ພະນິມິດທີ່ເປີດເຜີຍໃຫ້ໂຢຮັນ
7 ຫຼັງຈາກນັ້ນ ຂ້ອຍເຫັນທູດສະຫວັນ 4 ອົງຢືນຢູ່ 4 ແຈຂອງໂລກແລະກຳລັງຫ້າມລົມຈາກ 4 ທິດບໍ່ໃຫ້ພັດໃສ່ໂລກ ຫຼືທະເລ ຫຼືຕົ້ນໄມ້ຕົ້ນໃດເລີຍ. 2 ແລ້ວຂ້ອຍກໍເຫັນທູດສະຫວັນອີກອົງໜຶ່ງຂຶ້ນມາຈາກທິດຕາເວັນອອກ. ລາວຖືກາຈ້ຳທີ່ໄດ້ຮັບຈາກພະເຈົ້າຜູ້ມີຊີວິດຢູ່. ທູດສະຫວັນອົງນີ້ຮ້ອງສຽງດັງບອກທູດສະຫວັນທັງສີ່ເຊິ່ງໄດ້ຮັບອຳນາດໃຫ້ສ້າງຄວາມເສຍຫາຍຕໍ່ໂລກແລະຕໍ່ທະເລວ່າ: 3 “ຢ່າຟ້າວສ້າງຄວາມເສຍຫາຍຕໍ່ໂລກ ຫຼືທະເລ ຫຼືຕົ້ນໄມ້ ຈົນກວ່າພວກເຮົາຈະຈ້ຳກາ+ໃສ່ໜ້າຜາກພວກທາດຂອງພະເຈົ້າຂອງພວກເຮົາກ່ອນ.”+
4 ຂ້ອຍໄດ້ຍິນວ່າຄົນທີ່ຖືກຈ້ຳກາມີ 144.000 ຄົນ.+ ເຂົາເຈົ້າມາຈາກທຸກຕະກູນຂອງຄົນອິດສະຣາເອນ ຄື:+
5 ຈາກຕະກູນຢູດາມີ 12.000 ຄົນທີ່ຖືກຈ້ຳກາ
ຈາກຕະກູນຣູເບັນມີ 12.000 ຄົນ
ຈາກຕະກູນຄາດມີ 12.000 ຄົນ
6 ຈາກຕະກູນອາເຊມີ 12.000 ຄົນ
ຈາກຕະກູນນັບທາລີມີ 12.000 ຄົນ
ຈາກຕະກູນມານາເຊ+ມີ 12.000 ຄົນ
7 ຈາກຕະກູນຊີເມໂອນມີ 12.000 ຄົນ
ຈາກຕະກູນເລວີມີ 12.000 ຄົນ
ຈາກຕະກູນອິດຊາຄາມີ 12.000 ຄົນ
8 ຈາກຕະກູນເຊບູລູນມີ 12.000 ຄົນ
ຈາກຕະກູນໂຢເຊັບມີ 12.000 ຄົນ
ແລະຈາກຕະກູນເບັນຢາມິນມີ 12.000 ຄົນທີ່ຖືກຈ້ຳກາ.
9 ຫຼັງຈາກນັ້ນ ຂ້ອຍກໍເຫັນຄົນກຸ່ມໃຫຍ່ທີ່ບໍ່ມີຜູ້ໃດນັບຈຳນວນໄດ້ຈາກທຸກປະເທດ ທຸກຕະກູນ ທຸກຊົນຊາດ ແລະທຸກພາສາ+ຢືນຢູ່ຕໍ່ໜ້າບັນລັງແລະຕໍ່ໜ້າແກະນ້ອຍຂອງພະເຈົ້າ. ເຂົາເຈົ້າໃສ່ເສື້ອຄຸມສີຂາວ+ແລະຖືໃບປາມ.+ 10 ເຂົາເຈົ້າຮ້ອງສຽງດັງບໍ່ຢຸດບໍ່ເຊົາວ່າ: “ຄວາມລອດມາຈາກພະເຈົ້າຂອງພວກເຮົາຜູ້ທີ່ນັ່ງຢູ່ເທິງບັນລັງ+ແລະມາຈາກແກະນ້ອຍຂອງເພິ່ນ.”+
11 ທູດສະຫວັນທຸກອົງຢືນອ້ອມບັນລັງແລະຢືນອ້ອມພວກຜູ້ປົກຄອງ+ກັບສິ່ງທີ່ມີຊີວິດທັງສີ່ ແລະທູດສະຫວັນເຫຼົ່ານັ້ນກໍໝູບລົງນະມັດສະການພະເຈົ້າຕໍ່ໜ້າບັນລັງນັ້ນ 12 ແລະເວົ້າວ່າ: “ອາແມນ!* ຂໍໃຫ້ພະເຈົ້າຂອງພວກເຮົາໄດ້ຮັບຄຳສັນລະເສີນ ສະຫງ່າລາສີ ສະຕິປັນຍາ ການຂອບໃຈ ຄວາມນັບຖື ອຳນາດ ແລະກຳລັງຕະຫຼອດໄປ.+ ອາແມນ.”
13 ຜູ້ປົກຄອງຄົນໜຶ່ງໄດ້ຖາມຂ້ອຍວ່າ: “ຄົນເຫຼົ່ານັ້ນທີ່ໃສ່ເສື້ອຄຸມສີຂາວ+ແມ່ນໃຜແລະມາຈາກໃສ?” 14 ຂ້ອຍຕອບທັນທີວ່າ: “ທ່ານເອີ້ຍ ທ່ານກໍຮູ້ແລ້ວ.” ເພິ່ນຈຶ່ງບອກຂ້ອຍວ່າ: “ເຂົາເຈົ້າເປັນຄົນທີ່ຜ່ານຄວາມທຸກລຳບາກຄັ້ງໃຫຍ່+ ແລະໄດ້ຊັກເສື້ອຄຸມຂອງໂຕເອງແລະເຮັດໃຫ້ຂາວດ້ວຍເລືອດຂອງແກະນ້ອຍຂອງພະເຈົ້າ.+ 15 ຍ້ອນແນວນີ້ ເຂົາເຈົ້າຈຶ່ງໄດ້ມາຢູ່ຕໍ່ໜ້າບັນລັງຂອງພະເຈົ້າແລະເຮັດວຽກຮັບໃຊ້ທີ່ສັກສິດໃຫ້ເພິ່ນທັງເວັນທັງຄືນໃນວິຫານຂອງເພິ່ນ ແລະຜູ້ທີ່ນັ່ງຢູ່ເທິງບັນລັງນັ້ນ+ຈະກາງເຕັ້ນຂອງເພິ່ນປົກປ້ອງເຂົາເຈົ້າ.+ 16 ເຂົາເຈົ້າຈະບໍ່ຫິວເຂົ້າຫິວນ້ຳອີກຕໍ່ໄປ. ຄວາມຮ້ອນແລະແສງແດດຈະບໍ່ໄໝ້ເຂົາເຈົ້າ+ 17 ຍ້ອນແກະນ້ອຍຂອງພະເຈົ້າ+ທີ່ຢູ່ທາງກາງບ່ອນທີ່ບັນລັງນັ້ນຕັ້ງຢູ່ຈະລ້ຽງເຂົາເຈົ້າ+ແລະຈະພາເຂົາເຈົ້າໄປບ່ອນທີ່ມີນ້ຳພຸຕ່າງໆເຊິ່ງມີນ້ຳທີ່ໃຫ້ຊີວິດ+ ແລະພະເຈົ້າຈະເຊັດນ້ຳຕາທຸກຢົດຈາກຕາຂອງເຂົາເຈົ້າ.”+