ເຢເຣມີຢາ
26 ຕອນທີ່ກະສັດເຢໂຮຢາກີມ+ລູກຊາຍຂອງໂຢສີຢາເລີ່ມປົກຄອງຢູດາ ພະເຢໂຫວາໄດ້ເວົ້າກັບເຢເຣມີຢາ. 2 “ພະເຢໂຫວາບອກວ່າ ‘ໃຫ້ເຈົ້າໄປຢືນຢູ່ເດີ່ນວິຫານຂອງພະເຢໂຫວາແລະເວົ້າກັບ*ຄົນໃນເມືອງຕ່າງໆຂອງຢູດາທີ່ມານະມັດສະການ*ຢູ່ວິຫານຂອງພະເຢໂຫວາ. ໃຫ້ເຈົ້າບອກເຂົາເຈົ້າທຸກສິ່ງທີ່ເຮົາສັ່ງເຈົ້າ ຢ່າໃຫ້ຂາດແມ່ນແຕ່ຄຳດຽວ. 3 ບາງເທື່ອເຂົາເຈົ້າຈະຟັງແລະເຊົາເຮັດຊົ່ວ ແລ້ວເຮົາຈະປ່ຽນໃຈ*ແລະບໍ່ເຮັດໃຫ້ເຂົາເຈົ້າເຈິຄວາມຈິບຫາຍຄືກັບທີ່ເຮົາໄດ້ຕັ້ງໃຈໄວ້ຍ້ອນເຂົາເຈົ້າເຮັດຊົ່ວ.+ 4 ໃຫ້ເຈົ້າໄປບອກເຂົາເຈົ້າວ່າ “ພະເຢໂຫວາບອກວ່າ ‘ຖ້າພວກເຈົ້າບໍ່ເຊື່ອຟັງເຮົາ ບໍ່ເຮັດຕາມກົດໝາຍ*ທີ່ເຮົາໃຫ້ພວກເຈົ້າ 5 ແລະບໍ່ຟັງຄຳເວົ້າຂອງພວກຜູ້ພະຍາກອນທີ່ເປັນຜູ້ຮັບໃຊ້ຂອງເຮົາ ເຊິ່ງເຮົາໄດ້ສົ່ງມາບອກພວກເຈົ້າເທື່ອແລ້ວເທື່ອອີກ*+ 6 ເຮົາຈະປະຖິ້ມວິຫານຫຼັງນີ້ຄືກັບທີ່ເຮົາເຄີຍຖິ້ມຊີໂລ+ແລະເຮົາຈະເຮັດໃຫ້ຊາດຕ່າງໆທີ່ຢູ່ໃນໂລກນີ້ສາບແຊ່ງເມືອງນີ້.’”’”+
7 ພວກປະໂລຫິດ ພວກຜູ້ພະຍາກອນ ແລະປະຊາຊົນທັງໝົດກໍໄດ້ຍິນສິ່ງທີ່ເຢເຣມີຢາເວົ້າໃນວິຫານຂອງພະເຢໂຫວາ.+ 8 ເມື່ອເຢເຣມີຢາເວົ້າທຸກສິ່ງທີ່ພະເຢໂຫວາສັ່ງໃຫ້ລາວເວົ້າກັບປະຊາຊົນຈົບແລ້ວ ພວກປະໂລຫິດ ພວກຜູ້ພະຍາກອນ ແລະປະຊາຊົນທຸກຄົນກໍຈັບເຢເຣມີຢາໄວ້ ແລ້ວເວົ້າກັບລາວວ່າ: “ເຈົ້າຕາຍແທ້! 9 ເປັນຫຍັງເຈົ້າຈຶ່ງພະຍາກອນໂດຍໃຊ້ຊື່ຂອງພະເຢໂຫວາແລະເວົ້າວ່າ ‘ວິຫານນີ້ຈະເປັນຄືກັບຊີໂລ ແລະເມືອງນີ້ຈະຮ້າງເປົ່າແລະບໍ່ມີຄົນອາໄສຢູ່’?” ແລ້ວປະຊາຊົນກໍພາກັນມາລ້ອມເຢເຣມີຢາໄວ້ຢູ່ວິຫານຂອງພະເຢໂຫວາ.
10 ເມື່ອພວກເຈົ້ານາຍຂອງຢູດາໄດ້ຍິນເລື່ອງນີ້ ເຂົາເຈົ້າກໍອອກຈາກວັງຂອງກະສັດແລະມາວິຫານຂອງພະເຢໂຫວາ. ແລ້ວນັ່ງຢູ່ທາງເຂົ້າປະຕູໃໝ່ຢູ່ວິຫານຂອງພະເຢໂຫວາ.+ 11 ພວກປະໂລຫິດກັບພວກຜູ້ພະຍາກອນເວົ້າກັບພວກເຈົ້ານາຍແລະປະຊາຊົນທັງໝົດວ່າ: “ຜູ້ຊາຍຄົນນີ້ສົມຄວນຕາຍ+ຍ້ອນລາວພະຍາກອນວ່າເມືອງນີ້ຈະຈິບຫາຍ. ພວກເຈົ້າກໍໄດ້ຍິນກັບຫູຂອງໂຕເອງແລ້ວຕົ໋ວ.”+
12 ເຢເຣມີຢາຈຶ່ງເວົ້າກັບພວກເຈົ້ານາຍແລະປະຊາຊົນທັງໝົດວ່າ: “ພະເຢໂຫວາເປັນຜູ້ສົ່ງຂ້ອຍມາພະຍາກອນເລື່ອງຄວາມຈິບຫາຍຂອງວິຫານຫຼັງນີ້ແລະຂອງເມືອງນີ້ຄືກັບທີ່ພວກເຈົ້າໄດ້ຍິນແລ້ວ.+ 13 ບັດນີ້ ໃຫ້ພວກເຈົ້າປ່ຽນວິທີໃຊ້ຊີວິດແລະການກະທຳຂອງໂຕເອງ ແລະໃຫ້ເຊື່ອຟັງພະເຢໂຫວາພະເຈົ້າຂອງພວກເຈົ້າ. ແລ້ວພະເຢໂຫວາຈະປ່ຽນໃຈບໍ່ໃຫ້ພວກເຈົ້າເຈິຄວາມຈິບຫາຍຄືກັບທີ່ເພິ່ນໄດ້ບອກໄວ້.+ 14 ແຕ່ຕອນນີ້ ຂ້ອຍຢູ່ໃນມືຂອງພວກເຈົ້າແລ້ວ. ພວກເຈົ້າຢາກເຮັດຫຍັງກັບຂ້ອຍກໍເຮັດໂລດ. 15 ແຕ່ຂໍໃຫ້ພວກເຈົ້າຮູ້ໄວ້ເດີ້ວ່າຖ້າພວກເຈົ້າຂ້າຂ້ອຍກໍສ່ຳກັບວ່າພວກເຈົ້າ ຄົນໃນເມືອງນີ້ ແລະເມືອງນີ້ໄດ້ຂ້າຄົນທີ່ບໍ່ມີຄວາມຜິດ. ຍ້ອນແທ້ໆແລ້ວ ພະເຢໂຫວາໄດ້ສົ່ງຂ້ອຍໃຫ້ມາບອກເລື່ອງເຫຼົ່ານີ້ກັບພວກເຈົ້າ.”
16 ພວກເຈົ້ານາຍກັບປະຊາຊົນທັງໝົດຈຶ່ງເວົ້າກັບພວກປະໂລຫິດແລະພວກຜູ້ພະຍາກອນວ່າ: “ຜູ້ຊາຍຄົນນີ້ບໍ່ສົມຄວນຕາຍ ຍ້ອນລາວເວົ້າກັບພວກເຮົາໃນຖານະຕົວແທນ*ຂອງພະເຢໂຫວາພະເຈົ້າຂອງພວກເຮົາ.”
17 ຈາກນັ້ນ ພວກຜູ້ນຳປະຊາຊົນບາງຄົນໄດ້ລຸກຂຶ້ນ ແລ້ວເວົ້າກັບປະຊາຊົນທີ່ຢູ່ຫັ້ນວ່າ: 18 “ມີກາ+ຄົນໂມເຣເຊັດກັດເຄີຍພະຍາກອນໄວ້ໃນສະໄໝທີ່ກະສັດເຮເຊກີຢາ+ປົກຄອງຢູດາ. ລາວໄດ້ເວົ້າກັບຄົນຢູດາທັງໝົດວ່າ ‘ພະເຢໂຫວາຜູ້ບັນຊາການກອງທັບບອກວ່າ
“ຊີໂອນຈະຖືກໄຖຄືກັບທົ່ງນາ
ເຢຣູຊາເລັມຈະກາຍເປັນກອງຊາກຫັກພັງ+
ແລະພູທີ່ວິຫານຕັ້ງຢູ່ຈະກາຍເປັນປ່າທີ່ຮົກໆ.”’+
19 ຕອນນັ້ນ ເຮເຊກີຢາກະສັດຂອງຢູດາກັບຄົນຢູດາໄດ້ຂ້າລາວບໍ? ກະສັດໄດ້ຢ້ານຢຳພະເຢໂຫວາແລະໄດ້ຂໍຮ້ອງພະເຢໂຫວາເພື່ອທີ່ພະເຢໂຫວາຈະປ່ຽນໃຈ ບໍ່ເຮັດໃຫ້ເຂົາເຈົ້າເຈິຄວາມຈິບຫາຍຄືກັບທີ່ເພິ່ນເຄີຍເວົ້າໄວ້ບໍ່ແມ່ນບໍ?+ ຖ້າພວກເຮົາເຮັດແບບນີ້* ພວກເຮົາກໍຈະເຮັດໃຫ້ໂຕເອງເຈິຄວາມຈິບຫາຍຄັ້ງໃຫຍ່.
20 ຜູ້ຊາຍອີກຄົນໜຶ່ງຊື່ອຸຣີຢາທີ່ເປັນລູກຊາຍຂອງເຊມາຢາຄົນກີຣິອາດເຢອາຣີມ+ກໍເຄີຍພະຍາກອນໂດຍໃຊ້ຊື່ຂອງພະເຢໂຫວາ. ລາວໄດ້ພະຍາກອນກ່ຽວກັບເມືອງນີ້ແລະແຜ່ນດິນນີ້ຄ້າຍຄືກັບສິ່ງທີ່ເຢເຣມີຢາໄດ້ເວົ້າ. 21 ກະສັດເຢໂຮຢາກີມ+ ພວກທະຫານທີ່ເກັ່ງໆທັງໝົດ ແລະພວກເຈົ້ານາຍທັງໝົດກໍໄດ້ຍິນຄຳພະຍາກອນນັ້ນ ກະສັດຈຶ່ງຊອກວິທີຂ້າອຸຣີຢາ.+ ເມື່ອອຸຣີຢາຮູ້ເລື່ອງນີ້ ລາວກໍຢ້ານຫຼາຍແລະໜີໄປເອຢິບທັນທີ. 22 ຈາກນັ້ນ ກະສັດເຢໂຮຢາກີມຈຶ່ງສົ່ງເອນນາທານ+ລູກຊາຍຂອງອັກໂບແລະຄົນອື່ນໆໄປເອຢິບ. 23 ເຂົາເຈົ້າຈັບອຸຣີຢາມາຈາກເອຢິບ ແລ້ວກໍເອົາລາວໄປໃຫ້ກະສັດເຢໂຮຢາກີມ. ກະສັດກໍຂ້າອຸຣີຢາດ້ວຍດາບ+ແລະໂຍນສົບຂອງລາວລົງໄປໃນບ່ອນຝັງສົບຂອງຄົນທຳມະດາ.”
24 ແຕ່ອາຮີກາມ+ລູກຊາຍຂອງຊາຟານ+ໄດ້ຊ່ວຍເຢເຣມີຢາໄວ້ ເຢເຣມີຢາຈຶ່ງບໍ່ຖືກສົ່ງໂຕໄປໃຫ້ປະຊາຊົນຂ້າ.+