຂອງເຮົາ.”+
18 ແລ້ວຊາອູນກໍຍ່າງໄປຫາຊາມູເອນຢູ່ປະຕູເມືອງແລະຖາມວ່າ: “ຂໍຖາມແດ່ ເຮືອນຂອງຜູ້ເຫັນນິມິດຢູ່ໃສ?” 19 ຊາມູເອນຕອບຊາອູນວ່າ: “ຂ້ອຍນີ້ແຫຼະແມ່ນຜູ້ເຫັນນິມິດ. ໃຫ້ເຈົ້າຍ່າງນຳໜ້າຂ້ອຍຂຶ້ນໄປບ່ອນນະມັດສະການ. ມື້ນີ້ໃຫ້ເຈົ້າກິນເຂົ້ານຳຂ້ອຍ+ແລະມື້ອື່ນເຊົ້າຈຶ່ງເມືອ. ແລ້ວຂ້ອຍຈະບອກທຸກຢ່າງທີ່ເຈົ້າຢາກຮູ້. 20 ຝູງລາທີ່ເສຍ 3 ມື້ກ່ອນ+ ບໍ່ຕ້ອງເປັນຫ່ວງພວກມັນ ເພາະມີຄົນເຫັນແລ້ວ. ທີ່ຈິງ ສິ່ງທີ່ມີຄ່າທັງໝົດຂອງອິດສະຣາເອນຈະຕົກເປັນຂອງເຈົ້າແລະຂອງຄອບຄົວພໍ່ເຈົ້າ.”+ 21 ຊາອູນເວົ້າວ່າ: “ຂ້ອຍເປັນຄົນເບັນຢາມິນ ເຊິ່ງເປັນຕະກູນທີ່ນ້ອຍທີ່ສຸດຂອງອິດສະຣາເອນ+ ແລະໃນຕະກູນເບັນຢາມິນຄອບຄົວຂອງຂ້ອຍກໍບໍ່ໄດ້ມີຄວາມສຳຄັນເລີຍ. ເຈົ້າໝາຍຄວາມວ່າແນວໃດ?”
22 ຈາກນັ້ນ ຊາມູເອນກໍພາຊາອູນແລະຄົນຮັບໃຊ້ຂອງລາວໄປຫ້ອງກິນເຂົ້າ ແລະໃຫ້ເຂົາເຈົ້ານັ່ງຢູ່ບ່ອນທີ່ເດັ່ນກວ່າທຸກຄົນທີ່ຖືກເຊີນ ເຊິ່ງມີປະມານ 30 ຄົນ. 23 ຊາມູເອນບອກຄົນທີ່ແຕ່ງກິນວ່າ: “ເອົາຊີ້ນທີ່ຂ້ອຍບອກໃຫ້ເຈົ້າແບ່ງໄວ້ຕ່າງຫາກອອກມາ.” 24 ຄົນແຕ່ງກິນຈຶ່ງເອົາຊີ້ນສ່ວນຂາອອກມາ ແລະວາງໄວ້ຕໍ່ໜ້າຊາອູນ. ແລ້ວຊາມູເອນໄດ້ເວົ້າວ່າ: “ຊີ້ນນີ້ແມ່ນສ່ວນທີ່ແບ່ງໄວ້ໃຫ້ເຈົ້າ. ກິນແມ້ ເຂົາເຈົ້າແບ່ງໄວ້ໃຫ້ເຈົ້າສຳລັບໂອກາດນີ້ ຍ້ອນຂ້ອຍບອກເຂົາເຈົ້າວ່າ ‘ຂ້ອຍເຊີນແຂກມາ.’” ມື້ນັ້ນ ຊາອູນໄດ້ກິນເຂົ້າກັບຊາມູເອນ. 25 ຈາກນັ້ນ ເຂົາເຈົ້າກໍລົງມາຈາກບ່ອນນະມັດສະການ+ແລະກັບເຂົ້າໄປໃນເມືອງ. ຊາມູເອນຍັງລົມກັບຊາອູນຕໍ່ຢູ່ເທິງດາດຟ້າເຮືອນຂອງລາວ. 26 ເຂົາເຈົ້າຕື່ນແຕ່ເຊົ້າໆ. ຊາມູເອນຮ້ອງຊາອູນທີ່ນອນຢູ່ເທິງດາດຟ້າແລະບອກວ່າ: “ກຽມໂຕໃຫ້ພ້ອມເດີ້ ຂ້ອຍຈະສົ່ງເຈົ້າເມືອເຮືອນ.” ຊາອູນກໍກຽມໂຕ ແລ້ວທັງສອງກໍອອກໄປນຳກັນ. 27 ຕອນທີ່ຍ່າງລົງມາຈາກເມືອງ ຊາມູເອນບອກຊາອູນວ່າ: “ບອກຄົນຮັບໃຊ້+ຂອງເຈົ້າໃຫ້ຍ່າງໄປກ່ອນພວກເຮົາ ແຕ່ໃຫ້ເຈົ້າຢູ່ນີ້ນຳຂ້ອຍ ເພາະຂ້ອຍມີຂ່າວຈາກພະເຈົ້າຈະບອກໃຫ້ເຈົ້າຮູ້.” ແລ້ວຄົນຮັບໃຊ້ກໍຍ່າງໄປກ່ອນ.