ຈົດໝາຍເຖິງຄລິດສະຕຽນໃນເມືອງຟີລິບປອຍ
4 ພີ່ນ້ອງທີ່ຮັກແລະຄິດເຖິງ ພວກເຈົ້າເປັນຄວາມຍິນດີແລະເປັນຄວາມພູມໃຈ*ຂອງຂ້ອຍ.+ ຂໍໃຫ້ພວກເຈົ້າຮັກສາຄວາມສັດຊື່+ຕໍ່*ຜູ້ເປັນນາຍຂອງພວກເຮົາຄືກັບທີ່ຂ້ອຍໄດ້ເວົ້າໄປແລ້ວ.
2 ຂ້ອຍຂໍໃຫ້ຢູໂອເດຍແລະຊີນຕີເຂແກ້ໄຂເລື່ອງທີ່ເຂົາເຈົ້າຂັດແຍ່ງກັນ*ໃນຖານະລູກສິດຂອງຜູ້ເປັນນາຍ.+ 3 ຂ້ອຍຂໍເຈົ້າທີ່ເປັນໝູ່ທີ່ສັດຊື່ທີ່ເຮັດວຽກນຳຂ້ອຍໃຫ້ຊ່ວຍຜູ້ຍິງ 2 ຄົນນີ້. ເຂົາເຈົ້າກັບເກເມນໂຕແລະຄົນອື່ນໆໄດ້ເຮັດວຽກໜັກນຳກັນກັບຂ້ອຍເພື່ອປະກາດຂ່າວດີ. ເຂົາເຈົ້າມີຊື່ຢູ່ໃນປຶ້ມລາຍຊື່ຄົນທີ່ຈະໄດ້ຊີວິດ.+
4 ຂໍໃຫ້ມີຄວາມສຸກສະເໝີທີ່ໄດ້ຮັບໃຊ້ຜູ້ເປັນນາຍ. ຂ້ອຍຂໍບອກອີກເທື່ອໜຶ່ງວ່າ ຂໍໃຫ້ມີຄວາມສຸກ.+ 5 ໃຫ້ຄົນອື່ນເຫັນວ່າພວກເຈົ້າເປັນຄົນມີເຫດຜົນ.+ ຢ່າລືມວ່າຜູ້ເປັນນາຍຢູ່ໃກ້ໆພວກເຮົາ. 6 ຢ່າອຸກໃຈໃນເລື່ອງໃດເລີຍ+ ແຕ່ໃຫ້ອະທິດຖານເຖິງພະເຈົ້າຕະຫຼອດ. ອ້ອນວອນຂໍໃຫ້ເພິ່ນຊີ້ນຳແລະໃຫ້ຂອບໃຈເພິ່ນພ້ອມ.+ 7 ຖ້າພວກເຈົ້າເຮັດແບບນີ້ ສັນຕິສຸກ+ຂອງພະເຈົ້າທີ່ເກີນຄວາມເຂົ້າໃຈທຸກຢ່າງກໍຈະປົກປ້ອງຫົວໃຈ+ແລະຄວາມຄິດຂອງພວກເຈົ້າໄວ້ ຕອນທີ່ພວກເຈົ້າຕິດຕາມພະຄລິດເຢຊູ.
8 ສຸດທ້າຍນີ້ ພີ່ນ້ອງເອີ້ຍ ສິ່ງໃດທີ່ເປັນຄວາມຈິງ ສິ່ງໃດທີ່ສຳຄັນ ສິ່ງໃດທີ່ຖືກຕ້ອງ ສິ່ງໃດທີ່ບໍລິສຸດ ສິ່ງໃດທີ່ເປັນຕາຮັກ ສິ່ງໃດທີ່ເປັນຕາຊົມເຊີຍ ສິ່ງໃດທີ່ດີ ແລະສິ່ງໃດທີ່ເປັນຕາຍົກຍ້ອງ ໃຫ້ຄິດເຖິງ*ສິ່ງເຫຼົ່ານີ້ສະເໝີ.+ 9 ໃຫ້ເຮັດຕາມສິ່ງທີ່ພວກເຈົ້າໄດ້ຮຽນຮູ້ແລະໄດ້ຮັບຈາກຂ້ອຍ ແລະເຮັດຕາມສິ່ງທີ່ໄດ້ຍິນແລະໄດ້ເຫັນຈາກຂ້ອຍນຳ+ ແລ້ວພະເຈົ້າທີ່ມີສັນຕິສຸກຈະຢູ່ກັບພວກເຈົ້າ.
10 ຂ້ອຍດີໃຈຫຼາຍແລະຂອບໃຈຜູ້ເປັນນາຍທີ່ພວກເຈົ້າຍັງຄິດຮອດຂ້ອຍຢູ່.+ ທີ່ຈິງ ພວກເຈົ້າກໍເປັນຫ່ວງຂ້ອຍຕະຫຼອດ ແຕ່ບໍ່ມີໂອກາດໄດ້ສະແດງອອກ. 11 ຂ້ອຍເວົ້າແບບນີ້ບໍ່ໄດ້ໝາຍຄວາມວ່າຂ້ອຍຂາດເຂີນຫຍັງ. ຂ້ອຍໄດ້ຮຽນຮູ້ທີ່ຈະພໍໃຈໃນສິ່ງທີ່ມີຢູ່*ບໍ່ວ່າຈະຢູ່ໃນສະພາບໃດກໍຕາມ.+ 12 ຂ້ອຍຮູ້ວ່າຈະຢູ່ແນວໃດຕອນທີ່ຂາດເຂີນ+ແລະຕອນທີ່ມີຢ່າງເຫຼືອເຟືອ. ໃນທຸກສະພາບການ ຂ້ອຍໄດ້ຮຽນຮູ້ເຄັດລັບວ່າຈະຢູ່ແນວໃດຕອນທີ່ອີ່ມແລະຕອນທີ່ຫິວ ຕອນທີ່ມີຢ່າງເຫຼືອເຟືອແລະຕອນທີ່ຂາດເຂີນ. 13 ຂ້ອຍມີກຳລັງອົດທົນໄດ້ທຸກສິ່ງຍ້ອນພະເຈົ້າໃຫ້ກຳລັງຂ້ອຍ.+
14 ແຕ່ພວກເຈົ້າໃຈດີຫຼາຍທີ່ຊ່ວຍແບ່ງເບົາຄວາມທຸກລຳບາກຂອງຂ້ອຍ. 15 ທີ່ຈິງ ພວກເຈົ້າທີ່ເປັນຄົນຟີລິບປອຍກໍຮູ້ວ່າ ຫຼັງຈາກທີ່ພວກເຈົ້າໄດ້ຮຽນຮູ້ກ່ຽວກັບຂ່າວດີແລະຂ້ອຍໄດ້ອອກຈາກແຂວງມາເກໂດເນຍແລ້ວ ມີແຕ່ປະຊາຄົມຂອງພວກເຈົ້າທີ່ຊ່ວຍເຫຼືອຂ້ອຍ.+ 16 ຕອນທີ່ຂ້ອຍຢູ່ໃນເມືອງເທຊະໂລນິກ ພວກເຈົ້າກໍສົ່ງສິ່ງຂອງມາຊ່ວຍຂ້ອຍ ບໍ່ແມ່ນແຕ່ເທື່ອດຽວ ແຕ່ຮອດ 2 ເທື່ອ. 17 ບໍ່ແມ່ນວ່າຕອນນີ້ຂ້ອຍຢາກໄດ້ຂອງຂວັນ ແຕ່ຂ້ອຍຢາກໃຫ້ພວກເຈົ້າໄດ້ຮັບລາງວັນ*ທີ່ມາຈາກການໃຫ້. 18 ຂ້ອຍມີທຸກຢ່າງຢູ່ແລ້ວແລະມີຫຼາຍກວ່າທີ່ຈຳເປັນຊ້ຳ. ສິ່ງຂອງທີ່ພວກເຈົ້າຝາກມານຳເອປາໂຟດີໂຕ+ນັ້ນຊ່ວຍຂ້ອຍບໍ່ໃຫ້ຂາດເຂີນຫຍັງເລີຍ. ສິ່ງຂອງເຫຼົ່ານັ້ນເປັນຄືກັບເຄື່ອງບູຊາທີ່ມີກິ່ນຫອມ+ທີ່ເຮັດໃຫ້ພະເຈົ້າພໍໃຈ. 19 ແລ້ວພະເຈົ້າຂອງຂ້ອຍຈະໃຫ້ທຸກສິ່ງທີ່ຈຳເປັນກັບພວກເຈົ້າ+ໂດຍທາງພະຄລິດເຢຊູ ຍ້ອນເພິ່ນມີທຸກສິ່ງຢ່າງເຫຼືອເຟືອ. 20 ຂໍໃຫ້ພະເຈົ້າຜູ້ເປັນພໍ່ຂອງພວກເຮົາໄດ້ຮັບການຍ້ອງຍໍສັນລະເສີນຕະຫຼອດໄປ. ອາແມນ.*
21 ຂ້ອຍຂໍຝາກຄວາມຄິດຮອດໄປຫາຜູ້ບໍລິສຸດທຸກຄົນທີ່ເປັນລູກສິດຂອງພະຄລິດເຢຊູ. ພວກພີ່ນ້ອງທີ່ຢູ່ກັບຂ້ອຍກໍຝາກຄວາມຄິດຮອດໄປຫາຄືກັນ. 22 ຜູ້ບໍລິສຸດທຸກຄົນ ໂດຍສະເພາະຄົນທີ່ຢູ່ວັງຂອງກາຍຊາ*+ກໍຝາກຄວາມຄິດຮອດໄປເຖິງພວກເຈົ້າ.
23 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຢຊູຄລິດຜູ້ເປັນນາຍຂອງພວກເຮົາຍ້ອນພວກເຈົ້າສະແດງນ້ຳໃຈທີ່ດີ.