ພະບັນຍັດ
28 “ຖ້າພວກເຈົ້າຕັ້ງໃຈຟັງພະເຢໂຫວາພະເຈົ້າຂອງພວກເຈົ້າ ໂດຍເຮັດຕາມຄຳສັ່ງທີ່ຂ້ອຍບອກພວກເຈົ້າໃນມື້ນີ້ຢ່າງເຄັ່ງຄັດ ພະເຢໂຫວາພະເຈົ້າຂອງພວກເຈົ້າກໍຈະຍົກພວກເຈົ້າໃຫ້ສູງກວ່າຊາດອື່ນໆໃນໂລກນີ້.+ 2 ຖ້າພວກເຈົ້າຟັງພະເຢໂຫວາພະເຈົ້າຂອງພວກເຈົ້າສະເໝີ ພວກເຈົ້າຈະໄດ້ຮັບພອນຕ່າງໆ+ດັ່ງຕໍ່ໄປນີ້:
3 ເຈົ້າຈະໄດ້ຮັບພອນຢູ່ໃນເມືອງ ແລະຈະໄດ້ຮັບພອນຢູ່ທົ່ງນາ.+
4 ເຈົ້າຈະໄດ້ຮັບພອນໃຫ້ມີລູກມີຫຼານຫຼາຍໆ+ ແລະຜົນລະປູກຂອງເຈົ້າຈະອຸດົມສົມບູນ. ງົວ ແກະ ແລະແບ້ຂອງເຈົ້າກໍຈະອອກແມ່ແພ່ລູກຫຼາຍ.+
5 ເຈົ້າຈະໄດ້ຮັບພອນທີ່ເຮັດໃຫ້ກະຕ່າ+ແລະຊາມນວດແປ້ງ+ຂອງເຈົ້າເຕັມຢູ່ສະເໝີ.
6 ເຈົ້າຈະໄດ້ຮັບພອນບໍ່ວ່າເຈົ້າຈະໄປໃສຫຼືເຮັດຫຍັງກໍຕາມ.
7 ພະເຢໂຫວາຈະເຮັດໃຫ້ສັດຕູທີ່ມາຕໍ່ສູ້ເຈົ້າບໍ່ຊະນະເຈົ້າ.+ ພວກເຂົາຈະມາໂຈມຕີເຈົ້າທາງໜຶ່ງ ແຕ່ຈະແຕກໜີໄປ 7 ທາງ.+ 8 ພະເຢໂຫວາຈະອວຍພອນສາງມ້ຽນອາຫານຂອງເຈົ້າ+ແລະທຸກສິ່ງທີ່ເຈົ້າເຮັດ. ພະເຢໂຫວາພະເຈົ້າຂອງເຈົ້າຈະອວຍພອນເຈົ້າໃນແຜ່ນດິນທີ່ເພິ່ນຈະເອົາໃຫ້ເຈົ້າ. 9 ພະເຢໂຫວາຈະເຮັດໃຫ້ເຈົ້າເປັນຊາດບໍລິສຸດຂອງເພິ່ນ+ຕາມທີ່ເພິ່ນໄດ້ສັນຍາກັບເຈົ້າ+ ຍ້ອນເຈົ້າເຮັດຕາມກົດໝາຍຂອງພະເຢໂຫວາພະເຈົ້າຂອງເຈົ້າ ແລະໃຊ້ຊີວິດຕາມແນວທາງຂອງເພິ່ນສະເໝີ. 10 ຄົນໃນທົ່ວໂລກຈະຮູ້ວ່າເຈົ້າເປັນຄົນທີ່ຖືກເອີ້ນຕາມຊື່ຂອງພະເຢໂຫວາ+ ແລະພວກເຂົາກໍຈະຢ້ານເຈົ້າ.+
11 ພະເຢໂຫວາຈະເຮັດໃຫ້ພວກເຈົ້າມີລູກມີຫຼານຫຼາຍໆ ເຮັດໃຫ້ສັດລ້ຽງຂອງພວກເຈົ້າອອກແມ່ແພ່ລູກ ແລະເຮັດໃຫ້ຜົນລະປູກຂອງພວກເຈົ້າອຸດົມສົມບູນ+ໃນແຜ່ນດິນທີ່ພະເຢໂຫວາໄດ້ສັນຍາກັບປູ່ຍ່າຕານາຍຂອງພວກເຈົ້າວ່າຈະເອົາໃຫ້ພວກເຈົ້າ.+ 12 ພະເຢໂຫວາຈະເປີດທ້ອງຟ້າອອກຄືກັບເປີດສາງທີ່ອຸດົມສົມບູນຂອງເພິ່ນ ແລະໃຫ້ມີຝົນຕົກຕາມລະດູການ.+ ເພິ່ນຈະອວຍພອນທຸກຢ່າງທີ່ພວກເຈົ້າເຮັດ. ຊາດຕ່າງໆຈະມາຢືມນຳພວກເຈົ້າ ແຕ່ພວກເຈົ້າຈະບໍ່ຕ້ອງຢືມພວກເຂົາ.+ 13 ຖ້າພວກເຈົ້າເຊື່ອຟັງແລະເຮັດຕາມຄຳສັ່ງຂອງພະເຢໂຫວາພະເຈົ້າຂອງພວກເຈົ້າທີ່ຂ້ອຍບອກພວກເຈົ້າໃນມື້ນີ້ ພະເຢໂຫວາຈະເຮັດໃຫ້ພວກເຈົ້ານຳໜ້າຊາດອື່ນໆ+ ບໍ່ແມ່ນນຳຫຼັງພວກເຂົາ. ພວກເຈົ້າຈະມີອຳນາດເໜືອພວກເຂົາ ບໍ່ແມ່ນຢູ່ໃຕ້ບັງຄັບຂອງພວກເຂົາ. 14 ພວກເຈົ້າຕ້ອງເຮັດຕາມຄຳສັ່ງທຸກຢ່າງທີ່ຂ້ອຍບອກພວກເຈົ້າໃນມື້ນີ້ຢ່າງເຄັ່ງຄັດໂດຍບໍ່ເຈີດຊ້າຍເຈີດຂວາ.+ ຫ້າມໄປນະມັດສະການພະເຈົ້າອື່ນ.+
15 ແຕ່ຖ້າພວກເຈົ້າບໍ່ເຊື່ອຟັງແລະບໍ່ເຮັດຕາມຂໍ້ກຳນົດກົດໝາຍທັງໝົດຂອງພະເຢໂຫວາພະເຈົ້າຂອງພວກເຈົ້າທີ່ຂ້ອຍບອກພວກເຈົ້າໃນມື້ນີ້ ພວກເຈົ້າຈະຖືກສາບແຊ່ງແນວນີ້.+
16 ເຈົ້າຈະຖືກສາບແຊ່ງຢູ່ໃນເມືອງແລະຈະຖືກສາບແຊ່ງຢູ່ທົ່ງນາ.+
17 ເຈົ້າຈະຖືກສາບແຊ່ງໃຫ້ກະຕ່າ+ແລະຊາມນວດແປ້ງ+ຂອງເຈົ້າບໍ່ມີຫຍັງ.
18 ເຈົ້າຈະຖືກສາບແຊ່ງໃຫ້ມີລູກມີຫຼານບໍ່ຫຼາຍ+ແລະຜົນລະປູກຂອງເຈົ້າຈະບໍ່ອຸດົມສົມບູນ. ງົວ ແກະ ແລະແບ້ຂອງເຈົ້າກໍຈະບໍ່ອອກແມ່ແພ່ລູກຫຼາຍ.+
19 ເຈົ້າຈະຖືກສາບແຊ່ງບໍ່ວ່າເຈົ້າຈະໄປໃສຫຼືເຮັດຫຍັງກໍຕາມ.
20 ພະເຢໂຫວາຈະສາບແຊ່ງພວກເຈົ້າບໍ່ວ່າພວກເຈົ້າຈະເຮັດຫຍັງ. ເພິ່ນຈະເຮັດໃຫ້ພວກເຈົ້າສັບສົນ ແລະຈະລົງໂທດພວກເຈົ້າຈົນກວ່າພວກເຈົ້າຈະຕາຍໄປໄວໆຈົນໝົດ ຍ້ອນພວກເຈົ້າເຮັດສິ່ງທີ່ຊົ່ວແລະປະຖິ້ມເພິ່ນໄປ.+ 21 ພະເຢໂຫວາຈະເຮັດໃຫ້ພວກເຈົ້າເຈິໂລກລະບາດ ຈົນກວ່າພວກເຈົ້າຈະຖືກທຳລາຍໃຫ້ໝົດໄປຈາກແຜ່ນດິນທີ່ພວກເຈົ້າຈະເຂົ້າໄປຢູ່.+ 22 ພະເຢໂຫວາຈະເຮັດໃຫ້ພວກເຈົ້າເຈິກັບວັນນະໂລກ ອາການໄຂ້ສູງ+ ອາການອັກເສບ ອາການຄີງຮ້ອນຍ້ອນເປັນໄຂ້ ການໂຈມຕີຈາກສັດຕູ+ ລົມຮ້ອນແລະພະຍາດທີ່ຈະທຳລາຍຜົນລະປູກຂອງພວກເຈົ້າ.+ ສິ່ງເຫຼົ່ານີ້ຈະເກີດຂຶ້ນກັບພວກເຈົ້າຈົນກວ່າພວກເຈົ້າຈະຕາຍຈົນໝົດ. 23 ເພິ່ນຈະປິດທ້ອງຟ້າບໍ່ໃຫ້ຝົນຕົກ*ແລະເຮັດໃຫ້ດິນບໍ່ເກີດຜົນລະປູກ.*+ 24 ພະເຢໂຫວາຈະເຮັດໃຫ້ມີຝຸ່ນນ້ອຍໆຕົກແທນຝົນຈົນກວ່າພວກເຈົ້າຈະຖືກທຳລາຍຈົນໝົດ. 25 ພະເຢໂຫວາຈະເຮັດໃຫ້ພວກເຈົ້າບໍ່ຊະນະສັດຕູ.+ ພວກເຈົ້າຈະໂຈມຕີສັດຕູທາງໜຶ່ງ ແຕ່ພວກເຈົ້າຈະແຕກໜີໄປ 7 ທາງ. ຊາດຕ່າງໆທົ່ວໂລກຈະຕົກໃຈເມື່ອເຫັນພວກເຈົ້າຖືກທຳລາຍ.+ 26 ນົກກັບສັດຕ່າງໆຈະມາກິນຊາກສົບຂອງພວກເຈົ້າ ແລະຈະບໍ່ມີຜູ້ໃດໄລ່ພວກມັນໜີ.+
27 ພະເຢໂຫວາຈະລົງໂທດເຈົ້າໃຫ້ເປັນຝີຄືກັບທີ່ເພິ່ນເຮັດກັບພວກເອຢິບ ເປັນລິດສີດວງ ໂລກຜິວໜັງ ແລະຜື່ນຄັນ ເຊິ່ງບໍ່ມີທາງປິ່ນປົວໄດ້. 28 ພະເຢໂຫວາຈະເຮັດໃຫ້ເຈົ້າເປັນບ້າເປັນປ່ວງ ຕາບອດ+ ແລະຈິດໃຈສັບສົນ. 29 ເຈົ້າຈະງົມຈະທາວຫາທາງໃນຕອນກາງເວັນ ຄືກັບຄົນຕາບອດງົມໆທາວໆຫາທາງໃນຄວາມມືດ.+ ເຈົ້າເຮັດຫຍັງກໍຈະບໍ່ປະສົບຜົນສຳເລັດ. ເຈົ້າຈະຖືກໂກງຖືກປຸ້ນຢູ່ເລື້ອຍໆ ແຕ່ຈະບໍ່ມີຜູ້ໃດມາຊ່ວຍເຈົ້າ.+ 30 ເຈົ້າຈະໝັ້ນກັບຜູ້ຍິງຄົນໜຶ່ງ ແຕ່ຄົນອື່ນຈະຂົ່ມຂືນລາວ. ເຈົ້າຈະປຸກເຮືອນ ແຕ່ຈະບໍ່ໄດ້ຢູ່.+ ເຈົ້າຈະເຮັດສວນໝາກລະແຊັງ ແຕ່ຈະບໍ່ໄດ້ກິນໝາກຂອງມັນ.+ 31 ງົວຂອງເຈົ້າຈະຖືກຂ້າຕໍ່ໜ້າຕໍ່ຕາເຈົ້າ ແຕ່ເຈົ້າຈະບໍ່ໄດ້ກິນຊີ້ນມັນ. ລາຂອງເຈົ້າຈະຖືກລັກໄປຕໍ່ໜ້າຕໍ່ຕາເຈົ້າ ແຕ່ເຈົ້າກໍຈະບໍ່ໄດ້ມັນຄືນມາ. ສັດຕູຈະມາລັກເອົາແກະຂອງເຈົ້າໄປ ແຕ່ຈະບໍ່ມີໃຜຊ່ວຍເຈົ້າໄດ້. 32 ຄົນອື່ນ+ຈະມາເອົາລູກຊາຍລູກສາວຂອງເຈົ້າໄປຕໍ່ໜ້າຕໍ່ຕາເຈົ້າ. ເຈົ້າຈະຄິດຮອດເຂົາເຈົ້າຕະຫຼອດ ແຕ່ກໍເຮັດຫຍັງບໍ່ໄດ້. 33 ຜົນລະປູກທີ່ເຈົ້າປູກຢູ່ໄຮ່ຢູ່ນາຂອງເຈົ້າກໍຈະມີຄົນທີ່ເຈົ້າບໍ່ຮູ້ຈັກມາກິນ.+ ເຈົ້າຈະຖືກໂກງແລະຖືກກົດຂີ່ເລື້ອຍໆ. 34 ເຈົ້າຈະເປັນບ້າຍ້ອນສິ່ງທີ່ເຈົ້າເຫັນ.
35 ພະເຢໂຫວາຈະເຮັດໃຫ້ພວກເຈົ້າເປັນຝີທີ່ເຈັບປວດແລະປິ່ນປົວບໍ່ໄດ້ຢູ່ຫົວເຂົ່າກັບຂາ ແລະມັນຈະລາມຕັ້ງແຕ່ຕີນໄປຈົນຮອດຫົວ. 36 ພະເຢໂຫວາຈະຂັບໄລ່ພວກເຈົ້າກັບກະສັດທີ່ພວກເຈົ້າແຕ່ງຕັ້ງໃຫ້ໄປຢູ່ປະເທດທີ່ພວກເຈົ້າກັບປູ່ຍ່າຕານາຍຂອງພວກເຈົ້າບໍ່ເຄີຍຮູ້ຈັກ+ ແລະຢູ່ບ່ອນນັ້ນພວກເຈົ້າຈະນະມັດສະການພະເຈົ້າອື່ນທີ່ເປັນໄມ້ເປັນຫີນ.+ 37 ເມື່ອພວກເຈົ້າໄປຮອດບ່ອນທີ່ພະເຢໂຫວາໄລ່ພວກເຈົ້າໄປນັ້ນ+ ຄົນທີ່ໄດ້ຍິນເລື່ອງຂອງພວກເຈົ້າກໍຈະຕົກສະເງີ້. ພວກເຂົາຈະຫົວຂວັນແລະເຍາະເຍີ້ຍພວກເຈົ້າ.
38 ເຈົ້າຈະຫວ່ານແນວປູກຫຼາຍໆຢູ່ໄຮ່ຢູ່ສວນ ແຕ່ເຈົ້າຈະເກັບກ່ຽວໄດ້ແຕ່ໜ້ອຍດຽວ+ ຍ້ອນຕັກກະແຕນຈະກິນໝົດ. 39 ເຈົ້າຈະໃສ່ຝຸ່ນ ພູນດິນ ແລະຫົດນ້ຳສວນໝາກລະແຊັງ ແຕ່ເຈົ້າກໍຈະບໍ່ໄດ້ຫຍັງ+ ຍ້ອນຈະມີໂຕບົ້ງມາກິນມັນ ແລະເຈົ້າຈະບໍ່ມີເຫຼົ້າແວງໄວ້ກິນເລີຍ. 40 ເຈົ້າຈະປູກຕົ້ນໝາກກອກຢູ່ທົ່ວເຂດແດນຂອງເຈົ້າ ແຕ່ເຈົ້າກໍຈະບໍ່ມີນ້ຳມັນໝາກກອກໄວ້ທາໂຕ ເພາະວ່າໜ່ວຍມັນຫຼົ່ນຖິ້ມໝົດ. 41 ເຈົ້າຈະມີລູກຊາຍແລະລູກສາວ ແຕ່ຈະບໍ່ໄດ້ຢູ່ນຳເຂົາເຈົ້າ ເພາະເຂົາເຈົ້າຈະຖືກຈັບໄປເປັນຊະເລີຍ.+ 42 ພວກແມງໄມ້ກໍຈະມາກິນຜົນລະປູກແລະຕົ້ນໄມ້ຂອງເຈົ້າຈົນໝົດ. 43 ຄົນຕ່າງຊາດທີ່ຢູ່ນຳເຈົ້າຈະມີແຕ່ຈະເລີນຮຸ່ງເຮືອງຂຶ້ນ ສ່ວນເຈົ້າກໍຈະຕົກຕ່ຳລົງເລື້ອຍໆ. 44 ພວກເຂົາຈະໃຫ້ເຈົ້າຢືມ ແຕ່ເຈົ້າຈະບໍ່ມີຫຍັງໃຫ້ພວກເຂົາຢືມ.+ ພວກເຂົາຈະນຳໜ້າເຈົ້າ ສ່ວນເຈົ້າຈະນຳຫຼັງພວກເຂົາ.+
45 ຄຳສາບແຊ່ງທັງໝົດນີ້+ຈະເກີດຂຶ້ນກັບພວກເຈົ້າ ແລະຈະຕິດໂຕພວກເຈົ້າໄປຈົນກວ່າພວກເຈົ້າຈະຖືກທຳລາຍຈົນໝົດ+ ຍ້ອນພວກເຈົ້າບໍ່ໄດ້ເຊື່ອຟັງພະເຢໂຫວາພະເຈົ້າຂອງພວກເຈົ້າ ແລະບໍ່ໄດ້ເຮັດຕາມຂໍ້ກຳນົດກົດໝາຍທີ່ເພິ່ນໄດ້ສັ່ງພວກເຈົ້າ.+ 46 ຄຳສາບແຊ່ງເຫຼົ່ານີ້ຈະເກີດຂຶ້ນກັບພວກເຈົ້າແລະລູກຫຼານຂອງພວກເຈົ້າ ເພື່ອເປັນສິ່ງເຕືອນໃຈສຳລັບທຸກຄົນ+ 47 ຍ້ອນຕອນທີ່ພວກເຈົ້າມີທຸກສິ່ງທຸກຢ່າງ+ ພວກເຈົ້າບໍ່ໄດ້ຮັບໃຊ້ພະເຢໂຫວາພະເຈົ້າຂອງພວກເຈົ້າດ້ວຍຄວາມສຸກຄວາມຍິນດີຈາກໃຈ. 48 ພະເຢໂຫວາຈະໃຫ້ສັດຕູມາຕໍ່ສູ້ພວກເຈົ້າ. ພວກເຈົ້າຈະຮັບໃຊ້ພວກເຂົາ+ທັງໆທີ່ພວກເຈົ້າຫິວເຂົ້າ+ຫິວນ້ຳ ບໍ່ມີເຄື່ອງນຸ່ງ ແລະບໍ່ມີຫຍັງ. ເພິ່ນຈະເອົາແອກເຫຼັກມາໃສ່ຄໍເຈົ້າຈົນກວ່າພວກເຈົ້າຈະຖືກທຳລາຍຈົນໝົດ.
49 ພະເຢໂຫວາຈະໃຫ້ຊາດໜຶ່ງທີ່ຢູ່ໄກໆ+ຈາກສຸດຂອບໂລກເບື້ອງນັ້ນມາຕໍ່ສູ້ເຈົ້າ. ຊາດນັ້ນເປັນຊາດທີ່ເຈົ້າບໍ່ເຂົ້າໃຈພາສາຂອງພວກເຂົາ+ ແລະພວກເຂົາຈະຄຸບເຈົ້າຄືກັບນົກອິນຊີຄຸບເຫຍື່ອ.+ 50 ຄົນໃນຊາດນັ້ນໂຫດຫ້ຽມ ບໍ່ນັບຖືຜູ້ເຖົ້າ ແລະບໍ່ອີ່ຕົນເດັກນ້ອຍ.+ 51 ພວກເຂົາຈະກິນລູກສັດຈາກຝູງສັດຂອງເຈົ້າ ແລະຈະກິນຜົນລະປູກຈາກໄຮ່ຈາກສວນຂອງເຈົ້າຈົນກວ່າເຈົ້າຈະຖືກທຳລາຍຈົນໝົດ. ພວກເຂົາຈະກິນເຂົ້າ ເຫຼົ້າແວງໃໝ່ ນ້ຳມັນໝາກກອກ ງົວແລະແກະຂອງເຈົ້າຈົນໝົດ ແລະຈະທຳລາຍເຈົ້າ.+ 52 ພວກສັດຕູຈະລ້ອມເມືອງຂອງເຈົ້າທຸກໆເມືອງ ແລະບໍ່ໃຫ້ຜູ້ໃດອອກມາໄດ້ຈົນກວ່າກຳແພງສູງໆ ແລະປ້ອມທີ່ເຈົ້າໝັ້ນໃຈນັ້ນພັງລົງ. ພວກເຂົາຈະລ້ອມທຸກເມືອງໃນແຜ່ນດິນທີ່ພະເຢໂຫວາພະເຈົ້າຂອງເຈົ້າເອົາໃຫ້ເຈົ້າ.+ 53 ຍ້ອນພວກສັດຕູລ້ອມເມືອງຂອງເຈົ້າຢ່າງແໜ້ນໜາ ແລະເຮັດໃຫ້ເຈົ້າລຳບາກຫຼາຍ ເຈົ້າກໍເລີຍຕ້ອງໄດ້ກິນຊີ້ນລູກຊາຍແລະລູກສາວຂອງໂຕເອງ+ທີ່ພະເຢໂຫວາພະເຈົ້າຂອງເຈົ້າອວຍພອນໃຫ້ເຈົ້າມີ.
54 ແມ່ນແຕ່ຜູ້ຊາຍທີ່ສຳອາງແລະອ່ອນໄຫວທີ່ສຸດໃນພວກເຈົ້າກໍຈະບໍ່ອີ່ຕົນອ້າຍນ້ອງແລະເມຍກັບລູກທີ່ລາວຮັກ. 55 ລາວຈະກິນຊີ້ນລູກຂອງໂຕເອງແລະບໍ່ປັນຜູ້ໃດ ຍ້ອນລາວບໍ່ມີຫຍັງຈະກິນແລ້ວ ເພາະພວກສັດຕູໄດ້ມາລ້ອມເມືອງຂອງພວກເຈົ້າທຸກເມືອງຢ່າງແໜ້ນໜາ ແລະເຮັດໃຫ້ມີຄວາມທຸກລຳບາກຫຼາຍ.+ 56 ແມ່ນແຕ່ຜູ້ຍິງທີ່ສຳອາງແລະອ່ອນໄຫວທີ່ສຸດ+ໃນພວກເຈົ້າ ເຊິ່ງບໍ່ເຄີຍປະຕີນເປົ່າຢຽບດິນເລີຍ ລາວກໍຈະບໍ່ອີ່ຕົນຜົວແລະລູກທີ່ລາວຮັກ. 57 ລາວຈະລັກກິນຊີ້ນລູກຂອງໂຕເອງທີ່ລາວເບັ່ງອອກມາ ລວມທັງສາຍແຮ່ແລະພົກແຮ່ ເພາະພວກສັດຕູໄດ້ມາລ້ອມເມືອງຂອງພວກເຈົ້າທຸກເມືອງຢ່າງແໜ້ນໜາ ແລະເຮັດໃຫ້ມີຄວາມທຸກລຳບາກຫຼາຍ.
58 ຖ້າພວກເຈົ້າບໍ່ເຮັດຕາມກົດໝາຍທັງໝົດທີ່ຂຽນໄວ້ໃນປຶ້ມນີ້ຢ່າງເຄັ່ງຄັດ+ ແລະບໍ່ໄດ້ນັບຖືຊື່ທີ່ມີກຽດແລະຍິ່ງໃຫຍ່+ຂອງພະເຢໂຫວາ+ພະເຈົ້າຂອງພວກເຈົ້າ 59 ພະເຢໂຫວາຈະເຮັດໃຫ້ພວກເຈົ້າກັບລູກຫຼານຂອງພວກເຈົ້າເຈິໄພພິບັດທີ່ຮ້າຍແຮງຫຼາຍ ເປັນໄພພິບັດທີ່ເປັນຕາຢ້ານແລະເກີດຂຶ້ນດົນ.+ ພວກເຈົ້າຈະທໍລະມານຫຼາຍຍ້ອນເຈັບປ່ວຍຊຳເຮື້ອ. 60 ພະຍາດຕ່າງໆທີ່ເຄີຍເກີດຂຶ້ນກັບພວກເອຢິບທີ່ພວກເຈົ້າຢ້ານ ເພິ່ນກໍຈະເຮັດໃຫ້ເກີດຂຶ້ນກັບພວກເຈົ້າ ແລະຢູ່ກັບພວກເຈົ້າໄປຕະຫຼອດ. 61 ບໍ່ໄດ້ມີແຕ່ເທົ່ານັ້ນ ພະເຢໂຫວາຈະໃຫ້ພວກເຈົ້າເຈິຄວາມເຈັບປ່ວຍແລະໄພພິບັດທີ່ບໍ່ໄດ້ຂຽນໄວ້ໃນປຶ້ມກົດໝາຍນີ້ ຈົນກວ່າພວກເຈົ້າຈະຖືກທຳລາຍຈົນໝົດ. 62 ເຖິງວ່າພວກເຈົ້າຈະມີຈຳນວນຫຼາຍຄືກັບດາວຢູ່ເທິງຟ້າ+ ແຕ່ກໍຈະເຫຼືອຄົນແຕ່ໜ້ອຍດຽວ+ ຍ້ອນພວກເຈົ້າບໍ່ໄດ້ເຊື່ອຟັງພະເຢໂຫວາພະເຈົ້າຂອງພວກເຈົ້າ.
63 ຄືກັບທີ່ພະເຢໂຫວາຍິນດີທີ່ໄດ້ເຮັດໃຫ້ພວກເຈົ້າຈະເລີນຮຸ່ງເຮືອງ ແລະເຮັດໃຫ້ພວກເຈົ້າມີຈຳນວນຫຼາຍຂຶ້ນ ພະເຢໂຫວາກໍຈະຍິນດີທີ່ຈະທຳລາຍພວກເຈົ້າໃຫ້ໝົດໄປຈາກໂລກນີ້ ແລະພວກເຈົ້າກໍຈະຖືກຂັບໄລ່ອອກຈາກແຜ່ນດິນທີ່ພວກເຈົ້າເຄີຍຢູ່.
64 ພະເຢໂຫວາຈະເຮັດໃຫ້ພວກເຈົ້າກະຈັດກະຈາຍກັນໄປຢູ່ນຳຊາດຕ່າງໆ ຕັ້ງແຕ່ສຸດຂອບໂລກເບື້ອງນີ້ໄປຈົນຮອດສຸດຂອບໂລກເບື້ອງນັ້ນ.+ ຢູ່ບ່ອນນັ້ນ ພວກເຈົ້າຈະນະມັດສະການພະເຈົ້າອື່ນໆທີ່ເປັນໄມ້ເປັນຫີນ ເຊິ່ງພວກເຈົ້າກັບປູ່ຍ່າຕານາຍຂອງພວກເຈົ້າບໍ່ເຄີຍຮູ້ຈັກ.+ 65 ຕອນທີ່ຢູ່ກັບຊາດເຫຼົ່ານັ້ນ+ ພວກເຈົ້າຈະບໍ່ມີຄວາມສະຫງົບສຸກແລະບໍ່ມີບ່ອນຢູ່. ພະເຢໂຫວາຈະເຮັດໃຫ້ພວກເຈົ້າອຸກໃຈຫຼາຍ+ ຕາຕົກແລະໝົດຫວັງ.+ 66 ຊີວິດຂອງພວກເຈົ້າຈະມີແຕ່ອັນຕະລາຍ. ພວກເຈົ້າຈະຢ້ານໝົດມື້ໝົດຄືນ. ພວກເຈົ້າຈະບໍ່ຮູ້ເລີຍວ່າຊີວິດຂອງພວກເຈົ້າຈະລອດໄປຮອດມື້ໃດ. 67 ເມື່ອຮອດຕອນເຊົ້າ ພວກເຈົ້າຈະເວົ້າວ່າ ‘ປານໃດນໍ້ຊິຄ່ຳ!’ ບາດຮອດຕອນຄ່ຳ ພວກເຈົ້າກໍຈະເວົ້າວ່າ ‘ປານໃດນໍ້ຊິເຊົ້າ!’ ຍ້ອນຄວາມຢ້ານມັນຝັງໃຈພວກເຈົ້າ ແລະສິ່ງທີ່ພວກເຈົ້າເຫັນມັນຕິດຕາພວກເຈົ້າ. 68 ພະເຢໂຫວາຈະພາພວກເຈົ້າກັບໄປເອຢິບທາງເຮືອ ໄປທາງທີ່ເພິ່ນເຄີຍບອກພວກເຈົ້າວ່າ ‘ພວກເຈົ້າຊິບໍ່ໄດ້ເຫັນອີກ.’ ຢູ່ບ່ອນນັ້ນ ພວກເຈົ້າຕ້ອງໄດ້ຂາຍໂຕເອງໃຫ້ເປັນທາດຂອງສັດຕູ ແຕ່ກໍຈະບໍ່ມີຜູ້ໃດຊື້.”