ເຢເຣມີຢາ
33 ຕອນທີ່ເຢເຣມີຢາຍັງຖືກກັກໂຕຢູ່ເດີ່ນທະຫານປ້ອງກັນໂຕກະສັດ+ ພະເຢໂຫວາກໍມາເວົ້າກັບລາວເປັນເທື່ອທີ 2 ວ່າ: 2 “ພະເຢໂຫວາຜູ້ທີ່ສ້າງໂລກ ພະເຢໂຫວາຜູ້ທີ່ຕັ້ງໂລກໄວ້ຢ່າງໝັ້ນຄົງ ພະເຈົ້າທີ່ຊື່ວ່າເຢໂຫວາເວົ້າວ່າ 3 ‘ໃຫ້ເຈົ້າຮ້ອງຫາເຮົາແລະເຮົາຈະຕອບເຈົ້າ. ເຮົາຈະບອກເຈົ້າດ້ວຍຄວາມເຕັມໃຈກ່ຽວກັບສິ່ງທີ່ຍິ່ງໃຫຍ່ແລະສິ່ງທີ່ເຂົ້າໃຈບໍ່ໄດ້ທີ່ເຈົ້າບໍ່ເຄີຍຮູ້ຈັກມາກ່ອນ.’+
4 ເຮົາເຢໂຫວາພະເຈົ້າຂອງອິດສະຣາເອນເວົ້າກ່ຽວກັບຫີນຂອງເຮືອນຕ່າງໆໃນເມືອງນີ້ແລະຫີນຂອງວັງຕ່າງໆຂອງພວກກະສັດຢູດາທີ່ປະຊາຊົນພາກັນຮື້ລົງມາ ເພື່ອໃຊ້ຮັບມືກັບພວກສັດຕູທີ່ເອົາດິນມາກອງເປັນໂນນຈຸກຳແພງແລະຖືດາບມາໂຈມຕີ.+ 5 ເຮົາຍັງໄດ້ເວົ້າກ່ຽວກັບຄົນທີ່ຈະມາຕໍ່ສູ້ພວກການເດອາ ກ່ຽວກັບບ່ອນຕ່າງໆທີ່ເຕັມແຕ່ຊາກສົບຂອງຄົນທີ່ເຮົາຂ້າຖິ້ມດ້ວຍຄວາມໃຈຮ້າຍແຮງ ແລະກ່ຽວກັບຄົນທີ່ເຮັດຊົ່ວຫຼາຍຈົນເຮັດໃຫ້ເຮົາປະຖິ້ມເມືອງນີ້ໄປ. ເຮົາເວົ້າວ່າ 6 ‘ເຮົາຈະເຮັດໃຫ້ສະພາບຂອງເມືອງນີ້ດີຂຶ້ນ*+ ເຮົາຈະປິ່ນປົວຄົນໃນເມືອງນີ້ແລະຈະໃຫ້ເຂົາເຈົ້າຢູ່ຢ່າງສະຫງົບສຸກແລະປອດໄພ.+ 7 ເຮົາຈະພາພວກຢູດາແລະພວກອິດສະຣາເອນທີ່ຖືກຈັບໄປເປັນຊະເລີຍກັບມາ.+ ເຮົາຈະເຮັດໃຫ້ເຂົາເຈົ້າເປັນຊາດໜຶ່ງຄືກັບທີ່ເຮົາເຄີຍເຮັດໃນຕອນທຳອິດ.+ 8 ເຮົາຈະຍົກໂທດບາບແລະຄວາມຜິດທັງໝົດທີ່ເຂົາເຈົ້າໄດ້ເຮັດຕໍ່ເຮົາເພື່ອທີ່ເຂົາເຈົ້າຈະສະອາດ.+ 9 ເມືອງນີ້ຈະເຮັດໃຫ້ຊາດຕ່າງໆໃນໂລກທີ່ໄດ້ຍິນສິ່ງດີທັງໝົດທີ່ເຮົາເຮັດໃຫ້ປະຊາຊົນຂອງເຮົາ ສັນລະເສີນເຮົາແລະໃຫ້ກຽດເຮົາ.+ ຊາດເຫຼົ່ານັ້ນຈະຢ້ານຈົນໂຕສັ່ນ+ເມື່ອເຂົາເຈົ້າເຫັນສິ່ງດີຕ່າງໆແລະຄວາມສະຫງົບສຸກທີ່ເຮົາເອົາໃຫ້ເມືອງນີ້.’+
10 ພະເຢໂຫວາບອກວ່າ ‘ພວກເຈົ້າຈະເວົ້າວ່າບ່ອນນີ້ເປັນບ່ອນຮ້າງເປົ່າ ບໍ່ມີຄົນແລະສັດອາໄສຢູ່. ເມືອງຕ່າງໆຂອງຢູດາແລະຫົນທາງເມືອງເຢຣູຊາເລັມກໍເປັນບ່ອນຮ້າງເປົ່າ ບໍ່ມີຄົນແລະສັດອາໄສຢູ່ຄືກັນ. 11 ແຕ່ບ່ອນນີ້ຈະກັບມາມີສຽງໂຫ່ຮ້ອງດີໃຈ+ ສຽງຄວາມມ່ວນຊື່ນ ສຽງຂອງເຈົ້າບ່າວເຈົ້າສາວ ແລະສຽງຂອງຄົນທີ່ເວົ້າວ່າ “ໃຫ້ຂອບໃຈພະເຢໂຫວາຜູ້ບັນຊາການກອງທັບ ຍ້ອນພະເຢໂຫວາດີແທ້ໆ+ແລະເພິ່ນມີຄວາມຮັກທີ່ໝັ້ນຄົງຕະຫຼອດໄປ!”’+
ພະເຢໂຫວາບອກວ່າ ‘ເຂົາເຈົ້າຈະເອົາເຄື່ອງບູຊາສະແດງຄວາມຂອບໃຈມາໃຫ້ຢູ່ວິຫານຂອງພະເຢໂຫວາ+ ຍ້ອນເຮົາໄດ້ພາຄົນທີ່ຢູ່ແຜ່ນດິນນີ້ທີ່ຖືກຈັບໄປເປັນຊະເລີຍກັບມາຢູ່ນີ້ຄືເກົ່າ.’
12 ພະເຢໂຫວາຜູ້ບັນຊາການກອງທັບບອກວ່າ ‘ໃນແຜ່ນດິນທີ່ຮ້າງເປົ່າ ໃນເມືອງຕ່າງໆທີ່ບໍ່ມີຄົນແລະສັດອາໄສຢູ່ນີ້ຈະມີທົ່ງຫຍ້າໃຫ້ຄົນລ້ຽງແກະພາຝູງແກະໄປກິນຫຍ້າອີກເທື່ອໜຶ່ງ.’+
13 ພະເຢໂຫວາບອກວ່າ ‘ໃນເມືອງຕ່າງໆທີ່ຢູ່ເຂດພູ ຢູ່ທົ່ງພຽງ ຢູ່ທາງໃຕ້ ຢູ່ເຂດຂອງພວກເບັນຢາມິນ ຢູ່ອ້ອມແອ້ມເມືອງເຢຣູຊາເລັມ+ ແລະຢູ່ເມືອງຕ່າງໆຂອງຢູດາ+ຈະມີພວກຄົນລ້ຽງແກະທີ່ນັບຝູງແກະຂອງເຂົາເຈົ້າອີກເທື່ອໜຶ່ງ.’
14 ພະເຢໂຫວາບອກວ່າ ‘ອີກບໍ່ດົນ ເມື່ອເຮົາເຮັດໃຫ້ຄຳສັນຍາດີໆທີ່ເຮົາເວົ້າໄວ້ກ່ຽວກັບຄົນອິດສະຣາເອນແລະຄົນຢູດາເກີດຂຶ້ນແທ້+ 15 ໃນສະໄໝນັ້ນແລະໃນຕອນນັ້ນ ເຮົາຈະເຮັດໃຫ້ເຊື້ອສາຍທີ່ຍຸຕິທຳມາຈາກດາວິດ.*+ ລາວຈະເຮັດໃຫ້ມີຄວາມຖືກຕ້ອງແລະຍຸຕິທຳໃນແຜ່ນດິນນີ້.+ 16 ໃນຕອນນັ້ນ ຄົນຢູດາຈະໄດ້ຮັບການຊ່ວຍໃຫ້ລອດ+ແລະຄົນໃນເມືອງເຢຣູຊາເລັມຈະປອດໄພ.+ ເມືອງນີ້ຈະຖືກເອີ້ນວ່າຄວາມຖືກຕ້ອງມາຈາກພະເຢໂຫວາ.’+
17 ພະເຢໂຫວາບອກວ່າ ‘ຈະມີແຕ່ລູກຫຼານຂອງດາວິດປົກຄອງອິດສະຣາເອນຕະຫຼອດໄປ+ 18 ແລະຈະມີປະໂລຫິດຕະກູນເລວີຢືນຢູ່ຕໍ່ໜ້າເຮົາຕະຫຼອດໄປເພື່ອເຜົາເຄື່ອງບູຊາເຜົາ ເຄື່ອງບູຊາທີ່ເຮັດຈາກເມັດເຂົ້າ ແລະເຄື່ອງບູຊາອື່ນໆ.’”
19 ພະເຢໂຫວາເວົ້າກັບເຢເຣມີຢາອີກວ່າ: 20 “ພະເຢໂຫວາບອກວ່າ ‘ຄືກັບທີ່ເຈົ້າບໍ່ສາມາດຍົກເລີກສັນຍາທີ່ເຮົາເຮັດໄວ້ກັບກາງເວັນແລະສັນຍາທີ່ເຮົາເຮັດໄວ້ກັບກາງຄືນ ແລະບໍ່ສາມາດຫ້າມບໍ່ໃຫ້ກາງເວັນກັບກາງຄືນມາກົງເວລາຂອງພວກມັນ+ 21 ເຈົ້າກໍບໍ່ສາມາດຍົກເລີກສັນຍາທີ່ເຮົາເຮັດໄວ້ກັບດາວິດຜູ້ຮັບໃຊ້ຂອງເຮົາ+ ບໍ່ສາມາດຫ້າມບໍ່ໃຫ້ມີເຊື້ອສາຍຂອງລາວປົກຄອງເທິງບັນລັງ+ ແລະກໍບໍ່ສາມາດຍົກເລີກສັນຍາທີ່ເຮົາເຮັດໄວ້ກັບພວກປະໂລຫິດຕະກູນເລວີທີ່ເປັນຜູ້ຮັບໃຊ້ຂອງເຮົາຄືກັນ.+ 22 ເຮົາຈະເຮັດໃຫ້ລູກຫຼານຂອງດາວິດຜູ້ຮັບໃຊ້ຂອງເຮົາແລະພວກເລວີທີ່ຮັບໃຊ້ເຮົາມີຈຳນວນຫຼາຍຈົນນັບບໍ່ຫຼ້ອນຄືກັບດາວທີ່ຢູ່ເທິງຟ້າແລະເມັດດິນຊາຍຢູ່ທະເລ.’”
23 ພະເຢໂຫວາເວົ້າກັບເຢເຣມີຢາອີກວ່າ: 24 “ເຈົ້າບໍ່ໄດ້ຍິນຄົນພວກນີ້ເວົ້າບໍທີ່ວ່າ ‘ພະເຢໂຫວາຈະບໍ່ຍອມຮັບ 2 ຕະກູນທີ່ເພິ່ນເລືອກໄວ້’? ເຂົາເຈົ້າບໍ່ນັບຖືປະຊາຊົນຂອງເຮົາເລີຍແລະບໍ່ໄດ້ຖືວ່າເຂົາເຈົ້າເປັນຊາດໜຶ່ງຊ້ຳ.
25 ພະເຢໂຫວາບອກວ່າ ‘ຄືກັບສັນຍາທີ່ເຮົາໄດ້ເຮັດໄວ້ກັບກາງເວັນແລະກາງຄືນ+ ແລະກົດທີ່ເຮົາໄດ້ຕັ້ງໄວ້ສຳລັບຟ້າແລະໂລກທີ່ບໍ່ມີທາງປ່ຽນແປງໄດ້+ 26 ເຮົາກໍຈະບໍ່ມີທາງຜິດສັນຍາ. ເຮົາຈະບໍ່ມີທາງປະຖິ້ມລູກຫຼານຂອງຢາໂຄບແລະລູກຫຼານຂອງດາວິດຜູ້ຮັບໃຊ້ຂອງເຮົາ. ເຮົາຈະໃຫ້ລູກຫຼານຂອງລາວປົກຄອງລູກຫຼານຂອງອັບຣາຮາມ ອີຊາກ ແລະຢາໂຄບ. ເຮົາຈະອີ່ຕົນເຂົາເຈົ້າ+ແລະພາເຂົາເຈົ້າທີ່ຖືກຈັບໄປເປັນຊະເລີຍກັບມາ.’”+