ຈົດໝາຍເຖິງຄລິດສະຕຽນຄົນເຮັບເຣີ
6 ດັ່ງນັ້ນ ໃຫ້ພວກເຮົາພະຍາຍາມກ້າວໜ້າເພື່ອຈະໄດ້ເປັນຜູ້ໃຫຍ່+ ຍ້ອນພວກເຮົາຜ່ານຫຼັກຄຳສອນເບື້ອງຕົ້ນ+ກ່ຽວກັບພະຄລິດມາແລ້ວ. ຢ່າໃຫ້ຕ້ອງສອນຊ້ຳອີກເລື່ອງການກັບໃຈຈາກການກະທຳທີ່ບໍ່ມີປະໂຫຍດແລະຄວາມເຊື່ອເລື່ອງພະເຈົ້າ 2 ຫຼືເລື່ອງການຮັບບັບເຕມາ ການວາງມື+ ການຄືນມາຈາກຕາຍ+ ແລະການຕັດສິນລົງໂທດຕະຫຼອດໄປ. 3 ຖ້າພະເຈົ້າຊ່ວຍ ພວກເຮົາກໍຈະກ້າວໜ້າເພື່ອເປັນຜູ້ໃຫຍ່ໄດ້.
4 ບາງຄົນເຄີຍໄດ້ຮັບຄວາມສະຫວ່າງ+ ໄດ້ຮັບຂອງຂວັນຈາກພະເຈົ້າ ໄດ້ຮັບພະລັງບໍລິສຸດຂອງເພິ່ນ 5 ໄດ້ຮັບຄຳສອນທີ່ດີເລີດຂອງພະເຈົ້າ ແລະໄດ້ເຫັນສິ່ງທີ່ດີຕ່າງໆທີ່ຈະເກີດຂຶ້ນໃນອະນາຄົດ* 6 ແຕ່ເຂົາເຈົ້າພັດປະຕິເສດຄຳສອນທີ່ເປັນຄວາມຈິງ.+ ບໍ່ມີທາງເລີຍທີ່ຈະຊ່ວຍຄົນເຫຼົ່ານັ້ນໃຫ້ກັບໃຈໄດ້ອີກ ຍ້ອນເຂົາເຈົ້າຄຶງລູກຂອງພະເຈົ້າອີກເທື່ອໜຶ່ງແລະເຮັດໃຫ້ເພິ່ນຕ້ອງອັບອາຍຕໍ່ໜ້າຄົນອື່ນ.+ 7 ຖ້າດິນດູດນ້ຳຝົນທີ່ຕົກລົງມາເລື້ອຍໆ ແລ້ວເກີດພືດຜັກແລະຜົນລະປູກໃຫ້ຄົນປູກໄດ້ກິນ ມັນກໍຈະໄດ້ຮັບພອນຈາກພະເຈົ້າ. 8 ແຕ່ຖ້າດິນນັ້ນເຮັດໃຫ້ເກີດຕົ້ນໜາມແລະຫຍ້າ ຄົນປູກກໍຈະປະດິນຕອນນັ້ນໄວ້. ອີກບໍ່ດົນລາວກໍຈະສາບແຊ່ງມັນ ແລ້ວໃນທີ່ສຸດມັນກໍຈະຖືກຈູດຖິ້ມ.
9 ພີ່ນ້ອງທີ່ຮັກ ເຖິງວ່າພວກເຮົາຈະເວົ້າແບບນີ້ ແຕ່ພວກເຮົາໝັ້ນໃຈວ່າພວກເຈົ້າຢູ່ໃນຖານະທີ່ດີກວ່າເຂົາເຈົ້າ ແລະພວກເຈົ້າກຳລັງເຮັດສິ່ງທີ່ພາໄປສູ່ຄວາມລອດ. 10 ພວກເຈົ້າຮັບໃຊ້ພີ່ນ້ອງຮ່ວມຄວາມເຊື່ອ*ຈົນຮອດທຸກມື້ນີ້. ສິ່ງທີ່ພວກເຈົ້າເຮັດສະແດງວ່າພວກເຈົ້າຮັກຊື່ຂອງພະເຈົ້າ.+ ພະເຈົ້າຍຸຕິທຳ ເພິ່ນຈະບໍ່ລືມວຽກທີ່ພວກເຈົ້າເຮັດແລະຄວາມຮັກທີ່ພວກເຈົ້າມີຕໍ່ຊື່ຂອງເພິ່ນ. 11 ພວກເຮົາຢາກໃຫ້ພວກເຈົ້າແຕ່ລະຄົນດຸໝັ່ນຫ້າວຫັນຕໍ່ໆໄປເພື່ອຈະແນ່ໃຈວ່າຄວາມຫວັງ+ຂອງພວກເຈົ້າຈະເປັນຈິງໃນທີ່ສຸດ.+ 12 ພວກເຮົາບໍ່ຢາກໃຫ້ພວກເຈົ້າເປັນຄົນຂີ້ຄ້ານ+ ແຕ່ຢາກໃຫ້ພວກເຈົ້າຮຽນແບບຄົນທີ່ໄດ້ຮັບສິ່ງທີ່ພະເຈົ້າສັນຍາເປັນລາງວັນ*ຍ້ອນເຂົາເຈົ້າມີຄວາມເຊື່ອແລະຄວາມອົດທົນ.
13 ຕອນທີ່ພະເຈົ້າສັນຍາກັບອັບຣາຮາມ ເພິ່ນສາບານໂດຍອ້າງໂຕເພິ່ນເອງ+ ຍ້ອນບໍ່ມີຜູ້ໃດຍິ່ງໃຫຍ່ກວ່າເພິ່ນທີ່ຈະໃຫ້ເພິ່ນອ້າງເຖິງໄດ້ໃນຄຳສາບານ. 14 ເພິ່ນສາບານວ່າ: “ເຮົາຈະອວຍພອນໃຫ້ເຈົ້າແນ່ນອນ. ເຮົາຈະເຮັດໃຫ້ເຈົ້າມີລູກມີຫຼານຫຼາຍ.”+ 15 ຫຼັງຈາກທີ່ອັບຣາຮາມລໍຖ້າດ້ວຍຄວາມອົດທົນ ລາວກໍໄດ້ຮັບສິ່ງທີ່ພະເຈົ້າສັນຍາໄວ້. 16 ເມື່ອມະນຸດສາບານ ລາວມັກອ້າງເຖິງຜູ້ທີ່ຍິ່ງໃຫຍ່ກວ່າ. ນີ້ເປັນວິທີທີ່ເຮັດໃຫ້ການຜິດຖຽງກັນທຸກຢ່າງຈົບລົງ ຍ້ອນການສາບານເປັນການຮັບປະກັນຕາມກົດໝາຍ.+ 17 ຄ້າຍຄືກັນ ເມື່ອພະເຈົ້າຕັ້ງໃຈຈະເຮັດໃຫ້ຄົນທີ່ໄດ້ຮັບຄຳສັນຍານັ້ນ+ໝັ້ນໃຈຫຼາຍຂຶ້ນວ່າຄວາມຕ້ອງການຂອງເພິ່ນຈະບໍ່ມີວັນປ່ຽນແປງ ເພິ່ນຈຶ່ງຮັບປະກັນຄຳສັນຍານັ້ນດ້ວຍຄຳສາບານ. 18 ສອງສິ່ງນີ້ທີ່ພະເຈົ້າໄດ້ເຮັດບໍ່ມີວັນປ່ຽນແປງ ແລະພະເຈົ້າບໍ່ມີທາງເວົ້າຕົວະ.+ ພວກເຮົາທີ່ໄດ້ໜີເຂົ້າມາຢູ່ໃນບ່ອນລີ້ໄພຂອງເພິ່ນຈຶ່ງມີກຳລັງໃຈແທ້ໆທີ່ຈະຍຶດໝັ້ນກັບຄວາມຫວັງທີ່ຢູ່ຕໍ່ໜ້າພວກເຮົາ. 19 ຄວາມຫວັງນີ້+ເປັນຄືກັບສະໝໍເຮືອຂອງຊີວິດທີ່ໝັ້ນຄົງແນ່ນອນແລະພາພວກເຮົາຜ່ານເຂົ້າໄປທາງຫຼັງຜ້າກັ້ງ.+ 20 ພະເຢຊູເຂົ້າໄປບ່ອນນັ້ນແລ້ວເພື່ອປະໂຫຍດຂອງພວກເຮົາ.+ ເພິ່ນເປັນປະໂລຫິດໃຫຍ່ຕະຫຼອດໄປຕາມແບບຂອງເມັນຄີເຊເດັກ.+