ປະຖົມມະການ
24 ຕອນນີ້ ອັບຣາຮາມເຖົ້າຫຼາຍແລ້ວ ແລະພະເຢໂຫວາອວຍພອນລາວໃນທຸກໆເລື່ອງ.+ 2 ອັບຣາຮາມເວົ້າກັບຄົນຮັບໃຊ້ຜູ້ທີ່ອາຍຸຫຼາຍທີ່ສຸດໃນເຮືອນທີ່ເບິ່ງແຍງທຸກຢ່າງວ່າ:+ “ໃຫ້ເຈົ້າເອົາມືວາງໄວ້ກ້ອງກົກຂາຂ້ອຍ. 3 ຂ້ອຍຈະໃຫ້ເຈົ້າສາບານຕໍ່ພະເຢໂຫວາ ພະເຈົ້າຂອງສະຫວັນແລະໂລກວ່າ ເຈົ້າຈະບໍ່ເອົາລູກສາວຂອງພວກການາອານໃນແຜ່ນດິນທີ່ພວກເຮົາອາໄສຢູ່ນີ້ມາເປັນເມຍຂອງລູກຊາຍຂ້ອຍ.+ 4 ໃຫ້ເຈົ້າກັບໄປແຜ່ນດິນທີ່ຂ້ອຍເຄີຍຢູ່ ໄປຫາພີ່ນ້ອງຂອງຂ້ອຍ+ ເພື່ອຫາເມຍໃຫ້ອີຊາກລູກຊາຍຂອງຂ້ອຍ.”
5 ແຕ່ຄົນຮັບໃຊ້ເວົ້າກັບລາວວ່າ: “ຖ້າຜູ້ຍິງຄົນນັ້ນບໍ່ຢາກມາພີ້ນຳຂ້ອຍເດ້? ຂ້ອຍຕ້ອງກັບມາແລ້ວພາລູກຊາຍຂອງທ່ານໄປພຸ້ນບໍ?”+ 6 ອັບຣາຮາມຕອບວ່າ: “ຢ່າພາລູກຊາຍຂອງຂ້ອຍໄປພຸ້ນເດັດຂາດ.+ 7 ພະເຢໂຫວາພະເຈົ້າຜູ້ຢູ່ໃນສະຫວັນ ຜູ້ທີ່ພາຂ້ອຍອອກຈາກເຮືອນຂອງພໍ່ແລະຈາກແຜ່ນດິນທີ່ຍາດຕິພີ່ນ້ອງຂອງຂ້ອຍຢູ່+ ຜູ້ທີ່ເວົ້າແລະສັນຍາກັບຂ້ອຍວ່າ+ ‘ແຜ່ນດິນທີ່ເຈົ້າຢູ່ນີ້+ ເຮົາຈະເອົາໃຫ້ລູກຫຼານຂອງເຈົ້າ’+ ພະເຈົ້າຜູ້ນີ້ຈະສົ່ງທູດສະຫວັນຂອງເພິ່ນໄປກ່ອນເຈົ້າ+ ແລະເຈົ້າຈະຫາເມຍໃຫ້ລູກຊາຍຂ້ອຍຢູ່ພຸ້ນໄດ້ແທ້ໆ.+ 8 ຖ້າຜູ້ຍິງຄົນນັ້ນບໍ່ຢາກມານຳເຈົ້າ ເຈົ້າກໍບໍ່ຕ້ອງເຮັດຕາມຄຳສາບານນີ້. ແຕ່ຢ່າພາລູກຊາຍຂອງຂ້ອຍໄປພຸ້ນເດັດຂາດ.” 9 ແລ້ວຄົນຮັບໃຊ້ກໍວາງມືໄວ້ກ້ອງກົກຂາຂອງອັບຣາຮາມນາຍຂອງລາວ ແລະສາບານກັບອັບຣາຮາມວ່າຈະເຮັດຕາມນັ້ນ.+
10 ຄົນຮັບໃຊ້ເອົາອູດ 10 ໂຕແລະເອົາຂອງຂວັນຈາກນາຍໄປນຳ. ຈາກນັ້ນ ລາວກໍເດີນທາງໄປເມໂຊໂປຕາເມຍ ໄປເມືອງທີ່ນາໂຮຢູ່. 11 ລາວພາອູດໄປກິນນ້ຳຢູ່ນ້ຳສ້າງນອກເມືອງ. ຕອນນັ້ນກໍແລງແລ້ວ ເປັນເວລາທີ່ພວກຜູ້ຍິງມາຕັກນ້ຳ. 12 ລາວອະທິດຖານວ່າ: “ພະເຢໂຫວາ ພະເຈົ້າຂອງອັບຣາຮາມນາຍຂອງລູກ ຂໍຊ່ວຍລູກໃຫ້ເຮັດວຽກສຳເລັດມື້ນີ້ ແລະຂໍພະອົງສະແດງຄວາມຮັກທີ່ໝັ້ນຄົງຕໍ່ອັບຣາຮາມນາຍຂອງລູກ. 13 ຕອນນີ້ລູກຢືນຢູ່ແຖວນ້ຳສ້າງ ແລະພວກລູກສາວຂອງຄົນໃນເມືອງນີ້ກຳລັງອອກມາຕັກນ້ຳ. 14 ຖ້າລູກເວົ້ານຳຜູ້ຍິງວ່າ ‘ຂໍກິນນ້ຳຢູ່ໄຫຂອງເຈົ້າແດ່’ ແລ້ວລາວຕອບວ່າ ‘ໄດ້ ແລະຂ້ອຍຈະຕັກນ້ຳໃຫ້ອູດຂອງເຈົ້າກິນນຳ’ ຂໍໃຫ້ຄົນນັ້ນເປັນຜູ້ທີ່ພະອົງເລືອກໃຫ້ເປັນເມຍຂອງອີຊາກ. ແລ້ວລູກຈະຮູ້ວ່າພະອົງສະແດງຄວາມຮັກທີ່ໝັ້ນຄົງຕໍ່ນາຍຂອງລູກ.”
15 ລາວເວົ້າຍັງບໍ່ຈົບຊ້ຳ ເຣເບກາກໍແບກໄຫນ້ຳໃສ່ບ່າມາ. ລາວເປັນລູກສາວຂອງເບທູເອນ+ ແລະເບທູເອນເປັນລູກຊາຍຂອງມີລະກາ+ກັບນາໂຮ.+ ນາໂຮເປັນອ້າຍຂອງອັບຣາຮາມ. 16 ເຣເບກາເປັນຄົນງາມຫຼາຍ ແລະບໍ່ເຄີຍນອນນຳຜູ້ຊາຍຄົນໃດ. ລາວມາຕັກນ້ຳຢູ່ນ້ຳສ້າງໃສ່ໄຫແລ້ວກໍກັບໄປ. 17 ຄົນຮັບໃຊ້ຂອງອັບຣາຮາມແລ່ນໄປຫາລາວແລະເວົ້າວ່າ: “ລຸງຂໍກິນນ້ຳຈັກໜ້ອຍແດ່.” 18 ເຣເບກາຕອບວ່າ: “ໂດຍ ລຸງ.” ແລ້ວລາວກໍຟ້າວເອົາໄຫນ້ຳລົງຈາກບ່າແລະເອົາໃຫ້ຜູ້ຊາຍຄົນນັ້ນກິນ. 19 ເມື່ອລາວເອົານ້ຳໃຫ້ກິນແລ້ວ ລາວກໍເວົ້າວ່າ: “ຂ້ອຍຈະຕັກນ້ຳໃຫ້ອູດຂອງລຸງກິນນຳເດີ້.” 20 ເຣເບກາກໍທຽວໄປຕັກນ້ຳຢູ່ນ້ຳສ້າງມາຖອກໃສ່ຮາງໃຫ້ອູດທຸກໂຕກິນຈົນອີ່ມ. 21 ໃນລະຫວ່າງນັ້ນ ຄົນຮັບໃຊ້ຂອງອັບຣາຮາມເບິ່ງເຣເບກາດ້ວຍຄວາມງຶດງໍ້. ລາວຢາກຮູ້ວ່າພະເຢໂຫວາຈະຊ່ວຍລາວໃຫ້ເຮັດວຽກສຳເລັດຫຼືບໍ່.
22 ເມື່ອອູດກິນນ້ຳອີ່ມແລ້ວ ຄົນຮັບໃຊ້ກໍເອົາບ້ວງດັງທີ່ເປັນຄຳ 1 ບ້ວງໜັກເຄິ່ງເຊເກນ* ແລະປະລັກແຂນຄຳ 1 ຄູ່ໜັກ 10 ເຊເກນ*ໃຫ້ເຣເບກາ. 23 ແລ້ວລາວກໍຖາມວ່າ: “ບອກລຸງໄດ້ບໍ ເຈົ້າເປັນລູກໃຜ? ຢູ່ເຮືອນພໍ່ຂອງເຈົ້າມີບ່ອນໃຫ້ພວກເຮົານອນພັກນຳໄດ້ບໍ?” 24 ເຣເບກາຕອບວ່າ: “ຂ້ອຍເປັນລູກສາວຂອງເບທູເອນ.+ ພໍ່ຂອງຂ້ອຍເປັນລູກຂອງມີລະກາກັບນາໂຮ.”+ 25 ລາວຍັງບອກອີກວ່າ: “ເຮົາມີເຟືອງມີຫຍ້າຫຼາຍ ແລະມີບ່ອນໃຫ້ນອນຄ້າງຄືນໄດ້.” 26 ຜູ້ຊາຍຄົນນັ້ນໝູບໜ້າລົງພື້ນຂອບໃຈພະເຢໂຫວາ 27 ແລະເວົ້າວ່າ: “ຂໍສັນລະເສີນພະເຢໂຫວາ ພະເຈົ້າຂອງອັບຣາຮາມນາຍຂອງລູກ ພະອົງສະແດງຄວາມຮັກທີ່ໝັ້ນຄົງ ແລະເຮັດຕາມສັນຍາທີ່ໃຫ້ກັບນາຍຂອງລູກສະເໝີ. ພະເຢໂຫວາພາລູກມາຮອດເຮືອນອ້າຍຂອງນາຍລູກແລ້ວ.”
28 ເຣເບກາແລ່ນໄປບອກແມ່ກັບຄົນໃນເຮືອນໃຫ້ຮູ້ເລື່ອງທີ່ເກີດຂຶ້ນ. 29 ເຣເບກາມີອ້າຍຊື່ລາບານ.+ ລາບານໄດ້ແລ່ນໄປຫາຜູ້ຊາຍຄົນນັ້ນຢູ່ນ້ຳສ້າງ. 30 ຕອນທີ່ລາວເຫັນບ້ວງຄຳຢູ່ດັງແລະປະລັກແຂນຄຳຢູ່ຂໍ້ມືຂອງນ້ອງສາວ ແລະໄດ້ຍິນນ້ອງສາວເວົ້າໃຫ້ຟັງວ່າຜູ້ຊາຍຄົນນັ້ນເວົ້າຫຍັງແດ່ ລາວກໍແລ່ນໄປຫາຜູ້ຊາຍຄົນນັ້ນທີ່ຍັງຢືນຢູ່ນ້ຳສ້າງກັບອູດ. 31 ລາວເວົ້າວ່າ: “ຄົນທີ່ພະເຢໂຫວາອວຍພອນ ເຊີນມາກັບຂ້ອຍ. ບໍ່ຕ້ອງຢືນຢູ່ນີ້. ຂ້ອຍກຽມທຸກຢ່າງໄວ້ໃຫ້ທ່ານກັບອູດແລ້ວ.” 32 ຜູ້ຊາຍຄົນນັ້ນຈຶ່ງເຂົ້າມາໃນເຮືອນ ແລະລາວ*ປົດອານອອກຈາກຫຼັງອູດແລະເອົາເຟືອງກັບຫຍ້າໃຫ້ອູດກິນ ພ້ອມທັງເອົານ້ຳມາລ້າງຕີນໃຫ້ຜູ້ຊາຍຄົນນັ້ນກັບຄົນທີ່ມານຳລາວ. 33 ຫຼັງຈາກຄົນຮັບໃຊ້ຍົກອາຫານອອກມາແລ້ວ ຜູ້ຊາຍຄົນນັ້ນບອກວ່າ: “ຂ້ອຍຊິບໍ່ກິນເທື່ອ ຈົນກວ່າຊິໄດ້ບອກວ່າຂ້ອຍມານີ້ເຮັດຫຍັງ.” ລາບານກໍເລີຍເວົ້າວ່າ: “ເຊີນເວົ້າໂລດ.”
34 ລາວບອກວ່າ: “ຂ້ອຍເປັນຄົນຮັບໃຊ້ຂອງອັບຣາຮາມ.+ 35 ພະເຢໂຫວາອວຍພອນນາຍຂອງຂ້ອຍຫຼາຍອີ່ຫຼີ. ເພິ່ນເຮັດໃຫ້ລາວຮັ່ງຫຼາຍ. ໃຫ້ລາວມີແກະ ມີງົວ ມີອູດ ມີລາ ມີເງິນມີຄຳ ແລະມີຄົນຮັບໃຊ້ທັງຊາຍແລະຍິງ.+ 36 ນອກຈາກນັ້ນ ຊາຣາເມຍຂອງນາຍຂ້ອຍຍັງເກີດລູກຊາຍໃຫ້ນາຍຂ້ອຍຕອນທີ່ລາວເຖົ້າແລ້ວ+ ແລະນາຍຂອງຂ້ອຍຈະເອົາທຸກສິ່ງທຸກຢ່າງໃຫ້ລູກຄົນນີ້.+ 37 ດັ່ງນັ້ນ ນາຍຈຶ່ງໃຫ້ຂ້ອຍສາບານແລະບອກຂ້ອຍວ່າ ‘ເຈົ້າຢ່າເອົາລູກສາວຂອງພວກການາອານໃນແຜ່ນດິນທີ່ຂ້ອຍອາໄສຢູ່ນີ້ ມາເປັນເມຍຂອງລູກຊາຍຂ້ອຍເດັດຂາດ.+ 38 ແຕ່ໃຫ້ເຈົ້າໄປເຮືອນຂອງພໍ່ຂ້ອຍ ໄປຫາຍາດຕິພີ່ນ້ອງຂອງຂ້ອຍ+ ແລະຊອກເມຍໃຫ້ລູກຊາຍຂ້ອຍຢູ່ຫັ້ນ.’+ 39 ແຕ່ຂ້ອຍຖາມນາຍວ່າ ‘ຖ້າຜູ້ຍິງຄົນນັ້ນບໍ່ຢາກມານຳຂ້ອຍເດ້?’+ 40 ນາຍບອກຂ້ອຍວ່າ ‘ພະເຢໂຫວາຜູ້ທີ່ຂ້ອຍຮັບໃຊ້+ຈະສົ່ງທູດສະຫວັນ+ຂອງເພິ່ນໄປກັບເຈົ້າແລະຊ່ວຍເຈົ້າໃຫ້ເຮັດວຽກສຳເລັດ. ເຈົ້າຕ້ອງຫາຜູ້ຍິງທີ່ເປັນຄົນໃນຄອບຄົວຂອງພໍ່ຂ້ອຍແລະເປັນຍາດຕິພີ່ນ້ອງຂອງຂ້ອຍມາໃຫ້ເປັນເມຍຂອງລູກຊາຍຂ້ອຍ.+ 41 ຖ້າເຈົ້າໄປຫາຍາດຕິພີ່ນ້ອງຂອງຂ້ອຍແລະເຂົາເຈົ້າບໍ່ໃຫ້ຜູ້ຍິງຄົນນັ້ນມານຳເຈົ້າ. ເຈົ້າກໍບໍ່ຕ້ອງເຮັດຕາມຄຳສາບານທີ່ໃຫ້ໄວ້ກັບຂ້ອຍ.’+
42 ຕອນທີ່ຂ້ອຍມາຮອດນ້ຳສ້າງມື້ນີ້ ຂ້ອຍໄດ້ອະທິດຖານວ່າ ‘ພະເຢໂຫວາພະເຈົ້າຂອງອັບຣາຮາມນາຍຂອງຂ້ອຍ ຂໍພະອົງຊ່ວຍຂ້ອຍໃຫ້ເຮັດວຽກສຳເລັດ. 43 ຕອນນີ້ຂ້ອຍຢືນຢູ່ແຖວນ້ຳສ້າງ ຖ້າຂ້ອຍເວົ້າກັບຜູ້ຍິງ+ທີ່ມາຕັກນ້ຳວ່າ “ຂໍກິນນ້ຳຈັກໜ້ອຍແດ່” 44 ແລ້ວລາວຕອບຂ້ອຍວ່າ “ໄດ້ ກິນໂລດ ແລ້ວຂ້ອຍຈະຕັກນ້ຳໃຫ້ອູດຂອງເຈົ້າກິນນຳ” ຂໍໃຫ້ຜູ້ຍິງຄົນນັ້ນເປັນຜູ້ທີ່ພະເຢໂຫວາເລືອກໃຫ້ເປັນເມຍລູກຊາຍຂອງນາຍຂ້ອຍ.’+
45 ຕອນທີ່ຂ້ອຍອະທິດຖານໃນໃຈຍັງບໍ່ທັນຈົບ ຂ້ອຍກໍເຫັນເຣເບກາແບກໄຫມາແລະຍ່າງໄປຕັກນ້ຳຢູ່ນ້ຳສ້າງ. ເມື່ອລາວກັບມາ ຂ້ອຍເວົ້າກັບລາວວ່າ ‘ລຸງຂໍກິນນ້ຳແດ່.’+ 46 ລາວກໍຟ້າວເອົາໄຫນ້ຳລົງຈາກບ່າແລະເວົ້າວ່າ ‘ໂດຍ ລຸງກິນໂລດ+ ແລ້ວຂ້ອຍຈະຕັກນ້ຳໃຫ້ອູດຂອງລຸງກິນນຳ.’ ແລ້ວຂ້ອຍກໍກິນນ້ຳແລະເຣເບກາກໍຕັກນ້ຳໃຫ້ອູດກິນ. 47 ຈາກນັ້ນ ຂ້ອຍຖາມລາວວ່າ ‘ເຈົ້າເປັນລູກໃຜ?’ ລາວຕອບວ່າ ‘ຂ້ອຍເປັນລູກຂອງເບທູເອນ. ພໍ່ຂ້ອຍເປັນລູກຂອງນາໂຮກັບມີລະກາ.’ ຂ້ອຍຈຶ່ງເອົາບ້ວງດັງແລະປະລັກແຂນໃສ່ໃຫ້ລາວ.+ 48 ແລ້ວຂ້ອຍກໍໝູບໜ້າລົງພື້ນຂອບໃຈພະເຢໂຫວາແລະສັນລະເສີນພະເຢໂຫວາ ພະເຈົ້າຂອງອັບຣາຮາມນາຍຂ້ອຍ+ ຜູ້ທີ່ພາຂ້ອຍມາຫາລູກສາວຂອງພີ່ນ້ອງຂອງນາຍຂ້ອຍ ເພື່ອໃຫ້ຜູ້ຍິງຄົນນັ້ນເປັນເມຍລູກຊາຍຂອງນາຍຂ້ອຍ. 49 ແລ້ວຕອນນີ້ພວກເຈົ້າຢາກສະແດງຄວາມຮັກທີ່ໝັ້ນຄົງແລະຄວາມຈິງໃຈຕໍ່ນາຍຂອງຂ້ອຍບໍ? ຖ້າບໍ່ ກໍບອກໃຫ້ຂ້ອຍຮູ້ ຂ້ອຍຈະໄດ້ຫາທາງອື່ນ.”+
50 ຈາກນັ້ນ ລາບານແລະເບທູເອນກໍຕອບວ່າ: “ເລື່ອງນີ້ມາຈາກພະເຢໂຫວາ ພວກເຮົາຕອບບໍ່ໄດ້ດອກວ່າໄດ້ຫຼືບໍ່ໄດ້. 51 ເຣເບກາກໍຢູ່ນີ້ ພາລາວໄປໂລດ. ໃຫ້ລາວເປັນເມຍລູກຊາຍຂອງນາຍເຈົ້າ ຕາມທີ່ພະເຢໂຫວາບອກ.” 52 ເມື່ອຄົນຮັບໃຊ້ຂອງອັບຣາຮາມໄດ້ຍິນທີ່ເຂົາເຈົ້າເວົ້າ ລາວກໍໝູບໜ້າລົງພື້ນຂອບໃຈພະເຢໂຫວາ. 53 ລາວເອົາເຄື່ອງປະດັບທີ່ເປັນເງິນເປັນຄຳແລະເຄື່ອງນຸ່ງໃຫ້ເຣເບກາ ແລະເອົາສິ່ງທີ່ມີຄ່າອື່ນໆໃຫ້ອ້າຍກັບແມ່ຂອງລາວ. 54 ຫຼັງຈາກນັ້ນ ຄົນຮັບໃຊ້ກັບຄົນທີ່ມານຳລາວກໍກິນເຂົ້າແລງແລະນອນຄ້າງຄືນຢູ່ຫັ້ນ.
ເມື່ອຕື່ນເຊົ້າມາລາວກໍບອກວ່າ: “ຂ້ອຍຂໍກັບເມືອຫານາຍຂອງຂ້ອຍກ່ອນເດີ້.” 55 ແຕ່ອ້າຍກັບແມ່ຂອງເຣເບກາເວົ້າວ່າ: “ຂໍໃຫ້ລາວຢູ່ນີ້ກັບພວກເຮົາຈັກ 10 ມື້ກ່ອນແລ້ວຈຶ່ງໄປ.” 56 ແຕ່ຄົນຮັບໃຊ້ເວົ້າວ່າ: “ຢ່າໃຫ້ຂ້ອຍຢູ່ຕໍ່ເລີຍ. ພວກເຮົາກໍເຫັນແລ້ວວ່າພະເຢໂຫວາອວຍພອນວຽກງານຂອງຂ້ອຍ. ຂໍໃຫ້ຂ້ອຍກັບເມືອເພື່ອຂ້ອຍຈະໄດ້ໄປຫານາຍຂອງຂ້ອຍ.” 57 ເຂົາເຈົ້າເລີຍເວົ້າວ່າ: “ໃຫ້ພວກເຮົາເອີ້ນເຣເບກາມາຖາມເບິ່ງກ່ອນ.” 58 ເຂົາເຈົ້າເອີ້ນເຣເບກາມາແລະຖາມວ່າ: “ລູກຊິໄປກັບຜູ້ຊາຍຄົນນີ້ບໍ?” ລາວຕອບວ່າ: “ໂດຍ ລູກຈະໄປ.”
59 ແລ້ວເຂົາເຈົ້າກໍສົ່ງເຣເບກາ+ກັບຄົນເບິ່ງແຍງລາວ*+ ແລະຄົນຮັບໃຊ້ຂອງອັບຣາຮາມກັບຄົນທີ່ມານຳລາວກັບເມືອ. 60 ເຂົາເຈົ້າອວຍພອນເຣເບກາວ່າ: “ຂໍໃຫ້ນ້ອງມີລູກເຕັມບ້ານມີຫຼານເຕັມເມືອງ ແລະໃຫ້ລູກຫຼານຂອງນ້ອງເອົາຊະນະເມືອງຕ່າງໆຂອງສັດຕູໄດ້.”+ 61 ຈາກນັ້ນ ເຣເບກາກັບສາວໃຊ້ໄດ້ຂີ່ອູດນຳຫຼັງຄົນຮັບໃຊ້ຂອງອັບຣາຮາມໄປ ແລ້ວເຂົາເຈົ້າກໍອອກເດີນທາງ.
62 ຕອນນີ້ອີຊາກຫາກໍມາຈາກທາງທີ່ຈະໄປເບເອລາຄາຍຣອຍ+ ເພາະລາວອາໄສຢູ່ແຜ່ນດິນເນເກັບ.*+ 63 ຕອນແລງລາວຍ່າງໄປທົ່ງຫຍ້າເພື່ອຈະຄິດຕຶກຕອງ+ ເມື່ອລາວຫຼຽວໜ້າຂຶ້ນກໍເຫັນຂະບວນອູດກຳລັງມາ. 64 ເມື່ອເຣເບກາເງີຍໜ້າຂຶ້ນກໍເຫັນອີຊາກແລະລາວກໍຟ້າວລົງຈາກຫຼັງອູດ. 65 ລາວຖາມຄົນຮັບໃຊ້ຂອງອັບຣາຮາມວ່າ: “ຜູ້ຊາຍທີ່ຢູ່ທົ່ງຫຍ້າກຳລັງຍ່າງມາຫາເຮົາ ລາວແມ່ນໃຜ?” ຄົນຮັບໃຊ້ຕອບວ່າ: “ລາວແມ່ນນາຍຂອງຂ້ອຍ.” ແລ້ວເຣເບກາກໍດຶງຜ້າມາປົກຫົວ. 66 ຄົນຮັບໃຊ້ບອກທຸກສິ່ງທຸກຢ່າງທີ່ລາວໄດ້ເຮັດໃຫ້ອີຊາກຮູ້. 67 ອີຊາກກໍພາເຣເບກາເຂົ້າໄປໃນເຕັ້ນຂອງຊາຣາແມ່ຂອງລາວ.+ ນີ້ສະແດງວ່າລາວຮັບເຣເບກາເປັນເມຍ. ອີຊາກຮັກເຣເບກາຫຼາຍ+ແລະລາວກໍມີກຳລັງໃຈຂຶ້ນຫຼັງຈາກທີ່ເສຍແມ່ໄປ.+