ກະສັດສະບັບທີສອງ
2 ເມື່ອພະເຢໂຫວາໃກ້ຈະໃຫ້ລົມພາຍຸພັດເອົາເອລີຢາ+ຂຶ້ນໄປເທິງຟ້າ+ ເອລີຢາກັບເອລີຊາ+ໄດ້ອອກຈາກເມືອງກິນການ.+ 2 ເອລີຢາບອກເອລີຊາວ່າ: “ໃຫ້ເຈົ້າຢູ່ນີ້ ເພາະພະເຢໂຫວາບອກຂ້ອຍໃຫ້ໄປເມືອງເບເທນ.” ແຕ່ເອລີຊາບອກວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ແລະຕໍ່ທ່ານວ່າ ຂ້ອຍຈະໄປນຳທ່ານ.” ແລ້ວເຂົາເຈົ້າກໍໄປເມືອງເບເທນນຳກັນ.+ 3 ລູກຫຼານຂອງພວກຜູ້ພະຍາກອນ*ໃນເມືອງເບເທນໄດ້ອອກມາຫາເອລີຊາແລະຖາມລາວວ່າ: “ເຈົ້າຮູ້ບໍ່ວ່າມື້ນີ້ພະເຢໂຫວາຈະເອົາເຈົ້ານາຍຂອງເຈົ້າໄປ?”+ ລາວຕອບວ່າ: “ຂ້ອຍຮູ້ແລ້ວ. ບໍ່ຕ້ອງເວົ້າເຖິງເລື່ອງນີ້.”
4 ຕໍ່ມາ ເອລີຢາບອກເອລີຊາວ່າ: “ເອລີຊາ ໃຫ້ເຈົ້າຢູ່ນີ້ ເພາະພະເຢໂຫວາບອກຂ້ອຍໃຫ້ໄປເມືອງເຢຣິໂກ.”+ ແຕ່ເອລີຊາບອກວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ແລະຕໍ່ທ່ານວ່າ ຂ້ອຍຈະໄປນຳທ່ານ.” ແລ້ວເຂົາເຈົ້າກໍໄປເມືອງເຢຣິໂກນຳກັນ. 5 ແລ້ວລູກຫຼານຂອງພວກຜູ້ພະຍາກອນໃນເມືອງເຢຣິໂກໄດ້ມາຫາເອລີຊາແລະຖາມລາວວ່າ: “ເຈົ້າຮູ້ບໍ່ວ່າມື້ນີ້ພະເຢໂຫວາຈະເອົາເຈົ້ານາຍຂອງເຈົ້າໄປ?” ລາວຕອບວ່າ: “ຂ້ອຍຮູ້ແລ້ວ. ບໍ່ຕ້ອງເວົ້າເຖິງເລື່ອງນີ້.”
6 ຈາກນັ້ນ ເອລີຢາບອກເອລີຊາວ່າ: “ໃຫ້ເຈົ້າຢູ່ນີ້ ເພາະພະເຢໂຫວາບອກຂ້ອຍໃຫ້ໄປແມ່ນ້ຳຈໍແດນ.” ແຕ່ເອລີຊາບອກວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ແລະຕໍ່ທ່ານວ່າ ຂ້ອຍຈະໄປນຳທ່ານ.” ແລ້ວເຂົາເຈົ້າກໍໄປນຳກັນ. 7 ມີລູກຫຼານ 50 ຄົນຂອງພວກຜູ້ພະຍາກອນນຳເຂົາເຈົ້າໄປແລະຢືນເບິ່ງຢູ່ໄກໆຕອນທີ່ເອລີຢາກັບເອລີຊາຢືນຢູ່ແຄມແມ່ນ້ຳຈໍແດນ. 8 ຈາກນັ້ນ ເອລີຢາກໍເອົາຊຸດຜູ້ພະຍາກອນ+ຂອງລາວມາກໍ້ເຂົ້າແລະຟາດໃສ່ນ້ຳ ແລ້ວນ້ຳກໍແຍກອອກຈາກກັນ ເຂົາເຈົ້າຈຶ່ງຍ່າງເທິງດິນແຫ້ງຂ້າມໄປອີກຟາກໜຶ່ງ.+
9 ເມື່ອເຂົາເຈົ້າຂ້າມໄປແລ້ວ ເອລີຢາຖາມເອລີຊາວ່າ: “ກ່ອນທີ່ພະເຈົ້າຈະເອົາຂ້ອຍໄປ ເຈົ້າຢາກໃຫ້ຂ້ອຍເຮັດຫຍັງໃຫ້ເຈົ້າບໍ?” ເອລີຊາຕອບວ່າ: “ຂ້ອຍຂໍພະລັງຂອງພະເຈົ້າທີ່ຢູ່ນຳທ່ານ 2 ເທົ່າ+ໄດ້ບໍ່?”+ 10 ເອລີຢາຕອບວ່າ: “ເຈົ້າຄືຂໍສິ່ງທີ່ຍາກແທ້. ເອົາຈັ່ງຊີ້ ຖ້າເຈົ້າເຫັນຕອນທີ່ພະເຈົ້າເອົາຂ້ອຍໄປ ເຈົ້າກໍຈະໄດ້ຕາມທີ່ເຈົ້າຂໍ. ແຕ່ຖ້າບໍ່ເຫັນ ເຈົ້າກໍຈະບໍ່ໄດ້.”
11 ຕອນທີ່ເຂົາເຈົ້າກຳລັງຍ່າງລົມກັນ ທັນໃດນັ້ນກໍມີຝູງມ້າແກ່ລົດມ້າ+ຄັນໜຶ່ງທີ່ເປັນແປວໄຟມາແຊກກາງເຂົາເຈົ້າ 2 ຄົນ ແລ້ວລົມພາຍຸກໍພັດເອົາເອລີຢາຂຶ້ນໄປເທິງຟ້າ.+ 12 ຕອນທີ່ເອລີຊາກຳລັງແນມເບິ່ງ ລາວກໍຮ້ອງວ່າ: “ພໍ່ ພໍ່! ຂ້ອຍເຫັນມ້າກັບລົດມ້າຂອງອິດສະຣາເອນ.”*+ ເມື່ອບໍ່ເຫັນເອລີຢາແລ້ວ ລາວກໍຈີກເສື້ອຂອງໂຕເອງຂາດເປັນ 2 ຕ່ອນ.+ 13 ຈາກນັ້ນ ເອລີຊາໄດ້ຈັບເອົາຊຸດຜູ້ພະຍາກອນ+ຂອງເອລີຢາທີ່ຕົກຢູ່ຂຶ້ນມາ ແລ້ວກໍກັບໄປຢືນຢູ່ແຄມແມ່ນ້ຳຈໍແດນ. 14 ເອລີຊາໄດ້ເອົາຊຸດຜູ້ພະຍາກອນຂອງເອລີຢາຟາດໃສ່ນ້ຳແລະເວົ້າວ່າ: “ພະເຢໂຫວາພະເຈົ້າຂອງເອລີຢາຢູ່ໃສ?” ເມື່ອລາວຟາດນ້ຳ ນ້ຳກໍແຍກອອກຈາກກັນ ແລ້ວເອລີຊາກໍຍ່າງຂ້າມໄປອີກຟາກໜຶ່ງ.+
15 ເມື່ອລູກຫຼານຂອງພວກຜູ້ພະຍາກອນໃນເມືອງເຢຣິໂກເຫັນເອລີຊາແຕ່ໄກ ເຂົາເຈົ້າກໍເວົ້າວ່າ: “ພະລັງຂອງພະເຈົ້າທີ່ຢູ່ກັບເອລີຢາໄດ້ມາຢູ່ກັບເອລີຊາແລ້ວ.”+ ເຂົາເຈົ້າຈຶ່ງໄປຫາເອລີຊາແລະໝູບໜ້າລົງພື້ນເພື່ອສະແດງຄວາມນັບຖືລາວ. 16 ເຂົາເຈົ້າເວົ້າກັບເອລີຊາວ່າ: “ພວກເຮົາມີ 50 ຄົນທີ່ເປັນຄົນເກັ່ງ. ຂໍໃຫ້ເຂົາເຈົ້າໄປຊອກຫາເຈົ້ານາຍຂອງທ່ານ. ພະລັງ*ຂອງພະເຢໂຫວາອາດຈະເອົາລາວໄປໄວ້ຢູ່ພູຫຼືຮ່ອມພູບ່ອນໃດບ່ອນໜຶ່ງ.”+ ແຕ່ເອລີຊາບອກວ່າ: “ບໍ່ຕ້ອງໄປຊອກຫາລາວ.” 17 ເຂົາເຈົ້າຂໍຮ້ອງເອລີຊາເອົາແທ້ເອົາວ່າຈົນລາວຮູ້ສຶກລຳບາກໃຈ. ເອລີຊາຈຶ່ງບອກວ່າ: “ໄປຊອກກະໄດ້.” ແລ້ວເຂົາເຈົ້າກໍໃຫ້ 50 ຄົນນັ້ນໄປຊອກຫາເອລີຢາ 3 ມື້ ແຕ່ກໍບໍ່ເຫັນ. 18 ແລ້ວເຂົາເຈົ້າກໍກັບມາຫາເອລີຊາ ເຊິ່ງຕອນນັ້ນລາວຢູ່ເມືອງເຢຣິໂກ.+ ເອລີຊາເວົ້າກັບເຂົາເຈົ້າວ່າ: “ຂ້ອຍບອກແລ້ວວ່າບໍ່ຕ້ອງໄປຊອກຫາລາວ.”
19 ຕໍ່ມາ ຄົນໃນເມືອງນັ້ນເວົ້າກັບເອລີຊາວ່າ: “ທ່ານເອີ້ຍ ທ່ານກໍເຫັນວ່າເມືອງນີ້ຕັ້ງຢູ່ຈຸດທີ່ດີ+ ແຕ່ນ້ຳຢູ່ນີ້ໃຊ້ບໍ່ໄດ້ແລະດິນກໍປູກຫຍັງບໍ່ຂຶ້ນ.”* 20 ເອລີຊາຈຶ່ງບອກວ່າ: “ເອົາເກືອໃສ່ຖ້ວຍນ້ອຍໃໝ່ໆໃບໜຶ່ງມາໃຫ້ຂ້ອຍ.” ເຂົາເຈົ້າກໍເຮັດຕາມທີ່ລາວບອກ. 21 ຈາກນັ້ນ ລາວກໍໄປບ່ອນທີ່ເປັນຕົ້ນນ້ຳແລ້ວເອົາເກືອຖອກໃສ່ຫັ້ນ+ແລະເວົ້າວ່າ: “ພະເຢໂຫວາບອກວ່າ ‘ເຮົາເຮັດໃຫ້ນ້ຳນີ້ສະອາດແລະໃຊ້ໄດ້ແລ້ວ. ນ້ຳນີ້ຈະບໍ່ເຮັດໃຫ້ໃຜຕາຍຫຼືເປັນໝັນ*ອີກຕໍ່ໄປ.’” 22 ນ້ຳນັ້ນກໍສະອາດແລະໃຊ້ໄດ້ຈົນຮອດທຸກມື້ນີ້ຕາມທີ່ເອລີຊາເວົ້າ.
23 ເອລີຊາອອກຈາກເມືອງເຢຣິໂກຂຶ້ນໄປເມືອງເບເທນ. ຕອນທີ່ລາວກຳລັງເດີນທາງ ມີພວກເດັກນ້ອຍຜູ້ຊາຍອອກມາຈາກເມືອງແລະເວົ້າໃຫ້ລາວບໍ່ເຊົາ+ວ່າ: “ອີ່ຕາຫົວລ້ານໜີແມະ! ໜີແມະອີ່ຕາຫົວລ້ານ!” 24 ລາວຈຶ່ງປິ່ນໜ້າໄປເບິ່ງພວກເດັກນ້ອຍນັ້ນແລະສາບແຊ່ງເຂົາເຈົ້າໃນນາມຂອງພະເຢໂຫວາ ແລ້ວກໍມີໝີແມ່+ 2 ໂຕອອກມາຈາກປ່າແລະຈີກເດັກນ້ອຍ 42 ຄົນນັ້ນເປັນຕ່ອນໆ.+ 25 ເອລີຊາເດີນທາງຈາກຫັ້ນໄປພູກາເມນ+ຕໍ່ ແລ້ວກໍກັບມາເມືອງຊາມາເຣຍ.