ເຢເຣມີຢາ
39 ໃນປີທີ 10 ຂອງເດືອນທີ 9 ທີ່ເຊເດກີຢາເປັນກະສັດປົກຄອງຢູດາ ເນບູກາດເນັດຊາ*ກະສັດຂອງບາບີໂລນໄດ້ຍົກກອງທັບມາຕໍ່ສູ້ເມືອງເຢຣູຊາເລັມແລະລ້ອມເມືອງນີ້ໄວ້.+
2 ໃນວັນທີ 9 ເດືອນທີ 4 ຂອງປີທີ 11 ທີ່ເຊເດກີຢາເປັນກະສັດປົກຄອງ ເຂົາເຈົ້າກໍທຳລາຍກຳແພງເມືອງເຂົ້າມາໄດ້.+ 3 ພວກເຈົ້ານາຍຂອງກະສັດບາບີໂລນກໍໄດ້ເຂົ້າມາໃນເມືອງແລະນັ່ງຢູ່ປະຕູກາງ.+ ຄົນເຫຼົ່ານັ້ນມີເນການຊາເຣັດເຊທີ່ມີຕຳແໜ່ງເປັນສຳກາ ເນໂບສາເສກີມທີ່ມີຕຳແໜ່ງເປັນຣັບສາຣິດ* ເນການຊາເຣັດເຊທີ່ມີຕຳແໜ່ງເປັນຣັບມັກ* ແລະເຈົ້ານາຍຄົນອື່ນໆທັງໝົດຂອງກະສັດບາບີໂລນ.
4 ເມື່ອເຊເດກີຢາກະສັດຂອງຢູດາແລະທະຫານທັງໝົດເຫັນພວກສັດຕູ ເຂົາເຈົ້າກໍພາກັນໜີ.+ ເຂົາເຈົ້າອອກຈາກເມືອງໄປຕອນກາງຄືນທາງປະຕູຂອງກຳແພງສອງຊັ້ນທີ່ຢູ່ໃກ້ສວນຂອງກະສັດແລະໜີໄປທາງອາຣາບາ.+ 5 ແຕ່ກອງທັບຂອງພວກການເດອາກໍໄລ່ນຳໄປ. ເຂົາເຈົ້ານຳເຊເດກີຢາທັນຢູ່ບ່ອນກັນດານເຢຣິໂກ.+ ເຂົາເຈົ້າຈັບລາວໄປໃຫ້ເນບູກາດເນັດຊາກະສັດຂອງບາບີໂລນຢູ່ຣິບລາ+ໃນແຜ່ນດິນຮາມັດ+ ແລ້ວເຊເດກີຢາກໍຖືກຕັດສິນລົງໂທດຢູ່ຫັ້ນ. 6 ກະສັດບາບີໂລນໄດ້ສັ່ງຂ້າລູກຊາຍຂອງເຊເດກີຢາຕໍ່ໜ້າຕໍ່ຕາລາວຢູ່ຣິບລາແລະຍັງໄດ້ສັ່ງຂ້າພວກເຈົ້າເມືອງຂອງຢູດາທັງໝົດນຳ.+ 7 ຈາກນັ້ນ ກະສັດບາບີໂລນກໍເຮັດໃຫ້ເຊເດກີຢາຕາບອດແລະຈັບລາວລ່າມໂສ້ທອງແດງໄປບາບີໂລນ.+
8 ພວກການເດອາຈູດວັງຂອງກະສັດ ຈູດເຮືອນຂອງປະຊາຊົນຖິ້ມ+ ແລະທຳລາຍກຳແພງເມືອງເຢຣູຊາເລັມນຳ.+ 9 ເນບູຊາຣາດານ+ທີ່ເປັນຫົວໜ້າທະຫານປ້ອງກັນໂຕກະສັດໄດ້ຈັບຄົນທີ່ເຫຼືອຢູ່ໃນເມືອງ ຄົນທີ່ໜີໄປຫາລາວ ແລະຄົນທັງໝົດທີ່ເຫຼືອໄປເປັນຊະເລີຍຢູ່ບາບີໂລນ.
10 ແຕ່ເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດໄດ້ຈົ່ງຄົນທີ່ທຸກທີ່ສຸດບາງຄົນໄວ້ໃນແຜ່ນດິນຢູດາ. ເຂົາເຈົ້າແມ່ນຄົນທີ່ບໍ່ມີຫຍັງເລີຍ. ໃນມື້ນັ້ນ ລາວເອົາສວນໝາກລະແຊັງແລະທົ່ງນາໃຫ້ເຂົາເຈົ້າເບິ່ງແຍງ.+
11 ແລ້ວເນບູກາດເນັດຊາກະສັດຂອງບາບີໂລນກໍສັ່ງເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດເລື່ອງເຢເຣມີຢາວ່າ: 12 “ໃຫ້ເຈົ້າພາລາວໄປແລະເບິ່ງແຍງລາວ. ຢ່າທຳຮ້າຍລາວແລະຖ້າລາວຂໍຫຍັງກໍເອົາໃຫ້ລາວໂລດ.”+
13 ແລ້ວເນບູຊາຣາດານທີ່ເປັນຫົວໜ້າທະຫານປ້ອງກັນໂຕກະສັດ ເນບູຊັດບານທີ່ມີຕຳແໜ່ງເປັນຣັບສາຣິດ* ເນການຊາເຣັດເຊທີ່ມີຕຳແໜ່ງເປັນຣັບມັກ ແລະພວກຜູ້ຊາຍທັງໝົດທີ່ເປັນສຳຄັນຂອງກະສັດບາບີໂລນກໍສົ່ງຄົນໄປ 14 ພາເຢເຣມີຢາອອກມາຈາກເດີ່ນທະຫານປ້ອງກັນໂຕກະສັດ+ ແລະພາລາວໄປຫາເກດາລີຢາ+ລູກຊາຍຂອງອາຮີກາມ+ຫຼານຊາຍຂອງຊາຟານ+ເພື່ອໃຫ້ໄປຢູ່ເຮືອນຂອງລາວ. ແລ້ວເຢເຣມີຢາກໍຢູ່ກັບຄົນເຫຼົ່ານັ້ນ.
15 ຕອນທີ່ເຢເຣມີຢາຖືກກັກໂຕຢູ່ເດີ່ນທະຫານປ້ອງກັນໂຕກະສັດ+ ພະເຢໂຫວາໄດ້ມາເວົ້າກັບລາວວ່າ: 16 “ໃຫ້ເຈົ້າໄປບອກເອເບັດເມເລັກ+ຄົນເອທິໂອເປຍວ່າ ‘ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ “ເຮົາຈະເຮັດໃຫ້ເມືອງນີ້ເຈິຄວາມຈິບຫາຍແທນທີ່ຈະເຈິສິ່ງດີໆຄືກັບທີ່ເຮົາເຄີຍບອກໄວ້ ແລະໃນມື້ນັ້ນເຈົ້າຈະໄດ້ເຫັນມັນເກີດຂຶ້ນ.”’
17 ພະເຢໂຫວາບອກວ່າ ‘ແຕ່ໃນມື້ນັ້ນເຮົາຈະຊ່ວຍເຈົ້າໃຫ້ລອດ ແລະເຈົ້າຈະບໍ່ຖືກສົ່ງໂຕໃຫ້ຄົນທີ່ເຈົ້າຢ້ານ.’
18 ພະເຢໂຫວາບອກອີກວ່າ ‘ເຮົາຈະເຮັດໃຫ້ເຈົ້າມີທາງໜີໄດ້ແນ່ນອນແລະເຈົ້າຈະບໍ່ຖືກຂ້າດ້ວຍດາບ. ເຈົ້າຈະລອດຊີວິດ+ຍ້ອນເຈົ້າໄວ້ໃຈເຮົາ.’”+